NAWẸ e nọ ṣí na we eyin a mọ wekanhlanmẹ tulinamẹ tọn de sọn họntọn vivẹ́ de dè? Timoti mọ wekanhlanmẹ mọnkọ sọn apọsteli Paulu dè, yèdọ owe Biblu tọn lọ he mí nọ ylọ todin dọ 2 Timoti. Ayihaawe matin dọ Timoti na ko to jejeji nado dín fie to abọẹ de nado hia nue họntọn vivẹ́ etọn jlo na dọ na ẹn. Vlavo Timoti gán o to kinkanse ede dọ: ‘Nawẹ Paulu na ka te? Be e do ayinamẹ de na mi gando azọ́ndenamẹ ṣie lẹ go wẹ ya? Be wekanhlanmẹ ehe gán gọalọna mi to lizọnyizọn ṣie mẹ, bosọ gọalọna mẹdevo lẹ ga ya?’ Dile mí na mọ do, Timoti mọ gblọndo kanbiọ ehelẹ gọna devo lẹ tọn to wekanhlanmẹ họakuẹ ehe mẹ. Amọ́ todin, mì gbọ mí ni na ayidonugo nuagokun delẹ to ayinamẹ dagbe he tin to wekanhlanmẹ ehe mẹ lẹ mẹ.

Whenue Timoti jẹ wekanhlanmẹ ehe hia ji tlolo, e na ko flin lehe ewọ po Paulu po vẹ́ sọ. Po homẹhunhun po wẹ Paulu ylọ ẹ dọ “ovi yiwanna de.” (2 Tim. 1:2) Dile etlẹ yindọ Timoti na o do owhe 30 linlán whenue e mọ wekanhlanmẹ ehe to nudi owhe 65 W.M., e ko yin mẹho agun tọn numimọnọ de. E ko to zinzọnhẹ Paulu na owhe 10 linlán, podọ e na ko plọn nususu.

Timoti na ko mọ tuli yí taun nado sè dọ Paulu to akọndona whlepọn lẹ po nugbonọ-yinyin po. Gànmẹ wẹ Paulu te to Lomu bọ okú etọn ko sẹpọ. (2 Tim. 1:15, 16; 4:6-8) Timoti na o mọdọ Paulu yin adọgbotọ na e dọ dọ: “Yẹn zindonukọn nado to akọndona nulẹpo.” (2 Tim. 2:8-13) Taidi Timoti, apajlẹ akọndonanu ayidego tọn Paulu tọn gán na mílọsu huhlọn.

Paulu dotuhomẹna Timoti nado nọ pọ́n azọ́ndenamẹ etọn to sinsẹ̀nzọn Jiwheyẹwhe tọn mẹ hlan taidi nue họakuẹ tlala de. Paulu jlo dọ Timoti ni ‘to nunina Jiwheyẹwhe tọn he tin to ewọ mẹ lọ hẹn jizò di miyọ́n.’ (2 Tim. 1:6) Paulu yí hogbe lọ khaʹri·sma zan na “nunina.” Na taun tọn, hogbe Glẹkigbe tọn enẹ nọ dlẹnalọdo nunina vọnu de he mẹlọ ma jẹna. Timoti mọ nunina enẹ yí to whenue e yin dide dovo na sinsẹ̀nzọn vonọtaun de to agun mẹ.—1 Tim. 4:14.

Etẹwẹ Timoti na yí nunina ehe do wà? Dile e to hogbe lọ lẹ “hẹn jizò di miyọ́n” hia, e gán ko lẹnnupọndo lehe miyọ́n he yin fiflọ to whégbè nọ wá  lẹzun akán miyọ́nawu poun to whedelẹnu do ji. Yè dona fú jẹhọn do akán ehelẹ na yé nido hẹ̀ bosọ ji ganji. Hogbe Glẹkigbe tọn lọ a·na·zo·py·reʹo he Paulu yizan zẹẹmẹdo “nado na huhlọn nude, hẹn ẹn jẹ yọyọ kavi fú miyọ́n do,” enẹwutu, to yẹhiadonu-liho, e zẹẹmẹdo “nado whàn mẹde na e nido gọ́ na zohunhun gando azọ́n de go.” Na nugbo tọn, Paulu to ayinamẹ na Timoti nado ‘nọ vánkan to azọ́ndenamẹ etọn kọ̀n!’ To egbehe, mílọsu lẹ dona wà nudopolọ, enẹ wẹ nado yin zohunhunnọ to sinsẹ̀nzọn mítọn mẹ.

Dile Timoti zindonukọn nado to wekanhlanmẹ he họntọn vivẹ́ etọn kàn hlan ẹn lọ hia, e sọ mọ hogbe devo he na gọalọna ẹn nado tindo kọdetọn dagbe to lizọnyizọn etọn mẹ. Paulu dọmọ: “Nọ basi hihọ́na nuhọakuẹ lọ he yin zizedo alọmẹ na we gbọn gbigbọ wiwe he tin to mí mẹ lọ dali.” (2 Tim. 1:14) Etẹwẹ yin zizedo alọmẹ na Timoti? To wefọ he jẹnukọn mẹ, Paulu dọho gando “ohó he sọgbe lẹ” go, enẹ wẹ nugbo he tin to Owe-wiwe lẹ mẹ. (2 Tim. 1:13) Taidi lizọnyizọnwatọ Klistiani de, Timoti dona plọn nugbo lọ mẹhe tin to agun lọ mẹ lẹ po mẹhe to gbonu agun lọ tọn lẹ po. (2 Tim. 4:1-5) Podọ, Timoti ko yin pipà taidi mẹho nado yìn lẹngbọpa Jiwheyẹwhe tọn. (1 Pita 5:2) Timoti gán bayi hihọ́na nuhọakuẹ etọn, enẹ wẹ nugbo he e nọ plọnmẹ eyin e nọ ganjẹ gbigbọ wiwe Jehovah tọn po ohó etọn po go.—2 Tim. 3:14-17.

To egbehe, mílọsu ko yin azọ́ndena nado nọ plọnmẹ nugbo lọ to lizọnyizọn lọ mẹ. (Mat. 28:19, 20) Mí gán dohia dọ mí yọ́n pinpẹn nugbo họakuẹ enẹ tọn eyin mí nọ sinyẹnlin to odẹ̀ mẹ bosọ wleawuna aṣa dagbe Ohó Jiwheyẹwhe tọn pinplọn tọn. (Lom. 12:11, 12; 1 Tim. 4:13, 15, 16) Mí gán sọ mọ azọ́ndenamẹ devo, enẹ wẹ nado sẹ̀n taidi mẹho agun tọn kavi biọ sinsẹ̀nzọn whenu-gigọ́ tọn mẹ. Nuhọakuẹ mọnkọ dona zọ́n bọ mí na yin whiwhẹnọ, bo nasọ gọalọna mí nado mọdọ mí dona nọ ganjẹ Jiwheyẹwhe go. Enẹwutu, mí gán bayi hihọ́na kavi wlebòna nuhọakuẹ mítọn, eyin mí nọ yọ́n pinpẹn etọn bo nọ ganjẹ alọgọ Jehovah tọn go nado penukundego.

Azọ́ndenamẹ he Timoti mọyi lẹ ma gando ewọ kẹdẹ go. E sọ gando mẹdevo lẹ go ga. Abajọ, Paulu dotuhomẹna Timoti dọmọ: ‘Nuhe hiẹ ko sè sọn dè e lẹ, ze yé do alọmẹ na omẹ nugbonọ lẹ, mẹhe to godo mẹ, na pegan mlẹnmlẹn nado plọn mẹdevo lẹ.’ (2 Tim. 2:2) Na nugbo tọn, Timoti dona plọnnu sọn mẹmẹsunnu lẹ dè bosọ má nuhe e ko plọn lẹ hẹ yé. To egbehe, nujọnu wẹ e yin dọ nugopọntọ lẹpo to agun mẹ ni nọ dovivẹnu nado wà nudopolọ. Nugopọntọ dagbe de ma nọ whlá nuhe e yọnẹn gando azọ́ndenamẹ de go do mẹdevo lẹ. Kakatimọ, e nọ plọn mẹdevo lẹ na yé nido pegan na azọ́n lọ. E ma nọ dibu dọ yé na wá hò otẹn emitọn yí, na yé gán wá yọ́n azọ́n lọ hú emi kavi do nugopipe hú emi wutu. Enẹwutu, nugopọntọ de ma nọ plọnmẹ onú taun-taun he gando azọ́ndenamẹ de go lẹ poun. E nọ jlo na gọalọna mẹhe e to azọ́nplọn lẹ nado wleawuna lẹnpọn dagbe po wuntuntun po, enẹ wẹ nado yinukọn to gbigbọ-liho. Eyin e wàmọ, “omẹ nugbonọ” he e plọnazọ́n lẹ na wá yin dona daho na agun lọ.

Ayihaawe matin dọ Timoti yọ́n pinpẹn wekanhlanmẹ tulinamẹ tọn he e mọyi sọn Paulu dè ehe tọn. Mí gán yí nukun homẹ tọn do pọ́n lehe ewọ na nọ vọ́ dogbapọnna ayinamẹ họakuẹ ehelẹ whlasusu, bo nọ lẹnnupọndo aliho dagbe hugan he mẹ e na yí yé do yizan mẹ to azọ́ndenamẹ etọn lẹ mẹ te do ji.

Ojlo mítọn wẹ nado hẹn ayinamẹ ehe do ayiha mẹ ga. Gbọnna? Mí gán dovivẹnu nado hẹn nunina mítọn jizò di miyọ́n, basi hihọ́na nuhe yin zizedo alọmẹ na mí bosọ má numimọ po nue mí yọnẹn lẹ po hẹ mẹdevo lẹ. Eyin mí wàmọ, dile Paulu dọna Timoti do, mí gán “hẹn lizọnyizọn [mítọn] di to gigọ́ mẹ.”—2 Tim. 4:5.