Dọnsẹpọ Jiwheyẹwhe

Whẹdatọ He Nọ Wà Nuhe Sọgbe to Whepoponu

Gẹnẹsisi 18:22-32

WHẸDIDA dodo. Dodowiwa. Mẹnukuntamahopọn. Be hiẹ ma yiwanna jẹhẹnu dagbe ehelẹ? Mí gbẹtọvi lẹ nọ jlo to jọwamọ-liho dọ mẹdevo lẹ ni yinuwa hẹ mí to aliho he sọgbe mẹ. E blawu dọ mawadodo wẹ gbayipe to aihọn egbehe tọn mẹ. Ṣigba, Whẹdatọ he go mí sọgan dejido de tin—enẹ wẹ Jehovah Jiwheyẹwhe. E nọ wà nuhe sọgbe to whepoponu. Ehe sọawuhia hezeheze to hodọdopọ he wá aimẹ to Jehovah po Ablaham po ṣẹnṣẹn de mẹ, dile e yin kinkàndai do to Gẹnẹsisi 18:22-32. a

To whenuena Jehovah hẹn nudide etọn nado gbeje ninọmẹ Sọdọmi po Gọmọla po tọn pọ́n zun yinyọnẹn na Ablaham, dagbemẹninọ dodonọ he nọ nọ̀ finẹ lẹpo gọna tavẹ-ylọvi etọn Lọti tọn duahunmẹna Ablaham taun. Ablaham vẹ̀ Jehovah dọmọ: “Be hiẹ na và dodonọ sẹ̀ ga po mẹylankan po wẹ? Eya dodonọ kandeao tin to otò lọ mẹ: be hiẹ . . . ma na jo e do na dodonọ kandeao he tin to e mẹ?” (Wefọ 23, 24) Jiwheyẹwhe dọ dọ emi ma na và tòdaho lọ lẹ sudo eyin emi mọ dodonọ 50 poun to finẹ. Ablaham sọ vẹ̀ Jehovah whla atọ́n dogọ kakajẹ whenuena sọha lọ depò wá ao. To vẹvivẹ lọ lẹ dopodopo godo, Jiwheyẹwhe nọ dọ dọ emi ma na và tòdaho lọ lẹ sudo eyin sọha dodonọ he Ablaham dọ lọ lẹ tọn tin to finẹ.

Be Ablaham to núdọ̀n hẹ Jiwheyẹwhe wẹ ya? Paali! Ehe na ko yin nuyiwa sakla tọn. Kọnugbè Ablaham tọn do sisi po whiwhẹ he sọgbe po hia. E ylọ ede dọ “kọ́gudu po afín po.” Humọ, hogbe Ablaham tọn lẹ dohia dọ e dejido dodowiwa Jehovah tọn go. Whla awe plipli wẹ Ablaham dọ dọ “enẹ ni dẹn do” Jiwheyẹwhe nado và dodonọ po mẹylankan po dopọ. Tọgbo nugbonọ lọ do nujikudo etọn hia dọ ‘Whẹdatọ aihọn lẹpo tọn na wà nuhe sọgbe.’—Wefọ 25.

Be nuhe Ablaham dọ lẹ sọgbe ya? Mí sọgan dọ mọwẹ podọ lala. Owhẹ̀ etọn ma whẹ́n to whenuena e lẹndọ e whè gbau dodonọ ao tin to Sọdọmi po Gọmọla po. Ṣigba, ayihaawe ma tin dọ owhẹ̀ etọn whẹ́n to whenuena e dọ dọ Jiwheyẹwhe ma na “và dodonọ . . . po mẹylankan po” dopọ gbede. To whenuena Jiwheyẹwhe wá và tòdaho ylankan enẹlẹ sudo, Lọti dodonọ lọ po viyọnnu etọn awe lẹ po gán po alọgọ angẹli lẹ tọn po.—2 Pita 2:7-9.

Etẹwẹ kandai ehe plọn mí gando Jehovah go? Na nugbo tọn, gbọn linlẹn Etọn didọna Ablaham dọ emi jlo na dla tòdaho lọ lẹ pọ́n dali, Jehovah jlo dọ Ablaham ni dọ nuhe yin numọtolanmẹ etọn. Enẹgodo, e dotoai po sọwhiwhe po to whenuena họntọn etọn Ablaham to ahunmẹdunamẹnu etọn lẹ dọ. (Isaia 41:8) Nuplọnmẹ dagbe nankọ die dọ Jehovah yin Jiwheyẹwhe whiwhẹnọ de, he nọ doyẹyigona devizọnwatọ etọn he tin to aigba ji lẹ! E họnwun dọ mí tindo whẹwhinwhẹ́n lẹpo nado dejido Jehovah go mlẹnmlẹn, yèdọ Whẹdatọ he nọ wà nuhe sọgbe to whepoponu lọ.

[Nudọnamẹ odò tọn]

[Yẹdide to weda 20]

Ablaham vẹvẹna Jehovah gando Sọdọmi po Gọmọla po go