Whetẹnu Wẹ Jesu Lẹzun Ahọlu?
Plọnnu Sọn Ohó Jiwheyẹwhe Tọn Mẹ
Whetẹnu Wẹ Jesu Lẹzun Ahọlu?
Hosọ ehe fọ́n kanbiọ he hiẹ sọgan ko nọ kanse lẹ dote bo do fihe hiẹ sọgan mọ gblọndo lọ lẹ te to Biblu mẹ hia. Homẹ Kunnudetọ Jehovah tọn lẹ tọn na hùn nado dọhodopọ hẹ we do gblọndo ehelẹ ji.
1. Opagbe ahọluduta tẹ tọn wẹ yin didona Jesu?
Jiwheyẹwhe dopagbe dọ kúnkan Ahọlu Davidi tọn de na sinai to ofìn Emitọn ji kakadoi. Jesu wẹ yin kúnkan dopagbe lọ, podọ e to gandu todin to olọn mẹ taidi Ahọlu Ahọluduta Jiwheyẹwhe tọn.—Hia Psalm 89:4; Luku 1:32, 33.
To whenue Davidi gbẹ́ yin jọja de, Jiwheyẹwhe de e nado yin ahọlu do akọta Jehovah tọn ji, yèdọ Islaeli. To whenuena Davidi kú, Sọlomọni, mẹhe Jehovah de wẹ sin ‘ofìn Jehovah’ tọn ji to Jelusalẹm. (1 Otannugbo lẹ 28:4, 5; 29:23) Enẹwutu, hukan gandudu Davidi tọn po Jelusalẹm po nọtena gandudu Jiwheyẹwhe tọn to aigba ji. To whenue Sọlomọni kú godo, ahọlu susu wẹ dugán to Jelusalẹm, ṣigba suhugan yetọn ma yin nugbonọ. To godo mẹ, Jehovah jotẹnna awhànfuntọ Babilọni tọn lẹ nado và Jelusalẹm sudo, podọ nado de ahọlu he to gandu lọ sẹ̀. Enẹ jọ to owhe 607 J.W.M. Sọn ojlẹ enẹ mẹ gbọ́n, kúnkan Davidi tọn depope masọ duahọlu to tòdaho Jelusalẹm tọn mẹ.—Hia Ezekiẹli 21:27.
2. Na ojlẹ nẹmu wẹ Ahọluduta Jiwheyẹwhe tọn ma do tindo afọzedaitọ de to aigba ji?
Owhe delẹ to vasudo Jelusalẹm tọn godo, Jehovah dọna yẹwhegán etọn Daniẹli dọ emi na de ahọlu de he na dugán sọn olọn mẹ. Whetẹnu wẹ gandudu etọn na bẹjẹeji?—Hia Daniẹli 7:13, 14.
Daniẹli dọ zẹẹmẹ numimọ de tọn ehe mẹ Jiwheyẹwhe degbe te dọ atin daho de ni yin hihọliai, kẹdẹdile Jiwheyẹwhe ko degbe dọ ahọluduta he tin to Jelusalẹm ni yin sinsánsẹ bo yin vivasudo do. Ṣigba, adọ̀ atin lọ tọn dona yin jijodo aigba mẹ na e nido sọgan vọ́ wú to “ojlẹ ṣinawe” godo. Biblu dohia dọ “ojlẹ” atọ̀n po odaa po nọtena azán 1260, enẹwutu “ojlẹ ṣinawe” nọtena azán 2 520. (Osọhia 12:6, 14) To dọdai Biblu tọn lẹ mẹ, azán lẹ nọ saba nọtena owhe lẹ. (Osọha lẹ 14:34) Enẹwutu, Ahọluduta Jiwheyẹwhe tọn ma na tindo afọzedaitọ de to aigba ji na owhe 2520.—Hia Daniẹli 4:10-17.
3. Whetẹnu wẹ Jesu lẹzun Ahọlu?
Jiwheyẹwhe ze Jesu do ofìn ji taidi Ahọlu to olọn mẹ to 1914, yèdọ owhe 2 520 pẹpẹ to vasudo Jelusalẹm tọn godo. Onú tintan he Jesu wà to whenue e lẹzun Ahọlu wẹ yindọ e yàn Satani po aovi etọn lẹ po sọn olọn mẹ. (Osọhia 12:7-10) Gbẹtọvi lẹ ma mọ nujijọ enẹ, ṣigba e hẹn nugbajẹmẹji yinukundomọ de wá gbẹtọvi lẹ ji. (Osọhia 12:12) Nujijọ he wá aimẹ sọn 1914 gbọ́n lẹ dohia dọ Jesu lẹzun Ahọlu to owhe enẹ mẹ.—Hia Matiu 24:14; Luku 21:10, 11, 31.
4. Etẹwẹ gandudu Jesu tọn zẹẹmẹdo na we?
Dọdai he mọ hẹndi gando gandudu Jesu tọn go lẹ dohia dọ hiẹ sọgan dejido Ohó Jiwheyẹwhe tọn go. To madẹnmẹ, Jesu na yí huhlọn he e tindo taidi ahọlu zan nado hẹn kọgbọ wá na gbẹtọvi lẹ sọn yajiji lẹpo si.—Hia Psalm 72:8, 12, 13; Daniẹli 2:44.
Na nudọnamẹ dogọ, pọ́n weda 215-218 owe Etẹwẹ Biblu Plọn MÍ Taun? tọn, he Kunnudetọ Jehovah tọn lẹ zinjẹgbonu.
[Yẹdide to weda 19]
(Na nudọnamẹ gigọ́, pọ́n linlinnamẹwe)
Octobre Octobre
607 gọna osun 3 1914 W.M.
← owhe 2 520 →
1000 J.W.M. 1 J.W.M. 1 W.M. 1000 W.M.
2000 W.M.
← 606 gọna osun 3 →← 1913 gọna osun 9 →
Ahọluduta Basi lẹndopọ ehe: Jiwheyẹwhe yí Jesu do
he to Jelusalẹm 606 gọna osun 3 dó Ahọlu bo na ẹn aṣẹ nado
yin vivasudo + 1913 gọna osun 9 dugán do akọta lẹpo ji
= 2 520
