1, 2. Nawẹ hogbe Jehovah tọn he to Isaia 65:16, 17 mẹ lẹ na mí tuli ma nado gbọjọ gbọn?

HOSỌ ojlofọndotenamẹ tọn plidopọ daho 2017 tọn wẹ “MA GBỌJỌ BLO!” Tito-to-whinnu lọ do lehe mí gán doakọnna whlepọn he mí nọ pehẹ lẹ do hia. E ko yì owhe ẹnẹ din he mí bayi plidopọ enẹ, podọ mí gbẹ́ pò to akọndonanu to titonu ylankan ehe mẹ.

² Nuhahun tẹlẹ wẹ a pehẹ to agọe? Be okú hagbẹ whẹndo tọn kavi họntọn vivẹ́ de tọn wẹ a? Be azọ̀n jẹmagbọ de wẹ a? Be nuhahun mẹhowhe tọn lẹ wẹ ya? Be nugbajẹmẹji jọwamọ tọn, danuwiwa kavi homẹkẹn wẹ ya? Kavi nuyiwadomẹji azọ̀n de tọn, taidi azọ̀n bẹplamẹ COVID-19 tọn lẹ? Lehe mí to jejeji pọ́n azán he gbè mí na ko dogodo onú enẹ lẹpo, bo na ko wọnji yé go pete, bọ yé ma nasọ wá aimẹ gbede ba do sọ!—Hia Isaia 65:16, 17.

3. Etẹwẹ mí dona wà todin, podọ etẹwutu?

³ Gbẹninọ to aihọn ylankan ehe mẹ ma bọawu paali, podọ mí tlẹ gán sọ pehẹ nuhahun he sinyẹn humọ lẹ to nukọn mẹ. (Mat. 24:21) E họnwun dọ mí dona zindonukọn nado to akọndonanu mítọn hẹn lodo. Etẹwutu? Jesu dọmọ: “Gbọn akọndonanu mìtọn dali wẹ mì na whlẹn ogbẹ̀ mìtọn gán.” (Luku 21:19) Nulinlẹnpọn do lehe Jehovah ko gọalọna mẹdevo lẹ nado doakọnna whlepọn mítọn nkọ lẹ po kọdetọn dagbe po do ji gán yidogọna akọndonanu mítọn.

4. Naegbọn mí gán dọ dọ Jehovah wẹ apajlẹ dagbe hugan akọndonanu tọn?

⁴ Mẹnu wẹ yin apajlẹ dagbe hugan akọndonanu tọn? Jehovah Jiwheyẹwhe wẹ. Be gblọndo enẹ paṣa we wẹ ya? E gán yinmọ kakajẹ whenue a lẹnnupọndeji. Aihọn ehe to anademẹ Lẹgba tọn glọ, podọ nuhahun kẹdẹ wẹ gọ́ e mẹ. Jehovah do huhlọn nado de nuhahun enẹlẹ sẹ̀ to afọdopolọji, amọ́ e to tenọpọn  ojlẹ dagbe de to sọgodo nado wàmọ. (Lom. 9:22) Todin whẹ́, Jiwheyẹwhe mítọn zindonukọn nado to akọndonanu kakajẹ whenue ojlẹ dide lọ na wá. Mì gbọ mí ni gbadopọnna onú ṣinẹnẹ delẹ he Jiwheyẹwhe ko de nado doakọnna.

5. Nawẹ oyín Jiwheyẹwhe tọn yin vivlẹko gbọn, podọ numọtolanmẹ tẹwẹ enẹ nọ hẹn we tindo?

⁵ Vlẹko he yin hinhẹnwa oyín etọn ji. Jehovah yiwanna yinkọ etọn bosọ jlo dọ mẹlẹpo ni nọ na ẹn sisi. (Isa. 42:8) Amọ́ sọn nudi owhe 6 000 die, vlẹko ko yin hinhẹnwa oyín dagbe etọn ji. (Salm. 74:10, 18, 23) Ehe bẹjẹeji to jipa Edẹni tọn mẹ, whenue Lẹgba (he zẹẹmẹdo “Mẹhẹngbletọ”), sawhẹdokọna Jiwheyẹwhe dọ e tẹ̀ Adam po Evi po nude he sin hudo yé do nado do ayajẹ. (Jen. 3:1-5) Sọn whenẹnu, yè ko sawhẹ lalo dokọna Jehovah dọ ewọ nọ tẹ̀ gbẹtọvi lẹ nuhe yé do hudo etọn nugbonugbo lẹ. Vlẹko planplan he yin hinhẹnwa yinkọ Otọ́ etọn tọn ji nọ duahunmẹna Jesu taun. Enẹwutu, e plọn devi etọn lẹ nado nọ hodẹ̀ dọmọ: “Otọ́ mítọn he tin to olọn mẹ, na oyín towe ni yin kinklandowiwe.”—Mat. 6:9.

6. Naegbọn Jehovah do dike whenu susu ni juwayi whẹpo ewọ nido didẹ whẹho nupojipetọ-yinyin tọn etọn?

⁶ Nupojipetọ-yinyin etọn yin nukundiọsọ. Jehovah kẹdẹ wẹ do jlọjẹ nado dugán do olọn po aigba po ji, podọ aliho gandudu tọn etọn wẹ yọ́n hugan. (Osọ. 4:11) Amọ́, Lẹgba tẹnpọn nado doyẹklọ angẹli po gbẹtọvi lẹ po nado lẹndọ Jiwheyẹwhe ma do jlọjẹ enẹ. Whẹho he gando jlọjẹ Jehovah tọn nado yin nupojipetọ go ma sọgan yin dididẹ to zánto dopo mẹ. Jiwheyẹwhe gbọn nuyọnẹn dali jo whenu susu do na gbẹtọvi lẹ nado mọdọ eyin yé tẹnpọn nado dugán do yede ji bo hò Mẹdatọ lọ do apadopo, e ma na pà yé pọ́n. (Jel. 10:23) Na Jiwheyẹwhe fahomẹ wutu, whẹho lọ na yin dididẹ whladopo podọ kakadoi. Nupojipetọ-yinyin etọn na yin whẹsuna, to whenue e na dohia dọ Ahọluduta emitọn kẹdẹ wẹ gán hẹn jijọho po hihọ́ nujọnu tọn po wá aigba ji.

7. Mẹnu lẹ wẹ ṣiatẹ sọta Jehovah, podọ nawẹ e na yinuwa hẹ yé gbọn?

⁷ Atẹṣiṣi ovi etọn delẹ tọn. Jehovah dá ovi gbigbọmẹ tọn podọ aigba ji tọn etọn lẹ to pipé mẹ, yèdọ matin ylando depope. Enẹgodo, Satani (he zẹẹmẹdo “Agọjẹdomẹtọ”) sisẹ́ gbẹtọvi pipé lọ lẹ, Adam po Evi po nado diọnukunsọ Jehovah. Angẹli po gbẹtọvi devo lẹ po hopódona yé to atẹṣiṣi lọ mẹ. (Juda 6) To nukọn mẹ, hagbẹ akọta Islaeli tọn lẹ lọsu, yèdọ akọta dide Jiwheyẹwhe tọn gbẹ́ ẹ dai bo jẹ yẹwhe lalo lẹ sẹ̀n ji. (Isa. 63:8, 10) Po whẹjijọ po, Jehovah mọdọ yè blu emi. Ṣogan e doakọnna, bo na pò to akọndona kakajẹ whenue ojlẹ na sọ̀ nado và atẹṣitọ lẹpo sudo. Enẹ na hẹn kọgbọ wá na nugbonọ etọn lẹ, yèdọ mẹhe sọ to akọndona nuylankan taidi ewọ to titonu ehe mẹ lẹ!

8, 9. Lalo tẹlẹ wẹ yin dido dokọna Jehovah, podọ nawẹ mí nọ yinuwa gando yé go gbọn?

⁸ Lalo Lẹgba tọn lẹ. Satani sawhẹdokọna devizọnwatọ nugbonọ Jehovah tọn Jobu, bo dọ dọ ṣejannabi wẹ nọ whàn sinsẹ̀n-basitọ nugbonọ Jehovah tọn lẹpo nado sẹ̀n ẹn. (Jobu 1:8-11; 2:3-5) Lẹgba gbẹ́ tẹdo whẹsadokọnamẹ etọn lẹ go kakajẹ egbé. (Osọ. 12:10) Mí gán yí adà mítọn wà nado dohia dọ lalo dódó wẹ whẹsadokọnamẹ Satani tọn lẹ yin, eyin mí desọn owanyi mẹ nado doakọnna whlepọn mítọn lẹ bosọ hẹn nugbonọ-yinyin mítọn na Jehovah go. Dile e yindo na Jobu, mí na yin didona, na mí doakọnnanu wutu.—Jak. 5:11.

⁹ Satani nọ yí sinsẹ̀ngán lalo lẹ zan nado dohia dọ Jehovah yin kanylantọ, bosọ nọ hẹn yajiji wá gbẹtọvi lẹ ji. Eyin ovivu lẹ kú, mẹdelẹ  tlẹ nọ dọ dọ Jiwheyẹwhe wẹ yí yé, na e do hudo angẹli devo lẹ tọn dogọ wutu. Lehe enẹ de yẹyi sọn Jiwheyẹwhe go do sọ! Mí yọ́n nugbo lọ. Eyin mí bẹ azọ̀n sinsinyẹn de kavi whenue mẹyiwanna mítọn de kú, mí ma nọ dowhẹ Jiwheyẹwhe mítọn pọ́n gbede. Kakatimọ, mí yise dọ to gbèdopo, ewọ na jla ninọmẹ lẹpo do. Mí gán dọna mẹdepope he jlo na dotoai dọ Jiwheyẹwhe owanyinọ de wẹ Jehovah yin. To whenẹnu, Jehovah gán gblọnhona mẹhe to vivlẹ ẹ kò.—Howh. 27:11.

10. Etẹwẹ Salmu lẹ 22:23, 24 dohia gando Jehovah go?

¹⁰ Yajiji devizọnwatọ yiwanna etọn lẹ tọn. Jehovah yin Jiwheyẹwhe awuvẹmẹtọ de. E nọ vẹna ẹn taun eyin e sè awhágbe mítọn lẹ na mí to akọndona yajiji, vlavo nukundiọsọmẹ, awutu kavi awugbopo mítọn lẹ wutu. (Hia Salmu lẹ 22:23, 24.) Jehovah nọ sè vivẹ́ hẹ mí; e nọ jlo na glọnalina awufiẹsa mítọn lẹ, podọ e na wàmọ. (Yijlẹdo Eksọdusi 3:7, 8; Isaia 63:9 go.) Azán lọ ja whenue ‘ewọ na súnsún dasin lẹpo sẹ̀ sọn nukun mítọn mẹ, bọ okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba.’—Osọ. 21:4.

11. Numọtolanmẹ tẹwẹ Jehovah nọ do gando devizọnwatọ nugbonọ etọn he kú lẹ go?

¹¹ Kinklan sọn họntọn etọn he ko kú lẹ go. Numọtolanmẹ tẹwẹ Jehovah nọ do gando sunnu po yọnnu nugbonọ he kú lẹ po go? E nọ jlo vẹkuvẹku nado gọ̀ yé mọ! (Jobu 14:15) Be a gán yí nukun homẹ tọn do pọ́n lehe e nọ jẹdò họntọn etọn Ablaham tọn do sọ ya? (Jak. 2:23) Kavi lehe e nọ jẹdò Mose, mẹhe e dọho hẹ “nukun sọ nukun” tọn do ya? (Eks. 33:11) Podọ lehe e dona ko to nukọnpọnhlan nado sè bọ Davidi po salmu-kantọ devo lẹ po na jihàn pipà tọn dagbedagbe yetọn lẹ do! (Salm. 104:33) Dile etlẹ yindọ họntọn Jiwheyẹwhe tọn ehelẹ to amlọndọ to okú mẹ, Jehovah ma wọn yé. (Isa. 49:15) E nọ flin nulẹpo gando yé go. To linlẹn de mẹ, “yemẹpo wẹ to  ogbẹ̀ to pọndohlan etọn mẹ.” (Luku 20:38, Odò.) E na hẹn yé gọwá ogbẹ̀ to gbèdopo, podọ whladopo dogọ, e na sè odẹ̀ ahundopo tọn yetọn lẹ bosọ kẹalọyi sinsẹ̀n-bibasi yetọn. Eyin a ko hẹn mẹyiwanna de bu to okú mẹ, hogbe ehelẹ gán miọnhomẹna we.

12. Etẹwẹ nọ vẹna Jehovah to azán godo tọn he ylan taun ehelẹ mẹ?

¹² Kọgbidinamẹ mẹylankan lẹ tọn. Whenue atẹṣiṣi fọ́n to Edẹni mẹ, Jehovah yọnẹn dọ ninọmẹ lọ lẹ nasọ ylan deji whẹpo do wá pọnte. Jehovah gbẹwanna kanyinylan, mawadodo po danuwiwa he to aihọn egbezangbe tọn mẹ po. Na taun tọn, onú agbátọnọ lẹ tọn nọ duahunmẹna ẹn to whelẹponu, enẹ wẹ madogánnọ lẹ, mẹhe ma do mẹde lẹ gọna tọṣiọvi po asuṣiọsi lẹ po. (Zek. 7:9, 10) E nọ vẹna Jehovah taun eyin e mọ bọ devizọnwatọ nugbonọ etọn lẹ yin kọgbidina bo yin súsú do gànmẹ. Mì deji dọ e yiwanna mìmẹpo he to akọndonanu dopọ hẹ ẹ lẹ.

13. Nawẹ walọyizan gbẹtọvi lẹ tọn ylan deji to nukun Jiwheyẹwhe tọn mẹ gbọn, podọ etẹwẹ e na wà gandego?

¹³ Walọyizan gbẹtọvi tọn he to yinylan deji. Satani yiwanna nado sisẹ́ gbẹtọvi he Jiwheyẹwhe dá to apajlẹ etọn mẹ lẹ nado wà nuylankan. Whenue Jiwheyẹwhe “mọdọ kanyinylan gbẹtọ tọn sù tlala” to azán Noa tọn gbè, e “vẹna Jehovah dọ e ko dá gbẹtọ do aigba ji, e sọ hẹn awugblena ẹn.” (Jen. 6:5, 6, Odò., 11) Be nulẹ ko pọnte sọn whenẹnu wẹ ya? Paali! Lehe homẹ Lẹgba tọn dona ko nọ hùn do sọ whenue e mọ bọ walọ fẹnnuwiwa tọn wunmẹ lẹpo gbayipe, ehe bẹ walọyizan mawé to mẹhe do vijinu dopolọ lẹ po mẹhe do vijinu voovo lẹ po ṣẹnṣẹn hẹn! (Efe. 4:18, 19) Homẹ Satani tọn nọ hùn taun eyin e penugo bo sisẹ́ devizọnwatọ Jehovah tọn lẹ nado jayi jẹ ylando mẹ. Whenue homẹfa Jehovah tọn na wá vivọnu, e na dohia dọ emi jẹagọdo walọyizan mawé wunmẹ lẹpo to aliho sinsinyẹn mẹ.

14. Etẹwẹ gbẹtọ lẹ to zinzọ̀n do nuhe Jiwheyẹwhe dá do aigba ji lẹ?

¹⁴ Husudo nudida etọn lẹ tọn. Gbọnvona dọ ‘gbẹtọ to gandu do gbẹtọ ji na awugble etọn,’ e masọ to nukunpedo aigba lọ po kanlin he Jehovah dá bo zedo alọ etọn mẹ lẹ po go. (Yẹwh. 8:9; Jen. 1:28) Lẹnunnuyọnẹntọ delẹ dọ dọ nuyiwa gbẹtọvi lẹ tọn gán zọ́n bọ nudida voovo * livi dopo linlán na busẹ to owhe kleun he ja lẹ mẹ. Abajọ yé nọ dọ dọ aihọn-gbẹ̀ lọ tin to owù sinsinyẹn mẹ! Pẹdido wẹ dọ Jehovah dopà “nado husudo mẹhe to aigba husudo lẹ,” bo hẹn aigba lọ blebu zun paladisi de.—Osọ. 11:18; Isa. 35:1.

15, 16. Etẹwẹ dona nọ whàn mí nado doakọnnanu dopọ hẹ Jehovah? Na apajlẹ.

¹⁵ Lẹnnupọndo nuhahun sinsinyẹn he Otọ́ olọn mẹ tọn mítọn to akọndona na owhe fọtọ́n susu lẹpo ji. (Pọ́n apotin lọ “ Nudelẹ He Jehovah to Akọndona.”) Jehovah gán hẹn titonu ylankan ehe wá opodo to whedepopenu. Amọ́, homẹfa etọn ko hẹn dona susugege wá na mí! Lẹnnupọndo apajlẹ ehe ji. Mí ni dọ dọ yè dọna dawe de po asi ẹ po dọ ovi yetọn he ma ko yin jiji do nuhahun agbasalilo tọn sinsinyẹn de, podọ ovi lọ ma na nọ gángán gbede to gbẹzan etọn mẹ bo nasọ yawu kú. Amọ́ mahopọnna dọ e na vẹawuna yé taun nado penukundo ovi lọ go, homẹ yetọn hùn whenue ovi lọ yin jiji. Owanyi he yé do na ovi lọ whàn yé nado doakọnna nuhahun depope nado sọgan wleawudaina gbẹzan dagbe hugan de na ẹn.

¹⁶ Mọdopolọ, kúnkan Adam po Evi po tọn lẹpo wẹ nọ yin mapenọ whenue yé yin jiji. Etomọṣo, Jehovah yiwanna yé bo nọ hò yetọn  pọ́n. (1 Joh. 4:19) Podọ, to vogbingbọn mẹ na mẹjitọ he yin nùdego to apajlẹ mítọn mẹ lẹ, Jehovah gán yí nude wà gando ninọmẹ mítọn go. E ko de azán he gbè e na de awutu he nọ doyana gbẹtọvi lẹ sẹ̀ mlẹnmlẹn. (Mat. 24:36) Be owanyi etọn ma dona nọ whàn mí nado doakọnnanu dopọ hẹ ẹ dile e na dẹnsọ ya?

17. Nawẹ nuhe yin didọ gando Jesu go to Heblu lẹ 12:2, 3 mẹ lẹ na mí tuli nado to akọndonanu zọnmii gbọn?

¹⁷ Jehovah ze apajlẹ pipé akọndonanu tọn dai. Jesu penugo bo hodo apajlẹ akọndonanu Otọ́ etọn tọn. To whenue Jesu to aigba ji, e doakọnna hodidọ ylankan, winyan po yatin de po na mítọn wutu. (Hia Heblu lẹ 12:2, 3.) Ayihaawe ma tin dọ apajlẹ akọndonanu tọn Jehovah tọn na huhlọn Jesu nado doakọnnanu. E gán na huhlọn mílọsu ga.

18. Nawẹ 2 Pita 3:9 gọalọna mí nado mọnukunnujẹ nuhe homẹfa Jehovah tọn to wiwadotana mẹ gbọn?

¹⁸ Hia 2 Pita 3:9. Jehovah yọ́n ojlẹ dagbe hugan lọ nado hẹn aihọn ylankan ehe wá opodo. Homẹfa Jehovah tọn ko zọ́n bọ gbẹtọ susugege de to yinyin bibẹpli, podọ gbẹtọ livi susu lẹ to sinsẹ̀n ẹn bosọ to pipà ẹ. Homẹ yemẹpo tọn wẹ nọ hùn dọ Jehovah ko doakọnnanu na ojlẹ dindẹn sọmọ, ehe zọ́n bọ yé wá yin jiji bo plọn nado yiwanna ẹn bosọ klan yede do wiwe na ẹn. E na wá họnwun gblegede dọ owhẹ̀ Jehovah tọn whẹ́n nado doakọnnanu whenue e na yí ayajẹ do suahọ gbẹtọ livi susu he na doakọnnanu kakajẹ opodo lẹ!

19. Etẹwẹ mí dona magbe nado wà, podọ ahọsumẹ tẹwẹ mí na mọyi?

¹⁹ Mí plọn lehe yè nọ doakọnnanu po ayajẹ po do sọn Jehovah dè. Mahopọnna awubla po yajiji he Satani hẹnwa lẹpo po, Jehovah gbẹ́ yin “Jiwheyẹwhe ayajẹnọ lọ.” (1 Tim. 1:11) Mọdopolọ, mílọsu gán gbẹ́ yin ayajẹnọ dile mí yí homẹfa do to tenọpọn Jehovah nado klan yinkọ ede tọn do wiwe, suwhẹna nupojipetọ-yinyin etọn, hẹn kanyinylan lẹpo wá opodo, bosọ doalọtena nuhahun mítọn alọnu tọn lẹ. Mì gbọ mí ni magbe nado doakọnnanu, podọ nado nọ mọ homẹmimiọn to yinyọnẹn mẹ dọ Otọ́ olọn mẹ tọn mítọn lọsu to akọndonanu ga. Eyin mí nọ wàmọ, hogbe ehelẹ na yin nugbo to whẹho dopodopo mítọn tọn mẹ: “Ayajẹnọ wẹ mẹlọ he to akọndona whlepọn zọnmii, na to whenuena e wá yin alọkẹyi e na mọ jẹgbakun ogbẹ̀ tọn lọ yí, he Jehovah dopagbe etọn na mẹhe zindonukọn nado to wanyina Ẹn lẹ.”—Jak. 1:12.