Lẹnnupọndo Omẹ He Nkọ E Jẹ Dọ Hiẹ Ni Yin Ji
Lẹnnupọndo Omẹ He Nkọ E Jẹ Dọ Hiẹ Ni Yin Ji
“Omẹ nankọ wẹ e jẹ dọ mìwlẹ ni yin to walọ wiwe lẹ po nuyiwa mẹdezejo na Jiwheyẹwhe tọn lẹ po mẹ!”—2 PITA 3:11.
NAWẸ HIẸ NA NA GBLỌNDO GBỌN?
Nado mọ nukundagbe Jiwheyẹwhe tọn, omẹ nankọ wẹ hiẹ dona yin?
Nawẹ Satani nọ klọ gbẹtọ lẹ gbọn?
Etẹwẹ hiẹ sọgan wà nado basi hihọ́na haṣinṣan he a tindo hẹ Jehovah?
1, 2. Nado yin alọkẹyi gbọn Jiwheyẹwhe dali, ‘omẹ nankọ wẹ e jẹ dọ mí ni yin’?
TO PAA mẹ, nuhe mẹdevo lẹ nọ lẹn gando mí go nọ duahunmẹ na mí. Ṣigba, taidi Klistiani lẹ, be e ma yin nuhe Jehovah nọ lẹn gando mí go wẹ dona duahunmẹna mí hugan ya? To popolẹpo mẹ, ewọ wẹ Omẹ he yin nujọnu hugan to wẹkẹ lọ mẹ podọ ewọ dè wẹ “asisa ogbẹ̀ tọn” te.—Ps. 36:9.
2 To whenue apọsteli Pita to nùzindo ‘omẹ nankọ he e jẹ dọ mí ni yin’ sọn pọndohlan Jehovah tọn mẹ ji, e dotuhomẹna mí nado nọ tindo mahẹ to “walọ wiwe lẹ po nuyiwa mẹdezejo na Jiwheyẹwhe tọn lẹ po mẹ.” (Hia 2 Pita 3:11.) Nado yin alọkẹyi gbọn Jiwheyẹwhe dali, mí dona hẹn wiwejininọ mítọn go to walọyizan-liho, to apọ̀nmẹ, podọ to gbigbọ-liho. Humọ, mí dona nọ tindo mahẹ to “nuyiwa mẹdezejo na Jiwheyẹwhe tọn lẹ” mẹ gbọn sisi sisosiso tintindo na Jiwheyẹwhe podọ nado ze míde jo na ẹn po nugbonọ-yinyin po dali. Enẹwutu, nado yin alọkẹyi to Jiwheyẹwhe dè, e ma yin walọyizan mítọn kẹdẹ wẹ yin nujọnu gba, ṣigba nuhe mí yin to homẹ lọsu ga. Na Jehovah wẹ nọ “whlé ayiha pọ́n” wutu, ewọ nọ yọnẹn eyin walọ mítọn lẹ wé podọ eyin mí ze míde jo na ẹn mlẹnmlẹn kavi lala.—1 Otan. 29:17.
3. Kanbiọ tẹlẹ ji wẹ mí dona lẹnnupọndo gando haṣinṣan he mí tindo hẹ Jiwheyẹwhe go?
3 Kẹntọ mítọn, Satani Lẹgba ma jlo dọ mí ni mọ nukundagbe Jiwheyẹwhe tọn. Na nugbo tọn, e nọ wà nuhe go e pé lẹpo na mí nido hẹn haṣinṣan mítọn hẹ Jehovah gble. Satani nọ tẹnpọn nado hẹn mí jẹla sọn Jiwheyẹwhe he mí to sinsẹ̀n lọ dè gbọn lalodido na mí po yẹdoklọ mí po dali. (Joh. 8:44; 2 Kọl. 11:13-15) Enẹwutu, nuyọnẹnnu wẹ e yin nado kanse míde dọ: ‘Nawẹ Satani nọ klọ gbẹtọ lẹ gbọn? Etẹwẹ n’sọgan wà nado basi hihọ́na haṣinṣan he n’tindo hẹ Jehovah?’
NAWẸ SATANI NỌ KLỌ GBẸTỌ LẸ GBỌN?
4. Etẹwẹ Satani nọ domọwle nado hẹn haṣinṣan mítọn hẹ Jiwheyẹwhe gble, podọ etẹwutu?
4 Devi Jakọbu dọmọ: “Omẹ dopodopo nọ yin whiwhlepọn dile e yin dindọn yì bo yin omọ̀ dó na gbọn ojlo edetiti tọn dali. Enẹgodo, ojlo lọ, to whenuena e ko mọhò, e nọ ji ylando; podọ to godo mẹ, to whenuena ylando ko yin wiwà pó, e nọ hẹn okú wá.” (Jak. 1:14, 15) Nado hẹn mí jẹla sọn Jiwheyẹwhe dè, Satani nọ domọwle asisa ojlo mítọn lẹ tọn, enẹ wẹ ahun mítọn.
5, 6. (a) Etẹlẹ wẹ Satani nọ yizan nado domọwle mí? (b) Yẹdoklọmẹnu tẹlẹ wẹ Satani nọ yizan nado hẹn ojlo ahun mítọn mẹ tọn lẹ flu, podọ obá tẹ mẹ wẹ e nọ yí yé zan po azọ́nyinyọnẹn po jẹ?
5 Etẹlẹ wẹ Satani nọ yizan nado domọwle ahun mítọn? Biblu dọmọ: “Aihọn lọ pete tin to huhlọn mẹylankan lọ tọn glọ.” (1 Joh. 5:19) Omọ̀ Satani tọn lẹ bẹ “onú he tin to aihọn mẹ lẹ” hẹn. (Hia 1 Johanu 2:15, 16.) Na owhe fọtọ́n susu lẹ, Lẹgba ko yí sọwhiwhe do dó omọ̀ lẹdo mí pé. To whenuena e yindọ aihọn lọ mẹ wẹ mí to gbẹnọ te, mí dona họ́ míde sọta nuyiwa yẹdoklọmẹ tọn etọn lẹ.—Joh. 17:15.
6 Satani nọ yí ayiha wintinwintin lẹ zan nado hẹn ojlo ahun mítọn mẹ tọn lẹ flu. Apọsteli Johanu donù onú atọ̀n delẹ he Satani nọ yizan nado doyẹklọ mí go: (1) “ojlo agbasalan tọn,” (2) “ojlo nukun tọn,” podọ (3) “nutindo gbẹ̀mẹ tọn mẹtọn lẹ jijlá.” Satani yí yé zan nado whlé Jesu pọ́n to danfafa ji. Na Satani ko yí omọ̀ enẹlẹ zan na owhe susu lẹ wutu, e nọ yí yé zan po kọdetọn dagbe po to egbehe, bo nọ diọada sọgbe hẹ ojlo mẹdopodopo tọn. Mì gbọ mí ni pọ́n lehe Lẹgba ko yí yẹdoklọmẹnu delẹ zan na Evi bo tindo kọdetọn dagbe ṣigba bo gboawupo to whenue e yí yé zan na Visunnu Jiwheyẹwhe tọn do, podọ enẹgodo mí na gbadopọnna afọdide he mí sọgan ze nado basi hihọ́na míde sọta omọ̀ Satani tọn lẹ.
“OJLO AGBASALAN TỌN”
7. Nawẹ Satani yí “ojlo agbasalan tọn” zan nado whlé Evi pọ́n gbọn?
7 Gbẹtọvi lẹ tindo nuhudo núdùdù tọn nado sọgan tindo agbasalilo dagbe. Mẹdatọ lọ dá aigba to aliho de mẹ na e nido sọgan na núdùdù susugege. Satani sọgan yí nuhudo jọwamọ tọn na núdùdù zan nado lẹ́ mí sọn ojlo Jiwheyẹwhe tọn wiwà mẹ. Pọ́n lehe e wàmọ na Evi do. (Hia Gẹnẹsisi 3:1-6.) Satani dọna Evi dọ ewọ sọgan dù sinsẹ́n “atin yinyọ́n dagbe po oylan po tọn lọ” tọn bo ma na kú, podọ e dọ dọ azán he gbè e na dù i, ewọ na taidi Jiwheyẹwhe. (Gẹn. 2:9) Gbọnmọ dali, Lẹgba dohia dọ Evi ma tin to dandannu glọ nado setonuna Jiwheyẹwhe whẹpo do nọgbẹ̀. Lalo nankọ die! Tlolo he linlẹn enẹ yin dido do ahun mẹ na Evi, ewọ dona basi dide to onú awe ṣẹnṣẹn: E sọgan gbẹ́ linlẹn enẹ dai kavi to nulẹnpọndeji bo dike ojlo he e tindo na atin-sinsẹ́n lọ ni jideji. Mahopọnna dọ ewọ sọgan dù sọn sinsẹ́n atin jipa lọ tọn lẹ mẹ, ewọ de nado lẹnnupọndo nuhe Satani dọna ẹn gando atin he tin to jipa lọ ṣẹnṣẹn go ji, podọ e “yí sọn sinsẹ́n etọn mẹ bo dù.” Gbọnmọ dali, Satani sisẹ́ Evi nado tindo ojlo na nuhe Mẹdatọ etọn dosẹ́n etọn na ẹn.
8. Nawẹ Satani yí “ojlo agbasalan tọn” zan nado doyẹklọ Jesu gbọn, podọ naegbọn e ma do tindo kọdetọn dagbe?
8 Ayiha wintinwintin dopolọ wẹ Satani yizan to whenue ewọ tẹnpọn nado whlé Jesu pọ́n to danfafa ji. To whenue Jesu blanù na okle 40 ozán 40 godo, Satani tẹnpọn nado yí ojlo Jesu tọn na núdùdù zan. Satani dọmọ: “Eyin hiẹ yin visunnu Jiwheyẹwhe tọn de, dọna zannu ehelẹ dọ yé ni lẹzun akla.” (Luku 4:1-3) Jesu dona basi dide to onú awe ṣẹnṣẹn: E sọgan de nado yí huhlọn azọ́njiawu wiwà tọn etọn zan nado hẹn pekọ wá na nuhudo núdùdù tọn etọn kavi lala. Jesu yọnẹn dọ emi ma dona yí huhlọn mọnkọtọn zan na lẹndai ṣejannabi tọn lẹ wutu. Dile etlẹ yindọ huvẹ wẹ e te, haṣinṣan he e tindo hẹ Jehovah yin nujọnu na ẹn hugan pekọ hinhẹnwa na huvẹ etọn. Jesu gblọn dọmọ: “E ko yin kinkan dọ, ‘Gbẹtọ ma nọ nọgbẹ̀ gbọn akla kẹdẹ dali gba, ṣigba gbọn ohó he nọ tọ́n sọn onù Jehovah tọn mẹ lẹpo dali.’”—Mat. 4:4.
“OJLO NUKUN TỌN”
9. Etẹwẹ hodidọ lọ “ojlo nukun tọn” dohia, podọ nawẹ Satani fọ́n ojlo ehe dote to whẹho Evi tọn mẹ gbọn?
9 Johanu sọ donù “ojlo nukun tọn” go taidi yẹdoklọmẹnu devo. Hodidọ enẹ dohia dọ mẹde sọgan jẹ ojlo tindo na nude ji eyin e pọ́n nulọ poun. To whẹho Evi tọn mẹ, Satani fọ́n ojlo ehe dote to whenue e dọmọ: “Yè na hùn nukun mìtọn.” Dile Evi to atin-sinsẹ́n he yè dosẹ́n etọn na ẹn lọ pọ́n, mọ wẹ e to whanpẹ yọ́n dogọ to nukun etọn mẹ do niyẹn. Evi mọdọ atin-sinsẹ́n lọ “yọnwhanpẹ to nukunta.”
10. Aliho tẹ mẹ wẹ Satani yí “ojlo nukun tọn” zan nado whlé Jesu pọ́n te, podọ nawẹ Jesu yinuwa gbọn?
10 Etẹwẹ dogbọn Jesu dali? Satani “do ahọluduta aigba ji tọn lẹpo hia [Jesu] to nukunwhiwhe dopo mẹ; Lẹgba sọ dọna ẹn dọmọ: ‘Yẹn na na we aṣẹpipa ehe lẹpo po gigo yetọn po.’” (Luku 4:5, 6) E ma yin ahọluduta aigba ji tọn lẹpo wẹ Jesu mọ nugbonugbo gba, ṣigba gigo yetọn wẹ e mọ to numimọ de mẹ. Satani na ko lẹndọ nuhe Jesu mọ lẹ na doyẹklọ ẹ. Winyan ma tlẹ hù Satani nado dọmọ: “Eyin hiẹ basi sinsẹ̀n whladopo to nukọn ṣie, popolẹpo na lẹzun towe.” (Luku 4:7) Jesu ma jlo to aliho depope mẹ nado yin mẹhe nkọ Satani jlo dọ ni yin. Enẹwutu, e gblọnna ẹn to afọdopolọji dọmọ: “E ko yin kinkan dọ, ‘Jehovah Jiwheyẹwhe towe wẹ hiẹ dona nọ sẹ̀n, podọ ewọ kẹdẹ wẹ hiẹ dona nọ wà sinsẹ̀nzọn wiwe hlan.’”—Luku 4:8.
“NUTINDO GBẸ̀MẸ TỌN MẸTỌN LẸ JIJLÁ”
11. Nawẹ Satani domọwle Evi gbọn?
11 To whenue Johanu to onú aihọn tọn lẹ slẹ, e donù “nutindo gbẹ̀mẹ tọn mẹtọn lẹ jijlá” go. To ojlẹ he mẹ Adam po Evi po kẹdẹ tin to aigba ji, e họnwun dọ yé ma sọgan ‘jla nutindo gbẹ̀mẹ tọn yetọn lẹ’ to gbẹtọ devo lẹ nukọn. Ṣigba, yé do goyiyi hia. To whenue Satani to Evi whlepọn, e dohia ẹ dọ Jiwheyẹwhe to nudagbe de whlá do e. Lẹgba dọna ẹn dọ azán he gbè ewọ na dù sọn “atin yinyọ́n dagbe po oylan po tọn lọ” mẹ, ewọ “na tin di Jiwheyẹwhe, bo nọ yọ́n onú dagbe po oylan po.” (Gẹn. 2:17; 3:5) Gbọnmọ dali, Satani to didohia dọ Evi sọgan nọgbẹ̀ matin anademẹ Jehovah tọn. E họnwun dọ goyiyi yin dopo to nuhe hẹn ẹn nado kẹalọyi lalo enẹ lẹ mẹ. E dù sọn atin he yè dosẹ́n etọn lọ mẹ po linlẹn lọ po dọ emi ma na kú. Lehe e klọ ede do sọ!
12. Aliho devo tẹ mẹ wẹ Satani tẹnpọn nado whlé Jesu pọ́n te, podọ nawẹ Jesu gblọnna ẹn gbọn?
12 To vogbingbọn mẹ na Evi, Jesu ze apajlẹ whiwhẹ tọn dagbe de dai na mí. Satani tẹnpọn nado whlé Jesu pọ́n to aliho devo mẹ, ṣigba ewọ ma dike linlẹn lọ nado wà nuhe na whlé Jiwheyẹwhe pọ́n depope ni gbọṣi ahun etọn mẹ. Mọwiwà na taidi goyiyi! Kakatimọ, gblọndo he Jesu na Satani họnwun bo tátá: “E ko yin kinkan dọ: ‘Hiẹ ma dona whlé Jehovah Jiwheyẹwhe towe pọ́n.’”—Hia Luku 4:9-12.
NAWẸ MÍ SỌGAN BASI HIHỌ́NA HAṢINṢAN HE MÍ TINDO HẸ JEHOVAH GBỌN?
13, 14. Dọ lehe Satani nọ yí yẹdoklọmẹnu delẹ zan to egbehe do.
13 To egbehe, Satani nọ yí yẹdoklọmẹnu dopolọ he e yí do klọ Evi po Jesu po lẹ zan. Nado fọ́n “ojlo agbasalan tọn” gbẹtọ lẹ tọn dote, Satani nọ yí aihọn etọn zan nado nọgodona fẹnnuwiwa gọna wazẹjlẹgo to dùdù po nùnù po mẹ. Gbọn yẹdide fẹnnuwiwa tọn lẹ dali, titengbe to Intẹnẹt ji, e nọ dọ̀n ayidonugo mẹhe ma to aṣeji lẹ tọn nado fọ́n “ojlo nukun tọn” yetọn dote. Podọ e nọ yí ojlo lọ nado ‘jla nutindo gbẹ̀mẹ tọn mẹtọn lẹ’ zan bo sisẹ́ gbẹtọ lẹ nado lẹzun goyitọ, nado nọ yí egblemaku do dín ogántẹn, yindidi po adọkunnu lẹ po!
14 “Onú he tin to aihọn mẹ lẹ” taidi nuhe whèhutọ de nọ yizan nado dọ̀n whèvi lẹ. Onú mọnkọtọn lẹ nọ dọ̀n whèvi lẹ, ṣigba dopodopo yetọn nọ yin yíyí do omlẹn de nù. Satani nọ yí nuhe gbẹtọ lẹ sọgan pọ́n taidi dandannu gbẹ̀mẹ tọn lẹ zan nado hẹn yé nado wà nuhe jẹagọdo osẹ́n Jiwheyẹwhe tọn lẹ. Ṣigba, yẹdoklọmẹnu enẹlẹ yin awuwlena nado yinuwado ojlo mítọn lẹ ji bo hẹn ahun mítọn flu. Na nugbo tọn, yé yin awuwlena nado hẹn mí nado yise dọ nukunpipedo nuhudo mítọn lẹ go po vivomẹninọ po yin nujọnu hugan ojlo Jiwheyẹwhe tọn wiwà. Be mí na dike yẹdoklọmẹnu enẹlẹ ni duto mí ji wẹ ya?
15. Nawẹ mí sọgan hodo apajlẹ Jesu tọn to avùnteninọ sọta whlepọn Satani tọn lẹ mẹ gbọn?
15 Evi joawuna omọ̀ Satani tọn lẹ, ṣigba Jesu duto yé ji. To ninọmẹ dopodopo mẹ, ewọ nọ yí wefọ de zan nado na gblọndo, bo nọ dọmọ: “E ko yin kinkan dọ.” Eyin mí nọ plọn Biblu po sọwhiwhe po, mí na jẹakọ hẹ Owe-wiwe lẹ ganji bo na penugo nado nọ flin wefọ he na gọalọna mí to whenue mí wá tin to whlepọn lẹ nukọn. (Ps. 1:1, 2) Eyin mí nọ flin mẹhe yin nugbonọ na Jiwheyẹwhe bo yin nùdego to Biblu mẹ lẹ, mí na penugo nado nọ hodo apajlẹ yetọn. (Lom. 15:4) Mí na basi hihọ́na míde, eyin mí tindo sisi sisosiso na Jehovah, bo nọ yiwanna nuhe e yiwanna bosọ nọ gbẹwanna nuhe e gbẹwanna lẹ.—Ps. 97:10.
16, 17. Nuyiwadomẹji tẹwẹ “huhlọn nulẹnpọn tọn” mítọn sọgan tindo do omẹ he nkọ mí yin ji?
16 Apọsteli Paulu dotuhomẹna mí nado nọ yí “huhlọn nulẹnpọn tọn” mítọn zan nado nọ lẹnnupọn to aliho he mẹ Jiwheyẹwhe nọ lẹnnupọn te, e ma yin dile aihọn nọ wà do. (Lom. 12:1, 2) To whenue Paulu to nùzindo nuhudo lọ ji dọ mí dona nọ basi hihọ́na linlẹn mítọn, e dọmọ: “Mí to hoyijlẹdohogo agọ̀ lẹ podọ onú dahodaho lẹpo he yin zizedaga sọta oyọnẹn Jiwheyẹwhe tọn họliai; podọ mí to linlẹn lẹpo hẹnwa mẹmẹglọ mẹ nado hẹn yé setonuna Klisti.” (2 Kọl. 10:5) Linlẹn mítọn lẹ nọ tindo nuyiwadomẹji sinsinyẹn do omẹ he nkọ mí yin ji, enẹwutu mí dona to nuhe nọ jlọmẹdote lẹ “lẹnpọn zọnmii.”—Flp. 4:8.
17 Mí ma sọgan donukun nado yin mẹwiwe, eyin mí nọ lẹnnupọndo linlẹn po ojlo he ma sọgbe lẹ po ji. Mí dona yiwanna Jehovah po “ahun wiwe de” po. (1 Tim. 1:5) Ṣigba, ahun yin klenọ, podọ mí tlẹ sọgan nọma doayi obá he mẹ “onú he tin to aihọn mẹ lẹ” ko yinuwado mí ji jẹ. (Jel. 17:9) Enẹwutu, be e ma jẹ dọ mí ni nọ ‘tẹ́n míde pọ́n nado yọnẹn eyin mí to yise mẹ, bo nọ dindona míde nado yọ́n mẹhe nkọ mí yin’ gbọn mídelẹ gbigbejepọn sọgbe hẹ nuhe mí plọn sọn Biblu mẹ lẹ dali ya?—2 Kọl. 13:5.
18, 19. Naegbọn mí dona magbe nado yin omẹ he nkọ Jehovah jlo dọ mí ni yin?
18 Onú devo he nọ gọalọna mí nado nọavùnte sọta “onú he tin to aihọn mẹ lẹ” wẹ ohó gbọdo Johanu tọn he mí hẹn do ayiha mẹ ehelẹ: “Aihọn to jujuyi po ojlo etọn po ga, ṣigba ewọ he wà ojlo Jiwheyẹwhe tọn na gbọṣi aimẹ kakadoi.” (1 Joh. 2:17) Titonu Satani tọn sọgan taidi nuhe na gbọṣi aimẹ kakadoi. Ṣigba, e na wá opodo to gbèdopo. Nudepope he aihọn Satani tọn sọgan zedonukọnna mí ma na gbọṣi aimẹ kakadoi. Nugbo enẹ flinflin na gọalọna mí ma nado yin kiklọ gbọn yẹdoklọmẹnu Lẹgba tọn lẹ dali.
19 Apọsteli Pita dotuhomẹna mí nado yin mẹhe nkọ Jiwheyẹwhe nọ kẹalọyi, dile mí to “tenọpọn bo to hinhẹn tintin tofi azán Jehovah tọn do ayiha mẹ gligli, to ehe mẹ olọn he to miyọ́n ji lẹ na yọ́ bọ nugonu he hùnmiyọ́n sinsinyẹn lẹ na yọ́!” (2 Pita 3:12) Azán enẹ na wá to madẹnmẹ, bọ Jehovah na và adà aihọn Satani tọn lẹpo sudo. Ṣigba, kakajẹ whenẹnu, Satani na zindonukọn nado nọ yí “onú he tin to aihọn mẹ lẹ” zan nado whlé mí pọ́n, kẹdẹdile e whlé Evi po Jesu po pọ́n do. Mí ma dona yinuwa taidi Evi bo tẹnpọn nado hẹn pekọ wá na ojlo mítọn titi lẹ. Mọwiwà na dohia dọ mí kẹalọyi Satani taidi yẹwhe mítọn. Mí dona yinuwa taidi Jesu bo nọavùnte sọta yẹdoklọmẹnu mọnkọtọn lẹ, mahopọnna lehe yé sọgan yọnwhanpẹ bo dọnmẹdogo do. Mì gbọ dopodopo mítọn ni magbe nado yin omẹ he nkọ Jehovah jlo dọ mí ni yin.
[Kanbiọ hukan lẹ tọn]
[Yẹdide to weda 24]
Satani yí “ojlo agbasalan tọn” zan nado klọ Evi (Pọ́n hukan 7)
[Yẹdide to weda 25]
Jesu ma dike nudepope ni fẹayihasẹna ẹn (Pọ́n hukan 8)
[Yẹdide to weda 26]
Nunọwhinnusẹ́n tẹlẹ wẹ hiẹ dona flin to ninọmẹ ehelẹ mẹ? (Pọ́n hukan 13, 14)
