Adọkun He Whlá lẹ Mimọ

BE HIẸ ko mọ adọkun he whlá to fie a ma lẹndọ a sọgan mọ ẹn te de pọ́n ya? Ivo Laud, he yin dopo to Kunnudetọ Jehovah tọn lẹ mẹ mọ onú mọnkọtọn de to Estonie to 27 mars 2005. E to alọgọna Alma Vardja, he yin Kunnudetọ hatọ mẹhomẹ de nado họ́ ohọ̀ hoho de liai. Dile yé jẹ adó lọ họ́ ji sọn gbonu, yé mọ dòtin de he yè yí owhlẹ do sú adà etọn dopo. Whenue yé de owhlẹ lọ sẹ̀, yé mọ odò de to dòtin lọ go he gblo sọ centimètre 10, dite sọ mẹtlu 1,2, podọ e yì homẹ sọ centimètre 10, bọ owhlẹ he yè yí do sú i lọ tindo sinmẹ dopolọ hẹ dòtin lọ. (1) Odi adọkun he whlá lẹ tọn wẹ! Adọkun tẹlẹ wẹ? Mẹnu wẹ ze yé whlá do finẹ?

Wepò susu he yè yí wema do bu po sọwhiwhe po lẹ wẹ tin to odi lọ lẹ mẹ. (2) Wepò lọ lẹ bẹ owe Kunnudetọ  Jehovah tọn lẹ tọn delẹ hẹn, he suhugan yetọn yin hosọ oplọn tọn sọn Atọ̀họ̀-Nuhihọ́ Lọ Tọn lẹ mẹ, he delẹ yin sọn 1947. (3) Yè yí alọ do kàn yé po sọwhiwhe po do Estonie-gbè mẹ. Delẹ to wepò lọ lẹ mẹ tindo ohia he yè sọgan yí do yọ́n mẹhe whlá yé do finẹ tọn. Nudọnamẹ he gando hokansemẹ asu Alma tọn he nọ yin Villem Vardja go lẹ wẹ kandai enẹlẹ bẹhẹn, gọna nudọnamẹ he gando owhe he e yizan to gànpamẹ lẹ go. Naegbọn e do yin wiwle do gànmẹ?

Villem Vardja sẹ̀n taidi dopo to mẹhe tindo azọngban to Agun Tartu tọn mẹ podọ to enẹgodo, to Agun Otepää tọn mẹ to Estonie, yèdọ dopo to otò Républiques socialistes soviétiques dai tọn lẹ mẹ. Vlavo e na ko mọ nugbo to gblagbla owhe he jẹnukọnna Wẹkẹ-Whàn II lọ tọn lẹ mẹ. To owhe vude godo to 24 décembre 1948, gandudu Communiste tọn wle Mẹmẹsunnu Vardja na nuwiwa sinsẹ̀n tọn he mẹ e nọ doalọ te lẹ wutu. Ponọ nuglọ tọn lẹ kanhose e bo yinuwa hẹ ẹ po kanyinylan po bo tẹnpọn nado hẹn ẹn po huhlọn po nado dọ oyín yisenọ hatọ etọn lẹ tọn na yé. Whenue yé gbẹ́ nado na ẹn jlọjẹ nado yiavunlọna ede to owhẹ̀ nukọn godo, yé dawhẹ na ẹn dọ e na sẹ̀ngàn na owhe ao to gànpa Russie tọn lẹ mẹ.

Villem Vardja gbọṣi nugbonọ-yinyin mẹ na Jehovah kakajẹ whenue e kú to 6 mars 1990. Asi etọn ma tlẹ yọnẹn dọ e ze owe de whlá. Hihọ́ basi na asi etọn wẹ e na ko te na yé nikaa wle e bo kanhose e. Naegbọn e ze owe lọ lẹ whlá? E wàmọ, na Wedegbẹ́ He Nọ Basi Hihọ́na Otò Soviétique tọn, yèdọ KGB, nọ saba wá gbà owhé Kunnudetọ Jehovah tọn lẹ tọn pọ́n bo nọ to owe sinsẹ̀n tọn lẹ dín. Vlavo Mẹmẹsunnu Vardja na ko ze owe enẹlẹ whlá nado hẹn ẹn diun dọ núdùdù gbigbọmẹ tọn de tin-to-aimẹ na yisenọ hatọ lẹ eyin e wá jọ bọ KGB lẹ bẹ nulẹpo sọn yé si. Odi owe devo lẹ tọn yin mimọ to alunlun 1990 tọn mẹ. Dopo yin mimọ to Tartu, to hùwaji Estonie tọn. Villem Vardja wẹ ze enẹ lọsu whlá.

Naegbọn mí ylọ owe ehelẹ dọ adọkun? Na owe he yè yí alọ do kàn po sọwhiwhe po bosọ yin zize whlá ganji ehelẹ do lehe Kunnudetọ lẹ yọ́n pinpẹn núdùdù gbigbọmẹ tọn he tin-to-aimẹ to whenẹnu tọn do hia. (Mat. 24:45) Be a nọ yọ́n pinpẹn awuwledainanu gbigbọmẹ tọn he a nọ mọyi todin to lẹdo towe mẹ lẹ tọn ya? Dopo to yé mẹ wẹ Atọ̀họ̀-Nuhihọ́ Lọ Tọn he tin to Estonie-gbè mẹ gọna ogbè he hugan 170 devo lẹ.