Jiwheyẹwhe Nọ Na Gblọndo Odẹ̀ lẹ Tọn
Jiwheyẹwhe Nọ Na Gblọndo Odẹ̀ lẹ Tọn
Kọneliọsi yin dawe de he din nukundagbe Jiwheyẹwhe tọn gbọn odẹ̀ ahundopo, gbọzangbọzan tọn hihò dali. Humọ, e yí otẹn etọn taidi awhàngán zan to aliho dagbe mẹ. Sọgbe hẹ Biblu, ‘e basi nunina lẹblanu tọn susu’ hlan mẹhe tin to nuhudo mẹ lẹ.—Owalọ lẹ 10:1, 2.
TO OJLẸ enẹ mẹ, agun Klistiani tọn bẹ Ju yisenọ lẹ, mẹdiọzun Juvi lẹ, po Samalianu lẹ po hẹn. Kosi he ma gbowhẹ̀ de wẹ Kọneliọsi yin bo ma yin apadewhe agun Klistiani tọn. Be enẹ zẹẹmẹdo dọ odẹ̀ etọn lẹ yin to ovọ́ mẹ wẹ ya? Lala. Jehovah Jiwheyẹwhe doayi Kọneliọsi po azọ́n dẹ̀hiho etọn tọn po go.—Owalọ lẹ 10:4.
Gbọn anademẹ angẹli tọn dali, Kọneliọsi yin hinhẹn nado kọnawudopọ hẹ agun Klistiani tọn. (Owalọ lẹ 10:30-33) Taidi kọdetọn de, ewọ po whédo etọn po tindo lẹblanulọkẹyi nado lẹzun Kosi tintan he ma gbowhẹ̀ lẹ nado yin alọkẹyi biọ agun Klistiani tọn mẹ. Jehovah Jiwheyẹwhe mọdọ numimọ mẹdetiti Kọneliọsi tọn jẹ nado yin yiyidogọ kandai Biblu tọn. Matin ayihaawe, e basi diọdo susu lẹ nado hẹn ogbẹ̀ etọn tin to kọndopọ mẹ mlẹnmlẹn hẹ nujinọtedo Jiwheyẹwhe tọn lẹ. (Isaia 2:2-4; Johanu 17:16) Numimọ Kọneliọsi tọn dona yin tulinamẹnu daho de na gbẹtọ he tin to akọta lẹpo mẹ he to nukundagbe Jiwheyẹwhe tọn din to egbehe lẹpo. Gbadopọnna apajlẹ delẹ.
Apajlẹ Egbezangbe Tọn Lẹ
Yọnnu jọja de to Inde tin to nuhudo sinsinyẹn mẹ nado yin homẹmiọnna. E wlealọ to owhe 21 mẹvi-yinyin mẹ, bosọ tindo ovi awe. Ṣigba to madẹnmẹ to ovi awetọ lọ jiji godo, asu etọn kú. To ajiji mẹ, to owhe 24 mẹvi-yinyin mẹ, ewọ yin asuṣiọsi de he tindo viyọnnu osun-2-mẹvi de po visunnu osun-22-mẹvi de po. Abajọ e do tin to nuhudo nado yin homẹmiọnna tọn mẹ! Fie wẹ ewọ na lẹhlan? To ozán dopo mẹ, to ayimajai sinsinyẹn de mẹ, e hodẹ̀, bo dọmọ, “Otọ́ Olọn mẹ tọn, jaale miọnhomẹna mi gbọn Ohó towe gblamẹ.”
To wunkẹngbe, e tindo jonọ de. E yin dopo to Kunnudetọ Jehovah tọn lẹ mẹ. To azán enẹ gbè, lizọnyizọn whédegbè-jẹ-whédegbè etọn ko yin awusinyẹnnamẹnu na omẹ vude wẹ ko hùn ohọ̀n na ẹn. Na nuṣikọnamẹ po gbigbọjọ he e tindo po wutu, e jlo nado yì whé, ṣigba yin whinwhàn mọmọ nado dla owhé dopo pọ́n dogọ. Finẹ wẹ yin fihe e dukosọhẹ asuṣiọsi jọja lọ te. E basi oylọ na ẹn biọ whégbè bo kẹalọyi owe de he basi zẹẹmẹ Biblu tọn. Yọnnu lọ mọ homẹmiọnnamẹnu daho yí sọn owe enẹ hihia mẹ podọ sọn hodọdopọ etọn lẹ hẹ Kunnudetọ lọ mẹ. E plọnnu gando opagbe Jiwheyẹwhe tọn nado fọ́n ṣiọ lẹ sọnku go podọ gando Ahọluduta Jiwheyẹwhe tọn go, ehe na hẹn aigba zun paladisi de to madẹnmẹ. Hú popolẹpo, e wá nado yọ́n bosọ yiwanna Jiwheyẹwhe nugbo dopo lọ, Jehovah, mẹhe ko na gblọndo na odẹ̀ etọn.
Nora, he nọ nọ̀ tòdaho George tọn mẹ, to Afrique du Sud, de osun dopo dovo nado tindo mahẹ to azọ́n wẹndagbe-jijlá whenu-gigọ tọn mẹ. Whẹpo e do bẹjẹeji, e hodẹ̀ vẹkuvẹku hlan Jehovah nado gọalọna ẹn nado mọ mẹde he na tindo ojlo nujọnu tọn to Biblu pinplọn mẹ. Aigbadenamẹ he ji e yin azọ́ndena nado wazọ́n te bẹ owhé mẹde he ko yinuwa to aliho agọ̀ mẹ hẹ Nora to dlapọn he ko wayi lẹ whenu hẹn. Po adọgbigbo po, Nora dla owhe enẹ gbè pọ́n whladopo dogọ. Hlan nupaṣamẹ etọn, e mọ dọ họhayatọ yọyọ de, he nọ yin Noleen, ko sẹtẹn wá owhé lọ gbè. Humọ, Noleen po onọ̀ etọn po ko to dẹ̀ho hlan Jiwheyẹwhe na alọgọ nado mọnukunnujẹ Biblu mẹ. “To whenuena yẹn ze oplọn Biblu tọn de donukọnna yé, homẹ yetọn hùn,” wẹ Nora basi zẹẹmẹ dọ. Noleen po onọ̀ etọn po tindo nukọnyiyi po awuyiya po. To madẹnmẹ, yé omẹ awe lẹ jẹ mahẹ tindo hẹ Nora to azọ́n azọ̀nhẹngbọ gbigbọmẹ tọn mẹ ji.
Apajlẹ devo he do huhlọn odẹ̀ tọn hia wẹ yin asu po asi po de tọn he nọ nọ̀ Afrique du Sud to tòdaho Johannesburg tọn mẹ. To samedi zanmẹ dopo to 1996, alọwle Dennis po Carol tọn po ko dibla gbakija. Taidi onú godo tọn he dona yin lilẹhlan, yé magbe nado hodẹ̀ na alọgọ, ehe yé basi pludopludo kakajẹ zanhomẹ. To wunkẹngbe, to ogàn 11:00 mẹ, awe to Kunnudetọ Jehovah tọn lẹ mẹ húhú ohọ̀n yetọn. Dennis wá ohọ̀nji bo dọ na yé nado nọte kakajẹ whenuena e na ylọ asi etọn. Enẹgodo Dennis gbẹnuna Carol dọ eyin e ylọ Kunnudetọ lẹ biọ họmẹ, e sọgan sinyẹnawu nado dọna yé nado yì. Carol flinnu Dennis dọ yé ko to dẹ̀ho na alọgọ bosọ dọ dọ ehe sọgan yin gblọndo Jiwheyẹwhe tọn hlan odẹ̀ yetọn lẹ. Enẹwutu Kunnudetọ lọ lẹ yin yiylọ biọ họmẹ, bọ plọnmẹ Biblu tọn de jẹeji to owe Oyọnẹn He Nọ Planmẹ Sọyi Ogbẹ̀ Madopodo mẹ mẹ. Dennis po Carol po jẹaglin na nuhe yé plọn. Whèmẹ enẹ dopolọ, yé yì opli yetọn tintan to Plitẹnhọ Ahọluduta tọn heyin Kunnudetọ Jehovah tọn lẹ tọn he tin to lẹdo lọ mẹ. Gbọn oyọnẹn he yé ko plọn sọn Biblu mẹ lọ yiyizan dali, Dennis po Carol po mọ pọngbọ lẹ na nuhahun alọwle yetọn tọn lẹ. Yé yin ayajẹnọ todin, yèdọ gigopana Jehovah tọ́ he ko yí baptẹm lẹ bosọ nọ má nuyise sinai do Biblu ji yetọn to gbesisọmẹ hẹ kọmẹnu yetọn lẹ.
Etẹwẹ E Yin Hiẹ Lẹndọ A Ma Jẹ Nado Hodẹ̀?
Gbẹtọ ahundoponọ delẹ sọgan lẹndọ yé ma jẹ nado hodẹ̀ na aliho ylankan gbẹzan yetọn tọn lẹ tọn wutu. Jesu Klisti dọ otàn dawe mọnkọtọn de tọn, heyin tokuẹ ṣinyantọ he nọ yin vivlẹko de. To whenuena e biọ awánu tẹmpli lọ tọn mẹ, dawe ehe tindo numọtolanmẹ dọ emi ma jẹ nado biọ otẹn fie odẹ̀ nọ yin hihò te tọn mẹ. “Ṣite to aganu . . . [e] zìnnudo akọ́nnu etọn, dọmọ, Jiwheyẹwhe, yin nukundagbenọ hlan mi, ylandonọ lọ.” (Luku 18:13) Sọgbe hẹ nuhe Jesu dọ, dawe ehe mọ gblọndo nukundagbe tọn yí. Ehe dohia dọ Jehovah Jiwheyẹwhe na nugbo tọn yin homẹdagbenọ bo nọ jlo nado gọalọna ylandonọ he lẹnvọjọ sọn ahun mẹ wá lẹ.
Lẹnnupọndo dawe jọja Afrique du Sud tọn de ji he nọ yin Paul. Taidi jọja de, Paul ko nọ yì opli Klistiani tọn lẹ hẹ onọ̀ etọn. Ṣigba to owhe wehọmẹ daho yìyì tọn whenu, e jẹ gbẹdo hẹ jọja he ma nọ hodo aliho Jiwheyẹwhe tọn lẹ ji. To wehọmẹ tintọ́n sọn godo, e wazọ́n to gandudu awhànpa he klandovo Afrique du Sud tọn dai tọn mẹ. Enẹgodo, to ajiji mẹ, họntọn etọn yọnnu doalọtena haṣinṣan yetọn. Aliho awubla tọn gbẹzan tọn ehe hẹn Paul tindo numọtolanmẹ flumẹjijẹ tọn taun. “To whèjai dopo, yẹn hodẹ̀ hlan Jehovah bo biọ alọgọ etọn, dile etlẹ yindọ yẹn ma ko dọnsẹpọ Jiwheyẹwhe po ahundopo po na owhe susu lẹ.”
Ojlẹ vude to odẹ̀ ehe godo, onọ̀ Paul tọn basi oylọ na ẹn nado yì Oflin okú Klisti tọn whemẹwhemẹ tọn. (Luku 22:19) Paulu mọ ẹn taidi nubajonọmẹ dọ onọ̀ etọn wà ehe, na ewọ ko yin tasinyẹntọ bo ma tindo ojlo depope to Biblu mẹ dai. “Yẹn pọ́n oylọ-basinamẹ ehe hlan taidi gblọndo Jehovah tọn hlan odẹ̀ ṣie bosọ tindo numọtolanmẹ dọ yẹn dona basi diọdo.” Sọn ojlẹ enẹ mẹ sọyi, Paul jẹ opli Klistiani tọn lẹpo yì ji. To osun ẹnẹ plọnmẹ Biblu tọn godo, e pegan na baptẹm. Humọ, e doalọtena oplọn lẹnunnuyọnẹn zomọ tọn etọn lẹ bo de yanwle mahẹ tintindo to azọ́n wẹndagbe-jijlá whenu-gigọ tọn mẹ. To egbehe, Paul yin dawe ayajẹnọ de, bo masọ nọ blawu gando gbẹzan he ko wayi etọn go gba. Na owhe 11 he ko wayi lẹ, e ko wadevizọn to wekantẹn alahọ Ogbẹ́ Watch Tower tọn mẹ to Afrique du Sud.
Na nugbo tọn, Jehovah Jiwheyẹwhe gbọn homẹdagbe dali nọ na gblọndo na odẹ̀ lẹ bo yin “ahọsutọ yé he whesọ do din in lẹ tọn.” (Heblu lẹ 11:6) To madẹnmẹ azán daho Jehovah tọn na wá bo na hẹn opodo wá na kanyinylan lẹpo. To ojlẹ dopolọ mẹ, Jehovah to gblọndo na na odẹ̀ omẹ etọn lẹ tọn na huhlọn po anademẹ po dile yé yí zohunhun do to mahẹ tindo to azọ́n nujọnu tọn heyin kunnudide tọn mẹ. Gbọnmọ dali, gbẹtọ livi susu lẹ sọn akọta lẹpo mẹ to yinyin hinhẹn wá kọndopọmẹ hẹ agun Klistiani tọn bosọ to yinyin didona po oyọnẹn Biblu tọn he nọ planmẹ yì ogbẹ̀ madopodo mẹ po.—Johanu 17:3.
[Yẹdide to weda 5]
Odẹ̀ ahundoponọ Kọneliọsi tọn dekọtọn do dlapọn de mimọyi sọn apọsteli Pita dè mẹ
[Yẹdide to weda 6]
Odẹ̀ ko gọalọna mẹsusu lẹ nado jugbọn ojlẹ ayimajai tọn lẹ mẹ
[Yẹdide to weda 7]
Onú dagbe wẹ e yin nado hodẹ̀ na alọgọ nado mọnukunnujẹ Biblu mẹ
[Yẹdide to weda 7]
Asu po asi po he ko wlealọ lẹ sọgan hodẹ̀ na alọgọ nado hẹn alọwle yetọn lodo