Dodinnanu Whenu Dindẹn Tọn de Yin Ahọsuna

“JEHOVAH? Mẹnu wẹ yin Jehovah?” Owhe-ṣinatọn-mẹvi Silvia ko mọ oyín lọ to Biblu Arménie-gbè tọn, heyin nuhọakuẹ whẹndo de tọn heyin didohia ẹ gbọn viyọnnu pẹvi devo dali lọ mẹ. E kanse to lẹdo lọ mẹ, ṣigba mẹdepope ma tin to Yerevan, Arménie, fie e nọ nọ̀ he sọgan dọ mẹhe Jehovah yin na ẹn gba—mẹjitọ etọn lẹ wẹ o, mẹplọntọ etọn lẹ, lizọnyizọnwatọ ṣọṣi lẹdo lọ tọn lẹ ma tlẹ penugo.

Silvia whẹ́n mẹho, dotana wehọmẹ, bo mọ agbasazọ́n de, ṣigba e ma ko yọ́n mẹhe Jehovah yin. Taidi jọja he ko whẹ́n de, e dona tọ́nsọn Arménie, podọ to ojlẹ delẹ godo e yì Pologne, bo nọ nọ̀ abò pẹvi de mẹ hẹ fibẹtado-dintọ devo lẹ. Dopo to mẹhe nọ nọ̀ họmẹ hẹ ẹ lẹ mẹ nọ tindo jonọ lẹ to gbesisọmẹ. “Mẹnu wẹ jonọ towe lẹ yin?” wẹ Silvia kanse. “Yé yin Kunnudetọ Jehovah tọn lẹ, bo wá nado plọn mi Biblu,” wẹ yin gblọndo lọ.

Ahun Silvia tọn gọ́ na ayajẹ to whenuena e sè oyín lọ Jehovah. To godo mẹ, e jẹ nuplọn ji dogbọn mẹhe Jehovah yin dali podọ Jiwheyẹwhe owanyinọ nankọ die ewọ yin. Nalete, to madẹnmẹ, e dona tọ́nsọn Pologne. E dín fibẹtado to Danemark, dasá Ohù Baltique tọn. Nutindo vude poun wẹ e hẹn, ṣigba owe Biblu tọn lẹ heyin zinzinjẹgbonu gbọn Kunnudetọ Jehovah tọn lẹ dali tin to yé mẹ. To weda godo tọn owe dopo tọn ji, Silvia mọ todohukanji adlẹsi wekantẹn alahọ Ogbẹ́ Watch Tower tọn lẹ. Enẹ yin dopo to nutindo họakuẹ hugan etọn lẹ mẹ—⁠yèdọ aliho kanṣiṣa etọn tọn hlan Jehovah dè!

To Danemark, Silvia yin hinhẹn yì oslá fibẹtado-dintọ lẹ tọn mẹ, podọ e jẹ Kunnudetọ Jehovah tọn lẹ dín ji to afọdopolọji. Sọn todohukanji adlẹsi tọn etọn mẹ, e yọnẹn dọ wekantẹn alahọ Ogbẹ́ Watch Tower tọn de tin to Danemark to otò Holbæk tọn mẹ. Ṣigba fitẹ wẹ enẹ tin te? Silvia yin tẹnsẹna yì oslá devo mẹ gbọn pínpàn mẹ, podọ to aliho ji jei finẹ, pínpàn lọ gbọn Holbæk! Whladopo dogọ, ahun etọn sọ gọ́ na ayajẹ.

To madẹnmẹ to enẹgodo to owhè ṣadádá de mẹ, Silvia dó pínpàn lọ lẹkọwa Holbæk bo zinzọnlin sọn pínpàn-glintẹn lọ yì wekantẹn alahọ tọn lọ mẹ. E flin dọmọ: “To whenuena yẹn biọ jipa lọ mẹ, yẹn sinai do oján gaa de ji bo dọna dee dọ, ‘Paladisi de die!’ ” E yin kuavọdona po zohunhun po to alahọ lọ mẹ bo penugo to godo mẹ nado tindo plọnmẹ Biblu edetiti tọn.

Ṣigba tẹnsẹnamẹ susu lẹ bọdego. Sọn nọtẹn fibẹtado-dintọ lẹ tọn de jẹ devo mẹ, Silvia dona nọ dín Kunnudetọ Jehovah tọn lẹ mọ bo nọ vọ́ plọnmẹ Biblu etọn bẹjẹeji gbọzangbọzan. Ṣogan, to owhe awe godo, e ko plọn nususu nado klán gbẹzan etọn dowiwe hlan Jehovah. E yin bibaptizi bo biọ lizọnyizọn whenu-gigọ́ tọn mẹ whenu vude to enẹgodo. To 1998 gandudu Danemark tọn kẹalọyi i.

Silvia yin owhe 26 mẹvi todin bo nọ wà sinsẹ̀nzọn to nọtẹn he hẹn ẹn flin paladisi lọ mẹ, yèdọ wekantẹn alahọ Kunnudetọ Jehovah tọn lẹ tọn to Danemark. “Etẹwẹ yẹn sọgan dọ?” wẹ zẹẹmẹ he e basi todin. “Yẹn ko to Jehovah dín sọn whenue gbọ́n yẹn yin viyọnnu pẹvi de. Todin yẹn ko mọ ẹn. Ojlo vẹkuvẹku ṣie wẹ e ko yin nado yí gbẹzan ṣie zan to sinsẹ̀nzọn etọn mẹ, podọ todin yẹn tin tofi to Bẹtẹli. Odẹ̀ ṣie wẹ yindọ nọtẹn ehe ni yin owhé ṣie na owhe susu he ja lẹ!”