BE A doayi e go dọ mẹsusu to aihọn lọ mẹ nọ mọdọ emi jẹna lẹblanulọkẹyi, jlọjẹ kavi nuyiwahẹmẹ vonọtaun lẹ ya? Mahopọnna obá he mẹ yé ko mọ onú ehelẹ yí jẹ, yé gbẹ́ nọ mọdọ emi gbẹ́ jẹna dogọ. Gbigbọ ṣejannabi po mayọndagbe po tọn he yin ohia azán godo tọn lẹ tọn wẹ yin adọ̀ pọndohlan ehe tọn.—2 Tim. 3:2.

Nado dọ hójọhó, mẹdetiti tọn mẹ víví do ma yin nuyọyọ de. Adam po Evi po basi dide nado magbe nuhe yin dagbe po oylan po tọn na yede, ehe hẹn kọdetọn vẹadi lẹ wá. To owhe kanweko lẹ godo, Ahọlu Juda tọn lọ Uzia lẹndọ emi do jlọjẹ nado mẹ̀ nuyọnwan to tẹmpli mẹ, amọ́ ali bu wẹ e te taun. (2 Otàn. 26:18, 19) Mọdopolọ, Falesi lẹ po Sadusi lẹ po lẹndọ Jiwheyẹwhe dona do nukundagbe vonọtaun hia yé, na yé wá sọn kúnkan Ablaham tọn mẹ poun wutu.—Mat. 3:9.

Gbẹtọ ṣejannabinọ po goyitọ lẹ po wẹ lẹdo mí, podọ pọndohlan yetọn gán yinuwado mí ji. (Gal. 5:26) Mí gán jẹ linlẹn ji dọ mí jẹ nado mọ lẹblanulọkẹyi de yí kavi nado yin nuyiwa hẹ to aliho vonọtaun mẹ. Nawẹ mí gán dapana aliho nulẹnpọn tọn ehe gbọn? Nado bẹjẹeji, mí dona mọnukunnujẹ pọndohlan Jehovah tọn mẹ gando whẹho lọ go. Nunọwhinnusẹ́n Biblu tọn awe na gọalọna mí.

Jehovah wẹ nọ magbe nuhe mí jẹna tọn. Lẹnnupọndo apajlẹ delẹ ji.

•   To tito whẹndo tọn he yin zizedai mẹ, asu de dona nọ mọdọ asi emitọn nọ na emi sisi, podọ asi de dona nọ mọdọ asu emitọn yiwanna emi. (Efe. 5:33) Alọwlemẹ lẹ dona nọ duvivi owanyi asu po asi po tọn to ode awetọ kẹdẹ ṣẹnṣẹn. (1 Kọl. 7:3) Mẹjitọ lẹ tindo jlọjẹ lọ nado donukun dọ ovi yetọn lẹ ni nọ setonuna yé, podọ ovi lẹ dona nọ mọ owanyi po godonọnamẹ po yí sọn mẹjitọ yetọn lẹ dè.—2 Kọl. 12:14; Efe. 6:2.

• To agun mẹ, mẹho agun tọn azọ́n sinsinyẹnwatọ lẹ jẹna sisi mítọn. (1 Tẹs. 5:12) Amọ́, yé ma tindo jlọjẹ nado duklunọ do mẹmẹsunnu po mẹmẹyọnnu yetọn lẹ po ji.—1 Pita 5:2, 3.

• Jiwheyẹwhe ko na gandudu gbẹtọvi tọn lẹ jlọjẹ lọ nado nọ biọ tòkuẹ lẹ podọ nado nọ mọ gbégbò yí sọn mẹjidugando yetọn lẹ dè.—Lom. 13:1, 6, 7. 

Jehovah nọ gbọn owanyi dali na mí hugan nuhe mí jẹna. Na mí yin ylandonọ wutu, okú kẹdẹ wẹ mí jẹna. (Lom. 6:23) Amọ́ owanyi nugbo whàn Jehovah bọ e na mí dona susu lẹ. (Salm. 103:10, 11) Dona kavi lẹblanulọkẹyi depope he mí mọyi sọn e dè yin nukundagbe majẹhẹ etọn.—Lom. 12:6-8; Efe. 2:8.

Nọ aṣeji sọta pọndohlan aihọn tọn. Mí gán jẹ linlẹn ji to mayọnẹn mẹ dọ mí jẹna nude hú mẹdevo lẹ. Jesu do lehe e bọawu nado wleawuna pọndohlan mọnkọ do hia to whenue e na apajlẹ pakanọ he yè sú denali dopo lẹ tọn. Pakanọ delẹ bẹ azọ́n jẹeji to afọnnu fuu bo wazọ́n na azán lọ blebu to owhè ṣádada nù; mẹdevo lẹ wazọ́n na gànhiho dopo poun. Pipli tintan lọ mọdọ emi jẹna azọ́nkuẹ susu na azọ́n he emi ko wà lọ wutu. (Mat. 20:1-16) Jesu yí apajlẹ ehe zan nado dohia dọ hodotọ emitọn lẹ dona do pekọ to nuhe Jiwheyẹwhe gbọn homẹdagbe dali wleawu etọn lẹ mẹ.

Nọ yọ́n pinpẹn nutọn bo ma nọ donukun nude sọn mẹdevo lẹ si blo. (1 Tẹs. 5:18) Nọ hodo apajlẹ apọsteli Paulu tọn, mẹhe ma biọ dọ mẹmẹsunnu Kọlinti tọn lẹ ni nanú emi dile etlẹ yindọ e do jlọjẹ nado wàmọ. (1 Kọl. 9:11-14) Mí dona nọ yọ́n pinpẹn dona dopodopo he mí nọ mọyi tọn bo nọ dapana gbigbọ lọ nado nọ tẹkudeji dọ yè dona nanú mí.

 Nọ wleawuna whiwhẹ. Eyin mẹde nọ lẹn ede tọn pọ́n glanglan, e nọ saba jẹ linlẹn ji dọ emi jẹna nude hú nuhe emi tindo. Whiwhẹ wẹ yin amasin ayilinlẹn ylankan enẹ tọn.

Yẹwhegán Daniẹli ze apajlẹ dagbe dai na nuhe dù whiwhẹ didohia. Whẹndo he mẹ e wá sọn, whanpẹ etọn, nuyọnẹn etọn po nugopipe etọn lẹ po gán ko hẹ ota na ẹn bo hẹn ẹn lẹndọ emi jẹna nuyiwahẹmẹ vonọtaun gọna lẹblanulọkẹyi he emi mọyi lẹ. (Dan. 1:3, 4, 19, 20) Amọ́ Daniẹli yin whiwhẹnọ, podọ jẹhẹnu ehe zọ́n bọ e họakuẹ na Jehovah.—Dan. 2:30; 10:11, 12.

Mì gbọ mí ni gbẹ́ gbigbọ ṣejannabi po goyiyi po tọn he gbayipe to aihọn egbehe tọn mẹ dai. Kakatimọ, mì gbọ mí ni zindonukọn nado nọ jaya to dona depope he Jehovah gbọn nukundagbe etọn dali na mí mẹ.