N’yin jiji to 1983. To whenue n’gbẹ́ pò to ovu, n’to ganji to agbasa mẹ, amọ́ to whenue n’do owhe ao, n’jẹ vivẹ́ sinsinyẹn sè ji to agbasa ṣie blebu mẹ. To nudi owhe awe godo, n’fọ́n to afọnnu de bọ tẹnsisẹ glo. N’wà nulẹpo nado ze afọ amọ́ glo janwẹ e glo. Sọn gbenẹgbe, n’ma gán sọ zinzọnlin ba. Awutu lọ sọ zọ́n bọ n’pòwhẹ́n. Kakajẹ din, n’gbẹ́ whèsin taidi ovi pẹvi de.

Osun delẹ to whenue azọ̀n lọ ko hò mi do họ̀ godo, Kunnudetọ Jehovah tọn awe wá dla mi pọ́n. To paa mẹ, eyin jonọ lẹ wá, họ̀n wẹ n’nọ họ̀n whlá, amọ́ to gbenẹgbe uwọ, n’na dotẹnmẹ yọnnu lọ lẹ nado dọhona mi. Dile yé to hodọdo Paladisi ji, n’flin nue n’sè whenue n’do nudi owhe atọ́n. To ojlẹ lọ mẹ, mẹdehlan de he nọ yin Jethro bo nọ nọ̀ Suriname nọ wá gbétatò mítọn mẹ whladopo to osun dopo mẹ, podọ e nọ plọn Biblu hẹ baba ṣie. Jethro nọ jọmẹ hẹ mi taun. N’yiwanna ẹn tlán. Podọ, mẹjitọ daho ṣie lẹ nọ plan mi yì opli Kunnudetọ lẹ tọn, he nọ yin bibayi to gbétatò mítọn mẹ. Enẹwutu, whenue Florence he yin dopo to yọnnu awe he wá dla mi pọ́n wayi lọ lẹ mẹ kanse mi eyin n’jlo na yọ́n nususu dogọ, n’yigbe.

Florence lẹkọwa po asu etọn Justus po, bọ yé omẹ awe lẹ jẹ Biblu plọn hẹ mi ji. Dee yé doayi e go dọ n’ma yọ́n wehia, yé plọn mi nuhihia. To ojlẹ de godo, yẹnsu jẹ nuhia ji. To gbèdopo, asu po asi po lọ dọna mi dọ yé yin didohlan Suriname. E blawu dọ mẹdevo de masọ to Orealla he gán penukundo oplọn ṣie go. Amọ́, n’dopẹ́ dọ Jehovah ma wọn mi.

E ma dẹn bọ gbehosọnalitọ de he nọ yin Floyd wá Orealla bo dukosọna mi dile e to yẹwhehodọ sọn ohọ̀ de kọ̀n jẹ họ̀ de kọ̀n. Whenue e kanse mi eyin e na jlo mi nado plọn Biblu, n’konu. E kanse mi dọ, “Etẹwẹ whẹ́n na we?” N’dọna ẹn dọ n’ko plọn alọnuwe lọ Etẹwẹ Jiwheyẹwhe Biọ to Mí Si? bo ko jẹ Oyọnẹn He Nọ Planmẹ Sọyi Ogbẹ̀ Madopodo Mẹ plọn ji. * N’dọ nue wutu oplọn lọ masọ to yìyì ba na ẹn. Floyd fó owe Oyọnẹn hẹ mi, amọ́ uwọsu wá yin azọ́ndena hlan fidevo. Whladopo dogọ, n’masọ do mee na plọn Biblu hẹ mi ba.

Amọ́ to 2004, Granville po Joshua po he  yin gbehosọnalitọ titengbe lẹ yin azọ́ndena do Orealla. Yé dukosọna mi whenue yé to yẹwhehodọ sọn họ̀ de kọ̀n jẹ họ̀ de kọ̀n. To whenue yé kanse mi eyin n’jlo na plọn Biblu, n’konu. N’biọ to yé si nado plọn owe Oyọnẹn hẹ mi sọn bẹjẹeji. N’jlo na pọ́n eyin nue yé na plọn mi lẹ na sọgbe po nue mee plọnnu mi dai lẹ plọn mi po. Granville dọna mi dọ opli lẹ nọ yin bibayi to gbétatò lọ mẹ. Amọ́, e jlo mi dọ ma yì, dile etlẹ yindọ afọ ṣie o jẹ họngbo ji din, e yì owhe ao. Enẹwutu, Granville wá whégbè bo ze mi do kẹkẹvi sẹkunọ lẹ tọn de mẹ bo sisẹ́ mi kaka yì Plitẹnhọ Ahọluduta tọn mẹ.

To nukọn mẹ, Granville na mi tuli nado ze yinkọ dai to Wehọmẹ Lizọnyizọn Yẹwhehọluduta tọn. E dọ: “A do oblọ, amọ́ a gán dọho. A na wá na hodidọ na mẹlẹpo to gbèdopo. E ka na yinmọ.” Hogbe tulinamẹ tọn etọn lẹ na mi jide.

N’jẹ kunnude ji hẹ Granville. Susu to ali gbétatò lọ tọn lẹ mẹ wẹ yin póde-dòde bo ma yọ́n na kẹkẹvi sẹkunọ tọn paali. Enẹwutu, n’dọna Granville dọ ni nọ ze mi do kẹkẹvi devo de (brouette) mẹ bo nọ sisẹ́ mi. Ehe pọnte taun. To avril 2005, n’yí baptẹm. E ma dẹn bọ mẹmẹsunnu lẹ plọnazọ́n mi nado nọ penukundo owe lẹ po zomọ gbèzeyiaga tọn po go to Plitẹnhọ mẹ.

Enẹgodo, e blawu dọ to 2007 baba ṣie kú to asidan tọji tọn de mẹ. Ehe yinuwado whẹndo mítọn ji taun. Granville hodẹ̀ hẹ mí bosọ hia wefọ homẹmiọnnamẹ tọn delẹ na mí. To owhe awe godo, nujijọ ajiji devo sọ jọ do mí go, Granville kú to asidan tọji tọn de mẹ.

Mẹho agun tọn depope masọ pò to agun pẹvi mítọn mẹ ba, adavo devizọnwatọ lizọnyizọnwiwa tọn dopo gee. Okú Granville tọn vẹna mi taun; họntọn alọmayiemẹ wẹ mí yin. E ko penukundo nuhudo gbigbọmẹ tọn po agbasa tọn ṣie lẹ po go po nugbonọ-yinyin po. To opli he bọdo okú etọn go, yẹn wẹ do wehihia to Oplọn Atọ̀họ̀-Nuhihọ́ lọ Tọn whenu. Whenue n’hia hukan awe tintan lẹ godo, n’jẹ avivi ji bọ dasin to wiwá yì do mi plẹplẹ. N’dona jẹte sọn oplò lọ ji.

N’wá jẹ dee mẹ mọ ji whenue mẹmẹsunnu lẹ sọn agun devo mẹ wá Orealla nado gọalọna mí. Podọ, alahọ do gbehosọnalitọ titengbe de hlan he nọ yin Kojo. Homẹ ṣie hùn dọ iya ṣie po nọvisunnu ṣie po jẹ nuplọn ji bo wá yí baptẹm. Enẹgodo, to mars 2015 n’yin pipà di devizọnwatọ lizọnyizọnwiwa tọn. To ojlẹ de godo, n’na hodidọ na mẹlẹpo ṣie tintan. To gbenẹgbe, homẹ ṣie hùn bọ dasin pinpẹn-nutọn-yinyọnẹn tọn wayi do mi whenue n’flin nue Granville dọna mi owhe delẹ die wayi dọ: “To gbèdopo, a na na hodidọ na mẹlẹpo. E ka na yinmọ.”

To tito Televiziọn JW tọn lẹ mẹ, n’mọ mẹmẹsunnu po mẹmẹyọnnu po devo lẹ he to ninọmẹ ṣie nkọ mẹ. Bọ mahopọnna madogán yetọn, yé nọ penugo bo nọ wà nususu bosọ nọ do ayajẹ. Yẹnsu gán wà nudelẹ ga. Ojlo ṣie nado wà nue go n’pé na Jehovah whàn mi nado lẹzun gbehosọnalitọ whepoponu tọn. Podọ, to septembre 2019 nue n’ma donukun de jọ! To osun enẹ mẹ, n’yin pipà di mẹho to agun mítọn he bẹ nudi wẹnlatọ 40 hẹn mẹ.

N’dọnudo mẹmẹsunnu po mẹmẹyọnnu vivẹ́ he plọnnu hẹ mi bo gọalọna mi nado hẹn lizọnyizọn ṣie di lẹ po. Hú popolẹpo, n’dopẹna Jehovah taun dọ e ma wọn mi.