Wekanhlanmẹ de sọn Bolivie

Ayajẹ po Todido po Mahopọnna Ohẹ́n

N’WÀ devizọn taidi mẹdehlan to otò wamọnọ tọn de mẹ, ṣigba n’ma ko mọ mẹde to ninọmẹ ohẹ́n po todido matindo po tọn mẹ domọ pọ́n. E jlo mi dọ mẹlẹpo ni mọ pọngbọ na yajiji yetọn to afọdopolọji. Ṣigba n’yọnẹn dọ Ahọluduta Jiwheyẹwhe tọn kẹdẹ wẹ sọgan didẹ nuhahun ehelẹ. N’ko doayi e go whlasusu dọ mẹhe nọ hodo anademẹ he tin to Ohó Jiwheyẹwhe tọn mẹ lẹ nọ mọ ayajẹ, mahopọnna ninọmẹ sinsinyẹn he mẹ yé te lẹ. Sabina yin dopo to yé mẹ.

To owhe delẹ die wayi, Sabina bẹ viyọnnu pẹvi etọn awe lẹ do awà mẹ, bo to asu etọn pọ́n dile e to mọto hoho de mẹ biọ nado yì dín azọ́n he pekuẹ to tògodo. E donukun in na osun lẹ, bọ osun wá lẹzun owhe, kaka bọ e ma gọ̀ gbede. Sọn whenue gbọ́n asu Sabina tọn ko yì, e dona wazọ́n sinsinyẹn egbesọegbesọ nado penukundo ede po viyọnnu etọn awe lẹ, Milena po Ghelian po go.

Tintan he n’dukosọ hẹ Sabina to whèmẹ de, e yí homẹfa do to hodọ hẹ ahisinọ he to ṣọ̀ṣọ̀ do na ẹn lẹ to ṣọfu mẹdaho etọn yọnnu tọn mẹ. Nukunmẹ Sabina tọn he kúṣiọ dohia dọ e ko to azọ́n sinsinyẹn wà sọn afọnnu gbọ́n. N’ze Biblu pinplọn donukọnna ewọ po viyọnnu etọn awe lẹ po. “E jlo mi,” wẹ e dọ, “ṣigba alọnu ṣie ján taun. Etomọṣo, a sọgan plọnnu po viyọnnu ṣie lẹ po.” N’yigbe nado plọnnu hẹ yé. Dile oplọn viyọnnu lọ lẹ tọn to nukọnyi, n’wá yọ́n Sabina dogọ, bosọ mọnukunnujẹ adán he to gbigbò e mẹ.

Nudi 4:00 mẹ afọnnu wẹ Sabina nọ fọ́n. Whenue viyọnnu etọn lẹ gbẹ́ pò to amlọndọ to họ̀nu dopo he mẹ yemẹpo nọ nọ̀, Sabina nọ flọ miyọ́n bo nọ ze ganzẹn daho hoho de do e ji. E nọ dà olàn he e na dó pâté he e nọ sọ̀ mẹ, pâté enẹ wẹ e nọ sà nado penukundo ede po ovi etọn awe lẹ po go. Sabina nọ hò linfin pâté tọn lọ dlọ́.

Sabina nọ whe kẹkẹvi de bo nọ yí sọwhiwhe do bẹ agbàn he e tindo nuhudo etọn to gbenẹgbe lẹ do e mẹ—enẹ wẹ, whèhẹ daho de, adògbẹ́, tafo, oján, nudazẹ́n, amì, olàn po linfin hihò lọ po gọna ahàn vivi he ewọ lọsu basi do lọba lẹ mẹ.

To 6:00 mẹ afọnnu, Sabina po viyọnnu etọn awe lẹ po ko nọ sọnú nado tọ́n. Yé nọ dọ̀n ohọ̀n sú bo nọ dogàn e ji. Nukunmẹ yetọn ma nọ họ́n; depope to yé mẹ ma nọ dọho kavi konu. Yé nọ ze ayidonugo yetọn lẹpo do azọ́n he yé jlo na wà ji. Whlasusu wẹ n’nọ nọ̀ owhé mẹdehlan tọn mítọn gbè bo nọ mọ gbẹtọ lẹ gbọn fleṣenu dile yé to azọ́n yetọn lẹ mẹ yì taidi Sabina. Mọwẹ, dopo poun to yọnnu susu he nọ fọ́nzán nado yì sà núdùdù po ahàn vivi po to alihogbó Bolivie tọn tó lẹ mẹ wẹ Sabina yin.

 Whẹpo 6:30 afọnnu tọn na hò, whenue owhè nọ jẹ zizẹ ji, Sabina po viyọnnu etọn lẹ po ko nọ jẹ nusatẹn yetọn. Tlolo wẹ yé nọ jẹ agbàn de ji sọn kẹkẹvi lọ mẹ bo nọ pé adò. Eyin e kán linfin hihò tintan do amì míawu mẹ, e nọ dọnú ṣì ì. Owán gblingblin etọn nọ gbà pé gbọn jẹhọn fifá afọnnu tọn mẹ, bo nọ yawu dọ̀n ahisinọ he huvẹ to hùhù lẹ wá.

“Nẹmu?” wẹ Sabina kanse ahisinọ tintan he wá agbàn etọn kọ̀n to gbèdopo. Ahisinọ he amlọn gbẹ́ pò to nukunji na lọ dlẹn alọvi etọn awe, bọ Sabina sà pâté míawu awe na ẹn. Enẹgodo, ahisinọ lọ dlẹn akuẹ he ma sọ nude do e. Mọ wẹ gbẹtọ lẹ nọ to wiwá bo nọ to yìyì do niyẹn kaka e do nọ sà fó. Whenue e sà pâté godo tọn wẹ e nọ há agbàn bo nọ dedo whégbè. Mahopọnna dọ afọ ko nọ kú Sabina na e ko nọte sọn afọnnu gbọ́n wutu, e sọ nọ yì wazọ́n devo to ṣọfu mẹdaho etọn tọn mẹ.

Whla tintan he n’wá ṣọfu lọ mẹ nado plọn Biblu hẹ viyọnnu etọn lẹ, yé ko ze oján awe dai do nuglọ fide. Sọn whenue mí jẹ nuplọn ji wẹ Milena he tindo owhe 9 po Ghelian he tindo owhe 7 po nọ to jejeji nado plọnnu bo nọ wleawu dai ganji. Vudevude, viyọnnu awe he nọ kuwinyan ehelẹ wá jẹ hodọ hẹ mi ji ganji, podọ enẹ zọ́n bọ n’jẹakọ hẹ yé. Enẹ whàn Sabina taun. E ma dẹn bọ ewọ lọsu basi dide dọ emi na plọn Biblu hẹ mi mahopọnna dọ alọnu etọn nọ ján taun.

Dile oyọnẹn Sabina tọn to susudeji, owanyi etọn na Jehovah Jiwheyẹwhe sinyẹn deji. E jẹ numimọ he e ma ko tindo pọ́n de tindo ji—enẹ wẹ ayajẹ! Sabina, mẹhe nọ sànú to alitó, he onú nọ ṣikọna bọ nukunmẹ etọn nọ kúṣiọ dai masọ to mọ todin ba. Awú nọ yá ẹ todin podọ nukunmẹ etọn nọ to sisẹ́. “Sabina nọ to nukiko mẹ to whelẹponu,” wẹ mẹdaho etọn dọ. “E ma to mọ dai.” Mẹdevo lẹ lọsu doayi e go dọ Sabina po viyọnnu etọn lẹ po ko diọ taun. Todin e ko mọ pekọ na ojlo vẹkuvẹku he e tindo nado yọ́n Jiwheyẹwhe po lẹndai etọn po.

Sabina nọ duvivi nuhe plọn e te tọn, ṣigba na azọ́n etọn nọ yí whenu susu wutu, e ma nọ mọ vivò nado yì opli Klistiani tọn lẹ. To godo mẹ, e wá yigbe nado wá opli to Plitẹnhọ Ahọluduta tọn mẹ. Sọn whenẹnu gbọ́n, e nọ wá opli lẹ to gbesisọ mẹ. Sabina mọ họntọn dagbe lẹ to agun Klistiani tọn mẹ. E sọ mọ sọn numimọ etọn titi mẹ dọ Jehovah nọ penukundo mẹhe yiwanna ẹn bo nọ basi avọ́sinsan nado sẹ̀n ẹn lẹ go ganji.—Luku 12:22-24; 1 Timoti 6:8.

Na Sabina yiwanna nuhe plọn e te wutu, e jlo nado má ẹn hẹ mẹdevo lẹ. Ṣigba e dọ dọ, “Whedepopenu he n’lẹnnu jẹ kunnudide gbangba tọn ji, obu nọ di mi.” E dọ dọ, ‘Nawẹ yẹn, he nọ kuwinyan bo ma yí wehọmẹ sọmọ sọgan penugo nado plọnnu mẹdevo lẹ gbọn?’ Ṣigba aliho he mẹ mẹmẹsunnu lẹ yinuwa hẹ ẹ te po lehe gbẹzan etọn pọnte deji do po whàn ẹn nado ze afọdide nujọnu tọn ehe. E sọ doayi e go dọ apajlẹ etọn wẹ viyọnnu etọn lẹ nọ hodo. Enẹwutu, e jẹ wẹndagbe lọ lá na mẹdevo lẹ ji. Po zohunhun po, viyọnnu etọn lẹ kọnawudopọ hẹ ẹ.

To egbehe, Sabina masọ yin hẹntọnọ de poun he nọ to tuklajẹ po awubla po egbesọegbesọ ba. Ninọmẹ akuẹzinzan tọn etọn ma ko diọ kaka de gba, ṣigba pọndohlan etọn gando ogbẹ̀ go wẹ diọ. Todin, taidi Klistiani he ko yí baptẹm de, e nọ lá na mẹdevo lẹ dọ Ahọluduta Jiwheyẹwhe tọn kẹdẹ wẹ na de ohẹ́n po todido matindo po sẹ̀ sọn aihọn mẹ mlẹnmlẹn.—Matiu 6:10.

Todin, 5:00 afọnnu tọn ko hò, bọ Sabina ko sọ fọ́n. Ṣigba to ojlẹ ehe mẹ, e mayin nado yì sà pâté gba. E jei nado yì kọnawudopọ hẹ Klistiani hatọ delẹ nado yì dekunnu to tòhomẹ-liho ji. Whenu he e nọ de dovo to sẹmẹsẹmẹ nado gọalọna mẹdevo lẹ nọ hẹn ẹn tindo ayajẹ dogọ. E nọ sú ohọ̀n etọn, podọ po nukiko yẹsẹ de po, e nọ dedo tòhomẹ-liho ji. Kakati nado to kẹkẹvi de sisẹ́, saki de wẹ e nọ zehẹn todin. E nọ bẹ Biblu po owe sinai do Biblu ji he e na yizan nado lá wẹndagbe na mẹdevo lẹ po do saki lọ mẹ. Po nukiko yẹsẹ de po, Sabina dọ po adọgbigbo po dọmọ: “N’ma tlẹ kúdlọ pọ́n gbede dọ n’sọgan penugo nado dọhona mẹdevo lẹ gando Biblu go.” E yidogọ dọ, “N’nọ duvivi etọn taun!”