Be hiẹ jlo na yọ́n nugbo lọ gando Jiwheyẹwhe go ya, yèdọ omẹ nankọ he ewọ yin, nuhe ewọ yiwanna, nuhe ewọ gbẹwanna podọ nuhe yin ojlo etọn? Jehovah Jiwheyẹwhe do nuhe yin nugbo lọ gando ede go hia to Ohó etọn Biblu mẹ. Ṣigba, e ma yin mẹdepope poun wẹ sọgan mọnukunnujẹ nugbo enẹ mẹ eyin e hia Biblu. Etẹwutu? Na lẹblanulọkẹyi de wẹ e yin nado mọnukunnujẹ nugbo enẹ mẹ; podọ e ma yin mẹlẹpo wẹ nọ mọ ẹn yí. Mì gbọ mí ni pọ́n nuhe Jesu dọ gando whẹho ehe go.—Hia Matiu 11:25.

Wefọ lọ bẹjẹeji po hogbe ehelẹ po: “To ojlẹ enẹ mẹ, Jesu gblọn dọmọ.” Enẹwutu, nuhe Jesu jlo na dọ na ko gando nuhe ṣẹṣẹ jọ de go. Ewọ ṣẹṣẹ gblewhẹdo omẹ tòdaho voovo atọ̀n delẹ tọn to Galili fie ewọ wà azọ́njiawu te lẹ, na yé ma jlo na lẹzun devi etọn lẹ wutu. (Matiu 11:20-24) Hiẹ sọgan kanse dọ, ‘Nawẹ mẹde sọgan mọ azọ́njiawu Jesu tọn lẹ bo ma na do yise hia to nugbo he ewọ plọnmẹ lẹ mẹ gbọn?’ Na ahun yetọn sinyẹn wẹ zọ́n bọ yé ma jlo na yin devi etọn lẹ.—Matiu 13:10-15.

Jesu yọnẹn dọ eyin mí na mọnukunnujẹ nugbo lọ mẹ gando Jiwheyẹwhe go, mí tindo nuhudo onú awe delẹ tọn: enẹ wẹ alọgọ Jiwheyẹwhe tọn po ninọmẹ ahun mẹ tọn he sọgbe po. Jesu dọmọ: “Yẹn pà we to gbangba, hiẹ Otọ́, Oklunọ olọn po aigba po tọn, na hiẹ ko whlá onú ehelẹ do nuyọnẹntọ lẹ po weyọnẹntọ lẹ po bo ko de yé hia ovivu lẹ.” Be hiẹ mọ nuhewutu mí do dọ dọ lẹblanulọkẹyi wẹ e yin nado mọnukunnujẹ nugbo he tin to Biblu mẹ lọ mẹ ya? Na Jehovah wẹ “Oklunọ olọn po aigba po tọn” wutu, ewọ sọgan whlá nugbo lọ do mẹde kavi dehia ẹ sọgbe hẹ ojlo etọn. Ṣigba, Jiwheyẹwhe jlo dọ mẹlẹpo ni mọnukunnujẹ nugbo ehe mẹ, na ewọ ma yin mẹnukuntahopọntọ. Eyin mọ wẹ, linlẹn tẹ mẹ wẹ ewọ nọ de nugbo Biblu tọn hia mẹdelẹ bo nọ whlá ẹ do mẹdevo lẹ te?

Whiwhẹnọ lẹ go wẹ homẹ Jehovah nọ hùn do, e ma yin saklanọ lẹ. (Jakọbu 4:6) Ewọ nọ whlá nugbo lọ do “nuyọnẹntọ lẹ po weyọnẹntọ lẹ po”—enẹ wẹ nuyọnẹntọ po weyọnẹntọ aihọn tọn lẹ po, mẹhe nọ yigo bo nọ ganjẹ yedetiti go bosọ nọ dohia dọ yé ma tindo nuhudo alọgọ etọn tọn lẹ. (1 Kọlintinu lẹ 1:19-21) Ṣigba, e nọ de nugbo lọ hia “ovivu lẹ”—yèdọ mẹhe wá ewọ dè po ahundopo po bo do whiwhẹ hia taidi yọpọvu lẹ. (Matiu 18:1-4; 1 Kọlintinu lẹ 1:26-28) Onú dopolọ go wẹ Jesu, Visunnu Jiwheyẹwhe tọn doayi. Sinsẹ̀ngán goyitọ susu lẹ wẹ ma mọnukunnujẹ owẹ̀n Jesu tọn mẹ, ṣigba whèhutọ whiwhẹnọ lẹ mọnukunnujẹemẹ. (Matiu 4:18-22; 23:1-5; Owalọ lẹ 4:13) To ojlẹ dopolọ mẹ, adọkunnọ po weyọnẹntọ he do whiwhẹ ahundopo tọn hia po delẹ lẹzun hodotọ Jesu tọn.—Luku 19:1, 2, 8; Owalọ lẹ 22:1-3.

Todin, mì gbọ mí ni lẹkọwa kanbiọ he fọndote to bẹjẹeji lọ ji: Be hiẹ jlo na yọ́n nugbo lọ gando Jiwheyẹwhe go ya? Eyin mọ wẹ, homẹ towe na hùn nado yọnẹn dọ homẹ Jiwheyẹwhe tọn ma nọ hùn do mẹhe nọ pọ́n yede hlan taidi nuyọnẹntọ to aihọn lọ mẹ lẹ go. Kakatimọ, mẹhe nuyọnẹntọ aihọn tọn lẹ nọ yí nukunpẹvi do pọ́n lẹ go wẹ homẹ etọn nọ hùn do. Eyin hiẹ nọ plọn Ohó Jiwheyẹwhe tọn po ninọmẹ ahun mẹ tọn he sọgbe po, a sọgan yin dopo to mẹhe Jehovah na na lẹblanulọkẹyi lọ nado mọnukunnujẹ nugbo lọ mẹ gando ewọ go lẹ mẹ. Nukunnumimọjẹ nugbo enẹ mẹ na hẹn gbẹzan towe pọnte dogọ todin podọ a na penugo nado biọ “ogbẹ̀ nujọnu tọn lọ” mẹ—yèdọ ogbẹ̀ madopodo to aihọn yọyọ he Jiwheyẹwhe dopagbe etọn bọ e na wá to madẹnmẹ lọ mẹ. a—1 Timoti 6:12, 19; 2 Pita 3:13.