NADO gọalọna mí nado yọ́n Mẹssia lọ, Jehovah Jiwheyẹwhe gbọdo yẹwhegán susu he kàn Biblu lẹ nado na nudọnamẹ susu gando jiji, lizọnyizọn, po okú Mẹwhlẹngántọ dopagbe ehe tọn po go. Dọdai Biblu tọn ehe lẹpo wẹ mọ hẹndi to Jesu Klisti mẹ. Gbesisọ po nugbo-yinyin yetọn po paṣamẹ taun. Di dohia, mì  gbọ mí ni gbadopọnna dọdai kleun delẹ he dọhodo nujijọ he gando jiji Mẹssia tọn po ovu-whenu etọn po go ji.

Yẹwhegán Isaia dọ dọdai dọ Mẹssia lọ na yin kúnkan Ahọlu Davidi tọn. (Isaia 9:7) Na nugbo tọn, Jesu yin jiji to kúnkan Davidi tọn mẹ.—Matiu 1:1, 6-17.

Mika, yẹwhegán Jiwheyẹwhe tọn devo, dọ dọdai dọ ovi ehe  na wá lẹzun ogán to godo mẹ podọ e na yin jiji to “Bẹtlẹhẹm Eflata.” (Mika 5:2) To ojlẹ he mẹ Jesu yin jiji te, tòpẹvi awe wẹ tin to Islaeli he nọ yin Bẹtlẹhẹm. Dopo ma dẹn do Nazalẹti to agewaji otò lọ tọn, podọ awetọ tin sẹpọ Jelusalẹm to Juda. Bẹtlẹhẹm he ma dẹn do Jelusalẹm wẹ nọ yin yiylọ to ojlẹ de mẹ wayi dọ Eflata. Jesu yin jiji to tòpẹvi enẹ mẹ, kẹdẹdile dọdai lọ dọ do pẹpẹ!—Matiu 2:1.

Dọdai Biblu tọn devo dọ dọ Visunnu Jiwheyẹwhe tọn na yin yiylọ “jẹgbonu sọn Egipti.” Taidi ovivu de, Jesu yin zize sọyi Egipti. E yin hinhẹn lẹkọwa to okú Hẹlodi tọn godo, bo gbọnmọ dali hẹn dọdai lọ di.—Hosea 11:1; Matiu 2:15.

To apotin lọ “ Dọdai He Gando Mẹssia Go Lẹ” ji lọ mẹ, wefọ heyin sislẹ do hosọ lọ “Dọdai” glọ lẹ bẹ zẹẹmẹ gigọ́ hẹn gando Mẹssia lọ go. Jaale yí ehelẹ jlẹdo wefọ heyin sislẹ do hosọ lọ “Hẹndi” glọ lẹ go. Mọwiwà nasọ hẹn yise towe to nugbo-yinyin Ohó Jiwheyẹwhe tọn mẹ lodo dogọ.

To whenuena hiẹ to dogbapọnna wefọ ehelẹ, hẹn do ayiha mẹ dọ dehe yin dọdai lẹ ko yin kinkàn owhe kanweko susu whẹpo Jesu do yin jiji. Jesu dọmọ: “Onú lẹpo ma sọgan nọma di gba, he yè ko wlan to osẹ́n Mose tọn mẹ, podọ to yẹwhegán lẹ mẹ, podọ to Psalm lẹ mẹ na yẹn tọn wutu.” (Luku 24:44) Dile hiẹ sọgan mọ to Biblu towe titi mẹ do, na nugbo tọn yé mọ hẹndi yí—yèdọ to gigọ́mẹ mlẹnmlẹn!