Hẹn Nugbonọ-Yinyin Towe Go to Aihọn Nugbomadọ Tọn de Mẹ

NUGBOMADỌ gbayipe gbọn filẹpo taidi jẹhọn. Gbẹtọ lẹ nọ dolalo, nọ doahi vivẹ́ na nulẹ, nọ jajo, ma nọ suahọ he yé dù lẹ, bo nọ doawagun to ajọ́ he nọ yawu hẹn ale wá lẹ mẹ. Na mí to gbẹnọ to lẹdo ehe mẹ wutu, mí nọ saba pehẹ ninọmẹ he nọ whlé gbemima mítọn nado hẹn nugbonọ-yinyin go lẹ pọ́n. Nawẹ mí sọgan zindonukọn nado nọavùnte sọta ayilinlẹn nugbomadọ tọn gbọn? Mì gbọ mí ni gbadopọnna onú titengbe atọ̀n he na gọalọna mí nado nọ wàmọ lẹ. Onú lọ lẹ wẹ budisi Jehovah, ayihadawhẹnamẹnu dagbe de po pekọ tintindo po.

Budisi Jehovah He Sọgbe

Yẹwhegán Isaia wlan dọmọ: ‘Jehovah wẹ Whẹdatọ mítọn, Jehovah wẹ Osẹ́nnọ mítọn, Jehovah wẹ Ahọlu mítọn.’ (Isa. 33:22) Eyin mí nọ kẹalọyi aṣẹpipa Jehovah tọn, ehe na gọalọna mí nado wleawuna budisi Jiwheyẹwhe—yèdọ huhlọn de he nọ whàn mí nado nọavùnte sọta gbigbọ nugbomadọ tọn. Howhinwhẹn lẹ 16:6 dọmọ: “Gbọn osi OKLUNỌ tọn dali wẹ gbẹtọ fọnyi sọn oylan mẹ.” Obu enẹ ma zẹẹmẹdo sijọsijọ ji ninọ na Jiwheyẹwhe kanylantọ de gba, kakatimọ obu he sọgbe ma nado hẹn homẹgble Otọ́ olọn mẹ tọn mítọn wẹ e yin, mẹhe dagbemẹninọ mítọn nọ duahunmẹna taun.—1 Pita 3:12.

Numimọ jọnun gbẹzan tọn de do kọdetọn dagbe he obu mọnkọtọn tintindo nọ hẹnwa hia. Ricardo po asi etọn Fernanda po yí akuẹ he yì dọla Amelika tọn 700 (nudi 330000 F CFA) sọn akuẹsẹdotẹn yetọn. a Fernanda ma hia akuẹ lọ whẹpo do bẹ ẹ do akuẹ-hẹnnu etọn mẹ. To whenue yé ko suahọ delẹ bo yì whégbè godo, e paṣa yé dọ diblayin akuẹ he yé yí to akuẹsẹdotẹn lọ pẹpẹ wẹ gbẹ́ pò to akuẹ-hẹnnu Fernanda tọn mẹ. Yé wá tadona lọ kọ̀n dọ, “Nawe he yí akuẹ na mí to akuẹsẹdotẹn lọ wẹ na ko ṣinuwa.” Jẹnukọn whẹ́, yé yin whiwhlepọn nado hẹn akuẹ lọ go to whenuena e yindọ ahọ́ devo lẹ gbẹ́ pò bọ yé na sú. Ricardo basi zẹẹmẹ dọmọ: “Mí hodẹ̀ dọ Jehovah ni na mí huhlọn nado gọ̀ akuẹ lọ jo. Ojlo mítọn nado hẹn homẹ etọn hùn sọgbe hẹ tulinamẹ etọn he tin to Howhinwhẹn lẹ 27:11 mẹ whàn mí nado gọ̀ akuẹ lọ jo.”

Ayihadawhẹnamẹnu He Yin Pinplọn Gbọn Biblu Dali

Mí sọgan wleawuna ayihadawhẹnamẹnu dagbe de eyin mí nọ plọn Biblu bo nọ dovivẹnu nado yí nuhe mí plọn lẹ do yizan mẹ. Gbọnmọ dali, ‘ohó Jiwheyẹwhe tọn he tin to ogbẹ̀ bo tindo huhlọn,’ ma na yinuwado ayiha mítọn kẹdẹ ji gba, ṣigba do ahun mítọn lọsu ji. Ehe na whàn mí “nado nọ yinuwa po ahundopo po to onú lẹpo mẹ.”—Heb. 4:12; 13:18.

Lẹnnupọndo apajlẹ João tọn ji. E duahọ daho de he yì dọla Amelika tọn 5000 (nudi 2440000 F CFA). Enẹgodo, e nọ ahọ́ lọ ma sú bo sẹtẹn yì tòdaho devo mẹ. To owhe ṣinatọ̀n godo, João plọn nugbo lọ, podọ ayihadawhẹnamẹnu etọn he yin pinplọn gbọn Biblu dali whàn ẹn nado dín mẹhe e duahọ do lọ mọ bo suahọ lọ! Na akuẹ pẹẹde janwẹ João nọ mọ nado penukundo asi etọn po ovi etọn ẹnẹ lẹ po go wutu, mẹhe e duahọ do lọ yigbe dọ e sọgan suahọ lọ vudevude to sunmẹsunmẹ.

Pekọ Tintindo

Apọsteli Paulu wlan dọmọ: “E nọ hẹn ale daho wá, eyin mẹdezejo na Jiwheyẹwhe ehe yin tintindo to pọmẹ po pekọ po. . . . Eyin mí  tindo núdùdù, avọ̀ po adọtẹn po, onú ehelẹ na pekọna mí.” (1 Tim. 6:6-8) Ayinamẹ nuyọnẹn tọn ehe hinhẹn do ayiha mẹ na gọalọna mí nado dapana nukunkẹn, ajọ́ he nọ fọ́n ayihaawe dote lẹ kavi tito adọkunnọ lilẹzun to zánto dopo mẹ tọn lẹ. (Howh. 28:20) Ayinamẹ Paulu tọn hihodo nasọ gọalọna mí nado ze Ahọluduta Jiwheyẹwhe tọn do otẹn tintan mẹ po jidide lọ po dọ mí na mọ dandannu gbẹ̀mẹ tọn mítọn lẹ.—Mat. 6:25-34.

Etomọṣo, na “huhlọn mẹkiklọ adọkunnu lẹ tọn” wutu, mí ma dona nọ yí nukunpẹvi do pọ́n owù lọ nado joawuna nukunkẹn. (Mat. 13:22) Flin nuhe jọ do Akani go. E ko mọ aliho jiawu he mẹ Islaelivi lẹ dasá Tọ̀sisa Jọdani te. Ṣogan, na nukunkẹn etọn wutu, e ma duto ojlo lọ ji nado fìn fataka, sika po awugbó akuẹgegenu tọn de po sọn ogblànnu tòdaho Jẹliko tọn lẹ mẹ. Nuyiwa enẹ zọ́n bọ e hẹn ogbẹ̀ etọn bu. (Jọṣ. 7:1, 20-26) Abajọ Jesu na avase to owhe kanweko susu lẹ godo dọmọ: “Mì hùn nukun mìtọn lẹ bo họ́ mìde sọta nukunkẹn wunmẹ lẹpo”!—Luku 12:15.

Nọ Yin Nugbonọ to Azọ́nmẹ

Todin, mì gbọ mí ni gbadopọnna ninọmẹ delẹ he sọgan ze gbemima mítọn nado hẹn nugbonọ-yinyin go to nulẹpo mẹ do whlepọn mẹ. Nugbonọ-yinyin to azọ́nmẹ nọ biọ dọ mí ‘ma na nọ jẹajo’—eyin nuhe mẹlẹpo tlẹ to wiwà niyẹn. (Titu 2:9, 10) Jurandir, he nọ wazọ́n to azọ́nwhé ahọlu tọn de nọ dọ nugbo to whenue e to linlin akuẹ he e zan na gbejizọnlin etọn lẹ tọn na. Ṣigba, azọ́nwatọgbẹ́ etọn lẹ nọ na linlin akuẹ he hugan dehe yé zan tọn. Yé nọ wàmọ na ogán azọ́nwatẹn lọ tọn nọ ṣinyọnnudo nuyiwa nugbomadọ tọn yetọn. Ogán lọ tlẹ gblewhẹdo Jurandir na nugbodidọ etọn bo masọ nọ ze azọ́n he na biọ dọ ni zingbejizọnlin lẹ na ẹn ba. Ṣigba to nukọn mẹ, ninọmẹ akuẹzinzan tọn azọ́nwhé lọ tọn yin gbigbejepọn bọ Jurandir yin pipà na nugbonọ-yinyin etọn. E sọ yin zizedo otẹn he yiaga de mẹ.

Azọ́nmẹyimẹdotọ André he yin nusàtọ de tọn, biọ to e si nado nọ yí akuẹ nuhe e to sisà lẹ tọn donu awe do sà dopo na ahisinọ lẹ. Mẹmẹsunnu mítọn biọ adọgbigbo Jehovah to odẹ̀ mẹ nado tẹdo nunọwhinnusẹ́n Biblu tọn lẹ go. (Ps. 145:18-20) E sọ tẹnpọn nado basi zẹẹmẹ nuhewutu e ma sọgan wàmọ tọn na azọ́nmẹyimẹdotọ etọn—amọ́ to ovọ́ mẹ. Enẹwutu, André de nado jo azọ́n he pekuẹ ehe do. Ṣigba, to nudi owhe dopo godo, azọ́nmẹyimẹdotọ etọn sọ gọ̀ ẹ ylọ, bo hẹn ẹn deji dọ emi masọ nọ doahi vivẹ́ na ahisinọ lẹ ba. André yin zizedo ogántẹn de mẹ.

Nọ Suahọ He A Dù Lẹ

Apọsteli Paulu na ayinamẹ Klistiani lẹ dọmọ: “Mì duahọ nudepope tọn do mẹde  blo.” (Lom. 13:8) Mí sọgan dín whẹjijọ ma nado suahọ de bo lẹndọ adọkunnọ wẹ mẹhe yàn akuẹ na mí lọ podọ e ma tindo nuhudo akuẹ lọ tọn. Ṣigba, Biblu na avase dọmọ: “Mẹylankan nọ yàn, e masọ gọwá sú.”—Ps. 37:21.

Etẹwẹ lo, eyin ‘nujijọ madonukun’ de glọnalina mí ma nado suahọ he mí dù? (Yẹwh. 9:11) Di apajlẹ, Francisco yàn akuẹ he yì dọla Amelika tọn 7000 (nudi 3400000 F CFA) to Alfredo si nado sú akuẹ he e yàn do gbá owhé etọn. Ṣigba, na nuhahun ajọwiwa tọn delẹ wutu, Francisco ma penugo nado suahọ lọ to azán he yé magbe etọn ji. E ze afọdide tintan lọ nado yì mọ Alfredo bo dọhodo whẹho lọ ji, podọ Alfredo yigbe dọ ni suahọ lọ vudevude.

Nọ Dapana Mẹkiklọ

Flin apajlẹ ylankan Ananias po Safila po tọn, yèdọ asu po asi po de to agun Klistiani owhe kanweko tintan tọn mẹ. To whenue yé sà aigba de, yé hẹn apadewhe aigba-kuẹ lọ tọn wá na apọsteli lẹ bo sọalọakọ́n dọ akuẹ lọ blebu wẹ. Yé jlo na yí alọtútlú nukunta tọn yetọn do hẹn awuji mẹdevo lẹ. Ṣigba, to anademẹ gbigbọ wiwe Jiwheyẹwhe tọn glọ, apọsteli Pita hùngona mẹkiklọ yetọn, podọ yé yin hùhù gbọn Jehovah dali.—Owalọ 5:1-11.

To vogbingbọn mẹ na Ananias po Safila po he ma yin nugbonọ, mẹhe kàn Biblu lẹ dọ hójọhó bosọ yin nugbonọ. Mose yí nugbonọ-yinyin do na linlin lehe e joawuna homẹgble do tọn, yèdọ nujijọ he wutu e ma do yì Aigba Pagbe tọn lọ ji. (Sọh. 20:7-13) Mọdopolọ, Jona ma ṣinyọnnudo awugbopo he e dohia whẹpo do yì dọyẹwheho na Ninevenu lẹ podọ to enẹgodo lẹ gba. Kakatimọ, e kàn yé dai.—Jona 1:1-3; 4:1-3.

Matin ayihaawe, e nọ biọ adọgbigbo nado dọ nugbo titengbe to whenue ninọmẹ lẹ ma bọawu, dile nuhe jọ do viyọnnu owhe 14 mẹvi Nathalia go to wehọmẹ dohia do. E vọ́ kandai mẹtẹnpọn tọn de he e basi to wehọmẹ gbeje pọ́n bo doayi e go dọ dopo to gblọndo he mẹplọntọ etọn dohia dọ e sọgbe lẹ mẹ ma sọgbe. Dile etlẹ yindọ Nathalia yọnẹn dọ ehe na yinuwado nukọnyiyi emitọn ji, e ma whleawu nado yì dọna mẹplọntọ etọn. E dọmọ: “Mẹjitọ ṣie lẹ nọ saba plọn mi dọ eyin n’na hẹn homẹ Jehovah tọn hùn, n’dona nọ dọ nugbo. Ayihadawhẹnamẹnu ṣie na ko dotukla mi eyin n’ma dọ ẹ na mẹplọntọ ṣie.” Mẹplọntọ lọ yọ́n pinpẹn nugbonọ-yinyin Nathalia tọn.

Nugbonọ-Yinyin—Jẹhẹnu de He Nọ Hẹn Gbégbò Wá Na Jehovah

Giselle, viyọnnu de he tindo owhe 17, mọ akuẹ-hẹnnu de he mẹ owe lẹ po akuẹ he yì dọla Amelika tọn 35 (nudi 17000 F CFA) po tin te. E ze afọdide lẹ gbọn ogán wehọmẹ etọn tọn lẹ ji na akuẹ-hẹnnu lọ nido yin gigọjo na mẹhe tindo e. To osun dopo godo, mẹhe bọdo ogán wehọmẹ lọ tọn go hia wekanhlanmẹ de na klasi lọ blebu nado pà Giselle na nugbonọ-yinyin etọn bosọ pà whẹndo etọn na oplọn dagbe po nuplọnmẹ sinsẹ̀n tọn he e mọyi lẹ po. “Azọ́n dagbe” etọn lẹ hẹn gigo wá na Jehovah.—Mat. 5:14-16.

E nọ biọ vivẹnudido nado yin nugbonọ dile mí to gbẹnọ to mẹhe yin ‘wanyina mẹdetiti tọ́, wanyina akuẹtọ, mẹdezedagatọ, saklanọ, po nugbomadọtọ lẹ po’ ṣẹnṣẹn. (2 Tim. 3:2) Etomọṣo, budisi Jehovah he sọgbe, ayihadawhẹnamẹnu he yin pinplọn gbọn Biblu dali, po pekọ tintindo po na gọalọna mí nado hẹn nugbonọ-yinyin go to aihọn nugbomadọ tọn ehe mẹ. Mí sọ nọ wleawuna haṣinṣan pẹkipẹki de hẹ Jehovah, mẹhe ‘yin dodonọ bosọ yiwanna dodo.’—Ps. 11:7.

[Nudọnamẹ odò tọn]

[Yẹdide to weda 7]

Budisi Jehovah he sọgbe nọ na huhlọn gbemima mítọn nado yin nugbonọ

[Yẹdide to weda 8]

Nugbodidọ mítọn nọ hẹn gigo wá na Jehovah