Be Hiẹ Tindo Zìnzìn Ya?

TO WHENUENA e to whẹdatọ lẹ de do Islaeli ji, Mose vánkan nado dín ‘sunnu zinzintọ lẹ po nuyọnẹntọ lẹ po gọna numimọnọ lẹ.’ (Deutelonomi 1:13) Numimọ, he owhe nọ hẹnwa, ma yin nujinọtedo dopo kẹdẹ lọ gba. Nuyọnẹn po zìnzìn po sọ yin nujọnu ga.

Mẹhe tindo zìnzìn nọ do wuntuntun hia to hogbe po walọyizan po mẹ. Sọgbe hẹ Webster’s Ninth New Collegiate Dictionary, gbẹtọ he tindo zìnzìn sọ nọ “penugo nado whlá oyọnẹn” ga. Mọwẹ, “whenu hodidọ tọn” tin, podọ “whenu abọẹninọ tọn” tin, podọ gbẹtọ zinzintọ nọ mọnukunnujẹ vogbingbọn lọ mẹ. (Yẹwhehodọtọ 3:7) Whlasusu, whẹwhinwhẹ́n dagbe nọ tin nado nọ abọẹ, na Biblu dọmọ: “To ohó susu mẹ yè ma sọgan ba ylanwa po: ṣigba ewọ he hẹn nùflo etọn dote wẹ [zìn].”—Howhinwhẹn lẹ 10:19.

Klistiani lẹ nọ yin sọwhiwhenọ nado yin zinzintọ to nuyiwa yetọn lẹ hẹ ode awetọ mẹ. Mẹhe nọ dọho pludopludo hugan kavi po huhlọn po hugan ma nọ yin omẹ titengbe hugan kavi nujọnu tọn lọ hugan to whepoponu gba. Flin dọ, Mose yin ‘huhlọnnọ to ohó etọn lẹ mẹ,’ ṣigba ewọ ma sọgan yin nukọntọ na akọta Islaeli tọn po kọdetọn dagbe po gba kakajẹ whenuena ewọ wleawuna homẹfa, homẹmimiọn, po mawazẹjlẹgo po. (Owalọ lẹ 7:22) Enẹwutu, mẹhe yè ze aṣẹpipa do mẹdevo lẹ ji do alọmẹ na lẹ na titengbe tọn dona vánkan nado yin whiwhẹnọ bosọ nọ do lẹnpọn dagbe hia.—Howhinwhẹn lẹ 11:2.

Mẹhe Jesu Klisti ko ze ‘nutindo etọn lẹpo’ do alọmẹ na lẹ yin zẹẹmẹ etọn basi to Ohó Jiwheyẹwhe tọn mẹ taidi ‘nugbonọ po nuyọnẹntọ po.’ (Matiu 24:45-47) Yé ma nọ gbọn jlẹkaji matindo dali dowezun jẹnukọnna Jehovah matin lẹnpọn dagbe gba; mọjanwẹ yé ma nọ dọ̀n yonu-do-godo to whenuena anademẹ Jiwheyẹwhe tọn to whẹho de mẹ họnwun do niyẹn. Yé nọ yọ́n whenu ojlẹ hodidọ tọn podọ whenu abọẹninọ na nukunnumọjẹnumẹ yinukọn dogọ tọn. Klistiani lẹpo na wà dagbe e mayin nado hodo apajlẹ yise yetọn tọn kẹdẹ wẹ gba ṣigba nado do yedelẹ hia di zinzintọ, dile hagbẹ afanumẹ lọ tọn nọ wà do.—Heblu lẹ 13:7.