Ayinamẹ lẹ Na Ayajẹ Whẹndo Tọn

Hẹn Gbemima Alọwle Tọn Towe Go

Asi lọ dọmọ: “N’doayi e go dọ sọn ojlẹ de mẹ todin, numọtolanmẹ he asu ṣie Michael tindo na mi jẹ didepo ji, podọ e masọ nọ yawu do ovi lẹ sọmọ ba. a Nuyiwa etọn diọ tlolo he mí tindo Internet to whégbè, podọ ayiha ṣie dọna mi dọ e ko to yẹdide fẹnnuwiwa tọn pọ́n to ọdinatẹẹ ji. To zánmẹ gbèdopo, to whenuena ovi lẹ ko yihọ, n’ze whẹho lọ pé e bọ e yigbe dọ emi ko jẹ yẹdide fẹnnuwiwa tọn pọ́n ji to nọtẹn Internet tọn lẹ ji. Ehe hẹn homẹgble mi taun. E taidi odlọ de na mi. N’masọ dejidego paali ba. Nuhe tlẹ sọ hẹn whẹho lọ vantan wẹ yindọ, azọ́nwatọgbẹ́ ṣie de jẹ owanyi dohia mi ji.”

Asu lọ dọmọ: “To ojlẹ de mẹ wayi, asi ṣie Maria, mọ fọto de to ọdinatẹẹ mítọn ji bo kanhose mi gandego. Whenue n’yigbena ẹn dọ n’nọ yì nọtẹn Internet ji tọn lẹ nado pọ́n yẹdide fẹnnuwiwa tọn lẹ whẹwhẹ, adi do e taun. Winyan hù mi taun. N’lẹndọ alọwle mítọn ko fó do finẹ.”

ETẸWẸ a lẹndọ e jọ do asu po asi po ehe go? Hiẹ sọgan lẹndọ yẹdide fẹnnuwiwa tọn pinpọn wẹ yin nuhahun tangan Michael tọn. Ṣigba dile Michael wá mọ do, ohia nuhahun sinsinyẹn de tọn wẹ walọ ylankan ehe yin—yèdọ awugbopo nado hẹn gbemima alọwle tọn go. b Whenuena Michael po Maria po wlealọ tlolo, linlẹn yetọn wẹ nado yiwanna yede bo wà nulẹ dopọ. Ṣigba, taidi asu po asi po susu to egbehe, gbemima alọwle tọn yetọn ko depò dile ojlẹ lẹ to yìyì, podọ yé masọ nọ tindo ojlo to ode awetọ mẹ sọmọ ba.

Be a nọ mọdọ kanṣiṣa he tin to hiẹ po alọwlemẹ towe po ṣẹnṣẹn ko depò dile owhe lẹ to yìyì wẹ ya? Be hiẹ na jlo nado vọ́ haṣinṣan enẹ jlado? Eyin mọwẹ, hiẹ dona dín gblọndo na kanbiọ atọ̀n ehelẹ: Etẹwẹ e zẹẹmẹdo nado hẹn gbemima alọwle tọn towe go? Nuhahun tẹlẹ wẹ sọgan dekanpona gbemima mọnkọtọn? Podọ etẹwẹ a sọgan wà nado hẹn gbemima he a basi hẹ alọwlemẹ towe lodo?

Etẹwẹ Gbemima Yin?

Nawẹ hiẹ sọgan basi zẹẹmẹ gbemima alọwle tọn gbọn? Mẹsusu wẹ na dọ dọ, e dona yin pinpọnhlan taidi azọngban de. Di apajlẹ, asu po asi po de sọgan mọdọ yé dona hẹn gbemima alọwle tọn yetọn go na ovi lẹ wutu, kavi na  yé mọdọ azọngban de wẹ e yin bọ Jiwheyẹwhe, yèdọ Dowatọ alọwle tọn dena yé. (Gẹnẹsisi 2:22-24) Matin ayihaawe, linlẹn enẹlẹ yọ́n taun, podọ mọwiwà nọ gọalọna alọwlemẹ lẹ nado doakọnna ninọmẹ sinsinyẹn lẹ. Ṣigba eyin alọwlemẹ lẹ na tindo ayajẹ, yé ma dona nọ pọ́n alọwle yetọn hlan taidi azọngban de poun gba.

Jehovah Jiwheyẹwhe ze tito alọwle tọn dai, na asu po asi po lẹ nido tindo ayajẹ po pekọ nujọnu tọn po. Ojlo etọn wẹ yindọ sunnu ni “jaya hẹ asi” etọn, podọ na yọnnu ni yiwanna asu etọn bosọ tindo numọtolanmẹ lọ dọ asu etọn yiwanna ẹn kẹdẹdile asu lọ yiwanna agbasa ede tọn do. (Howhinwhẹn lẹ 5:18; Efesunu lẹ 5:28) Whẹpo asu po asi po de nido wleawuna kanṣiṣa mọnkọtọn, yé dona plọn nado nọ dejido ode awetọ go. E sọ yin nujọnu dọ yé ni wleawuna haṣinṣan tẹgbẹ tọn de. Eyin sunnu po yọnnu po dejido ode awetọ go bo dovivẹnu nado lẹzun họntọn vivẹ, enẹ na hẹn gbemima alọwle tọn yetọn lodo. Yé na wleawuna haṣinṣan pẹkipẹki de sọmọ bọ e na taidi dọ yé omẹ awe lẹ yin “agbasalan dopo” dile Biblu basi zẹẹmẹ etọn do.—Matiu 19:5.

Enẹwutu, gbemima alọwle tọn sọgan yin yiyijlẹdo sinma-yinyan he nọ hẹn bliki ohọ̀ he lodo de tọn lẹ dopọ go. Okọ́, sinma, po osin po wẹ yè do nọ wleawuna sinma-yinyan. Mọdopolọ, onú voovo delẹ wẹ nọ wleawuna gbemima alọwle tọn, taidi azọngban, jidedomẹgo, po họntọnjihẹmẹ po. Etẹwẹ sọgan dekanpona haṣinṣan enẹ?

Nuhahun Gbemima Alọwle Tọn Lẹ

Gbemima nọ biọ vivẹnudido po avọ́sinsan po. E nọ biọ dọ hiẹ ni wọnji nujlomẹ towe lẹ go nado hẹn homẹhun alọwlemẹ towe. Ṣigba alọkikẹyi ojlo mẹdevo lẹ tọn—yèdọ nado namẹ bo ma kanse dọ, ‘Ale tẹwẹ enẹ na hẹnwa na mi?’—masọ gbayipe to egbehe, podọ enẹ ma tlẹ nọ yọ́n sè na mẹdelẹ. Ṣigba kanse dewe dọ, ‘Ṣejannabinọ nẹmu wẹ n’yọnẹn he alọwle etọn tindo ayajẹ?’ Eyin e na tlẹ tin janwẹ, vude poun wẹ e na yin. Etẹwutu? E yọnbasi dọ ṣejannabinọ de ma na hẹn gbemima alọwle tọn etọn go eyin enẹ na biọ avọ́sinsan to e si, titengbe eyin e ma na mọ ale de sọn nuhe e kẹalọyi lọ mẹ to afọdopolọji. Eyin gbemima ma tin, haṣinṣan alọwle tọn ma sọgan vivi, mahopọnna lehe asu po asi po de yiwanna yede sọ to whenuena yé ṣẹṣẹ biọ họntọn mẹ.

Biblu dọ madoadúdẹji dọ alọwle nọ bẹ azọngban sinsinyẹn lẹ hẹn. E dọ dọ “ewọ he wlealọ nọ jẹtukla na nuhe yin aihọn tọn lẹ, le e na wà nuhe jlo asi etọn do,” podọ ga “ewọ he tindo asu nọ jẹtukla na onú aihọn tọn lẹ, le e na wà nuhe jlo asu etọn do.” (1 Kọlintinu lẹ 7:32-34) E blawu dọ, alọwlemẹ he ma tlẹ yin ṣejannabinọ lẹ ma nọ doayi ahunmẹdunamẹnu kavi avọ́sinsan ode awetọ tọn lẹ go. Eyin asu po asi po de gboawupo nado yọ́n pinpẹn ode awetọ tọn, dandan wẹ dọ alọwle yetọn ni hẹn yé tindo “tukla [susu] to agbasalan mẹ” hugan lehe e dona ko yin do.—1 Kọlintinu lẹ 7:28.

Eyin alọwle towe na tindo kọdetọn dagbe to ojlẹ awusinyẹn tọn po dagbe lẹ po mẹ, hiẹ dona nọ pọ́n alọwle towe hlan taidi haṣinṣan tẹgbẹ tọn de. Nawẹ hiẹ sọgan wleawuna pọndohlan mọnkọtọn bo na tuli alọwlemẹ towe nado hẹn gbemima etọn go gbọn?

Lehe Hiẹ Sọgan Hẹn Gbemima Towe Lodo Gbọn

Aliho titengbe dopo wẹ nado nọ yí ayinamẹ he tin to Ohó Jiwheyẹwhe tọn, Biblu mẹ lẹ do yizan mẹ po whiwhẹ po. Gbọn mọwiwà dali, hiẹ na ‘hẹn ale wá na dewe’ podọ na alọwlemẹ towe. (Isaia 48:17) Lẹnnupọndo afọdide yọ́n-na-yizan awe he hiẹ sọgan ze ehelẹ ji.

1. Ylọ alọwle towe dọ nujọnu. Apọsteli Paulu wlan dọmọ: “Mì . . . mọdona nuhe gbọnvo [kavi nuhe yin nujọnu hugan] lẹ.” (Filippinu lẹ 1:10) Lehe asu po asi po de nọ yinuwa hẹ ode awetọ do yin nujọnu taun to nukun Jiwheyẹwhe tọn mẹ. Jiwheyẹwhe nọ doyẹyigona sunnu he nọ wleyẹyina asi etọn. Podọ asi he nọ na sisi asu etọn “họakuẹ susu to Jiwheyẹwhe nukunmẹ.”—1 Pita 3:1-4, 7.

 Nawẹ alọwle towe yin nujọnu na we sọ? To paa mẹ, lehe nude yin nujọnu na we sọ, mọ wẹ hiẹ na yí whenu susu zan do e ji do niyẹn. Kanse dewe dọ: ‘To osun he wayi mẹ, whenu nẹmu wẹ n’ko de dovo nado yizan hẹ alọwlemẹ ṣie? Onú tangan tẹlẹ wẹ n’wà nado hẹn alọwlemẹ ṣie deji dọ mí gbẹ́ pò to họntọn vivẹ yin?’ Eyin whenu vude poun wẹ a nọ yizan nado penukundo alọwlemẹ towe go kavi ma tlẹ nọ wàmọ paali, e sọgan vẹawuna ẹn nado yise dọ hiẹ hẹn gbemima alọwle tọn towe go.

Be alọwlemẹ towe nọ mọ nugbonugbo dọ hiẹ hẹn gbemima alọwle tọn towe go ya? Nawẹ hiẹ sọgan yọnẹn gbọn?

TẸ́N EHE PỌ́N: Kàn onú voovo atọ́n ehelẹ do wema de ji: akuẹ, azọ́n, alọwle, ayidedai, po họntọn lẹ po. Todin, tò onú ehelẹ sọgbe hẹ nuhe a lẹndọ e yin nujọnu hugan na alọwlemẹ towe. Biọ to ewọ lọsu si nado wà nudopolọ. To whenuena mì fó, ze wema towe na ẹn bo yí etọn. Eyin alọwlemẹ towe lẹndọ hiẹ ma nọ yí dewe do sanvọ́ kavi yí whenu zan sọmọ to alọwle mìtọn mẹ, mì dọhodo diọdo he mì sọgan basi nado hẹn gbemima mì omẹ awe lẹ tọn lodo ji. Sọ kanse dewe dọ, ‘Etẹwẹ n’sọgan wà nado tindo ojlo dogọ to nuhe yin nujọnu na alọwlemẹ ṣie lẹ mẹ?’

2. Dapana nuyiwa nugbonọ-mayin tọn lẹpo. Jesu Klisti dọmọ: ‘Eyin mẹdepope zindonukọn nado to yọnnusi de pọ́n nado wà nugbigble hẹ ẹ, e ko deayọ hẹ ẹ to ayiha etọn mẹ dote.’ (Matiu 5:28) To whenuena mẹde tindo kọndopọ zanhẹmẹ tọn hẹ mẹhe ma yin alọwlemẹ etọn, yèdọ nuhe Biblu dọ dọ e yin dodonu gbẹdai tọn, e to gbakija hẹnwa alọwle lọ mẹ niyẹn. (Matiu 5:32) Ṣigba hogbe Jesu tọn he yin nùdego to aga lẹ dohia dọ ojlo ylankan lọ sọgan fọ́n to ayiha mẹ na ojlẹ dindẹn whẹpo mẹde ni tlẹ do deayọ. Nulinlẹnpọn do ojlo ylankan mọnkọtọn ji yin nuyiwa nugbonọ-mayin tọn de.

Nado hẹn gbemima alọwle tọn towe go, hiẹ dona magbe po ahundopo po ma nado pọ́n yẹdide fẹnnuwiwa tọn. Mahopọnna nuhe mẹsusu sọgan dọ, yẹdide fẹnnuwiwa tọn pinpọn nọ hẹnnugble to alọwle mẹ taun. Doayi lehe asi de dọ numọtolanmẹ etọn gando aṣa he asu etọn tindo nado nọ pọ́n yẹdide mọnkọtọn lẹ go do. E dọmọ: “Asu ṣie nọ dọ dọ yẹdide fẹnnuwiwa tọn pinpọn na yidogọna owanyi zogbe he mí tindo na mídelẹ. Ṣigba enẹ nọ hẹn mi tindo numọtolanmẹ lọ dọ n’ma yin nujọnu de to apá etọn, podọ yẹn kẹdẹ ma pé e. N’nọ to avivi kaka amlọn do nọ yí mi, to whenuena ewọ to onú etọn pọ́n.” Be hiẹ na dọ  dọ dawe ehe to gbemima alọwle tọn etọn hẹn lodo, kavi ewọ to kandepona ẹn? Be hiẹ lẹndọ ewọ to alọgọna asi etọn nado hẹn gbemima alọwle tọn etọn go ya? Be e to nuyiwa hẹ asi etọn taidi họntọn vivẹ etọn ya?

Dawe nugbonọ lọ Job do gbemima he e basi na Jiwheyẹwhe podọ na alọwlemẹ etọn hia gbọn ‘alẹnu de bibasi hẹ nukun etọn lẹ dali.’ E magbe ma nado “pọ́n [kavi na ayidonugo] yọpọ yọnnu” de. (Job 31:1) Nawẹ hiẹ sọgan hodo apajlẹ Job tọn gbọn?

Gbọnvona dọ hiẹ dona dapana yẹdide fẹnnuwiwa tọn lẹ pinpọn, hiẹ sọ dona họ́ ahun towe ma nado wleawuna haṣinṣan he ma sọgbe hẹ mẹhe ma yin alọwlemẹ towe. Nugbo wẹ dọ mẹdelẹ nọ lẹndọ aihun gblewa tọn didà hẹ mẹhe ma yin alọwlemẹ mẹtọn ma nọ hẹnnugble to alọwle mẹ. Ṣigba Ohó Jiwheyẹwhe tọn na mí avase dọmọ: “Ayiha yin oklenọ hugan nulẹpo, podọ e sọ yin awutunọ tupinpẹnnọ: mẹnu wẹ sọgan yọ́n ẹn?” (Jẹlemia 17:9) Be ayiha towe nọ klọ we wẹ ya? Kanse dewe dọ: ‘Mẹnu wẹ n’nọ na ayidonugo hugan—alọwlemẹ ṣie kavi mẹdevo he ma yin alọwlemẹ ṣie? Eyin n’sè ohó de, mẹnu wẹ n’nọ dọna jẹnukọn—alọwlemẹ ṣie kavi mẹdevo? Eyin alọwlemẹ ṣie dọna mi nado dekanpona haṣinṣan he n’tindo hẹ mẹhe ma yin alọwlemẹ ṣie, nawẹ n’na yinuwa gbọn? Be n’na gblehomẹ wẹ, kavi homẹ ṣie na hùn nado basi vọjlado he jẹ lẹ?’

TẸ́N EHE PỌ́N: Eyin hiẹ mọdọ onú mẹdevo tọn nọ jẹ towe ji hugan alọwlemẹ towe tọn, dekanpona haṣinṣan lọ bo ma dike ni zẹ̀ whẹho he yin dandan tọn lẹ kẹdẹ go blo. Ma ze ayidonugo towe do adà he mẹ a lẹndọ mẹlọ pọnte hú alọwlemẹ towe te lẹ ji blo. Kakatimọ, ze ayidonugo do jẹhẹnu dagbe he alọwlemẹ towe tindo lẹ ji. (Howhinwhẹn lẹ 31:29) Flin nuhewutu a do yiwanna alọwlemẹ towe to bẹjẹeji. Kanse dewe dọ, ‘Be alọwlemẹ ṣie masọ tindo jẹhẹnu ehelẹ ba wẹ, kavi yẹn wẹ masọ to ayidonugo na yé ba?’

Ze Afọdide Tintan

Michael po Maria po he yin nùdego to bẹjẹeji, de dide nado dín ayinamẹ do lehe yé na didẹ nuhahun yetọn lẹ do ji. Na nugbo tọn, afọdide tintan poun wẹ ayinamẹ dindin yin. Ṣigba, na Michael po Maria po wleawufo nado duto nuhahun yetọn lẹ ji bo dín alọgọ wutu, yé dohia hezeheze dọ yé hẹn gbemima alọwle tọn yetọn go, bo wleawufo nado hẹn alọwle yetọn tindo kọdetọn dagbe.

Eyin kanṣiṣa alọwle towe tọn lodo kavi lala, alọwlemẹ towe dona yọnẹn dọ hiẹ ko magbe nado hẹn alọwle mìtọn tindo kọdetọn dagbe. Wà nuhe jẹ lẹpo na alọwlemẹ towe nido mọdọ hiẹ nọ wàmọ. Be hiẹ ko wleawufo nado wà enẹ ya?

[Nudọnamẹ odò tọn]

KANSE DEWE DỌ . . .

▪ Nuwiwa tẹlẹ wẹ n’dona depò nado mọ whenu dogọ na alọwlemẹ ṣie?

▪ Etẹwẹ n’sọgan wà nado hẹn alọwlemẹ ṣie deji dọ n’hẹn gbemima alọwle tọn mítọn go?

[Yẹdide to weda 16]

Nọ de whenu dovo na alọwlemẹ towe

[Yẹdide to weda 17]

Ayiha mẹ wẹ nuyiwa nugbonọ-mayin tọn nọ bẹsọn