Yin Homẹmiọnna—Miọnhomẹna Mẹdevo Lẹ

Na mape mítọn wutu, mímẹpo wẹ nọ jẹazọ̀n. Mẹdelẹ tlẹ nọ doakọnna manọna sinsinyẹn lẹ. To ninọmẹ sinsinyẹn mọnkọtọn lẹ mẹ, etẹwẹ sọgan gọalọna mí ma nado jẹflumẹ?

Dopo to onú titengbe he na gọalọna mí to ninọmẹ enẹ mẹ lẹ mẹ wẹ homẹmiọnnamẹ hagbẹ whẹndo tọn, họntọn po yisenọ hatọ mítọn lẹ po tọn.

Dile amasin de nọ hẹnmẹ jẹgangan do, mọ wẹ hogbe mẹtọnhopọn po awuvẹmẹ po tọn he wá sọn họntọn de dè sọgan na mí tuli bo miọnhomẹna mí do. (Howh. 16:24; 18:24; 25:11) Ṣigba, gbọnvona dọ Klistiani nugbo lẹ nọ jlo nado yin homẹmiọnna, yé sọ nọ dovivẹnu “nado miọnhomẹna mẹhe tin to whlepọn wunmẹ depope mẹ gbọn homẹmimiọn he Jiwheyẹwhe to yíyí do miọnhomẹna [yelọsu lẹ] dali.” (2 Kọl. 1:4; Luku 6:31) Apajlẹ Antonio he yin nugopọntọ agbegbe tọn to Mexique tọn do ehe hia hezeheze.

To whenue doto lẹ dohia Antonio dọ e bẹ lymphome malin, yèdọ awutu de he nọ bẹpla nugonu ohùn tọn lẹ, e jẹflumẹ taun. Etomọṣo, e dovivẹnu nado duto flumẹjijẹ etọn ji. Gbọnna? E nọ tẹnpọn nado flin ohàn Ahọluduta tọn lẹ, podọ dile e to ohàn lọ lẹ ji, e nọ na ayidonugo hogbe lọ lẹ bo nọ lẹnayihamẹpọn do yé ji. Dẹ̀hiho daga po Biblu hihia po sọ yin asisa homẹmiọnnamẹ tọn daho de na ẹn.

Antonio wá yigbe dọ dopo to nuhe gọalọna emi hugan lẹ mẹ wẹ homẹmiọnnamẹ yisenọ hatọ emitọn lẹ tọn. E dọmọ: “Eyin yẹn po asi ṣie po jẹflumẹ, mí nọ ylọ hẹnnumẹ mítọn he yin mẹho agun tọn de wá whégbè nado hodẹ̀ hẹ mí. Ehe nọ miọnhomẹna mí bọ ayiha mítọn nọ jẹdò.” E yidogọ dọmọ: “Po godonọnamẹ whẹndo mítọn tọn gọna mẹmẹsunnu mítọn lẹ tọn po, mí penugo nado duto flumẹjijẹ mítọn ji to ojlẹ kleun de gblamẹ.” Lehe Antonio gọ́ na ayajẹ nado tindo họntọn owanyinọ podọ mẹtọnhopọntọ lẹ do sọ!

Nudevo he sọ nọ gọalọ to ojlẹ ayimajai tọn lẹ mẹ wẹ gbigbọ wiwe he Jesu dopagbe etọn. Apọsteli Pita dohia dọ “nunina vọnu” wẹ gbigbọ wiwe Jiwheyẹwhe tọn yin. (Owalọ 2:38) E họnwun dọ nugbo wẹ Pita dọ, na to Pẹntikọsti 33 W.M., gbẹtọ susu yin yiyiamisisadode. Mílọsu sọgan mọ nunina enẹ, yèdọ gbigbọ wiwe yí to egbehe. Na nunina enẹ tin-to-aimẹ susugege wutu, be e ma jẹ dọ mí ni nọ biọ ẹ to whepoponu ya?—Isa. 40:28-31.

NỌ VẸAWU MẸHE TO YAJI LẸ

Apọsteli Paulu doakọnna nuhahun susu. To nujijọ de whenu, e tlẹ dibla hẹn ogbẹ̀ etọn bu. (2 Kọl. 1:8-10) Etomọṣo, Paulu ma hanú zẹjlẹgo na ogbẹ̀ etọn. Na e yọnẹn dọ emi tindo godonọnamẹ Jiwheyẹwhe tọn wutu, enẹ nọ miọnhomẹna ẹn. E wlan dọmọ: “Donanọ wẹ Jiwheyẹwhe podọ Otọ́ Oklunọ mítọn Jesu Klisti tọn, Otọ́ lẹblanu sisosiso lẹ tọn podọ Jiwheyẹwhe homẹmimiọn lẹpo tọn, he nọ miọnhomẹna mí to nukunbibia mítọn lẹpo mẹ.” (2 Kọl. 1:3, 4) Paulu ma dike nuhahun etọn lẹ ni hẹn ẹn jẹflumẹ pete. Kakatimọ, whlepọn etọn lẹ gọalọna ẹn nado wleawuna awuvẹmẹ bo miọnhomẹna mẹhe to ninọmẹ sinsinyẹn mẹ lẹ.

To whenue Antonio wá jẹgangan, e gọ̀ azọ́n nugopọntọ tọn bẹ. Aṣa etọn wẹ e ko yin dai nado nọ vẹawu yisenọ hatọ etọn lẹ, ṣigba to manọna etọn godo, ewọ po asi etọn po sọ nọ dovivẹnu dogọ nado dla awutunọ lẹ pọ́n bo na tuli yé. Di apajlẹ, to whenue Antonio dla mẹmẹsunnu de he to akọndona manọna sinsinyẹn de pọ́n, e doayi e go dọ mẹmẹsunnu lọ masọ jlo na yì opli lẹ ba. Antonio dọmọ: “E ma yindọ e ma yiwanna Jehovah kavi mẹmẹsunnu lẹ wẹ gba, ṣigba manọna lọ yinuwado e ji sọmọ bọ e tindo numọtolanmẹ nuvọ́nọ-yinyin tọn.”

Nado na tuli mẹmẹsunnu enẹ, dopo to nuhe Antonio wà lẹ mẹ wẹ nado biọ to e si nado hodẹ̀ to nuwiwa pọmẹ tọn de whenu. Mẹmẹsunnu lọ lẹndọ emi ma jẹna lẹblanulọkẹyi enẹ, ṣogan e hodẹ̀ lọ. Antonio dọmọ: “Odẹ̀ lọ whànmẹ taun, podọ to nujijọ enẹ godo, pọndohlan etọn diọ. Whladopo dogọ, e mọdọ emi yọ́n-na-yizan.”

Mímẹpo wẹ nọ pehẹ ninọmẹ awufiẹsa tọn lẹ, dile etlẹ yindọ mẹdelẹ tọn nọ sinyẹn hugan mẹdevo lẹ tọn. Ṣigba, dile Paulu dohia do, ehe sọgan hẹn mí penugo nado miọnhomẹna mẹhe to ninọmẹ sinsinyẹn mẹ lẹ. Enẹwutu, mì gbọ mí ni nọ vẹawu yisenọ hatọ he to yaji lẹ bo nọ hodo apajlẹ Jehovah, Jiwheyẹwhe mítọn tọn gbọn homẹmimiọnna mẹdevo lẹ dali.