Opli Whemẹwhemẹ Tọn 7 Octobre 2000

OPLI WHEMẸWHEMẸ hagbẹ Watch Tower Bible and Tract Society of Pennsylvania tọn lẹ na yin bibasi to 7 octobre 2000, to Plitẹnhọ Plidopọ Kunnudetọ Jehovah tọn lẹ tọn mẹ, to 2932 Kennedy Boulevard, Jersey City, New Jersey. Opli he nọ jẹnukọn hagbẹ lọ lẹ kẹdẹ tọn na wá aimẹ to ogàn 9:15 afọnnu tọn mẹ, bọ opli paa whemẹwhemẹ tọn lọ na bọdego to ogàn 10:00 afọnnu tọn mẹ.

Hagbẹ Pipli lọ tọn lẹ dona hẹn Wekantẹn Wekantọ tọn yọnẹn todin dogbọn diọdo depope he wá aimẹ dali to adlẹsi wekanhlanmẹ yetọn tọn lẹ na owhe he wayi mẹ na wekanhlanmẹ gbesisọ tọn heyin ayidonugo po wema nudọnamẹ tọn lẹ po nido sọgan jẹ yé dè to juillet mẹ.

Wema nudọnamẹ tọn lẹ, he na yin didohlan hagbẹ lọ lẹ to pọmẹ hẹ ayidonugo opli whemẹwhemẹ tọn lọ, na yin didohlan lẹkọ nado sọgan jẹ Wekantẹn Wekantọ Ogbẹ́ tọn e dẹn gbau to 1^er août. Hagbẹ dopodopo dona kanwe gọ́ bosọ gọ̀ wema nudọnamẹ tọn etọn jo to niyaniya mẹ, bo dohia vlavo eyin ewọ lọsu na tin to opli lọ tẹnmẹ kavi lala. Nudọnamẹ heyin nina to wema nudọnamẹ tọn dopodopo ji dona sinai do nuagokun ehe ji, to whenuena e yindọ e na yin ginganjẹ e go to yinyọ́n mẹhe na tin to finẹ lẹ mẹ.

E yin nukundo dọ adà lọ blebu, gọna opli nukunpedo akuẹzinzan go gbesisọ tọn po linlin lẹ po na yin tadona to ogàn 1:00 whèmẹ tọn mẹ kavi to madẹnmẹ to enẹgodo. Adà whèmẹ tọn ma na tin gba. Na whèdomẹ tẹnmẹ tọn wutu, họmẹ-bibiọ na yin gbọn tike kẹdẹ dali. Tito depope ma na yin bibasi nado ṣá opli whemẹwhemẹ tọn dopọ do plitẹnhọ daho devo lẹ go po alokan lẹ po gba.