1-3. (a) Agbàn pinpẹ̀n tẹwẹ psalm-kàntọ Davidi hẹn, podọ nawẹ e mọ homẹmimiọn na ahun magbọjẹnọ etọn gbọn? (b) Eyin mí waylando, agbàn pinpẹ̀n tẹwẹ mí sọgan hẹn, ṣigba jidide etẹ tọn wẹ Jehovah na mí?

 “YLANWIWA ṣie ṣinyọ́n ota na mi,” wẹ psalm-kàntọ Davidi wlan. “Di agbàn pinpẹn, e pẹ̀n hugan mi. Yẹn dáku, yè sọ finyọ́n mi gbahugbahu.” (Psalm 38:4, 8) Davidi yọ́n lehe ayihadawhẹnamẹnu he gọ́ na numọtolanmẹ whẹhuhu tọn nọ pẹ̀nmẹ sọ. Ṣigba e mọ homẹmimiọn na ahun magbọjẹnọ etọn. E mọnukunnujẹemẹ dọ dile etlẹ yindọ Jehovah gbẹwanna ylando, E ma nọ gbẹwanna ylanwatọ lọ gba eyin mẹlọ lẹnvọjọ nugbonugbo bo gbẹkọ aliho ylanwiwa tọn etọn go. Po jidide mlẹnmlẹn po to ojlo Jehovah tọn nado do lẹblanu hia mẹhe lẹnvọjọ lẹ mẹ, Davidi dọmọ: “Hiẹ [Jehovah], . . . nọ wleawu nado jona.”—Psalm 86:5.

² Eyin mí waylando, ayihadawhẹnamẹnu mílọsu tọn sọgan yin tuklado. Numọtolanmẹ awubla tọn ehe ma ylan gba. E sọgan whàn mí nado ze afọdide he sọgbe lẹ nado vọ́ nuṣiwa mítọn lẹ jlado. Ṣigba, owù he tin to e mẹ wẹ yindọ numọtolanmẹ glanglan whẹhuhu tọn tintindo nọ hẹn mí gbọjọ. Ahun whẹgbledomẹ tọn mítọn sọgan to didọna mí dọ Jehovah ma na jona mí gba, mahopọnna lẹnvọjọ depope he mí dohia. Eyin mí “tlọ́” biọ numọtolanmẹ whẹhuhu tọn mẹ mlẹnmlẹn, Satani sọgan hẹn mí gbọjọ, nado lẹndọ Jehovah nọ pọ́n mí taidi nuvọ́nọ, he ma jẹ nado sẹ̀n ẹn.—2 Kọlintinu lẹ 2:5-11.

³ Be nukun he Jehovah nọ yí do pọ́n mí niyẹn ya? Paali! Jonamẹ yin adà owanyi daho Jehovah tọn. E na jide mí to Ohó etọn mẹ dọ, eyin mí do lẹnvọjọ nujọnu tọn hia sọn ahun mẹ, emi na jona mí. (Howhinwhẹn lẹ 28:13) Ma nado pọ́n jona Jehovah tọn hlan di nuhe kọ̀n mí ma sọgan jẹ, mì gbọ mí ni gbadopọnna nuhewutu podọ lehe e nọ jonamẹ gbọn.

4. Etẹwẹ Jehovah nọ flin gando ninọmẹ mítọn go, podọ nawẹ ehe nọ yinuwado aliho he mẹ e nọ yinuwahẹ mí te ji gbọn?

⁴ Jehovah yọ́n dogbó mítọn lẹ. “Ewọ yọ́n didá mítọn; e sọ flin dọ kọ́gudu wẹ mí,” wẹ Psalm 103: 14 dọ. E ma nọ wọnji dọ kọ́gudu mẹ wẹ mí yin didá sọn, bo tindo awugbopo, kavi madogán lẹ, taidi kọdetọn mape mítọn tọn. Hodidọ lọ dọ e yọ́n “didá mítọn” flinnu mí dọ Biblu yí Jehovah jlẹdo zẹ́ndotọ de go bo yí mí jlẹdo okòzẹ́n he e basi lẹ go. a (Jẹlemia 18:2-6) Zẹ́ndotọ Daho lọ nọ nọ̀ jlẹkaji to nuyiwa etọn lẹ mẹ hẹ mí sọgbe hẹ ninọmẹ madogán ylandonọ tọn mítọn podọ aliho he mẹ mí nọ kẹalọyi kavi gbẹkọ anademẹ etọn lẹ go te.

5. Nawẹ owe Lomunu lẹ tọn basi zẹẹmẹ omọ̀ huhlọnnọ ylando tọn gbọn?

⁵ Jehovah yọ́n lehe ylando dohuhlọn sọ. Ohó etọn basi zẹẹmẹ ylando tọn di huhlọn sinsinyẹn de he nọ wle gbẹtọ do omọ̀ etọn mẹ. Nawẹ omọ̀ ylando tọn dohuhlọn sọ? To owe Lomunu lẹ tọn mẹ, apọsteli Paulu basi zẹẹmẹ dọmọ: Mí “tin to ylando glọ,” dile awhànfuntọ lẹ nọ yin mẹmẹglọ na awhàngán yetọn do (Lomunu lẹ 3:9); ylando ko “duahọlu” do gbẹtọvi ji di ahọlu de (Lomunu lẹ 5:21); e “nọ nọ̀,” ohò mítọn mẹ (Lomunu lẹ 7:17, 20); “osẹ́n” etọn nọ to azọ́nwa to ohò mítọn mẹ whepoponu, bo nọ to tintẹnpọn nado deanana gbẹzan mítọn. (Lomunu lẹ 7:23, 25) Nuyiwadomẹji huhlọnnọ nankọtọn die ylando tindo do agbasa mapenọ mítọn ji!—Lomunu lẹ 7:21, 24.

6, 7. (a) Nukun tẹwẹ Jehovah nọ yí do pọ́n mẹhe dín lẹblanu etọn bo lẹnvọjọ sọn ahun mẹ wá lẹ? (b) Naegbọn mí ma dona ṣì lẹblanu Jiwheyẹwhe tọn zan?

⁶ Enẹwutu, Jehovah yọnẹn dọ tonusise mlẹnmlẹn ma sọgan yọnbasi na mí gba, mahopọnna lehe mí sọgan dovivẹnu nado setonuna ẹn do. E gbọn owanyi dali na jide mí dọ eyin mí dín lẹblanu etọn po ahun lẹnvọjọ tọn de po, emi na jona mí. Psalm 51:17 dọmọ: “Avọ́ Jiwheyẹwhe tọn wẹ otù  gbigbà; ayiha gbigbà finfinọn, Jiwheyẹwhe E, hiẹ ma to na vlẹ gba.” Jehovah ma na gbẹkọ, kavi lẹgodo do, ahun he yin “gbigbà” bo yin “finfinọn” gbọn agbàn pinpẹn whẹhuhu tọn dali lẹ gba.

⁷ Ṣigba, be ehe zẹẹmẹdo dọ mí sọgan ṣì lẹblanu Jiwheyẹwhe tọn zan, bo na nọ yí mapenọ-yinyin mítọn zan taidi whẹjijọ de nado waylan wẹ ya? Paali! Jehovah ma nọ yin anadena gbọn numọtolanmẹ tata dali gba. Lẹblanu etọn tindo dogbó. E ma na jona mẹhe nọ yí tasinsinyẹn do zindonukọn to ylanwiwa mẹ, bo ma nọ do lẹnvọjọ hia gbede lẹ gba. (Heblu lẹ 10:26) Ṣigba, eyin e mọ ahun he lẹnvọjọ, e nọ wleawu nado jonamẹ. Todin mì gbọ mí ni gbadopọnna hogbe awuvivi tọn delẹ he yin yiyizan to Biblu mẹ nado basi zẹẹmẹ adà jiawu owanyi Jehovah tọn ehe tọn.

8. Etẹwẹ Jehovah nọ wà to yẹhiadonu-liho to whenuena e jo ylando mítọn lẹ na mí, podọ jide tẹwẹ ehe na mí?

⁸ Davidi he lẹnvọjọ dọmọ: ‘Yẹn yigbe tasinyẹn ṣie tọn hlan we, ylanwiwa ṣie wẹ yẹn masọ yí whlá. Hiẹ sọ jo ylanwiwa ylando ṣie tọn na mi.’ (Psalm 32:5) Hogbe lọ “jo” yin lẹdogbedevomẹ hogbe dowhenu Heblu tọn de he zẹẹmẹdo “ze daga” kavi “nado ze.” Yíyí ì zan tofi zẹẹmẹdo nado ze “whẹhuhu, ylando, po ylanwiwa po” sọyi. Enẹwutu, to yẹhiadonu-liho, Jehovah ze ylando Davidi tọn lẹ daga bo ze yé sọyi. Matin ayihaawe, ehe de agbàn numọtolanmẹ whẹhuhu tọn he Davidi to hinhẹn lọ sẹ̀. (Psalm 32:3) Míwlẹ lọsu sọgan tindo jide gigọ́ to Jiwheyẹwhe mẹ, mẹhe nọ de ylando lẹ sẹ̀ na mẹhe dín jona to dodonu yise avọ́sinsan ofligọ Jesu tọn ji lẹ.—Matiu 20:28.

9. Nawẹ Jehovah nọ ze ylando mítọn lẹ sọyi dẹn do mí sọ?

⁹ Davidi sọ yí hogbe he họnwun devo zan nado basi zẹẹmẹ jonamẹ Jehovah tọn dọmọ: ‘Dile whèzẹtẹn dẹn do whèyihọ do, dẹn sọmọ wẹ Ewọ do ze sẹ́nmẹjẹ mítọn yì dẹn sọn mí dè.’ (Psalm 103:12) Nawẹ whèzẹtẹn dẹn do whèyihọ sọ? To linlẹn de mẹ, whèzẹtẹn nọ dẹn do whèyihọ hugan nudepope  he go mí sọgan jlẹdo; adà awe lọ lẹ ma sọgan dukosọ pọ́n gbede. Weyọnẹntọ dopo dohia dọ hodidọ ehe zẹẹmẹdo “dindẹn hugan; yèdọ dẹn hú fie mí sọgan lẹn.” Ohó gbọdo Davidi tọn dọna mí dọ eyin Jehovah jonamẹ, e nọ ze ylando mítọn lẹ sọyi fidindẹn hú fie mí sọgan lẹn.

10. Eyin Jehovah jo ylando mítọn lẹ na mí, naegbọn mí ma dona nọ lẹndọ mí na hẹn oblọ ylando enẹ tọn na pipòtọ gbẹzan mítọn tọn?

¹⁰ Be a ko tẹnpọn nado de dihó de sẹ̀ sọn avọ̀ wéwé de mẹ pọ́n ya? Vlavo mahopọnna vivẹnudido towe lẹpo, ohia dihó lọ tọn gbọṣi finẹ. Doayi lehe Jehovah basi zẹẹmẹ nugopipe jonamẹ etọn tọn do go: “Eyin ylando mìtọn tlẹ bia di avọ̀ vẹẹ, yé na yin hinhẹn zun wéwé di osingó; eyin yé tlẹ divẹẹ di ahóvọ̀, yé na yin hinhẹn zun wéwé di sékanfun.” (Isaia 1:18, NW) Hogbe lọ “avọ̀ vẹẹ” nọtena sinmẹ vẹẹ yàn àn. b “Ahó vẹẹ” yin dopo to sinmẹ vẹẹ ṣẹ́ṣẹ́ he nọ yin didó avọ̀ lẹ mẹ.  (Nahumi 2:3) Vivẹnudido mítọn titi lẹ ma sọgan de dihó ylando tọn sẹ̀ pọ́n gbede. Ṣigba Jehovah sọgan hẹn ylando he taidi avọ̀ vẹẹ po ahó vẹẹ po lẹ zun wéwé di osingó kavi sékanfun he yè ma ko dó ahó. Eyin Jehovah jo ylando mítọn lẹ na mí, mí ma dona nọ lẹndọ mí na hẹn oblọ ylando enẹ tọn na pipòtọ gbẹzan mítọn tọn gba.

11. Linlẹn tẹmẹ wẹ Jehovah nọ ze ylando mítọn lẹ dlan godo ede tọn te?

¹¹ To ohàn ayajẹ tọn he Hẹzekia yí do dopẹ́ to whenuena azọ̀n ylankan de yin hinhẹngbọ na ẹn mẹ, e dọna Jehovah dọmọ: ‘Hiẹ ko ze ylando ṣie lẹpo dlan godo towe.’ (Isaia 38:17) Jehovah yin didohia tofi taidi mẹhe nọ ze ylando mẹhe lẹnvọjọ lẹ tọn dlan godo Ede tọn fie E ma sọgan mọ yé kavi doayi yé go te ba. Dile asisa dopo dohia do, nuhe e zẹẹmẹdo sọgan yin didọ dole: “Hiẹ ko de [ylando ṣie lẹ] sẹ̀ taidi dọ yé ma ko jọ nkọtọn.” Be enẹ ma yin jidenamẹnu de ya?

12. Nawẹ yẹwhegán Mika dohia gbọn dọ eyin Jehovah jonamẹ, E nọ de ylando mítọn lẹ sẹ̀ kakadoi?

¹² To opagbe hẹngọwa tọn de mẹ, yẹwhegán Mika do nujikudo hia dọ Jehovah na jona omẹ etọn he lẹnvọjọ lẹ, dọmọ: ‘Mẹnu wẹ Jiwheyẹwhe de jijlẹ do hiẹ go, . . . bosọ nọ dasá sẹ́nmẹjẹ pipòtọ ogú etọn tọn lọ tọn? . . . Podọ hiẹ nasọ ze ylando yetọn lẹpo dlan biọ osẹ́dò ohù tọn mẹ.’ (Mika 7:18, 19) Yí nukun homẹ tọn do pọ́n nuhe hogbe enẹlẹ zẹẹmẹdo na mẹhe nọgbẹ̀ to ojlẹ Biblu tọn mẹ lẹ. Be e yọnbasi nado vọ́ nudepope he ko yin zizedlan “osẹ́dò ohù tọn mẹ” gọyí ya? Gbọnmọ dali, hogbe Mika tọn lẹ dohia dọ eyin Jehovah jonamẹ, e nọ de ylando mítọn lẹ sẹ̀ kakadoi wẹ.

13. Etẹwẹ hogbe Jesu tọn lẹ “jo ahọ́ mítọn lẹ na mí” zẹẹmẹdo?

¹³ Jesu yí kanṣiṣa he tin to akuẹyannamẹtọ lẹ po ahọ́tọnọ yetọn lẹ po ṣẹnṣẹn zan nado na apajlẹ jonamẹ Jehovah tọn. Jesu dotuhomẹna mí nado hodẹ̀ dọ: ‘Jo ahọ́ mítọn lẹ na mí.’ (Matiu 6:12) Gbọnmọ dali, Jesu yí ylando jlẹdo ahọ́ go. (Luku 11:4) To whenuena mí waylando, mí nọ lẹzun “ahọ́tọnọ” to Jehovah dè. Owe dodinnanu tọn dopo dọ gando zẹẹmẹ hókún Glẹki tọn he yin lilẹdogbedevomẹ dọ “jona” lọ go dọmọ: “Nado jodo, kavi nado de ayiha sọn ahọ́ de ji, bo  ma na biọ ẹ ba.” To linlẹn dopolọ mẹ, eyin Jehovah jona mí, e nọ zẹhù do ahọ́ he dona yin linlẹn dokọna mí lẹ ji. Enẹwutu ylandonọ he lẹnvọjọ lẹ sọgan yin homẹmiọnna. Jehovah ma na biọ ahọ́ ylando he e ko zẹhù deji lẹ tọn mí pọ́n gbede ba!—Psalm 32:1, 2.

14. Linlẹn tẹwẹ hodidọ lọ “súnsún ylando mítọn sẹ̀” hẹnwa ayiha mítọn mẹ?

¹⁴ Jonamẹ Jehovah tọn sọ yin zẹẹmẹ-basina yinukọn dogọ to Owalọ lẹ 3:19 mẹ dọmọ: ‘Mì lẹnvọjọ na enẹwutu, na yè ni diọ mì, na yè nido súnsún ylando mìtọn sẹ̀.’ Hodidọ godo tọn enẹ yin lẹdogbedevomẹ hókún Glẹki tọn de tọn he sọgan zẹẹmẹdo “nado súnsún sẹ̀, . . . zẹhù deji kavi yin vivasudo.” Weyọnẹntọ delẹ dọ dọ, apajlẹ he yin nina tofi lọ zẹẹmẹdo nado súnsún nukinkan lẹ. Nawẹ ehe yọnbasi gbọn? Wesìn he nọ yin yiyizan to hohowhenu nọ yin nuṣakadopọ de he bẹ akán, atinsìn, po osin po hẹn. To wekinkan po wesìn enẹ po godo tlolo, yè sọgan yí tèkàn he yin yinylọ́n do sinmẹ de zan nado súnsún nukinkan lọ sẹ̀. Ehe yin apajlẹ dagbe lẹblanu Jehovah tọn. Eyin e jo ylando mítọn lẹ na mí, e nọ taidi dọ e yí tèkàn de zan bo súnsún yé sẹ̀ nkọtọn.

15. Etẹwẹ Jehovah jlo dọ mí ni yọnẹn dogbọn emi dali?

¹⁵ To whenuena mí lẹnnupọndo apajlẹ voovo ehelẹ ji, be e ma họnwun dọ Jehovah jlo dọ mí ni yọnẹn dọ emi wleawu nado jo ylando mítọn lẹ na mí eyin mí lẹnvọjọ sọn ahun mẹ wá nugbonugbo ya? Mí ma dona nọ to budi dọ e na wá yí ylando enẹlẹ do sayana mí to sọgodo gba. Ehe yin didohia gbọn nuhe Biblu dọ gando lẹblanu daho Jehovah tọn go lọ dali dọ: Eyin ewọ jonamẹ, e nọ wọnji e go.

16, 17. To whenuena Biblu dọ dọ Jehovah nọ wọnji ylando mítọn lẹ go, etẹ dọ wẹ e te, podọ naegbọn gblọndo towe do yinmọ?

¹⁶ Jehovah dopagbe gando mẹhe tin to alẹnu yọyọ lọ mẹ lẹ go dọmọ: “Yẹn na jona ylanwa yetọn, ylando yetọn wẹ yẹn masọ to na flin ba.” (Jẹlemia 31:34) Be ehe dohia dọ eyin Jehovah jonamẹ e masọ nọ penugo nado flin ylando  lẹ ba wẹ ya? E ma sọgan yinmọ. Biblu dọ otàn mẹsusu tọn, gọna Davidi tọn na mí, mẹhe Jehovah jo ylando yetọn lẹ na yé. (2 Samuẹli 11:1-17; 12:13) E họnwun dọ Jehovah gbẹ́ yọ́n ylando he yé wà lẹ. Kandai ylando yetọn lẹ tọn, gọna lẹnvọjọ yetọn po jona Jehovah tọn po na yé, yin kinkàndai na ale mítọn. (Lomunu lẹ 15:4) To whelọnu lo, etẹ dọ wẹ Biblu te to whenuena e dọ dọ Jehovah ma nọ “flin” ylando mẹhe e ko jona lẹ tọn?

¹⁷ Hókún Heblu tọn heyin lilẹdo ‘Yẹn na flin’ zẹẹmẹdo nususu hugan nado flin nuhe ko jọ wayi lẹ poun. Owe lọ Theological Wordbook of the Old Testament dohia dọ e bẹ “nuyiwa yinukọn dogọ lẹ hẹn nado ze afọdide he sọgbe.” Enẹwutu to linlẹn ehe mẹ, nado “flin” ylando bẹ yasisana ylandonọ lọ hẹn. (Hosea 9:9) Ṣigba to whenuena Jiwheyẹwhe  dọ dọ “ylando yetọn wẹ yẹn masọ to na flin ba,” jide na mí wẹ e te dogọ dọ eyin emi jona ylandonọ he lẹnvọjọ lẹ, emi ma na sayana yé to sọgodo na ylando enẹlẹ wutu gba. (Ezekiẹli 18:21, 22) Enẹwutu, Jehovah nọ wọnji to linlẹn lọ mẹ dọ e ma nọ flin ylando mítọn lẹ pludopludo nado sọgan gblewhẹdo mí kavi yí ì do sayana mí sọn ojlẹ de mẹ jẹ devo mẹ. Be e mayin homẹmiọnnamẹnu de wẹ e yin nado yọnẹn dọ Jiwheyẹwhe mítọn nọ jonamẹ bo nọ wọnji ya?

18. Naegbọn jona ma zẹẹmẹdo hihọ́-bibasina ylandonọ he lẹnvọjọ lọ sọn kọdetọn ylando etọn tọn lẹpo mẹ?

¹⁸ Be awuwiwle Jehovah tọn nado jonamẹ zẹẹmẹdo dọ ylandonọ he lẹnvọjọ lọ na yin hihọ́-basina sọn kọdetọn ylando etọn tọn lẹpo mẹ wẹ ya? Paali. Mí ma sọgan waylando bo nọma jiya etọn gba. Paulu wlan dọmọ: “Nudepope he gbẹtọ dó, enẹ wẹ e na gbẹ̀n ga.” (Galatianu lẹ 6:7) Mí sọgan jiya kọdetọn ylando mítọn delẹ tọn. Ehe ma zẹẹmẹdo dọ Jehovah to nugbajẹmẹji lẹ hẹnwa mí ji to whenuena e ko jona mí pó godo gba. To whenuena nuhahun lẹ fọ́n, Klistiani de ma dona nọ lẹndọ, ‘Vlavo Jehovah wẹ to yasana emi na ylando emitọn he wayi lẹ wutu gba.’ (Jakobu 1:13) Mọdopolọ, Jehovah masọ nọ basi hihọ́na mí sọn nugandomẹgo nuṣiwa mítọn lẹ tọn lẹpo mẹ gba. Gbẹdai, gàhò-mimọ, asamẹzọ̀n lẹ, jimadedo-mẹgo po sisi hinhẹnbu po—ehe lẹpo yin kọdetọn awubla tọn, he ma sọgan yin didapana, ehe ylando nọ hẹnwa lẹ. Flindọ etlẹ yin to ylando Davidi tọn hẹ Bati-ṣeba podọ sọta Ulia jijona ẹn pó godo, Jehovah ma basi hihọ́na Davidi sọn kọdetọn nugbajẹmẹji tọn he bọdego lẹ mẹ gba.—2 Samuẹli 12:9-12.

19-21. (a) Nawẹ Osẹ́n he yin kinkàndai to Levitiku 6:1-7 mẹ hẹn ale wá na mẹhe yè ṣinuwa do po ylanwatọ lọ po gbọn? (b) Eyin ylando mítọn gbleawuna mẹdevo lẹ, homẹ Jehovah tọn nọ hùn eyin mí ze afọdide tẹlẹ?

¹⁹ Ylando mítọn lẹ sọgan sọ tindo kọdetọn ylankan devo lẹ, titengbe eyin nuṣiwa mítọn lẹ ko gbleawuna mẹdevo lẹ. Di apajlẹ, gbadopọnna kandai Levitiku weta 6 tọn. Osẹ́n Mose  tọn dọhodo ninọmẹ de ji to ehe mẹ dawe de waylando sinsinyẹn de gbọn nutindo Islaelivi hatọ de tọn hihòyi dali gbọn ajojijẹ, alọslonamẹ, kavi mẹhihodu gblamẹ. Enẹgodo ylandonọ lọ mọ́n dọ emi ma huwhẹ̀, bo tlẹ yí adọgbigbo do whlé to lalo mẹ. Nalete, kunnudetọ dopo gee wẹ tin na ylanwiwa lọ. Ṣigba to godo mẹ, ayihadawhẹnamẹnu ylanwatọ lọ tọn dotukla ẹ bọ e yigbe ylando etọn tọn. Nado mọ jona Jiwheyẹwhe tọn yí, e dona wà onú atọ̀n dogọ: e na gọ̀ nuhe e fìn lọ jo, bo na sú mado-atọ́n nuhe e fìn lọ lẹ tọn na mẹhe e finnudo, bo nasọ na agbò dopo taidi avọ́nunina whẹgbledo tọn. Enẹgodo, osẹ́n lọ dọmọ: “Yẹwhenọ lọ bo na basi ovẹsè na ẹn to OKLUNỌ lọ nukọn, ewọ nasọ yin jijona.”—Levitiku 6:1-7.

²⁰ Osẹ́n ehe yin awuwledainanu lẹblanunọ de sọn Jiwheyẹwhe dè. E hẹn ale wá na mẹhe nutindo etọn yin gigọjo, podọ matin ayihaawe e na ko tindo numọtolanmẹ kọgbọ tọn to whenuena ylanwatọ lọ wá yigbe ylando etọn tọn. To ojlẹ dopolọ mẹ, osẹ́n lọ sọ hẹn ale wá na mẹhe ayihadawhẹnamẹnu etọn whàn ẹn to godo mẹ nado yigbe na whẹhuhu etọn bo vọ́ nuṣiwa etọn jlado. Na nugbo tọn, eyin e gbẹ́ nado wàmọ, Jiwheyẹwhe ma na jona ẹn gba.

²¹ Dile etlẹ yindọ mí ma to Osẹ́n Mose tọn glọ, Osẹ́n enẹ hẹn mí nado yọ́n ayiha Jehovah tọn, gọna lẹnpọn etọn do jonamẹ ji. (Kọlọsinu lẹ 2:13, 14) Eyin ylando mítọn gbleawuna mẹdevo lẹ, homẹ Jiwheyẹwhe tọn nọ hùn eyin mí wà nuhe go mí pé lẹpo nado vọ́ ninọmẹ lọ jlado. (Matiu 5:23, 24) Ehe sọgan bẹ gbeyiyina ylando mítọn, gbeyiyina whẹhuhu mítọn, po ovẹvivẹ na mẹhe mí ṣinuwa do lọ po hẹn. Enẹgodo mí sọgan vẹvẹna Jehovah to dodonu avọ́sinsan Jesu tọn ji bo tindo jidide dọ Jiwheyẹwhe ko jona mí.—Heblu lẹ 10:21, 22.

22. Etẹwẹ sọgan zọnpọ hẹ jonamẹ Jehovah tọn?

²² Taidi mẹjitọ owanyinọ de, Jehovah sọgan yí mẹplọnlọ-domẹgo vude dogọ jonamẹ etọn. (Howhinwhẹn lẹ 3:11, 12) Lẹblanulọkẹyi sinsẹ̀nzọnwiwa tọn lẹ taidi mẹho, devizọnwatọ  lizọnyizọnwiwa tọn, kavi sinsẹ̀nzọn whenu-gigọ́ tọn sọgan yin yíyí sọn Klistiani he lẹnvọjọ de si. E sọgan vẹna ẹn nado hẹn lẹblanulọkẹyi he họakuẹ na ẹn mọnkọtọn lẹ bú na ojlẹ de. Ṣigba, mẹplọnlọ-domẹgo enẹ ma zẹẹmẹdo dọ Jehovah ma jona ẹn gba. Mí dona flindọ mẹplọnlọ-domẹgo sọn Jehovah dè yin kunnudenu owanyi etọn tọn na mí. Alọkikẹyi i po yíyí ì do yizan mẹ po na yin dagbe na mí.—Heblu lẹ 12:5-11.

23. Naegbọn mí ma dona wá tadona lọ kọ̀n gbede dọ lẹblanu Jehovah tọn ma sọgan dlẹnkan wá mí dè, podọ naegbọn mí dona hodo apajlẹ jonamẹ etọn tọn?

²³ Lehe e yin homẹmiọnnamẹnu nado yọnẹn dọ Jiwheyẹwhe mítọn nọ “wleawu nado jona” do sọ! Mahopọnna nuṣiwa he mí sọgan ko basi lẹ, mí ni ma wá tadona lọ kọ̀n gbede dọ lẹblanu Jehovah tọn ma sọgan dlẹnkan wá mí dè blo. Eyin mí lẹnvọjọ nugbonugbo, bo ze afọdide lẹ nado vọ́ ninọmẹ lọ jlado, bosọ hodẹ̀ vẹkuvẹku na jonamẹ to dodonu hùnsọndai Jesu tọn ji, mí sọgan tindo jidide gigọ́ dọ Jehovah na jona mí. (1 Johanu 1:9) Mì gbọ mí ni hodo apajlẹ jonamẹ etọn tọn to nuyiwa mítọn hẹ ode awetọ lẹ mẹ. Eyin Jehovah, mẹhe ma nọ waylando sọgan nọ yí owanyi do jona mí sọmọ, be míwlẹ he yin gbẹtọvi ylandonọ ma dona wà nuhe go mí pé lẹpo nado nọ jona ode awetọ mítọn ya?