Fọnsọnku Jesu Tọn Na Hẹn Ogbẹ̀ Madopodo Wá!

FỌNSỌNKU Jesu tọn ma yin nujijọ de he wá aimẹ to hohowhenu bo ma tindo zẹẹmẹ depope na mí to egbehe gba. Apọsteli Paulu zinnudo nujọnu-yinyin etọn ji to whenuena e wlan dọmọ: “Klisti ko yin finfọn sọn oṣiọ lẹ mẹ, yèdọ sinsẹ́n tintan mẹhe ko damlọn to okú mẹ lẹ tọn lẹ. Na to whenuena e yindọ omẹ dopo gblamẹ wẹ okú gbọn wá, omẹ dopo gblamẹ wẹ fọnsọnku oṣiọ lẹ tọn lọsu gbọn wá ga. Na kẹdẹdile mẹlẹpo to kúkú to Adam mẹ, mọdopolọ wẹ mẹlẹpo na yin hinhẹnwa ogbẹ̀ to Klisti mẹ do ga.”—1 Kọlintinu lẹ 15:20-22.

Jesu yin finfọnsọnku to azán 16 Nisan owhe 33 W.M., yèdọ azán he ji Ju lẹ nọ yí sinsẹ́n tintan jinukun yetọn lẹ tọn do sanvọ́ hlan Jehovah Jiwheyẹwhe to tẹmpli Jelusalẹm tọn mẹ. To whenue Paulu ylọ Jesu dọ sinsẹ́n tintan, ewọ dohia dọ mẹdevo lẹ na gbẹ́ yin finfọnsọnku.

Hogbe Paulu tọn he bọdego lẹ do nuhe fọnsọnku Jesu tọn hẹn yọnbasi lẹ hia. Paulu dọmọ: “Na to whenuena e yindọ omẹ dopo gblamẹ wẹ okú gbọn wá, omẹ dopo gblamẹ wẹ fọnsọnku oṣiọ lẹ tọn lọsu gbọn wá ga.” Na mí dugu ylando po mape po tọn sọn Adam dè wutu, mímẹpo wẹ nọ kú. Ṣigba, to whenue Jesu ze ogbẹ̀ pipé etọn jo taidi ofligọ de, e hùn dotẹnmẹ dote na gbẹtọvi lẹpo nado yin tuntundote sọn afanumẹ ylando po okú po tọn si gbọn fọnsọnku gblamẹ. Paulu blá whẹho lọ dopọ to whenuena e wlan to Lomunu lẹ 6:23 mẹ dọmọ: “Ale ylando tọn wẹ okú, ṣigba nunina he Jiwheyẹwhe nọ namẹ wẹ ogbẹ̀ madopodo gbọn Klisti Jesu Oklunọ mítọn dali.”

Jesu lọsu dọ nuhe okú po fọnsọnku etọn po zẹẹmẹdo na mí. E dọho gando ede go dọmọ: “Visunnu gbẹtọ tọn dona yin zizedaga . . . na mẹdepope he yise to ewọ mẹ nido sọgan tindo ogbẹ̀ madopodo. Na Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn, na mẹdepope he do yise hia to ewọ mẹ ma nado yin vivasudo adavo nado tindo ogbẹ̀ madopodo.”—Johanu 3:14-16.

Yí nukun homẹ tọn do pọ́n dọ a na nọgbẹ̀ kakadoi matin yajiji, awufiẹsa kavi awubla! (Osọhia 21:3, 4) Todido ayajẹ tọn nankọ die! Weyọnẹntọ de basi zẹẹmẹ etọn dole: “Tẹpa sọgan flinnu mí dọ ogbẹ̀ mítọn whègli, ṣigba fọnsọnku hẹn mí kudeji dọ mí ma na yin oṣiọ kakadoi.” Mọwẹ, fọnsọnku Jesu tọn na hẹn ogbẹ̀ madopodo wá!