Nuhahun He Hẹnmẹ Tindo Todido Lẹ
Nuhahun He Hẹnmẹ Tindo Todido Lẹ
“To azán godo tọn lẹ mẹ, ojlẹ awusinyẹn tọn he vẹawu nado pehẹ lẹ na wá tin.”—2 TIMOTI 3:1.
BE A ko sèhó gando ode to nujijọ ylankan he bọdego ehelẹ mẹ go kavi yé jọ do gowe pọ́n ya?
● Azọ̀nylankan sinsinyẹn de he hùmẹ taun.
● Núdùdù whèdomẹ daho de he hẹn okú wá na mẹsusu.
● Aigba sisọsisọ de he hù gbẹtọ fọtọ́n susu bosọ hányán owhé mẹsusu tọn.
To weda he bọdego lẹ ji, mí na gbadopọnna kunnudenu nujijọ awubla tọn ehe nkọ delẹ tọn he hẹnmẹ lẹnnupọn taun. A nasọ mọdọ Biblu ko dọ jẹnukọn dọ ninọmẹ ehe nkọ lẹ na wá tin to ojlẹ vonọtaun he yin yiylọdọ “azán godo tọn lẹ” mẹ. *
Ṣigba, hosọ ehelẹ ma yin awuwlena nado dohia poun dọ mí to gbẹnọ to aihọn tuklanọ de mẹ gba. E yọnbasi dọ hiẹ ko yí nukun do to nuhahun ehelẹ mọ. Kakatimọ, hosọ ehelẹ na gọalọna we nado wleawuna todido. Yé na dohia dọ hẹndi he dọdai ṣidopo ehelẹ to mimọ zẹẹmẹdo dọ “azán godo tọn lẹ” na wá vivọnu zande. Hosọ debọdo-dego ehelẹ nasọ basi zẹẹmẹ do linlẹn agọ̀ he gbayipe gando nugbo ehe go delẹ ji, bo nasọ na whẹwhinwhẹ́n dagbe delẹ he mí tindo nado kudeji dọ nudagbe de to tepọn mí to sọgodo.
[Nudọnamẹ odò tọn]
^ huk. 7 Nado yọ́n nuhewutu Jiwheyẹwhe nọ jotẹnna ninọmẹ ylankan lẹ, pọ́n hosọ lọ “Naegbọn Jiwheyẹwhe Nọ Na Dotẹnmẹ Nuylankan po Yajiji lẹ Po?” to weda 16 po 17tọ po zinjẹgbonu ehe tọn.