‘N’yin Madogánnọ Todin amọ́ N’yọnẹn Dọ E Ma Na Yin Kakadoi!’

Dile e yin didọ gbọn Sara van der Monde dali

Gbẹtọ lẹ nọ saba dọna mi dọ, “Sara, nukiko towe nọ dọnmẹdogo taun. Naegbọn homẹ nọ hùn we domọ to whepoponu?” N’nọ dọna yé dọ todido vonọtaun he n’tindo wẹ nọ na mi ayajẹ. Do glido, todido lọ dọ “n’yin madogánnọ todin amọ́ e ma na yin kakadoi!” wẹ nọ na mi huhlọn.

N’YIN jiji to Paris, France to 1974. Jiji ṣie ma bọawu podọ doto lẹ wá mọdọ n’to awukuzọ̀n jẹ. Afọ ṣie lẹ po awà ṣie lẹ po ma nọ ze ganji, podọ e nọ vẹawuna gbẹtọ lẹ nado mọnukunnujẹ nuhe n’nọ dọ lẹ mẹ. To ojlẹ delẹ godo, n’sọ bẹ adingbè bosọ nọ yawu jẹazọ̀n.

To whenue n’tindo owhe awe, whẹndo ṣie sẹtẹn yì Melbourne to Australie. To owhe awe godo, Papa jo yẹn po Mama po do. N’flindọ ojlẹ enẹ mẹ wẹ n’tindo numọtolanmẹ whla tintan dọ Jiwheyẹwhe ma dẹn do mi. Mama he yin dopo to Kunnudetọ Jehovah tọn lẹ mẹ nọ plan mi yì opli lẹ whẹwhẹ. To finẹ, n’plọn dọ Jiwheyẹwhe yiwanna mi bo nọ hò ṣie pọ́n. Enẹ yinyọnẹn gọna owanyi po tulinamẹ Mama tọn po gọalọna mi bọ n’ma nọ hanú mahopọnna ninọmẹ sinsinyẹn he mẹ mí te.

Humọ, Mama plọn mi lehe n’sọgan nọ hodẹ̀ hlan Jehovah do. Na nugbo tọn, dẹ̀hiho bọawuna mi taun hugan hodidọ. Eyin n’to dẹ̀ho, n’ma nọ jẹtukla nado ylọ hogbe lẹ tọ́n. Nuhe n’jlo na dọ lẹ nọ to yìyì to ayiha ṣie mẹ to jọwamọ-liho. Na e nọ vẹawuna gbẹtọ lẹ nado mọnukunnujẹ nuhe n’nọ dọ lẹ mẹ wutu, homẹmiọnnamẹnu wẹ e nọ yin na mi nado yọnẹn dọ Jehovah nọ mọnukunnujẹ nuhe n’nọ dọ lẹpo mẹ, vlavo n’dọ ẹ do homẹ wẹo, kavi n’dovivẹnu nado dọ ẹ tọ́n.—Ps. 65:2.

Lehe N’Doakọnna Nuhahun Ṣie lẹ Do

To whenue n’do owhe atọ́n, ogàn pinpẹn lẹ wẹ yè do dó afọ na mi whẹpo n’gán zinzọnlin. Etomọṣo, zọnlinzinzin gbẹ́ nọ vẹawuna mi taun. Afọ ṣie lẹ nọ to sisọsisọ mapote. Whenue n’wá do owhe 11, zọnlinzinzin glo mi pete. To nukọn mẹ, n’ma tlẹ sọgan fọ́n sọn adọzan ji kavi mlọnai na dee. Maṣinu de wẹ nọ ze mi sọn adọzan ji do kẹkẹvi ṣie he n’nọ yí alọ do deanana mẹ bosọ nọ ze mi sọn e mẹ do adọzan ji.

Nado dọ hójọhó, madogán ṣie nọ hẹn mi gbọjọ to whedelẹnu. Ṣigba to ojlẹ enẹlẹ mẹ, n’nọ flin nuhe mí nọ saba dọna mídelẹ to whẹndo mítọn mẹ, enẹ wẹ: “Ma ze ayiha do nuhe glo we lẹ ji blo. Na ayidonugo nuhe a sọgan wà lẹ.” Enẹ gọalọna mi bọ n’plọn bo yọ́n osọ́ kùn, n’nọ kùn tọjihun, n’nọ tọ́nwhẹ̀n bo nọ disa bo tlẹ sọ nọ kùn mọto to fie gbẹtọ ma sù te. Na n’yiwanna anazọ́n wutu, n’nọ yí osẹ̀n do de yẹdide, n’nọ tọ̀nú, n’nọ lọ̀n avọ̀ bo nọ kó avọ̀ bosọ nọ basi núzinzan okò tọn voovo lẹ.

Na azọ̀n sinsinyẹn he jẹ n’te wutu, mẹdelẹ dọ dọ n’ma gán basi dide na dee nado sẹ̀n Jiwheyẹwhe. Whenue n’do owhe 18, nawe de he  yin mẹplọntọ ṣie to wehọmẹ na mi ayinamẹ nado tlọ́n onọ̀ ṣie dè bo jo sinsẹ̀n etọn do. E tlẹ dọ dọ emi na gọalọna mi nado mọ fie n’na nọ. Ṣigba n’dọna ẹn dọ n’ma na jo sinsẹ̀n ṣie do gbede, podọ whenue n’mọdọ n’sọgan penukundo dee go wẹ n’na tlọ́n whégbè.

To nujijọ enẹ godo, e ma dẹn bọ n’yí baptẹm bo lẹzun dopo to Kunnudetọ Jehovah tọn lẹ mẹ. To owhe awe godo, n’tlọ́n whégbè bo yì jẹ ohọ̀ kleun de mẹ. N’do ayajẹ to fie n’te lọ, na n’nọ mọ godonọnamẹ he n’tindo nuhudo etọn po mẹdekannujẹ he n’jlo po.

Nuzedonukọnnamẹ He N’Ma Donukun De

Dile owhe lẹ to yìyì, ninọmẹ delẹ whlé yise ṣie pọ́n. To gbèdopo, wehọmẹvigbẹ́ de he ewọ lọsu yin madogánnọ dọna mi dọ emi jlo dọ yẹn ni dà emi. Tlolo whẹ́, e jlo mi. Taidi awhli susu, e nọ jlo mi taun nado tindo alọwlemẹ de. Ṣigba, nugbo lọ dọ mí omẹ awe lẹpo yin madogánnọ ma dohia dandan dọ alọwle lọ na tindo kọdetọn dagbe. Humọ, dẹpẹ lọ ma nọ sẹ̀n Jehovah. Nuyise mítọn lẹ, nuwiwa he mẹ mí nọ tindo mahẹ te lẹ po yanwle mítọn lẹ po gbọnvo pete. Nawẹ mí sọgan nọpọ́ bo tindo ayajẹ gbọn? Gbemima ṣie wẹ nado setonuna anademẹ họnwun Jiwheyẹwhe tọn nado wlealọ to Oklunọ mẹ kẹdẹ. (1 Kọl. 7:39) Enẹwutu, n’yí ogbè fifá do dọna dẹpẹ lọ dọ n’ma sọgan kẹalọyi nuzedonukọnnamẹ etọn.

Kakajẹ egbé, n’yọnẹn dọ nudide dagbe wẹ n’basi. N’sọ kudeji dọ to aihọn yọyọ dopagbe Jiwheyẹwhe tọn mẹ, n’na tindo ayajẹ. (Ps. 145:16; 2 Pita 3:13) Todin whẹ́, n’magbe nado yin nugbonọ na Jehovah bo hẹn ayajẹ ṣie go mahopọnna ninọmẹ ṣie.

Po jejejininọ po, n’to nukọnpọnhlan azán he gbè n’na lọ́n sọn kẹkẹvi ṣie mẹ bo họ̀nwezun matin aliglọnnamẹnu depope. To whenẹnu, n’na dawhá dọ “n’yin madogánnọ dai, amọ́ todin n’ko jẹgangan—kakadoi!”