Kanbiọ lẹ sọn Wehiatọ lẹ Dè
Eyin Klistiani de gbẹ́ asi etọn dai to dodonu he ma sọgbe hẹ Owe-wiwe lẹ ji bo wlealọ hẹ mẹdevo, nukun tẹwẹ agun lọ na yí do pọ́n alọwle hoho lọ po yọyọ lọ po?
To ninọmẹ enẹ mẹ, eyin sunnu lọ ko vọ́ alọwle, agun lọ na pọ́n kanṣiṣa alọwle hoho lọ tọn hlan di dehe ko yin kansánna, bo pọ́n alọwle yọyọ lọ di dehe sọgbe. Nado mọnukunnujẹ nuhewutu mí do wá tadona enẹ kọ̀n mẹ, mì gbọ mí ni gbadopọnna nuhe Jesu dọ gando gbẹdai po alọvivọwle po go.
Dile Matiu 19:9 dohia do, Jesu donù whẹwhinwhẹ́n Owe-wiwe tọn dopo gee he gán sánkanna kanṣiṣa alọwle tọn go. E dọmọ: “Mẹdepope he gbẹ́ asi etọn dai bọ e ma yin na whẹwhinwhẹ́n fẹnnuwiwa zanhẹmẹ tọn wutu, bo wlealọ hẹ devo, e deayọ.” Hogbe Jesu tọn lẹ plọn mí dọ, (1) fẹnnuwiwa zanhẹmẹ tọn wẹ yin whẹwhinwhẹ́n Owe-wiwe tọn dopo gee lọ nado basi gbẹdai bo sánkanna kanṣiṣa alọwle tọn, podọ (2) dọ sunnu de he gbẹ́ asi etọn dai matin whẹwhinwhẹ́n Owe-wiwe tọn deayọ. *
Be nuhe dọ Jesu te wẹ yindọ, eyin sunnu de doalọ to fẹnnuwiwa zanhẹmẹ tọn mẹ bo gbẹ́ asi etọn dai, Owe-wiwe kẹalọyi dọ e gán vọ́ alọwle wẹ ya? E ma yinmọ dandan. Eyin asu de deayọ, asi he yin homẹvọnọ lọ nọ basi dide eyin e na jona asu etọn kavi lala. Eyin e gbẹ́ nado jona ẹn bọ gbẹdai yin bibasi to osẹ́n-liho, yé omẹ awe lẹ vò nado vọ́ alọwle.
To alọ devo mẹ, alọwlemẹ homẹvọnọ lọ gán jlo vẹkuvẹku nado hẹn alọwle lọ dote bo gbọnmọ dali do ojlo lọ hia nado jona alọwlemẹ etọn. Amọ́, etẹwẹ lo eyin asu he deayọ lọ ma kọngbedopọ hẹ ojlo asi etọn tọn nado jona ẹn, bo yì basi gbẹdai to osẹ́n-liho? Na asi lọ jlo nado jona ẹn bo hẹn alọwle yetọn dote wutu, asu lọ ma na vò sọgbe hẹ Owe-wiwe nado vọ́ alọwle. Eyin asu lọ ma yin didesẹ sọn agun mẹ, amọ́ bo zindonukọn to nuyiwa etọn he jẹagọdo Owe-wiwe mẹ bosọ wlealọ hẹ mẹdevo, mahopọnna dọ e ma vò sọgbe hẹ Owe-wiwe nado wàmọ, e deayọ whladopo dogọ, podọ wedegbẹ́ whẹdida tọn nasọ sinai hẹ ẹ.—1 Kọl. 5:1, 2; 6:9, 10.
Eyin sunnu de he ma vò sọgbe hẹ Owe-wiwe vọ́ alọwle, nukun tẹwẹ agun lọ na yí do pọ́n alọwle hoho lọ po yọyọ lọ po? Be alọwle hoho lọ gbẹ́ sọgbe hẹ Owe-wiwe ya? Be alọwlemẹ homẹvọnọ lọ gán gbẹ́ basi dide eyin vlavo e na jona asu etọn hoho lọ kavi lala ya? Be agun lọ na pọ́n alọwle yọyọ ehe di ayọdide wẹ ya?
To dai, agun lọ nọ pọ́n alọwle yọyọ lọ hlan di ayọdide, dile e na dẹnsọ bọ alọwlemẹ homẹvọnọ lọ gbẹ́ togbẹ̀ bo ma ko vọ́ alọwle, bo masọ hùwhẹ fẹnnuwiwa zanhẹmẹ tọn. Amọ́, Jesu ma donù alọwlemẹ homẹvọnọ lọ go whenue e dọho gando gbẹdai po alọvivọwle po go. Kakatimọ, e dọ dọ sunnu he basi gbẹdai he ma sọgbe hẹ Owe-wiwe bo wlealọ hẹ mẹdevo, deayọ. To ninọmẹ enẹ mẹ, gbẹdai po alọvivọwle po he Jesu dọ dọ yé yin nudopolọ hẹ ayọdide, ko sánkanna kanṣiṣa alọwle tintan lọ tọn.
“Mẹdepope he gbẹ́ asi etọn dai bọ e ma yin na whẹwhinwhẹ́n fẹnnuwiwa zanhẹmẹ tọn wutu, bo wlealọ hẹ devo, e deayọ.” —Mat. 19:9
Eyin alọwlemẹ he hùwhẹ de basi gbẹdai bo vọ́ alọwle nado sánkanna kanṣiṣa alọwle tintan lọ tọn, alọwlemẹ homẹvọnọ lọ ma gán sọ basi nudide eyin vlavo e na jona asu etọn kavi lala ba. Enẹwutu, e ma hùwhẹ de, na e ma do to nudide he asu etọn hoho lọ basi mẹ wutu. Humọ, pọndohlan agun lọ tọn gando alọwle yọyọ lọ go, ma na sinai do ninọmẹ alọwlemẹ homẹvọnọ lọ tọn ji, vlavo e gbẹ́ togbẹ̀, ma ko vọ́ alọwle kavi ma hùwhẹ fẹnnuwiwa zanhẹmẹ tọn. *
To apajlẹ he go mí donù to aga lọ mẹ, asu lọ deayọ, ehe zọ́n bọ gbẹdai wá aimẹ. Etẹwẹ lo eyin asu lọ ma deayọ, amọ́ bo ka basi gbẹdai bosọ wlealọ hẹ mẹdevo? Kavi etẹwẹ lo eyin asu lọ ma doalọ to fẹnnuwiwa zanhẹmẹ tọn mẹ whẹpo do basi gbẹdai bo ka wá wàmọ to enẹgodo, bosọ wlealọ hẹ mẹdevo dile etlẹ yindọ asi lọ jlo nado jona ẹn? To ninọmẹ ehe lẹpo mẹ, gbẹdai po alọvivọwle po he yin nudopolọ hẹ ayọdide, na sánkanna kanṣiṣa alọwle tintan lọ tọn. Alọwle yọyọ lọ yin kanṣiṣa de he sọgbe to osẹ́n-liho. Atọ̀họ̀-Nuhihọ́ lọ Tọn 15 février 1980 tọn to Flansegbe mẹ, weda 32 dọmọ: “Todin he e ko vọ́ alọwle, e ma gán sọ lẹkọwa ninọmẹ hoho tọn etọn mẹ ba; na gbẹdai, ayọdide po alọvivọwle po ko sánkanna kanṣiṣa alọwle tintan lọ tọn wutu.”
Nukunnumọjẹnumẹ he yin vivọjlado ehe ma dekanpona wiwe-yinyin alọwle tọn kavi dohia dọ mí dona nọ yí nukunpẹvi do pọ́n ayọdide gba. Eyin sunnu de basi gbẹdai to dodonu he ma sọgbe hẹ Owe-wiwe ji bo wlealọ hẹ mẹdevo, mahopọnna dọ e ma vò sọgbe hẹ Owe-wiwe nado wàmọ, wedegbẹ́ whẹdida tọn de dona yin didoai, na e deayọ wutu. (E yindọ Klistiani de wẹ e vọ́ alọwle hẹ, wedegbẹ́ whẹdida tọn de dona sọ sinai hẹ ewọ lọsu, na e hùwhẹ fẹnnuwiwa zanhẹmẹ tọn wutu.) Dile etlẹ yindọ alọwle yọyọ lọ ma na yin pinpọnhlan di ayọdide, na owhe susu lẹ, sunnu lọ ma na pegan na lẹblanulọkẹyi sinsẹ̀nzọn tọn vonọtaun de to agun mẹ kakajẹ whenue vlẹko depope he nuṣiwa etọn hẹnwa na ko yin didesẹ, kavi kakajẹ whenue e na jẹna sisi mẹdevo lẹ tọn. Ehe na biọ dọ yè ni lẹnnupọndo ninọmẹ alọnu tọn alọwlemẹ homẹvọnọ lọ tọn ji, mẹhe gán ko yin nuyiwa hẹ po oklọ po. Podọ, ninọmẹ ovi flinflin he alọwlemẹ he hùwhẹ lọ gán ko jodo lẹ tọn dona yin nulẹnpọndeji ga.—Mal. 2:14-16.
Na kọdetọn vẹadi he gbẹdai he ma sọgbe hẹ Owe-wiwe po alọvivọwle po nọ hẹnwa lẹ wutu, Klistiani lẹ nọ gbọn nuyọnẹn dali wleawuna pọndohlan Jehovah tọn, bo nọ hẹn do ayiha mẹ dọ onú wiwe wẹ alọwle yin.—Yẹwh. 5:4, 5; Heb. 13:4.
^ Nado hẹn nulẹ bọawu, mí na dọ dọ asu lọ wẹ deayọ, bọ asi lọ yin homẹvọnọ. Amọ́, dile Malku 10:11, 12 dohia do, Jesu hẹn ẹn họnwun dọ ayinamẹ emitọn do whẹho ehe ji gando sunnu go bosọ gando yọnnu go ga.
^ Ehe yin vọjlado de gando nukunnumọjẹnumẹ mítọn dai tọn go. Nukunnumọjẹnumẹ mítọn dai tọn wẹ yindọ, alọwle mọnkọ na yin pinpọnhlan di ayọdide, dile e na dẹnsọ bọ alọwlemẹ homẹvọnọ lọ gbẹ́ pò togbẹ̀, ma ko vọ́ alọwle kavi ma hùwhẹ fẹnnuwiwa zanhẹmẹ tọn.
