Họ́ Dewe Sọta Gbigbọ Ylankan Lẹ

JAMES yin pinplọn whẹ́n to gbétatò de mẹ to Malaita, dopo to lopo Salomon tọn lẹ mẹ. E ko yin pinplọn sọn jọja whenu etọn gbọ́n nado nọ gbògbéna gbigbọ lẹ. E dọmọ: “N’ma lẹndọ n’na biọ to gbigbọ lẹ si nado gbleawuna mẹde pọ́n gbede, ṣigba linlẹn ṣie wẹ yindọ mẹde ma sọgan tindo ayajẹ to gbẹzan etọn mẹ eyin e ma yí rarafono [aṣa lọ nado biọ alọgọ sọn gbigbọ lẹ si] zan nado mọ hihọ́ sọn nugbajẹmẹji lẹ si.”

Lẹdo aihọn pé, mẹsusu tindo pọndohlan dopolọ di tòmẹnu lopo Salomon tọn lẹ he yise dọ gbigbọ lẹ sọgan gọalọnamẹ kavi gbleawunamẹ. Na nugbo tọn, Mélanésie-nu susu ma nọ whleawu nado biọ alọgọ gbigbọ he yé nọ pọnhlan taidi gbigbọ dagbe lẹ tọn podọ yé ma nọ dibuna yé.

Aliho susu mẹ wẹ gbẹtọ lẹ nọ dohia dọ yé tindo yise to gbigbọ lẹ mẹ te. Di apajlẹ, to whenue James pò to pẹvi, vinọ he tin to gbétatò etọn mẹ lẹ nọ yawu bẹ ovi yetọn lẹ biọ họmẹ whedepopenu he yé sè ogbè ohẹ̀ he nọ yin yiylọdọ korokoro tọn. Etẹwutu? Yé yise dọ ogbè ohẹ̀ lọ tọn yin avase dọ owùnu de ja mẹde ji.

Gbétanu delẹ nọ ze zannu wewe vonọtaun de do aga họntonu yetọn lẹ tọn. James lọsu wàmọ na e yise dọ zannu lọ na basi hihọ́na ẹn sọta gbigbọ ylankan lẹ. Podọ to azọ́nmẹ, eyin James dùnú fó to whèmẹ, e nọ bẹ nuhe e dùpò lẹpo do apò de mẹ nado bẹ dlan to nukọn mẹ. Obu etọn wẹ yindọ bojlẹtọ de sọgan mọ nuhe e dùpò lọ lẹ bo yí yé zan nado dó azọ̀n ẹn.

Aṣa ehelẹ sọgan nọma gbayipe to lẹdo towe mẹ, ṣigba taidi James, vlavo hiẹ mọdọ dandannu wẹ e yin nado hodo aṣa lẹdo towe tọn lẹ nado sọgan họ́ dewe sọta gbigbọ ylankan lẹ. Hiẹ sọgan kudeji dọ aṣa enẹlẹ hihodo yin nujọnu na dagbemẹninọ towe.

Matin ayihaawe, eyin hiẹ yí Biblu sè, a na jlo nado yọ́n gblọndo he e na na kanbiọ ehelẹ: (1) Nawẹ gbigbọ ylankan lẹ sọgan gbleawuna we gbọn? (2) Be aṣa delẹ hihodo ma na hùn we donuvo na nuyiwadomẹji aovi lẹ tọn ya? (3) Nawẹ hiẹ sọgan họ́ dewe nugbonugbo sọta gbigbọ ylankan lẹ bosọ yin ayajẹnọ gbọn?

Lehe Gbigbọ Ylankan lẹ Nọ Gbleawunamẹ Do

Biblu dohia dọ gbigbọ ylankan lẹ ma sọgan yin gbigbọ oṣiọ lẹ tọn gba. Ohó  Jiwheyẹwhe tọn dọmọ: “Na mẹhe to ogbẹ̀ yọnẹn dọ emi na kú; ṣigba oṣiọ lẹ ma yọ́n nude.” (Yẹwhehodọtọ 9:5) Na nugbo tọn, gbigbọ ylankan lẹ wẹ angẹli atẹṣitọ lẹ he kọnawudopọ hẹ Satani to vivẹnudido etọn mẹ nado hẹn gbẹtọ lẹ buali.—Osọhia 12:9.

Owe-wiwe dohia hezeheze dọ mí tindo nuhudo nado basi hihọ́na míde sọta gbigbọ ylankan lẹ. Apọsteli Paulu kanwe hlan Klistiani Efesu tọn lẹ dọmọ: ‘E ma yin agbasalan po ohùn po wẹ míwlẹ to ahidi hẹ gba, ṣigba hẹ gbigbọ ylankan he tin to olọn lẹ mẹ.’ Apọsteli Pita do Satani Lẹgba, ogán gbigbọ ylankan lẹ tọn, hia taidi “kinnikinni he to lìlì, [he] to zọnlinzin pé, bo to mẹhe e na tlẹndu dín.”—Efesunu lẹ 6:12; 1 Pita 5:8.

Aliho titengbe he mẹ Satani nọ gbleawuna gbẹtọ lẹ te wẹ gbọn kiklọ yé kavi whiwhle yé pọ́n nado yinuwa to aliho he na hẹn homẹgblena Jiwheyẹwhe mẹ dali. Biblu dọ dọ Satani “nọ diọadazun angẹli hinhọ́n tọn.” (2 Kọlintinu lẹ 11:14) E nọ do ede hia taidi gbigbọ hihọ́-basinamẹtọ de to whenuena e yindọ linlẹn ylankan kẹdẹ wẹ e tindo. Satani nọ tọ́nnukunna gbẹtọ lẹ ma nado yọ́n nugbo lọ gando ewọ go podọ gando Jiwheyẹwhe go. (2 Kọlintinu lẹ 4:4) Etẹwutu Satani do nọ klọ gbẹtọ lẹ?

Satani jlo vẹkuvẹku dọ gbẹtọ lẹ ni basi sinsẹ̀n hlan ẹn sọn ojlo mẹ wá kavi to mayọnẹn mẹ. Whenuena Jesu, Ovi Jiwheyẹwhe tọn tin to aigba ji, Satani jlo dọ ni “jẹklo bo litaina” emi. Jesu gblọn dọmọ: “Tọ́n sọn ofi, Satani: na yè wlanwe etọn dọ, Hiẹ na litaina [Jehovah] Jiwheyẹwhe towe.” (Matiu 4:9, 10) Jesu gbẹ́ nado wà nudepope he na dohia dọ e to sinsẹ̀n basi hlan Satani.

Jehovah wẹ gbigbọ he tindo huhlọn hugan gbigbọ lẹpo podọ e ma na dike awugble tẹgbẹ tọn depope ni wá mẹhe nọ setonuna ẹn lẹ ji. (Psalm 83:18; Lomunu lẹ 16:20) Ṣigba eyin mí jlo na hẹn homẹ Jehovah Jiwheyẹwhe tọn hùn dile Jesu wà do, mí ma dona wà nudepope he na dohia dọ mí to sinsẹ̀n basi hlan Satani kavi aovi etọn lẹ. Enẹwutu, mí dona yọ́n aṣa he nọ do gbégbò hia gbigbọ ylankan lẹ. Nawẹ hiẹ sọgan wà ehe gbọn?

Yọ́n Aṣa He Jiwheyẹwhe Gbẹwanna Lẹ

Jehovah Jiwheyẹwhe na avase Islaelivi he yin omẹ etọn hohowhenu tọn lẹ ma nado hodo aṣa akọta he lẹdo yé lẹ tọn. E dọmọ: ‘Yè ma na mọ mẹdepope to dè we finẹ he nọ zan aṣẹ, ode he nọ yí apajlẹnu basi, kavi afinyọnnọ de, kavi azétọ de, kavi bojlẹtọ de.’ Biblu dọ gando mẹhe nọ hodo aṣa ehelẹ go dọmọ: “Mẹdepope he wà onú helẹ yin osùnú de hlan OKLUNỌ lọ.”—Deutelonomi 18:10-12.

Enẹwutu, whenue hiẹ to nulẹnpọndo aṣa he gbayipe to lẹdo towe mẹ lẹ ji, gbadopọnna kanbiọ ehelẹ: Be aṣa lọ nọgodona afinyọnnuwiwa wẹ ya? Be e nọ hẹn gbẹtọ lẹ lẹndọ nuyizan tata lẹ tindo huhlọn to jọwamọ-liho nado basi hihọ́namẹ wẹ ya? Be e bẹ bowiwà nado gbleawunamẹ kavi nado mọ hihọ́ hẹn wẹ ya? Be e na biọ dọ hiẹ ni litaina gbigbọ devo gbọnvona Jehovah po Jesu he yin afọzedaitọ dide etọn po wẹ ya?—Lomunu lẹ 14:11; Filippinu lẹ 2:9, 10.

Nujọnu wẹ e yin dọ hiẹ ni gbẹ́ aṣa depope he nọ nọgodona nuyiwa mọnkọtọn lẹ dai. Etẹwutu? Apọsteli Paulu wlan to gbọdo glọ dọmọ: “Mìwlẹ ma sọgan yin mimátọ tafo [Jehovah] tọn, po tafo aovi lẹ tọn po gba.” E na avase dọ mẹhe to tintẹnpọn nado hẹn homẹhun Jiwheyẹwhe po gbigbọ devo lẹ po to ojlẹ dopolọ mẹ lẹ ‘to awuwhàn Jehovah tọn fọndote.’ (1 Kọlintinu lẹ 10:20-22) Jehovah Jiwheyẹwhe yin awuwhàntọ bosọ jẹna mẹdezejo mlẹnmlẹn.—Eksọdusi 20:4, 5.

Sọ lẹnnupọndo kanbiọ ehe ji: Be aṣa lọ nọgodona linlẹn lọ dọ mẹde ma dona yin whẹgbledo na nuyiwa etọn lẹ wẹ ya? Di apajlẹ, akọta susu wẹ jẹagọdo ayọdide po  zanhẹmẹ jẹnukọnna alọwle po podọ nuyiwa ehelẹ sọ yin whẹgbledo to Biblu mẹ. (1 Kọlintinu lẹ 6:9, 10) Etomọṣo, to aṣa lẹdo Pacifique tọn delẹ mẹ, eyin awhli de doalọ to walọyizan mọnkọtọn lẹ mẹ bo dọ dọ obó he yè do na emi wẹ sisẹ́ emi nado wàmọ, mẹde ma na gblewhẹdo e.

Ṣigba, Biblu plọn mí dọ mẹdopodopo wẹ na hẹn agbàn nuyiwa etọn lẹ tọn. (Lomunu lẹ 14:12; Galatianu lẹ 6:7) Di dohia, Evi, yọnnu tintan lọ suwhẹna ede dọ Satani wẹ klọ emi nado vẹtolina Jiwheyẹwhe bo dọmọ: “Odàn wẹ blu mi, bọ yẹn sọ dù.” Ṣogan, Jehovah hẹn Evi nado dogbè. (Gẹnẹsisi 3:13, 16, 19) Mọdopolọ, e nọ hẹn mí nado dogbè nuyiwa mítọn lẹ tọn.—Heblu lẹ 4:13.

Etẹwẹ Hiẹ Dona Wà?

Eyin hiẹ jlo na hẹn homẹhun Jiwheyẹwhe bosọ nọgbẹ̀ sọgbe hẹ nunọwhinnusẹ́n Biblu tọn lẹ, hiẹ dona ze afọdide nujikudo tọn. Gbẹtọ ahunjijlọnọ delẹ ze apajlẹ dagbe dai to ehe mẹ to owhe kanweko tintan whenu to Efesu. Nado de yede sọn nuyiwadomẹji gbigbọ ylankan lẹ tọn glọ, yé bẹ owe afinyọn tọn he yé tindo lẹ pli bo “mẹ̀n yé to gbẹtọ lẹpo nukọn.”—Owalọ lẹ 19:19.

Whẹpo omẹ ehelẹ do mẹ̀n owe lọ lẹ, yé “wá [bo] to gbeyi, bosọ to owalọ yetọn lẹ dohia.” (Owalọ lẹ 19:18) Nuhe Paulu plọn yé gando Klisti go whàn yé sọmọ bọ yé mẹ̀n owe afinyọn tọn yetọn lẹ bosọ diọ pọndohlan yetọn gando aṣa yetọn lẹ go.

Nugbo wẹ dọ e sọgan nọma bọawu nado dealọ sọn aṣa he gbayipe to lẹdo mítọn mẹ lẹ mẹ. James he yin nùdego jẹnukọn pehẹ avùnnukundiọsọmẹ ehe. E jẹ Biblu plọn hẹ Kunnudetọ Jehovah tọn lẹ ji bo duvivi nuhe plọn e te lẹ tọn. Ṣigba e gbẹsọ pò to rarafono yizan. To whenue e lẹnnupọndo aṣa ehelẹ ji, e mọdọ emi yí opagbe he Jehovah do na sọgodo lẹ sè, ṣigba todin whẹ́ emi gbẹ́ dona ganjẹ aṣa lọ lẹ go nado mọ hihọ́ yí.

Etẹwẹ gọalọna James nado diọ pọndohlan etọn? E dọmọ: “N’biọ to Jehovah si to odẹ̀ mẹ nado basi hihọ́na mi bo gọalọna mi nado dejido ewọ go. To ojlẹ dopolọ mẹ, n’dealọ sọn aṣa he n’nọ hodo dai lẹ mẹ. Be e jiya awugble de tọn wẹ ya? “Paali,” wẹ James dọ. “Nuhe jọ poun wẹ yindọ n’plọn nado dejido Jehovah go. N’wá mọ lehe mẹde sọgan tindo haṣinṣan pẹkipẹki hẹ Jehovah taidi họntọn de do.” Na nugbo tọn, to owhe ṣinawe he wayi ehelẹ mẹ, James nọ yí whenu susu zan nado gọalọna mẹdevo lẹ nado yọ́n nuhe Biblu plọnmẹ lẹ.

Naegbọn hiẹ lọsu ma na hodo apajlẹ James tọn? Gbadopọnna aṣa he gbayipe to lẹdo towe mẹ lẹ, bo yí huhlọn nulẹnpọn tọn towe zan nado yọnẹn eyin yé tin to kọndopọ mẹ hẹ “ojlo Jiwheyẹwhe tọn.” (Lomunu lẹ 12:1, 2) Enẹgodo, po adọgbigbo po, basi nudide nado dealọ sọn aṣa otangblo tọn lẹ mẹ. Eyin hiẹ wàmọ, a sọgan kudeji dọ Jehovah na “yí” kavi kẹalọyi we bosọ basi hihọ́na we. (2 Kọlintinu lẹ 6:16-18) Taidi James, hiẹ na mọ lehe opagbe Biblu tọn ehe yin nugbo do dọmọ: “Oyín [Jehovah] tọn, wẹ ohọ̀ gángán: dodonọ họ̀n biọ e mẹ, bosọ gán.”—Howhinwhẹn lẹ 18:10.

[Yẹdide to weda 15]

“Korokoro”

[Asisa Yẹdide tọn]

Courtesy of Dr. Bakshi Jehangir

[Yẹdide to weda 15]

Viyọnnu de to nudùpò lẹ bẹ na mẹde nikaa yí do wanu