WETA 24
Nudepope Ma Sọgan “Klan Mí sọn Owanyi Jiwheyẹwhe Tọn” Go
1. Linlẹn agọ̀ tẹwẹ nọ dotukla mẹsusu, kakajẹ Klistiani nugbo delẹ ji ga?
BE JEHOVAH JIWHEYẸWHE yiwanna hiẹ lọsu titi ya? Mẹdelẹ yigbe dọ Jiwheyẹwhe yiwanna gbẹtọvi lẹpo to pọmẹ, dile Johanu 3:16 dọ do. Ṣigba yé lẹndọ, na taun tọn: ‘Jiwheyẹwhe ma sọgan yiwanna yẹn taidi mẹde gba.’ Klistiani nugbo lẹ lọsu tlẹ sọgan tindo ayihaawe to whedelẹnu do ehe ji. Na e yin hinhẹn gbọjọ wutu, dawe de dọmọ: “E vẹawuna mi taun nado yise dọ Jiwheyẹwhe nọ hò ṣie pọ́n to aliho depope mẹ.” Be ayihaawe tintindo mọnkọtọn nọ dotukla we to whedelẹnu wẹ ya?
2, 3. Mẹnu wẹ jlo dọ mí ni yise dọ mí yin nuvọ́nọ to nukun Jehovah tọn mẹ kavi dọ e ma yiwanna mí, podọ nawẹ mí sọgan duto linlẹn enẹ ji gbọn?
2 Satani tin to jejeji nado hẹn mí yise dọ Jehovah Jiwheyẹwhe ma yiwanna mí bo masọ nọ yí nukun nuhọakuẹ tọn do pọ́n mí. Nugbo wẹ dọ, Satani nọ saba klọ gbẹtọ lẹ gbọn mẹdezedaga po goyiyi yetọn po dali. (2 Kọlintinu lẹ 11:3) Ṣigba e sọ nọ mọ homẹhunhun to sisi-mẹdetiti tọn madogánnọ lẹ tọn hinhẹngble mẹ. (Johanu 7:47-49; 8:13, 44) Ehe yin nugbo titengbe to ‘azán godo tọn’ ehelẹ mẹ. To egbehe, mẹsusu nọ whẹ́n to whẹndo he ma tindo “owanyi hẹnnumẹ tọn” lẹ mẹ. Mẹdevo lẹ nọ pehẹ fifiẹtọ, ṣejannabinọ, po tasinyẹntọ lẹ po to whelẹponu. (2 Timoti 3:1-5) Owhe susu nuyiwahẹmẹ agọ̀, akọ̀ ṣinṣinyan, kavi wangbẹnamẹ tọn sọgan ko hẹn omẹ mọnkọtọn lẹ kudeji dọ yé yin nuvọ́nọ kavi mẹde ma yiwanna yé.
3 Eyin linlẹn agọ̀ enẹ wá ayiha towe mẹ, a gbọjọ blo. Susu to mí mẹ wẹ nọ yí nukun pẹvi do pọ́n mídelẹ to aliho agọ̀ mẹ sọn ojlẹ de mẹ jẹ devo mẹ. Ṣigba flindọ, Ohó Jiwheyẹwhe tọn yin awuwlena na “anademẹ” podọ na “hihọliai [onú] gángán lẹ tọn.” (2 Timoti 3:16; 2 Kọlintinu lẹ 10:4) Biblu dọmọ: “[Mí] nasọ hẹn ayiha mítọn diun to nukọn etọn. Na eyin ayiha mítọn gblewhẹdo mí, Jiwheyẹwhe klo hú ayiha mítọn bosọ yọ́n onú popo.” (1 Johanu 3:19, 20) Mì gbọ mí ni gbadopọnna aliho ẹnẹ he mẹ Owe-wiwe gọalọna mí nado “hẹn ayiha mítọn diun” gando owanyi Jehovah tọn go te lẹ.
Hiẹ Họakuẹ to Jehovah Nukọn
4, 5. Nawẹ apajlẹ Jesu tọn gando oblẹnọ lẹ go dohia dọ mí họakuẹ to nukun Jehovah tọn mẹ gbọn?
4 Tintan, Biblu plọnmẹ tlọlọ dọ Jiwheyẹwhe nọ yọ́n pinpẹn devizọnwatọ etọn lẹ dopodopo tọn. Di apajlẹ, Jesu dọmọ: “Be oblẹnọ awe ma wẹ yé nọ sà yin abọgankuẹ pẹvi de? Mọ dopo yetọn ma na flẹ jẹ aigba to Otọ́ mìtọn godo. Ṣigba yèdọ oda ota mìtọn tọn lẹpo wẹ yè hia pé. Enẹwutu mì dibu blo, mìwlẹ doale hú oblẹnọ susu.” (Matiu 10:29-31) Lẹnnupọndo nuhe hogbe enẹlẹ zẹẹmẹdo na hosetọ Jesu tọn lẹ to owhe kanweko tintan whenu ji.
“Mìwlẹ doale hú oblẹnọ susu”
5 E sọgan paṣa mí nuhewutu mẹde sọgan họ̀ oblẹnọ de. To azán Jesu tọn gbè, oblẹnọ wẹ yin ohẹ̀ he pọ̀kuẹ hugan he nọ yin dùdù. Flindọ mẹde sọgan họ̀ oblẹnọ awe yin gànkuẹ flinflin dopo poun. Ṣigba Jesu dọ to godo mẹ dọ eyin mẹde ze gànkuẹ flinflin lọ awe jo, e mayin oblẹnọ ẹnẹ wẹ e na mọyi gba, ṣigba atọ́n. Ohẹ̀ lọ dopo nọ yin ninamẹ di déji taidi dọ e ma họakuẹ paali nkọtọn. Vlavo nudida enẹlẹ ma yin nuhọakuẹ to nukun gbẹtọ lẹ tọn mẹ, ṣigba nukun tẹwẹ Mẹdatọ lọ nọ yí do pọ́n yé? Jesu dọmọ: “Ode to yé mẹ [etlẹ yin dehe yin yiyidogọ lọ] ma yin winwọn to Jiwheyẹwhe nukọn gba.” (Luku 12:6, 7) Todin mí sọgan jẹ nukunnumọjẹ nuhe dọ Jesu te mẹ ji. Eyin Jehovah nọ yí nukun nuhọakuẹ tọn mọnkọtọn do pọ́n oblẹnọ dopo poun, lehe gbẹtọvi de na họakuẹ to nukun etọn mẹ do sọ! Dile Jesu basi zẹẹmẹ do, Jehovah yọ́n onú lẹpo gando mí go. Etẹ nkọ, yèdọ sọha oda he tin to ota na mí lẹpo tọn wẹ e yọnẹn!
6. Naegbọn mí do tindo nujikudo dọ nugbo dọ wẹ Jesu te to whenuena e dọ dọ oda he to ota na mí lẹpo wẹ ko yin hihia?
6 Be oda mítọn lẹpo sọgan yin hihia ya? Mẹdelẹ sọgan lẹndọ nuhe dọ Jesu te tofi ma sọgan yọnbasi gba. Ṣigba, saa lẹnnupọn dogbọn todido fọnsọnku tọn dali. Lehe Jehovah dona yọ́n mẹdopodopo mítọn ganji do sọ nado sọgan vọ́ mí dá! Mí họakuẹ to nukun etọn mẹ sọmọ bọ e nọ flin onú lẹpo gando mí go, gọna ogú jọwamọ tọn sọn mẹjitọ lẹ dè po oflin mítọn lẹpo po gọna numimọ mítọn lẹ. a Po ehe po, oda mítọn lẹ hihia—ehe ota mẹdopo tọn nọ tindo nudi 100 000 lẹ—na bọawu na ẹn taun.
Etẹwẹ Jehovah Mọ to Mí Mẹ?
7, 8. (a) Etẹwẹ yin delẹ to jẹhẹnu he homẹ Jehovah tọn nọ hùn nado mọ to whenuena e to dodinna ahun gbẹtọvi lẹ tọn mẹ? (b) Azọ́n tẹlẹ wẹ mí nọ wà, he Jehovah nọ yí nukun nuhọakuẹ tọn do pọ́n?
7 Awetọ, Biblu dọ onú dagbe he Jehovah nọ mọ to devizọnwatọ etọn lẹ mẹ na mí. Nado dọ ẹ tlọlọ, homẹ etọn nọ hùn do jẹhẹnu dagbe mítọn lẹ po vivẹnudido mítọn lẹ po go. Ahọlu Davidi dọna visunnu etọn Sọlọmọni dọmọ: “OKLUNỌ to ayiha lẹpo mẹ dinpọn, bosọ tunwun aṣàvà linlẹn tọn lẹ.” (1 Otannugbo lẹ 28:9) Dile Jiwheyẹwhe to dodinna ahun gbẹtọvi liva susu lẹ tọn to aihọn hunyanhunyan tọn, he gọ́ na wangbẹna ehe mẹ, lehe homẹ etọn na hùn to whenuena e wá mọ ahun mẹhe yiwanna jijọho, nugbo, po dodowiwa po tọn lẹ do sọ! Etẹwẹ nọ jọ to whenuena Jiwheyẹwhe mọ ahun mẹhe yiwanna ẹn lẹ tọn, he nọ jlo nado plọnnu dogbọn ewọ dali bosọ nọ jlo nado má oyọnẹn mọnkọtọn hẹ mẹdevo lẹ? Jehovah dọna mí dọ emi nọ doayi mẹhe nọ dọ ohó emitọn na mẹdevo lẹ go. E tlẹ tindo “owe oflin tọn de” na “yé he dibusi OKLUNỌ lẹ, podọ he to oyín etọn tọn lẹnpọn lẹ.” (Malaki 3:16) Jẹhẹnu enẹlẹ yin nuhọakuẹ na ẹn.
8 Etẹwẹ yin delẹ to azọ́n dagbe he Jehovah nọ yí nukun nuhọakuẹ tọn do pọ́n lẹ mẹ? Na jide tọn, vivẹnudido mítọn nado hodo apajlẹ Ovi etọn Jesu Klisti tọn yin dopo. (1 Pita 2:21) Dopo to azọ́n titengbe he Jiwheyẹwhe nọ yí nukun nuhọakuẹ tọn do pọ́n lẹ wẹ wẹndagbe Ahọluduta etọn tọn lilá. To Lomunu lẹ 10:15 mẹ, mí hia dọmọ: “Nawẹ afọ yé he dọyẹwheho wẹndagbe jijọho tọn, bosọ hẹn owẹ̀n dagbe onú dagbe lẹ tọn wá yọnwhanpẹ sọ!” Mí ma dona lẹnnupọn to paa mẹ dọ afọ tata mítọn lẹ “yọnwhanpẹ,” kavi dọnmẹdogo. Ṣigba tofi yé nọtena vivẹnudido he devizọnwatọ Jehovah tọn lẹ to didó nado dọyẹwheho wẹndagbe lọ tọn. Vivẹnudido ehe lẹpo wẹ yọnwhanpẹ bo họakuẹ to nukun etọn mẹ.—Matiu 24:14; 28:19, 20.
9, 10. (a) Naegbọn mí sọgan deji dọ Jehovah nọ yí nukun nuhọakuẹ tọn do pọ́n akọ́ndonanu mítọn to awusinyẹnnamẹnu voovo lẹ nukọn? (b) Pọndohlan agọ̀ tẹlẹ wẹ Jehovah ma nọ tindo gando devizọnwatọ nugbonọ etọn lẹ go gbede?
9 Jehovah sọ nọ yí nukun nuhọakuẹ tọn do pọ́n akọ́ndonanu mítọn. (Matiu 24:13) Flindọ, Satani jlo dọ hiẹ ni gbẹ́ Jehovah dai. Azán dopodopo gbè he a yin nugbonọ hlan Jehovah, a ko sọ gọalọ to gblọndo nina mẹvlẹko Satani tọn mẹ ga. (Howhinwhẹn lẹ 27:11) To whedelẹnu, akọ́ndonanu nọ kàn dẹpẹ biọ. Nuhahun agbasalilo tọn lẹ, nuhahun akuẹzinzan tọn lẹ, numọtolanmẹ apọṣimẹ tọn, po aliglọnnamẹnu devo lẹ po sọgan hẹn azán dopodopo yin mẹwhlepọn tọn de. Nukundido he ma to wiwá lẹ lọsu sọgan hẹnmẹ gbọjọ ga. (Howhinwhẹn lẹ 13:12) Akọ́ndonanu to avùnnukundiọsọmẹnu mọnkọtọn lẹ nukọn yin nuhọakuẹ taun to Jehovah nukọn. Enẹ wẹ zọ́n bọ Ahọlu Davidi biọ to Jehovah si nado hlá dasin etọn lẹ do “ogò” mẹ, bo yidogọ po jide po dọ: “Be yé ma tin to owe towe mẹ?” (Psalm 56:8) Mọwẹ, Jehovah nọ yí nukun nuhọakuẹ tọn do pọ́n dasin po yajiji he mí to akọ́ndona lẹpo to whenuena mí to nugbonọ yin hlan ẹn lẹ bosọ nọ flin yé. Yé yin nuhọakuẹ to nukun etọn mẹ ga.
Jehovah nọ yí nukun nuhọakuẹ tọn do pọ́n akọ́ndonanu mítọn to whlepọn lẹ nukọn
10 Ṣigba, ahun whẹgbledo mẹdetiti tọn mítọn sọgan gbẹkọ kunnudenu ehelẹ go dọ mí yin nuhọakuẹ to nukun Jiwheyẹwhe tọn mẹ. E sọgan nọ dọ na mí whẹwhẹ dọ: ‘Ṣigba mẹsusu devo lẹ yin apajlẹ dagbenọ hú yẹn maa. Lehe Jehovah na jẹflumẹ to whenuena e yí yẹn jlẹdo yé go do sọ!’ Jehovah ma nọ yí mẹde jlẹdo mẹdevo go; mọjanwẹ e ma nọ yin hẹngogonọ kavi fifiẹtọ to lẹnpọn etọn mẹ do niyẹn. (Galatianu lẹ 6:4) Nukun he bọawu wẹ e nọ yí do dindona ahun mítọn lẹ, bo nọ yí nukun nuhọakuẹ tọn do pọ́n dagbe he e mọ lẹ—eyin etlẹ yin pẹvide.
Jehovah Nọ Dín Dagbe Mọ sọn Ylankan Mẹ
11. Etẹwẹ mí sọgan plọn dogbọn Jehovah dali to aliho he mẹ e penukundo whẹho Abija tọn go te mẹ?
11 Atọ̀ntọ, dile Jehovah to dodinna ahun mítọn, e nọ gbeje onú lẹ pọ́n po sọwhiwhe po, bo nọ dín dagbe lẹ mọ. Di apajlẹ, to whenuena Jehovah degbè dọ hukan gandudu Ahọlu Jeloboami atẹṣitọ lọ tọn pete na yin hùhù, E degbè dọ dopo to visunnu ahọlu lọ tọn lẹ mẹ, yèdọ Abija, ni yin dìdì po yẹyi po. Etẹwutu? “Na to ewọ mẹ yè mọ onú dagbe vude wutu hlan OKLUNỌ dali, Jiwheyẹwhe Islaeli tọn.” (1 Ahọlu lẹ 14:1, 10-13) Na taun tọn, Jehovah gbeje ahun jọja sunnu lọ tọn pọ́n bo mọ “onú dagbe vude” to finẹ. Mahopọnna lehe dagbe enẹ sọgan ko whè kavi yin vude sọ, Jehovah mọdọ e jẹ nado basi kandai etọn do Ohó etọn mẹ. E tlẹ sú ahọ́ etọn ẹn, bo do lẹblanu vude hia dopo to hagbẹ whẹndo atẹṣitọ enẹ tọn mẹ.
12, 13. (a) Nawẹ whẹho Ahọlu Jehọṣafati tọn dohia dọ Jehovah nọ dín dagbe to mí mẹ to whenuena mí tlẹ waylando gbọn? (b) Na nuhe dù azọ́n dagbe po jẹhẹnu mítọn lẹ po, nawẹ Jehovah nọ yinuwa taidi Mẹjitọ owanyinọ de gbọn?
12 Apajlẹ he tlẹ sọ yọnhugan de sọgan yin mimọ to Ahọlu dagbe Jehọṣafati mẹ. To whenuena ahọlu lọ zan walọ nulunọ tọn de, yẹwhegán Jehovah tọn dọna ẹn dọmọ: “Na onú he homẹgble tin to oji we sọn OKLUNỌ nukọn.” Lehe linlẹn enẹ hẹnmẹ blawu do sọ! Ṣigba wẹndomẹ Jehovah tọn ma nọte do finẹ gba. E zindonukọn dọmọ: “Ṣogan yè mọ onú dagbe lẹ to hiẹ mẹ.” (2 Otannugbo lẹ 19:1-3) Enẹwutu adi dodo tọn Jehovah tọn ma hẹn ẹn nado gbẹkọ dagbe he Jehọṣafati wà lẹ go gba. Lehe enẹ gbọnvona gbẹtọvi mapenọ lẹ do sọ! To whenuena mí gblehomẹ do mẹdevo lẹ go, mí sọgan wọnji jẹhẹnu dagbe he yé tindo lẹ go. Podọ eyin mí waylando, numọtolanmẹ flumẹjijẹ, winyan, po whẹgbledomẹ tọn po he mí nọ tindo sọgan hẹn mí ma nado flin jẹhẹnu dagbe he mí tindo lẹ. Ṣigba flindọ, eyin mí lẹnvọjọ sọn ylando mítọn lẹ mẹ bo vánkan ma nado vọ́ yé basi, Jehovah nọ jona mí.
13 Dile Jehovah na to ahun towe gbeje pọ́n, e na ze ylando enẹlẹ dlan kẹdẹdile sika-kùntọ de nọ bẹ ahaya he ma yọn-na-yizan lẹ dlan do. Etẹwẹ dogbọn jẹhẹnu po azọ́n dagbe towe lẹ po dali? Mọwẹ, ehelẹ wẹ yin “nuhọakuẹ” he e nọ wlebòna! Be a ko doayi aliho he mẹ mẹjitọ owanyinọ lẹ nọ wlebòna yẹdide he ovi yetọn dè kavi wehọmẹ-wé yetọn lẹ, to whedelẹnu na owhe susu to whenuena ovi lọ lẹ lọsu tlẹ ko wọnji yé go ya? Jehovah wẹ yin Mẹjitọ owanyinọ hugan lọ. Dile e na dẹnsọ bọ mí na gbọṣi nugbonọ-yinyin mẹ hlan ẹn, ewọ ma na wọnji azọ́n po jẹhẹnu dagbe mítọn lẹ po go gbede. Na nugbo tọn, e na pọ́n ẹn di mawadodo nado wọnji onú helẹ go, ṣigba ewọ ma yin mawadodonọ gbede. (Heblu lẹ 6:10) E sọ nọ gbeje ahun mítọn pọ́n to aliho devo mẹ.
14, 15. (a) Naegbọn mapenọ-yinyin mítọn ma nọ glọnalina Jehovah nado mọ dagbe he tin to mí mẹ lẹ? Basi dohia. (b) Etẹwẹ Jehovah na yí jẹhẹnu dagbe he e mọ to mí mẹ lẹ do wà, podọ nukun tẹwẹ e nọ yí do pọ́n omẹ nugbonọ etọn lẹ?
14 Jehovah nọ pọnnu zẹ̀ mape mítọn go bo nọ mọ nugopipe mítọn lẹ. Di dohia: Mẹhe yiwanna anàzọ́n lẹ na dovivẹnu sinsinyẹn nado vọ́ yẹdide kavi anàzọ́n he ko yin hinhẹngble taun lẹ jlado. Di apajlẹ, to whenuena mẹde yí apòmẹ-sò de do hẹn yẹdide Leonardo da Vinci tọn he akuẹ etọn yiaga sọ dọla Amelika tọn livi donu 30 lọ gble to National Gallery Londres, Angleterre tọn mẹ, mẹdepope ma na ayinamẹ dọ yẹdide lọ ni yin zizedlan na e ko yin hinhẹngble wutu gba. Kakatimọ, yé bẹ azọ́n jẹeji to afọdopolọji nado vọ́ yẹdide he ko dẹn-to-aimẹ na nudi owhe 500 lọ jlado. Etẹwutu? Na e yin nuhọakuẹ de to nukun mẹhe yiwanna anàzọ́n lẹ tọn mẹ wutu. Be hiẹ ma họakuẹ hú yẹdide he yè yí okò po akán po do basi ya? Mọwẹ, to nukun Jiwheyẹwhe tọn mẹ—mahopọnna lehe ogú mapenọ-yinyin tọn sọgan ko hẹn we gble sọ. (Psalm 72:12-14) Jehovah Jiwheyẹwhe, heyin Mẹdatọ daho whẹndo gbẹtọvi tọn, na wà onú lẹpo nado hẹn mẹhe setonuna nukunpedomẹgo owanyinọ etọn lẹpo zun pipé.—Owalọ lẹ 3:21; Lomunu lẹ 8:20-22.
15 Mọwẹ, Jehovah nọ mọ dagbe delẹ to mí mẹ, ehe mílọsu sọgan nọma mọ to mídelẹ mẹ. Podọ dile mí to sinsẹ̀n ẹn, e na hẹn dagbe lọ sù deji kakajẹ whenuena mí na lẹzun pipé to godo mẹ. Mahopọnna lehe aihọn Satani tọn nọ yinuwahẹ mí do, Jehovah nọ yí nukun nuhọakuẹ tọn do pọ́n devizọnwatọ nugbonọ etọn lẹ di onú tindo ojlona lẹ.—Hagai 2:7.
Jehovah Do Owanyi Etọn Hia Hezeheze
16. Etẹwẹ yin kunnudenu daho hugan owanyi Jehovah tọn na mí, podọ nawẹ mí yọnẹn gbọn dọ nunina ehe yin nina mílọsu titi lẹ?
16 Ẹnẹtọ, Jehovah nọ wà nususu nado do owanyi etọn hia mí. Na jide tọn, avọ́sinsan Klisti tọn wẹ yin gblọndo dagbe hugan lọ na lalo Satani tọn dọ mí yin nuvọ́nọ kavi dọ mẹde ma yiwanna mí. Mí ma dona wọnji pọ́n gbede dọ, okú awufiẹsa tọn he Jesu kú to yatin ji po awufiẹsa daho he Jehovah doakọnna to whenuena e to okú Ovi yiwanna etọn tọn pọ́n po yin kunnudenu owanyi yetọn tọn na mí. E blawu dọ, e vẹawu na mẹsusu nado yise dọ nunina ehe yin nina yé lọsu titi lẹ. Yé nọ pọ́n yedelẹ taidi nuvọ́nọ. Ṣigba, flindọ apọsteli Paulu ko yin homẹkẹndomẹtọ de na hodotọ Klisti tọn lẹ pọ́n. Ṣogan, e wlan dọmọ: ‘Ovi Jiwheyẹwhe tọn . . . yiwanna mi, bosọ yí ede na mi.’—Galatianu lẹ 1:13; 2:20.
17. Gbọn etẹlẹ gblamẹ wẹ Jehovah dọ̀n mí wá ede po Ovi etọn po dè?
17 Jehovah nọ do owanyi etọn hia mí gbọn alọgigọna dopodopo mítọn lẹ nado yí dotẹnmẹ hundote avọ́sinsan Klisti tọn zan dali. Jesu dọmọ: “Mẹdepope ma sọgan wá dè e, adavo Otọ́ he do mi hlan dọ̀n ẹn.” (Johanu 6:44) Mọwẹ, Jehovah lọsu wẹ nọ dọ̀n mí wá Ovi etọn dè podọ wá todido ogbẹ̀ mavọmavọ tọn kọ̀n. Gbọnna? Gbọn azọ́n yẹwhehodidọ tọn lọ gblamẹ, ehe yin didọna dopodopo mítọn lẹ, podọ gbọn gbigbọ wiwe Jehovah tọn gblamẹ, ehe e nọ yizan nado gọalọna mí nado mọnukunnujẹ nugbo gbigbọmẹ tọn lọ mẹ bosọ yí ì do yizan mẹ, mahopọnna madogán po mapenọ-yinyin mítọn lẹ po. Enẹwutu, Jehovah sọgan dọ gando mí go dile e dọ gando Islaeli go do dọmọ: “Yẹn ko yí owanyi madopodo de do yiwanna we: enẹwutu wẹ yẹn ko yí dagbewanyi do dọ̀n we.”—Jẹlemia 31:3.
18, 19. (a) Aliho dagbe hugan tẹmẹ wẹ Jehovah do owanyi etọn hia mí te, podọ etẹwẹ dohia dọ ewọ lọsu titi wẹ nọ penukundo ehe go? (b) Nawẹ Ohó Jiwheyẹwhe tọn hẹn mí deji dọ Jehovah yin todoaitọ awuvẹmẹtọ de gbọn?
18 Vlavo gbọn lẹblanulọkẹyi odẹ̀ tọn gblamẹ wẹ mí nọ duvivi owanyi Jehovah tọn to aliho dagbe hugan de mẹ te. Biblu basi oylọna dopodopo mítọn lẹ nado nọ “hodẹ̀ magbọjẹ” hlan Jiwheyẹwhe. (1 Tẹsalonikanu lẹ 5:17) E nọ dotoai. E tlẹ yin yiylọdọ ‘Sisètọ odẹ̀ tọn.’ (Psalm 65:2) E ma de azọngban ehe na mẹdevo de gba, e ma tlẹ de e na Ovi etọn lọsu gba. Saa lẹnnupọndeji: Mẹdatọ wẹkẹ lọ tọn dotuhomẹna mí nado dọnsẹpọ ẹ to odẹ̀ mẹ, po awuvivo hodidọ tọn po. Podọ todoaitọ nankọtọn wẹ ewọ yin? Be mẹtọnmahopọntọ, lẹblanu matindotọ, po kanylantọ de po wẹ e yin ya? Paali.
19 Jehovah yin awuvẹmẹtọ. Etẹwẹ awuvẹmẹ yin? Klistiani nugbonọ mẹhomẹ de dọmọ: “Awuvẹmẹ yin awufiẹsa towe to ahun ṣie mẹ.” Be Jehovah nọ yọ́n awuvẹ yajiji mítọn lẹ tọn nugbonugbo ya? Mí hia gando yajiji omẹ etọn Islaeli tọn lẹ go dọmọ: “To nukunbibia yetọn lẹpo mẹ, yè bianukunna ẹn.” (Isaia 63:9) E ma yindọ Jehovah mọ nuhahun yetọn lẹ poun wẹ gba, ṣigba e sọ nọ vẹawu omẹ etọn lẹ. Lehe numọtolanmẹ etọn nọ siso sọ yin didohia to hodidọ Jehovah lọsu tọn hlan devizọnwatọ etọn lẹ mẹ dọmọ: “Ewọ he doalọ mì go doalọ azìn nukun [ṣie, NW] tọn go.” b (Zekalia 2:8) Lehe awufiẹsa enẹ na sinyẹn sọ! Mọwẹ, Jehovah nọ vẹawu mí. Eyin mí jiya, ewọ lọsu nọ jiya ga.
20. Eyin mí jlo na setonuna ayinamẹ he tin to Lomunu lẹ 12:3 mẹ, lẹnpọn he ma to jlẹkaji tẹwẹ mí dona dapana?
20 Klistiani lẹnpọn dagbenọ depope ma na yí kunnudenu owanyi Jiwheyẹwhe tọn enẹ po yẹyi he e nọ dohia na devizọnwatọ etọn lẹ po zan taidi dotẹnmẹ hundote de na goyiyi po mẹdezedaga po gba. Apọsteli Paulu wlan dọmọ: “Gbọn ojọmiọn he yè na mi dali, hlan omẹ dopodopo he tin to mì ṣẹnṣẹn, dọ e lẹn ede tọn glanglan hú ehe jẹ e ni lẹn blo: ṣigba nado [nọ lẹnnupọn bo zìn to ayiha mẹ], kẹdẹdile Jiwheyẹwhe basi ojlẹ yise tọn hlan omẹ dopodopo do.” (Lomunu lẹ 12:3) Lẹdogbedevomẹ devo dọ tofi dọmọ: “Yẹn na dọhlan dopodopo mìtọn lẹ ma na do ze ede daga hú nuhe e yin na taun tọn gba, ṣigba nado nọ whiwhẹ ede do odò.” (A Translation in the Language of the People gbọn Charles B. Williams dali) Enẹwutu dile mí to vivi dagbenu owanyi Otọ́ mítọn olọn mẹ tọn dù, mì gbọ mí ni yin lẹnpọn dagbenọ bo nọ flindọ mí ma jẹna owanyi Jiwheyẹwhe tọn mọjanwẹ mí ma tindo jlọjẹ na ẹn do niyẹn.—Luku 17:10.
21. Lalo Satani tọn tẹlẹ wẹ mí dona zindonukọn nado to gbigbẹdai, podọ nugbo Jiwheyẹwhe tọn tẹwẹ mí dona zindonukọn nado nọ yí do na jide ahun mítọn?
21 Mì gbọ mímẹpo ni wà nuhe go mí pé lẹpo nado gbẹ́ lalo Satani tọn lẹpo dai, gọna lalo lọ dọ mí yin nuvọ́nọ kavi mẹde ma yiwanna mí. Eyin numimọ towe lẹ to gbẹ̀mẹ ko plọn we nado nọ pọ́n dewe hlan taidi dọ owanyi sisosiso Jiwheyẹwhe tọn ma sọgan diọ gbẹzan towe, kavi dọ azọ́n dagbe towe lẹ whè sọmọ bọ nukun etọn he nọ mọ onú lẹpo ma sọgan mọ, kavi dọ ylando towe lẹ ko sù sọmọ bọ okú Ovi yiwanna etọn tọn ma sọgan ṣinyọnnudo, be lalo pete wẹ. Yí ahun towe lẹpo do gbẹ́ lalo enẹlẹ dai! Mì gbọ mí ni zindonukọn nado nọ to nugbo heyin didohia to ohó gbọdo Paulu tọn mẹ lẹ yí do na jide ahun mítọn dọmọ: “Yè hẹn mi yọnẹn dọ, okú, kavi ogbẹ̀, kavi angẹli lẹ, kavi ogán lẹ, kavi huhlọn lẹ, kavi onú whenu he tọn lẹ, kavi onú he ja lẹ. Kavi aga, kavi odò, kavi nudida devo de ma na tin sọgan nado klan mí sọn owanyi Jiwheyẹwhe tọn he tin to Klisti Jesu Oklunọ mítọn mẹ gba.”—Lomunu lẹ 8:38, 39.
a Whlasusu wẹ Biblu do kanṣiṣa he tin to todido fọnsọnku tọn po oflin Jehovah tọn po ṣẹnṣẹn hia. Dawe nugbonọ lọ Job dọna Jehovah dọmọ: ‘Ṣo hiẹ do de ojlẹ de na mi, bo na flin mi!’ (Job 14:13) Jesu dlẹnalọdo fọnsọnku “mẹhe tin to yọdò oflin tọn mẹ lẹpo tọn,” NW. Ehe sọgbe na Jehovah nọ flin oṣiọ he e na fọnsọnku lẹ to aliho pipé de mẹ.—Johanu 5:28, 29.
b Lẹdogbedevomẹtọ delẹ dohia tofi dọ mẹhe to alọdo omẹ Jiwheyẹwhe tọn lẹ go to alọdo nukun edetiti tọn kavi Islaeli tọn go, e mayin Jiwheyẹwhe tọn go gba. Wekantọ he pọ́n wefọ ehe hlan taidi sisi matindo bo diọ ẹ lẹ wẹ hẹn nuṣiwa ehe wá aimẹ. Vivẹnudido agọ̀ yetọn hẹn lehe awuvẹmẹ Jehovah lọsu tọn siso sọ dózin.
