Mí Tindo Nuhudo Titobasinanu Jehovah Tọn

BE HIẸ ko se pọ́n gbede bọ mẹde dọ dọ, “Yẹn yise to Jiwheyẹwhe mẹ ṣigba e mayin to sinsẹ̀n heyin titobasina mẹ gba”? Pọndohlan he taidi enẹ nkọtọn lẹ nọ saba yin didọ jẹgbonu gbọn mẹdopodopo heyin ṣọṣi-yitọ zohunhunnọ to whedenu wayi lẹ ṣigba bo ko yin hinhẹn jẹflumẹ gbọn awugbopo sinsẹ̀n yetọn tọn nado jẹ nuhudo gbigbọmẹ tọn yetọn lẹ kọ̀n dali. Dile etlẹ yindọ yé ko yin hinhẹn jẹflumẹ gbọn titobasinanu sinsẹ̀n tọn lẹ dali to paa mẹ, mẹsusu gbẹsọ tẹkudeji dọ yé jlo na basi sinsẹ̀n hlan Jiwheyẹwhe. Nalete, yé yise dọ e pọnte hugan nado basi sinsẹ̀n hlan ẹn to aliho yedetiti tọn mẹ hugan nado wàmọ to awukọndopọmẹ hẹ ṣọṣi de kavi titobasinanu sinsẹ̀n tọn devo.

Etẹwẹ Biblu dọ? Be Jiwheyẹwhe jlo dọ Klistiani lẹ ni kọnawudopọ hẹ titobasinanu de wẹ ya?

Klistiani Fliflimẹ Tọn lẹ Mọaleyi sọn Yinyin Titobasina Mẹ

To Pẹntikọsti 33 W.M., Jehovah kọ̀n gbigbọ wiwe etọn jẹgbonu, e mayin do yisenọ vude he vúnvún pé delẹ ji gba, ṣigba do pipli sunnu po yọnnu lẹ po he pli dopọ “to ofi dopo,” yèdọ to abò aga tọn de mẹ to todaho Jelusalẹm tọn mẹ lẹ ji. (Owalọ lẹ 2:1) To ojlẹ enẹ mẹ, agun Klistiani tọn, he wá lẹzun titobasinanu akọjọpli tọn de, yin didoai. Ehe sọawuhia nado yin dona nujọnu tọn de na devi fliflimẹ tọn enẹlẹ. Etẹwutu? Na onú dopo, yé ko yin nina azọ́ndenamẹ titengbe de—yèdọ enẹ heyin yẹwheho wẹndagbe Ahọluduta Jiwheyẹwhe tọn didọ to godo mẹ “to aigba fininọ lẹpo” ji tọn. (Matiu 24:14) To agun lọ mẹ omẹ yọyọ lẹ sọgan plọn lehe yè na to nukọnzindo to azọ́n yẹwhehodidọ tọn mẹ do sọn yisenọ hatọ numimọnọ lẹ dè.

To madẹnmẹ owẹ̀n Ahọluduta lọ tọn gbayipe zẹ̀ adó Jelusalẹm tọn lẹ go. To owhe 62 po 64 W.M. po gblamẹ, apọsteli Pita kàn wekanhlanmẹ etọn tintan hlan Klistiani he “gbàpe . . . to Pọntu, Galatia, Kapadokia, Asia, po Bitinia po mẹ” lẹ, popolẹpo to Turquie egbezangbe tọn mẹ. (1 Pita 1:1) Yisenọ lẹ sọ tin to Palestine, Lẹbanọni, Silia, Kiplu, Grèce, Klete, po Italie po ga. Dile Paulu wlan hlan Kọlọsinu lẹ do to owhe 60-61 W.M., wẹndagbe lọ ‘ko yin didọna mẹhe tin to olọn glọ lẹpo.’—Kọlọsinu lẹ 1:23.

Alemọyi awetọ sọn awukinkọndopọ hẹ titobasinanu de mẹ wẹ tuli he Klistiani lẹ sọgan na ode awetọ. To gbẹdido hẹ agun lọ mẹ, Klistiani lẹ sọgan se hodidọ mẹwhantọ lẹ, plọn Owe-wiwe gbọdo lẹ dopọ, má numimọ yise-hẹnlodo tọn lẹ, bosọ kọnawudopọ hẹ yisenọ hatọ lẹ to odẹ̀ mẹ. (1 Kọlintinu lẹ, weta 14) Podọ sunnu he whewhin lẹ sọgan “yìn lẹngbọpa Jiwheyẹwhe tọn.”—1 Pita 5:2.

Taidi hagbẹ agun lọ tọn lẹ, Klistiani lẹ wá yọ́n ode awetọ ga bosọ nọ wá yiwanna ode awetọ. Kakati nado tindo numọtolanmẹ mẹhe yè do agbàn pinpẹn na gbọn gbẹdido yetọn hẹ agun lọ dali, Klistiani fliflimẹ tọn lẹ yin jijlọdote bo yin hinhẹn lodo gbọn dali etọn.—Owalọ lẹ 2:42; 14:27; 1 Kọlintinu lẹ 14:26; Kọlọsinu lẹ 4:15, 16.

Whẹwhinwhẹ́n devo he wutu nuhudo tin na agun, kavi titobasinanu he tin to kọndopọmẹ lẹdo aihọn pé de wẹ nado ze pọninọ daga. Klistiani lẹ plọn nado “dọ onú dopolọ.” (1 Kọlintinu lẹ 1:10) Ehe yin onú titengbe. Hagbẹ agun lọ tọn lẹ wá sọn dodonu weyinyọnẹn tọn po lẹdo voovo lẹ po mẹ. Yé nọ do ogbè voovo lẹ, podọ yé tindo vogbingbọn he họnwun lẹ to gbẹtọ-yinyin mẹ. (Owalọ lẹ 2:1-11) To whedelẹnu, vogbingbọn nujọnu tọn lẹ tin to linlẹn mẹ. Etomọṣo, Klistiani lẹ yin alọgọna nado didẹ vogbingbọn mọnkọtọn lẹ to gblagbla agun lọ tọn mẹ.—Owalọ lẹ 15:1, 2; Filippinu lẹ 4:2, 3.

Kanbiọ nujọnu tọn he ma sọgan yin nukunpedego gbọn mẹho lẹdo mẹ tọn lẹ dali nọ yin didohlan nugopọntọ tomẹyitọ he whèwhín lẹ, taidi Paulu. Whẹho sinsẹ̀n-nuplọnmẹ tọn titengbe lẹ yin didohlan pipli hagbẹ anademẹtọ de he tin to Jelusalẹm. To tintan whenu apọsteli Jesu Klisti tọn lẹ wẹ wleawuna hagbẹ anademẹtọ lọ ṣigba e yin kandlẹnna to godo mẹ nado bẹ sunnu mẹho lẹ hẹn sọn agun he tin to Jelusalẹm mẹ. Agun dopodopo yọ́n aṣẹpipa heyin nina hagbẹ anademẹtọ lọ po afọzedaitọ etọn lẹ po gbọn Jiwheyẹwhe dali nado basi titona lizọnyizọn lọ, de sunnu lẹ do otẹn devizọnwiwa tọn lẹ mẹ, bo basi nudide lẹ do whẹho sinsẹ̀n-nuplọnmẹ tọn lẹ ji. To whenuena whẹho de yin dididẹ gbọn hagbẹ anademẹtọ lọ dali, agun lẹ kẹalọyi nudide lọ bosọ “jaya na homẹmiọn lọ.”—Owalọ lẹ 15:1, 2, 28, 30, 31.

Mọwẹ, Jehovah yí titobasinanu de zan to owhe kanweko tintan whenu. Ṣigba etẹwẹ dogbọn egbehe dali?

Mí Tindo Nuhudo Titobasinanu de Tọn to Egbehe

Taidi hagbẹ yetọn owhe kanweko-tintan whenu tọn lẹ, Kunnudetọ Jehovah tọn lẹ to egbehe nọ yí nukun nujọnu tọn do pọ́n azọ́ndenamẹ nado dọ yẹwheho wẹndagbe Ahọluduta lọ tọn. Dopo to aliho he mẹ yé nọ wà ehe te wẹ gbọn Biblu po alọgọnamẹnu Biblu pinplọn tọn lẹ po mimá dali, he nọ biọ titobibasinanu.

Owe zinjẹgbonu Klistiani tọn lẹ dona yin awuwlena po sọwhiwhe po, yin gbigbeje pọ́n na gbesisọnọ-yinyin, zinzinjẹgbonu, podọ to enẹgodo yin didohlan agun lẹ. To godo mẹ, Klistiani dopodopo lẹ dona ze yedelẹ jo nado hẹn owe lẹ jẹ mẹhe jlo na hia yé lẹ dè. Owẹ̀n Ahọluduta lọ tọn ko jẹ gbẹtọ livi susu lẹ dè to aliho ehe mẹ. Wẹnlatọ wẹndagbe lọ tọn lẹ nọ dovivẹnu nado hẹn nuyiwa yẹwhehodidọ tọn yetọn di to ninọmẹ titojininọ tọn de mẹ, bo nọ hẹn ẹn diun dọ adà aigba-denamẹ yetọn tọn depope mayin azọ́nwadeji hugan to whenuena adà devo lẹ yin kọgbẹ́ ẹ go gba. Ehe lẹpo nọ biọ titobibasinanu.

To whenuena e yindọ “Jiwheyẹwhe mayin mẹnukuntahopọntọ,” Biblu po owe Biblu tọn lẹ po dona yin lilẹdo ogbè devo lẹ mẹ. (Owalọ lẹ 10:34) To alọnu din, linlinnamẹwe ehe tin-to-aimẹ to ogbè 132 lẹ mẹ, podọ gbẹdohẹmẹtọ etọn, Réveillez-vous!, nọ yin zinzinjẹgbonu to ogbè 83 lẹ mẹ. Enẹ nọ biọ pipli azọ́nwatọgbẹ́ lẹdogbedevomẹ-basitọ heyin titobasina ganji lẹdo aihọn pé lẹ tọn.

Hagbẹ agun lọ tọn lẹ nọ mọ tulinamẹ yí to whenuena yé yì opli po plidopọ Klistiani tọn lẹ po. Yé nọ se hodidọ zodolanmẹnamẹ Biblu tọn lẹ to finẹ, plọn Owe-wiwe lẹ dopọ, má numimọ mẹjlọdote tọn lẹ, bosọ nọ kọnawudopọ hẹ sinsẹ̀n-basitọ hagbẹ lẹ to odẹ̀ mẹ. Podọ taidi mẹmẹsunnu yetọn lẹ to owhe kanweko tintan whenu, yé nọ duvivi dlapọn yise-hẹnlodo tọn lẹ sọn nugopọntọ tomẹyitọ owanyinọ lẹ dè. Gbọnmọ dali, Klistiani lẹ to egbehe wleawuna “apó dopo, . . . lẹngbọhọtọ dopo.”—Johanu 10:16.

Nugbo wẹ dọ, Kunnudetọ Jehovah tọn lẹ mayin gbẹtọ pipé lẹ gba, kẹdẹdile hagbẹ yetọn fliflimẹ tọn lẹ yin do. Ṣogan, yé nọ wazọ́n dopọ to pọninọ mẹ. Taidi kọdetọn de, azọ́n yẹwhehodidọ-Ahọluduta lọ tọn to yinyin wiwadotana to aigba lẹpo ji.—Owalọ lẹ 15:36-40; Efesunu lẹ 4:13.

 [Yẹdide to weda 31]

Klistiani lẹ to egbehe wleawuna “apó dopo, . . . lẹngbọhọtọ dopo”