Odẹ̀

6 Be E Nọ Gọalọ Ya?

BE DẸ̀HIHO nọ wà dagbe na mí ya? Gbau. Biblu dohia dọ e nọ wà dagbe, na devizọnwatọ nugbonọ Jiwheyẹwhe tọn lẹ nọ mọaleyi sọn odẹ̀ he yé nọ hò lẹ mẹ. (Luku 22:40; Jakọbu 5:13) Na nugbo tọn, dẹ̀hiho sọgan hẹn ale susu wá na mí to gbigbọ-liho, to numọtolanmẹ-liho, podọ etlẹ yin to agbasa-liho. Gbọnna?

Todin, mí ni dọ dọ a tindo ovi de bọ e mọ nunina de yí. Be a na plọn ẹn dọ pinpẹn nunina lọ tọn yinyọnẹn to ede mẹ poun ko pé wẹ ya? Kavi a na plọn ẹn nado nọ dohia dọ emi yọ́n pinpẹn nulọ tọn? Eyin mí dọ numọtolanmẹ mítọn lẹ tọ́n, mí nọ hẹn yé zun yinyọnẹn bọ yé tlẹ nọ dohuhlọn dogọ. Be nudopolọ wẹ gando hodidọ na Jiwheyẹwhe go ya? Gbau! Lẹnnupọndo apajlẹ ehelẹ ji.

Odẹ̀ pẹdido tọn lẹ. Whenue mí dopẹna Otọ́ mítọn na nudagbe he e wà na mí lẹ, mí nọ ze ayiha do dona he ewọ na mí lẹ ji. Bọ gbọnmọ dali, mí sọgan nọ yọ́n pinpẹn-nutọn, do ayajẹ bosọ tindo pọndohlan dagbe lẹ dogọ.—Filipinu lẹ 4:6.

Apajlẹ: Jesu dohia dọ emi yọ́n pinpẹn aliho he mẹ Otọ́ emitọn nọ dotoaina odẹ̀ emitọn lẹ bosọ nọ na gblọndo yetọn te tọn.—Johanu 11:41.

Odẹ̀ jonamẹ tọn lẹ. Whenue mí biọ jonamẹ Jiwheyẹwhe tọn, mí nọ vọ́ huhlọnna ayihadawhẹnamẹnu mítọn, nọ do lẹnvọjọ ahundopo tọn hia, bosọ nọ mọnukunnujẹ obá he mẹ ylando mítọn sinyẹn jẹ mẹ dogọ. Humọ, mí nọ penugo nado duto numọtolanmẹ whẹhuhu tọn tintindo ji.

Apajlẹ: Davidi hodẹ̀ nado do lẹnvọjọ po awubla etọn po hia.—Salmu lẹ 51.

Dẹ̀hiho nado mọ anademẹ po nuyọnẹn po yí. Eyin mí nọ biọ Jehovah nado deanana mí kavi na mí nuyọnẹn he mí nado basi nudide dagbe lẹ, ehe sọgan gọalọna mí nado nọ do whiwhẹ ahundopo tọn hia. Mọwiwà sọgan sọ flinnu mí dọ nugopipe mítọn lẹ do dogbó bo whàn mí nado nọ dejido Otọ́ olọn mẹ tọn mítọn go dogọ.—Howhinwhẹn lẹ 3:5, 6.

Apajlẹ: Sọlomọni yí whiwhẹ do biọ anademẹ po nuyọnẹn po nado sọgan dugán do Islaeli ji.—1 Ahọlu lẹ 3:5-12.

Odẹ̀ ayimajai tọn lẹ. Eyin mí nọ hùn ahun mítọn na Jiwheyẹwhe to whenue mí jẹflumẹ sinsinyẹn, mí na vò sọn ahun mẹ, bo nasọ ganjẹ Jehovah go kakati ni yin do mídetiti go.—Salmu lẹ 62:8.

Apajlẹ: Ahọlu Asa hodẹ̀ to whenue e pehẹ kẹntọ kanylantọ de.—2 Otànnugbo 14:11.

Dẹ̀hiho do mẹdevo he to hudo mẹ lẹ tamẹ. Odẹ̀ mọnkọ lẹ nọ gọalọna mí nado duto ṣejannabi ji podọ nado nọ do awuvẹmẹ po mẹtọnhopọn po hia dogọ.

Apajlẹ: Jesu hodẹ̀ do hodotọ etọn lẹ tamẹ.—Johanu 17:9-17.

Odẹ̀ pipà tọn lẹ. Eyin mí nọ pà Jehovah na azọ́n dagbedagbe po jẹhẹnu jiawu etọn lẹ po, sisi po pinpẹn-nutọn-yinyọnẹn he mí tindo na ewọ po na siso deji. Odẹ̀ mọnkọ lẹ sọgan sọ gọalọna mí nado dọnsẹpọ Otọ́ mítọn Jiwheyẹwhe dogọ.

Apajlẹ: Davidi yí zohunhun do pà Jiwheyẹwhe na nuhe ewọ dá lẹ wutu.—Salmu lẹ 8.

Dona devo he dẹ̀hiho nọ hẹnwa wẹ “jijọho Jiwheyẹwhe tọn he yiaga hugan nukunnumọjẹnumẹ lẹpo.” (Filipinu lẹ 4:7) Na nugbo tọn, dona vonọtaun de wẹ e yin nado tindo vivomẹninọ to aihọn he gọ́ na tukla ehe mẹ. Jijọho mọnkọ tlẹ nọ wà dagbe na mí to agbasa-liho ga. (Howhinwhẹn lẹ 14:30) Ṣigba, be gbọn vivẹnudido mítọn titi lẹ dali wẹ mí nọ mọ jijọho enẹ yí ya? Kavi e sọ nọ biọ dọ mí ni wà onú titengbe devo?

[Nudọnamẹ tangan lẹ]

Dẹ̀hiho nọ hẹn ale susu wá, na e nọ wà dagbe na mí to agbasa-liho, to numọtolanmẹ-liho podọ to gbigbọ-liho ga