Wehiatọ Vivẹ:

Be hiẹ lẹndọ emi sẹpọ Jiwheyẹwhe ya? Na mẹsusu, enẹ nọ taidi nuhe ma sọgan yọnbasi gbede. Mẹdelẹ nọ dibu dọ ewọ yiaga hú mí tlala; mẹdevo lẹ nọ mọdọ emi ma jẹ nado sẹpọ ẹ. Ṣigba, Biblu yí owanyi do dotuhomẹna mí dọmọ: “Mì sẹpọ Jiwheyẹwhe, ewọ nasọ sẹpọ mì.” (Jakobu 4:8) E tlẹ na jide sinsẹ̀ntọ etọn lẹ dọmọ: “Yẹn OKLUNỌ Jiwheyẹwhe towe, na hẹn adusilọ towe go, bo na dọ hlan we dọ, a dibu blo; yẹn na gọalọna we.”—Isaia 41:13.

Nawẹ mí sọgan dovivẹnu nado tindo kanṣiṣa pẹkipẹki mọnkọtọn hẹ Jiwheyẹwhe gbọn? Nado sọgan jihọntọn hẹ mẹde, kanṣiṣa lọ nọ sinai do yinyọ́n mẹlọ ganji, gọna owanyi po pinpẹn-nutọn tintindo na jijọ vonọtaun etọn lẹ po ji. Enẹwutu, dile e yin didohia to Biblu mẹ do, jẹhẹnu Jiwheyẹwhe tọn lẹ po aliho he mẹ e nọ yinuwa te lẹ po yin hosọ titengbe de he jẹna pinplọn. Sọwhiwhe yíyí do lẹnnupọndo aliho he mẹ Jehovah nọ do jẹhẹnu etọn lẹ dopodopo hia te, pinpọn lehe Jesu Klisti do yé hia to gbesisọmẹ do, podọ yinyọ́n lehe mílọsu sọgan wleawuna yé do na dọ̀n mí sẹpọ Jiwheyẹwhe. Mí na mọdọ Jehovah wẹ tindo jlọjẹ lọ bosọ pegan nado yin Nupojipetọ wẹkẹ tọn. Humọ, ewọ wẹ yin Otọ́ he mímẹpo tindo nuhudo etọn. Na ewọ yin huhlọnnọ, dodonọ, nuyọnẹntọ, po owanyinọ po wutu, e ma nọ gbẹkọ ovi nugbonọ etọn lẹ go gbede.

Na owe ehe ni gọalọna we nado dọ̀n we sẹpọ Jehovah Jiwheyẹwhe pẹkipẹki hugan gbede pọ́n tọn, nado wleawuna kanṣiṣa tẹgbẹ̀ tọn de hẹ ẹ, na hiẹ nido sọgan nọgbẹ̀ bo nọ pà ẹ kakadoi.