Mẹdelẹ nọ mọdọ e vẹawu nado yiwanna Jiwheyẹwhe. Yé nọ mọ Jiwheyẹwhe di mẹhe dablu bọ yè ma gán yọ́n mẹhe e yin taun de, mẹhe ma yọ́n dọnsẹpọ kavi kanylantọ de. Lẹnnupọndo hodidọ he bọdego ehelẹ ji:

• “N’hodẹ̀ hlan Jiwheyẹwhe nado gọalọna mi, amọ́ ojlẹ enẹ dopolọ mẹ wẹ e sọ di na mi dọ ewọ dẹn do mi, bo ma tlẹ yin mẹhe n’gán dọnsẹpọ. N’nọ mọdọ Jiwheyẹwhe yin nuyise tata de poun, he ma gán do numọtolanmẹ namẹ.”—Marco, Italie.

• “Dile etlẹ yindọ n’jlo vivẹvivẹ nado sẹ̀n Jiwheyẹwhe, e nọ ṣí na mi dai dọ ewọ ma yọ́n dọnsẹpọ paali. N’nọ lẹndọ Jiwheyẹwhe hùnylantọ he nọ to yasanamẹ poun de wẹ. N’ma yise dai dọ e tindo owanyi po awuvẹmẹ sisosiso po.”—Rosa, Guatemala.

• “Whenue n’to pẹvi, n’yise dọ Jiwheyẹwhe nọ to ṣiṣọ́ nuṣiwa mítọn lẹ, bo nọ to gbesisọ mẹ nado dọ̀n tó na mí eyin mí jẹ nú etọn mẹ. To nukọn mẹ, n’wá mọdọ e vẹawu nado dọnsẹpọ ẹ. N’nọ mọ Jiwheyẹwhe taidi ogán daho hugan de he nọ doalọ to whẹho mẹhe ji e to aṣẹpa do lẹ tọn mẹ—amọ́ bọ onú yetọn ma ka nọ duahunmẹna ẹn sọmọ.”—Raymonde, Canada.

Etẹwẹ a lẹn? Be Jiwheyẹwhe yin mẹhe gbẹtọ gán yiwanna ya? Klistiani lẹ ko kàn kanbiọ enẹ sè na owhe kanweko susu lẹ. Na nugbo tọn, to ojlẹ nukunmahun Europe tọn lẹ mẹ, suhugan hagbẹ sinsẹ̀n mẹylọhodotọklisti tọn lẹ tọn ma tlẹ nọ hodẹ̀ hlan Jiwheyẹwhe Gigogán lọ. Etẹwutu? Na yé nọ to sijọsijọ ji na ewọ wutu wẹ. Whenuho-kantọ Will Durant dọ ẹ to aliho ehe mẹ dọ: “Nawẹ ylanwatọ de poun gán gboadọ bo wá hodẹ̀ to ofìn he dobu taun bo ma yọ́n dọnsẹpọ de nukọn gbọn?”

Naegbọn mẹdelẹ do nọ mọ Jiwheyẹwhe di mẹhe “dobu bọ yè ma gán dọnsẹpọ”? Etẹwẹ Biblu plọnmẹ taun gando Jiwheyẹwhe go? Be nugbo lọ gando Jiwheyẹwhe go yinyọnẹn sọgan gọalọna we nado yiwanna ewọ ya?