Etẹwẹ Tenu-Núdùdù Oklunọ Tọn Zẹẹmẹdo Na We?
Etẹwẹ Tenu-Núdùdù Oklunọ Tọn Zẹẹmẹdo Na We?
“Mẹdepope he na dù akla he, bosọ nù kọfo Oklunọ tọn he jẹagọ, na ylanwhẹ̀ do agbasa po ohùn Oklunọ tọn po go.”—1 KỌLINTINU LẸ 11:27.
1. Nujijọ titengbe hugan tẹwẹ yin titobasina na owhe 2003, podọ nawẹ e bẹjẹeji gbọn?
NUJIJỌ titengbe hugan heyin titobasina na owhe 2003 na wá aimẹ to họyiyi owhè tọn godo to 16 avril. Whenẹnu wẹ Kunnudetọ Jehovah tọn lẹ na pli nado basi Oflin okú Jesu Klisti tọn tọn. Dile e yin didohia to hosọ he jẹnukọn mẹ do, Jesu ze hùnwhẹ ehe dai, he sọ yin yiylọdọ Tenu-Núdùdù Oklunọ tọn, to whenuena ewọ po apọsteli etọn lẹ po basi Juwayi to azán 14 Nisan owhe 33 W.M. godo. Yẹhiadonu Oflin tọn lọ lẹ, yèdọ akla madotọ́n lọ po ovẹn vẹẹ lọ po nọtena agbasa po ohùn sọndai Klisti tọn po he ma tindo ylando—heyin avọ́sinsan dopo akàn he sọgan fli gbẹtọvi sọn ylando po okú po he mí dugu etọn si.—Lomunu lẹ 5:12; 6:23.
2. Avase tẹwẹ yin kinkàndai to 1 Kọlintinu lẹ 11:27 mẹ?
2 Mẹhe to mahẹ tindo to yẹhiadonu Oflin tọn lọ mẹ lẹ dona wàmọ po sisi po. Apọsteli Paulu hẹn enẹ họnwun to whenuena e wlanwe hlan Klistiani Kọlinti hohowhenu tọn lẹ, to fie Tenu-Núdùdù Oklunọ tọn ma nọ yin bibasi to aliho he sọgbe mẹ te. (1 Kọlintinu lẹ 11:20-22) Paulu wlan dọmọ: “Mẹdepope he na dù akla he, bosọ nù kọfo Oklunọ tọn he jẹagọ, na ylanwhẹ̀ do agbasa po ohùn Oklunọ tọn po go.” (1 Kọlintinu lẹ 11:27) Etẹwẹ yin zẹẹmẹ hogbe enẹlẹ tọn?
Mẹdelẹ Basi Oflin lọ Matin Sisi
3. Nawẹ susu Klistiani Kọlinti tọn lẹ nọ yinuwado to hùnwhẹ Tenu-Núdùdù Oklunọ tọn ji ?
3 Susu Klistiani Kọlinti tọn lẹ tọn tindo mahẹ to Oflin lọ mẹ matin sisi. Kinklan tin to ṣẹnṣẹn yetọn, podọ e whè gbau na ojlẹ de, mẹdelẹ nọ hẹn núdùdù whèjai tọn yetọn wá bo nọ dù i jẹnukọn kavi to opli lọ whenu, bo nọ saba dùnú bo nùahàn zẹjlẹgo. Yé ma nọ tin to aṣeji to apọ̀nmẹ podọ to gbigbọmẹ. Ehe hẹn yé “ylanwhẹ̀ do agbasa po ohùn Oklunọ tọn po go.” Huvẹ nọ hù mẹhe ma dù núdùdù whèjai tọn lẹ bọ yé nọ yin ayihafẹsẹna. Mọwẹ, susu yetọn tindo mahẹ matin sisi bo masọ yọ́n nujọnu-yinyin nujijọ lọ tọn to gigọ́mẹ. Abajọ yé hẹn whẹgbledo wá yede ji!—1 Kọlintinu lẹ 11:27-34.
4, 5. Naegbọn mẹdetiti gbigbejepọn yin dandannu na mẹhe nọ saba tindo mahẹ to yẹhiadonu Oflin tọn mẹ lẹ?
4 Dile Oflin lọ to sisẹpọ to owhe dopodopo mẹ, mẹdetiti gbigbejepọn yin dandan na mẹhe nọ saba tindo mahẹ to yẹhiadonu lọ mẹ lẹ. Nado tindo mahẹ to núdùdù pọmẹ tọn ehe mẹ to aliho he sọgbe mẹ, yé dona tin to ninọmẹ dagbe gbigbọmẹ tọn mẹ. Mẹdepope he ma do sisi hia, kavi vlẹ avọ́sinsan Jesu tọn na tin to owù yinyin ‘sinsán sẹ sọn omẹ Jiwheyẹwhe tọn lẹ mẹ tọn mẹ,’ dile e nọ yin do na Islaelivi de he tindo mahẹ to núdùdù pọmẹ tọn de mẹ to ninọmẹ mawé tọn mẹ.—Levitiku 7:20; Heblu lẹ 10:28-31.
5 Paulu yí Oflin lọ jlẹdo núdùdù pọmẹ tọn to Islaeli hohowhenu tọn mẹ go. E dọ dọ mahẹ tindotọ lẹ to núdù hẹ Klisti bosọ dọ bọdego dọ: “Mìwlẹ ma sọgan nù kọfo [Jehovah] tọn, po kọfo aovi lẹ tọn po gba: mìwlẹ ma sọgan yin mimátọ tafo [Jehovah] tọn, po tafo aovi lẹ tọn po gba.” (1 Kọlintinu lẹ 10:16-21) Eyin mẹde he nọ tindo mahẹ to yẹhiadonu Oflin tọn mẹ waylando sinsinyẹn, e dona yigbe ehe tọn na Jehovah bo dín alọgọ gbigbọmẹ tọn sọn mẹho agun tọn lẹ dè. (Howhinwhẹn lẹ 28:13; Jakobu 5:13-16) Eyin e lẹnvọjọ nugbonugbo bo de sinsẹ́n he jẹ na lẹnvọjọ lẹ hia, e ma na to mahẹ tindo po sisi matindo po.—Luku 3:8.
Oflin Yìyì Taidi Nupọntọ He Tindo Sisi Lẹ
6. Mẹnu lẹ wẹ Jiwheyẹwhe ko na lẹblanulọkẹyi vonọtaun mahẹ tintindo to Tenu-Núdùdù Oklunọ tọn mẹ tọn?
6 Be mẹhe to dagbe wà hlan pipotọ mẹmẹsunnu 144 000 Klisti tọn lẹ todin lẹ dona nọ tindo mahẹ to Tenu-Núdùdù Oklunọ tọn mẹ wẹ ya? (Matiu 25:31-40; Osọhia 14:1) Lala. Jiwheyẹwhe ko na lẹblanulọkẹyi vonọtaun enẹ mẹhe e yí gbigbọ wiwe do de nado yin “whédutọ dopọ hẹ Klisti” lẹ kẹdẹ. (Lomunu lẹ 8:14-18; 1 Johanu 2:20) To whelọnu lo, etẹwẹ yin otẹn mẹhe tindo todido nado nọgbẹ̀ kakadoi to paladisi aigba ji tọn mẹ to gandudu Ahọluduta tọn glọ lẹ tọn? (Luku 23:43; Osọhia 21:3, 4) Na yé mayin whédutọgbẹ́ Jesu tọn he tindo todido olọn mẹ tọn wutu, yé nọ yì Oflin lọ taidi nupọntọ he tindo sisi lẹ.—Lomunu lẹ 6:3-5.
7. Naegbọn Klistiani owhe kanweko tintan tọn lẹ yọnẹn dọ yé dona tindo mahẹ to yẹhiadonu Oflin tọn lẹ mẹ?
7 Klistiani nugbo owhe kanweko tintan tọn lẹ yin dide gbọn gbigbọ wiwe dali. Suhugan yetọn penugo nado yí dopo kavi susu nunina jiawu gbigbọ tọn lẹ zan, taidi ogbè voovo didó. Enẹwutu, e ma na ko sinyẹn na omẹ enẹlẹ nado yọnẹn dọ gbigbọ ko de yé bọ yé dona tindo mahẹ to yẹhiadonu Oflin tọn lẹ mẹ. Ṣigba to ojlẹ mítọn mẹ, ehe sọgan yin yinyọnẹn to dodonu hodidọ gbọdo mọnkọtọn lẹ ji taidi ehelẹ he dọmọ: “Omẹ sọha he yè hlẹali gbọn gbigbọ Jiwheyẹwhe tọn dali, yé wẹ ovi Jiwheyẹwhe tọn. Na mìwlẹ ma yí gbigbọ mẹglọnọ tọn nasọ do to budi gba; ṣigba gbigbọ sọdodovi tọn wẹ mì yí ehe tọn dali mí to awhádo ylọ, Abba, Otọ́.”—Lomunu lẹ 8:14, 15.
8. Mẹnu lẹ wẹ nọtena “likun” po “ogbé ylankan” heyin nùdego to Matiu weta 13 mẹ lẹ po?
8 To owhe kanweko lẹ gblamẹ, mẹyiamisisadode nujọnu tọn lẹ ko wú taidi “likun” to ogle “ogbé ylankan,” kavi Klistiani lalo tọn lẹ tọn mẹ. (Matiu 13:24-30, 36-43) Sọn owhe 1870 lẹ gbọ́n, “likun” lọ sọawuhia hezeheze dogọ, bọ Klistiani nugopọntọ yiamisisadode lẹ yin didọna to nukọnmẹ dọmọ: “Mẹho lẹ . . . dona ze ninọmẹ po nubiọtomẹsi ehelẹ po donukọnna mẹhe pli [na Oflin lọ] lẹ,—(1) yise to ohùn [Klisti tọn] mẹ; podọ (2) klandowiwe hlan Oklunọ po sinsẹ̀nzọn etọn po, yèdọ kakajẹ okú. Enẹgodo wẹ yé ni basi oylọ na mẹhe tindo linlẹn mọnkọtọn bo ko klan yede do wiwe lẹpo nado tindo mahẹ to hùnwhẹ okú Oklunọ tọn mẹ.”—Études des Écritures, Bladopọ VI, La Nouvelle Création, weda 473. *
“Lẹngbọ Devo” lẹ Dindin
9. Nawẹ “gbẹtọ susu” lọ yinyọnẹn yin hinhẹn họnwun to 1935 gbọn, podọ nawẹ ehe yinuwado delẹ to mẹhe ko nọ tindo mahẹ to yẹhiadonu Oflin tọn mẹ dai ji do?
9 To nukọnmẹ, titobasinanu Jehovah tọn jẹ ayidonugo zedo mẹdevo he mayin hodotọ yiamisisadode Klisti tọn lẹ ji. Nujijọ ayidego tọn de wá aimẹ gando ehe go to gblagbla owhe 1930 tọn lẹ mẹ. Jẹnukọnna ojlẹ enẹ, omẹ Jiwheyẹwhe tọn lẹ nọ pọ́n “gbẹtọ susugege” Osọhia 7:9 mẹ tọn hlan taidi pipli awetọ gbigbọmẹ tọn de he na yin kinkọndopọ hẹ mẹyiamisisadode 144 000 heyin finfọnsọnku lẹ to olọn mẹ—taidi họntọn asi-yọyọ tọn kavi hagbẹ asi yọyọ Klisti tọn lẹ. (Psalm 45:14, 15; Osọhia 7:4; 21:2, 9) Ṣigba to 31 mai 1935, to hodidọ de mẹ to plidopọ Kunnudetọ Jehovah tọn lẹ tọn de ji to Washington, D.C., États-Unis, e yin didohia sọn Owe-wiwe mẹ dọ “gbẹtọ susugege” (gbẹtọgun daho lọ,” King James Version) nọtena “lẹngbọ devo” he to gbẹnọ to ojlẹ opodo tọn mẹ lẹ. (Johanu 10:16) To plidopọ enẹ godo, mẹhe ko nọ tindo mahẹ to yẹhiadonu Oflin tọn mẹ dai delẹ doalọte na yé yọnẹn dọ todido aigba ji tọn wẹ yé tindo, e mayin olọn mẹ tọn.
10. Nawẹ hiẹ na basi zẹẹmẹ todido po azọngban “lẹngbọ devo” egbezangbe tọn lẹ po tọn gbọn?
10 Na taun tọn sọn 1935 gbọ́n wẹ dindin mẹhe wá lẹzun “lẹngbọ devo,” he tindo yise to ofligọ lọ mẹ, klan yede do wiwe hlan Jiwheyẹwhe, bo to godonọna “lẹngbọpa pẹvi” lọ to azọ́n yẹwhehodidọ Ahọluduta tọn mẹ ko to nukọnzindo. (Luku 12:32) Todido lẹngbọ devo ehelẹ tọn wẹ nado nọ̀ aigba ji kakadoi, ṣigba to ninọmẹ devo lẹ mẹ, yé taidi pipotọ whédutọgbẹ́ egbezangbe Ahọluduta lọ tọn lẹ. Taidi wáṣinu Islaeli hohowhenu tọn he sẹ̀n Jehovah bo setonuna Osẹ́n lọ lẹ, lẹngbọ devo egbehe tọn lẹ kẹalọyi azọngban Klistiani tọn lẹ, taidi yẹwheho wẹndagbe lọ tọn didọ to pọmẹ hẹ hagbẹ Islaeli gbigbọmẹ tọn lẹ. (Galatianu lẹ 6:16) Kẹdẹdile wáṣinu de ma sọgan lẹzun ahọlu Islaeli tọn kavi yẹwhenọ de do, mọwẹ depope to lẹngbọ devo lẹ mẹ ma sọgan dugán to Ahọluduta olọn mẹ tọn mẹ kavi yinuwa taidi yẹwhenọ lẹ do niyẹn.—Deutelonomi 17:15.
11. Naegbọn ojlẹ he mẹ mẹde yí baptẹm te sọgan yinuwado todido etọn ji?
11 To 1930 lẹ gblamẹ, e họnwun dogọ dọ, hagbẹ olọn mẹ tọn lẹ ko yin dide to paa mẹ. Na owhe 70 nkọtọn todin, dindin lẹngbọ devo, he tindo todido aigba ji tọn lẹ ko to nukọnzindo. Eyin mẹyiamisisadode de lẹzun nugbomadọtọ, e yọnbasi taun dọ dopo to lẹngbọ devo lẹ mẹ he ko sẹ̀n Jiwheyẹwhe po nugbonọ-yinyin po na ojlẹ dindẹn nọ yin yiylọ nado yí otẹn mẹyiamisisadode lọ tọn to 144 000 lẹ mẹ.
Nuhewutu Mẹdelẹ Lẹndọ Yé Tindo Todido Olọn mẹ Tọn
12. Ninọmẹ tẹlẹ glọ wẹ mẹde dona doalọtena mahẹ tintindo to yẹhiadonu Oflin tọn lẹ mẹ te, podọ etẹwutu?
12 Klistiani yiamisisadode lẹ deji mlẹnmlẹn dọ oylọ olọn mẹ tọn wẹ yé tindo. Ṣigba eyin mẹhe ma tindo oylọ ehe delẹ ko to mahẹ tindo to yẹhiadonu Oflin tọn lẹ mẹ ka lo? Todin he yé yọnẹn dọ yé ma tindo todido olọn mẹ tọn, na jide tọn ayihadawhẹnamẹnu yetọn na whàn yé nado doalọte. Jiwheyẹwhe ma na yí nukundagbe do pọ́n mẹdepope he to ede dohia taidi mẹhe ko yin yiylọ nado yin ahọlu po yẹwhenọ po to olọn mẹ to whenuena omẹ lọ lọsu yọnẹn ganji dọ emi ma tindo oylọ enẹ. (Lomunu lẹ 9:16; Osọhia 20:6) Jehovah hù Kola heyin Levinu de na e gbọn sakla dali dín yẹwhenọduta Aalọn tọn wutu. (Eksọdusi 28:1; Osọha lẹ 16:4-11, 31-35) Eyin Klistiani de wá yọnẹn dọ emi ko gbọn nuṣiwa dali bo to mahẹ tindo to yẹhiadonu Oflin tọn lẹ mẹ, e dona doalọte bo yí whiwhẹ do hodẹ̀ na jona Jehovah tọn.—Psalm 19:13.
13, 14. Naegbọn mẹdelẹ sọgan gbọn nuṣiwa dali lẹndọ yé tindo oylọ olọn mẹ tọn?
13 Naegbọn mẹdelẹ sọgan gbọn nuṣiwa dali lẹndọ yé tindo oylọ olọn mẹ tọn? Okú alọwlemẹ de tọn kavi nugbajẹmẹji devo lẹ sọgan hẹn yé nado hẹn ojlo bu to gbẹninọ aigba ji tọn mẹ. Kavi yé sọgan jlo todido olọn mẹ tọn na họntọn vivẹ́ yetọn de dọ dọ emi yin Klistiani yiamisisadode de wutu. Na nugbo tọn, Jiwheyẹwhe ma ko de mẹdepope nado na tuli mẹdevo lẹ na lẹblanulọkẹyi ehe gba. Podọ e ma nọ de whédutọgbẹ́ Ahọluduta lọ tọn lẹ gbọn hinhẹn yé nado se ogbè lẹ he dohia dọ yé ko yin dide dali gba.
14 Linlẹn agọ̀ sinsẹ̀n lalo tọn lọ dọ gbẹtọ dagbe lẹpo wẹ nọ yì olọn mẹ sọgan hẹn mẹdelẹ nado lẹndọ yé tindo oylọ olọn mẹ tọn. Enẹwutu, mí dona họ́ míde sọta yinyin nuyiwadeji gbọn pọndohlan kavi linlẹn agọ̀ he ko wayi lẹ dali. Di dohia, mẹdelẹ sọgan kanse yedelẹ dọ: ‘Be yẹn zan amasin de he yinuwado numọtolanmẹ ṣie lẹ ji wẹ ya? Be yẹn nọ tindo numọtolanmẹ sisosiso he sọgan zọ́n bọ na gbọn nuṣiwa dali lẹndọ yẹn yin dopo to mẹyiamisisadode lẹ mẹ wẹ ya?’
15, 16. Naegbọn omẹ vude sọgan wá tadona kọ̀n dọ yé yin mẹyiamisisadode?
15 Omẹ vude sọgan kanse yede dọ: ‘Be yẹn jlo nado diyin wutu wẹ ya? Be na yẹn tindo ojlo zogbe na aṣẹpipa todin kavi nado lẹzun whédutọgbẹ́ sọgodo tọn de hẹ Klisti wutu wẹ ya? To whenuena whédutọgbẹ́ Ahọluduta tọn lẹ yin yiylọ to owhe kanweko tintan whenu, e mayin yemẹpo wẹ tindo azọngban to agun mẹ gba. Podọ mẹhe tindo oylọ olọn mẹ tọn lẹ ma nọ dín nado diyin kavi doawagun gando dide yetọn go gba. Yé nọ do whiwhẹ heyin nukundo sọn mẹhe tindo “ayiha Klisti tọn” lẹ dè hia.—1 Kọlintinu lẹ 2:16.
16 Mẹdelẹ sọgan ko wá tadona lọ kọ̀n dọ yé tindo oylọ olọn mẹ tọn na yé tindo oyọnẹn Biblu tọn susugege wutu. Ṣigba yinyin dide gbọn gbigbọ dali ma nọ hẹn nukunnumọjẹnumẹ vonọtaun wá gba, na Paulu dona plọn bo jla linlẹn mẹyiamisisadode delẹ tọn do. (1 Kọlintinu lẹ 3:1-3; Heblu lẹ 5:11-14) Jiwheyẹwhe tindo tito he gblamẹ e nọ na núdùdù gbigbọmẹ tọn omẹ etọn lẹpo te. (Matiu 24:45-47) Mẹdepope ma dona lẹndọ yinyin Klistiani yiamisisadode de hẹn emi tindo nuyọnẹn he yiaga hugan mẹhe tindo todido aigba ji tọn lẹ gba. Yinyin dide gbọn gbigbọ dali ma nọ yin didohia gbọn gblọndo Biblu tọn lẹ nina ganji, kunnudide, kavi hodidọ Biblu tọn lẹ nina mẹ gba. Klistiani he tindo todido aigba ji tọn lẹ lọsu pegan tlala to adà ehelẹ mẹ.
17. Etẹ ji wẹ yinyin dide po gbigbọ po sinai do, podọ azọngban mẹnu tọn wẹ e yin?
17 Eyin yisenọ hatọ de kàn kanbiọ se gando oylọ olọn mẹ tọn go, mẹho de kavi Klistiani he whèwhín devo sọgan dọhodo whẹho lọ ji hẹ ẹ. Etomọṣo, mẹde ma sọgan basi nudide lọ na mẹdevo gba. Mẹhe tindo oylọ ehe nugbonugbo de ma tindo nuhudo nado kanse mẹdevo eyin e tindo todido enẹ gba. Mẹyiamisisadode lẹ “lẹzun mẹvọji, e mayin sọn okún gbigble mẹ gba, ṣigba sọn magble mẹ, gbọn ohó Jiwheyẹwhe tọn dali, ehe togbẹ̀, bo nasọ tin to ote kakadoi.” (1 Pita 1:23) Gbọn gbigbọ po Ohó etọn po gblamẹ, Jiwheyẹwhe dó “okún” he nọ hẹn omẹ lọ zun “mẹdida yọyọ,” he tindo todido olọn mẹ tọn. (2 Kọlintinu lẹ 5:17) Jehovah wẹ nọ basi nudide lọ. Yinyin mẹyiamisisadode “mayin ewọ he to jijlo tọn, kavi ewọ he to wezundo tọn, ṣigba Jiwheyẹwhe . . . tọn wẹ.” (Lomunu lẹ 9:16) Enẹwutu nawẹ mẹde sọgan deji dọ emi tindo oylọ olọn mẹ tọn gbọn?
Nuhewutu Yé Yin Nujikudonọ
18. Nawẹ gbigbọ Jiwheyẹwhe tọn nọ dekunnu na gbigbọ mẹyiamisisadode lẹ tọn gbọn?
18 Kunnudide gbigbọ Jiwheyẹwhe tọn tọn nọ hẹn Klistiani yiamisisadode lẹ deji dọ yé tindo todido olọn mẹ tọn. Paulu wlan dọmọ: “Gbigbọ sọdodovi tọn wẹ mì yí ehe tọn dali mí to awhádo ylọ, Abba, Otọ́. Gbigbọ lọsu to kunnude hẹ gbigbọ mítọn, dọ ovi Jiwheyẹwhe tọn wẹ mí; be eyin mí yin ovi, whenẹnu whédutọ; whédutọ Jiwheyẹwhe tọn, podọ whédutọ dopọ hẹ Klisti; eyin e yin mọ dọ mí jiya hẹ ẹ, na yè nido pagigona mí dopọ hẹ ẹ ga.” (Lomunu lẹ 8:15-17) To anademẹ gbigbọ wiwe tọn glọ, gbigbọ mẹyiamisisadode lẹ tọn nọ whàn yé nado yí yede zan na nuhe Owe-wiwe dọ gando ovi gbigbọmẹ tọn Jehovah tọn lẹ go. (1 Johanu 3:2) Gbigbọ Jiwheyẹwhe tọn nọ na yé linlẹn ovi-yinyin hlan ẹn tọn bosọ nọ zín todido vonọtaun de do yé mẹ. (Galatianu lẹ 4:6, 7) Mọwẹ, gbẹninọ kakadoi to agbasalilo mẹ to aigba ji hẹ hagbẹ whẹndo tọn lẹ po họntọn lẹ po na yin awuvivinu taun, ṣigba enẹ mayin todido he Jiwheyẹwhe na yé lọ gba. Gbọn gbigbọ etọn gblamẹ, Jiwheyẹwhe ko wleawu todido dolido olọn mẹ tọn enẹ do yé mẹ bọ yé nọ jlo nado yí kanṣiṣa po todido aigba ji tọn lẹpo po do sanvọ́.—2 Kọlintinu lẹ 5:1-5, 8; 2 Pita 1:13, 14.
19. Otẹn tẹ mẹ wẹ alẹnu yọyọ lọ tin te to gbẹzan Klistiani yiamisisadode lẹ tọn mẹ?
19 Klistiani yiamisisadode lẹ yọnẹn dọ todido olọn mẹ tọn yetọn, yèdọ yinyin yíyí do alẹnu yọyọ mẹ tọn yin nujikudo tọn. Jesu donù e go to whenuena e ze Oflin lọ dai bo dọmọ: “Kọfo he wẹ alẹnu yọyọ to ohùn ṣie mẹ, yèdọ enẹ he yè [na] kọ̀n na mì.” (Luku 22:20) Adà voovo alẹnu yọyọ lọ tọn lẹ wẹ Jiwheyẹwhe po mẹyiamisisadode lẹ po. (Jẹlemia 31:31-34; Heblu lẹ 12:22-24) Jesu wẹ whẹgbọtọ. Na hùnsọndai Klisti tọn wẹ hẹn ẹn tindo huhlọn wutu, e mayin Ju lẹ mẹ kẹdẹ wẹ alẹnu yọyọ lọ yí gbẹtọ sọn gba ṣigba sọn akọta lẹpo mẹ na yinkọ Jehovah tọn wutu bosọ hẹn yé yin apadewhe “okún” Ablaham tọn lẹ. (Galatianu lẹ 3:26-29; Owalọ lẹ 15:14) “Alẹnu madopodo” ehe hẹn ẹn yọnbasi na Islaelivi gbigbọmẹ tọn lẹpo nado yin finfọnsọnku do ogbẹ̀ jọmaku tọn mẹ to olọn mẹ.—Heblu lẹ 13:20.
20. Alẹnu tẹ mẹ wẹ Klisti yí mẹyiamisisadode lẹ do?
20 Todido mẹyiamisisadode lẹ tọn yin nujikudo tọn. Yé ko yin hinhẹn biọ alẹnu devo mẹ, yèdọ alẹnu Ahọluduta tọn. Gando mahẹ tintindo hẹ Klisti go yetọn, Jesu dọmọ: “Mìwlẹ wẹ mẹhe ko nọte hẹ mi to whlepọn ṣie lẹ mẹ. Yẹn sọ de ahọludu de hlan mì, dile Otọ́ ṣie de hlan mi do.” (Luku 22:28-30) Alẹnu ehe to Klisti po ahọlu gbẹdohẹmẹtọ etọn lẹ po ṣẹnṣẹn na tin kakadoi.—Osọhia 22:5.
Ojlẹ Oflin Tọn—Ojlẹ Ayajẹ Tọn De
21. Nawẹ mí sọgan mọaleyi to gigọ́mẹ sọn ojlẹ Oflin tọn mẹ gbọn?
21 Dona susu wẹ nọ yin mimọyi to ojlẹ Oflin tọn mẹ. Mí sọgan mọaleyi sọn Biblu hihia heyin titodohukanji na ojlẹ ehe mẹ. Ojlẹ he sọ yọ́n taun de wẹ e yin na dẹ̀hiho, ayihamẹlinlẹnpọn do gbẹzan aigba ji Jesu tọn po okú etọn po ji, gọna mahẹ tintindo to azọ́n yẹwhehodidọ Ahọluduta tọn mẹ. (Psalm 77:12; Filippinu lẹ 4:6, 7) Hùnwhẹ lọ lọsu nọ flin mí owanyi he Jiwheyẹwhe po Klisti po dohia to kọndopọmẹ hẹ avọ́sinsan ofligọ Jesu tọn. (Matiu 20:28; Johanu 3:16) Awuwledainanu ehe nọ na mí todido po homẹmimiọn po bo nọ hẹn gbemima mítọn lodo nado doafọna gbẹzan he taidi Klisti tọn. (Eksọdusi 34:6; Heblu lẹ 12:3) Oflin lọ sọ dona na huhlọn mí nado hẹn klandowiwe mítọn taidi devizọnwatọ Jiwheyẹwhe tọn lẹ po hodotọ nugbonọ Ovi yiwanna etọn tọn po di ga.
22. Etẹwẹ yin nunina he klo hugan he Jiwheyẹwhe na gbẹtọvi, podọ aliho tẹ mẹ wẹ mí sọgan do pinpẹn-nutọn-yinyọnẹn hia na ẹn te?
22 Nunina dagbe nankọ lẹ die Jehovah na mí! (Jakobu 1:17) Mí tindo anademẹ Ohó etọn tọn, alọgọ gbigbọ etọn tọn, po todido ogbẹ̀ mavọmavọ tọn po. Nunina he klo hugan Jiwheyẹwhe tọn lọ wẹ avọ́sinsan Jesu tọn na ylando mẹyiamisisadode lẹ tọn podọ na mẹdevo he do yise hia lẹpo tọn ga. (1 Johanu 2:1, 2) Enẹwutu nawẹ okú Jesu tọn họakuẹ na we sọ? Be hiẹ na tin to mẹhe do pinpẹn-nutọn-yinyọnẹn hia na ẹn gbọn pipli dopọ to whèjai 16 avril 2003, nado basi Tenu-Núdùdù Oklunọ tọn lẹ mẹ ya?
[Nudọnamẹ Odò Tọn]
^ par. 8 Yin zinzinjẹgbonu gbọn Kunnudetọ Jehovah tọn lẹ dali ṣigba masọ tin-to-aimẹ ba.
Etẹwẹ Yin Gblọndo Towe?
• Mẹnu lẹ wẹ dona nọ tindo mahẹ to yẹhiadonu Oflin tọn lẹ mẹ?
• Naegbọn “lẹngbọ devo” lẹ nọ yì Tenu-Núdùdù Oklunọ tọn taidi nupọntọ he tindo sisi lẹ poun?
• Nawẹ Klistiani yiamisisadode lẹ nọ yọnẹn gbọn dọ yé dona tindo mahẹ to akla lọ po ovẹn lọ po mẹ to Oflin okú Klisti tọn ji?
• Etẹwẹ ojlẹ Oflin tọn yin ojlẹ dagbe na?
[Kanbiọ Oplọn Tọn Lẹ]
[Yẹdide Zẹẹmẹ-Bibasi Tọn/Yẹdide to weda 18]
(Nado mọ yẹdide ganji, pọ́n zinjẹgbonu)
Oflin-Watọ Lẹ
TO LIVI LẸ MẸ
15 597 746
15
14
13 147 201
13
12
11
10
9
8
7
6
5
4 925 643
4
3
2
1
878 303
63 146
1935 1955 1975 1995 2002
[Yẹdide to weda 18]
Be hiẹ na tin to Tenu-Núdùdù Oklunọ tọn tẹnmẹ to owhe ehe mẹ ya?
[Yẹdide lẹ to weda 21]
Ojlẹ Oflin tọn yin ojlẹ dagbe na Biblu hihia podọ mahẹ tintindo to azọ́n yẹwhehodidọ Ahọluduta tọn mẹ dogọ