WETA 37

Be N’Dona Yí Baptẹm Ya?

Dohiagona gblọndo mọwẹ kavi lala na hodidọ he bọdego lẹ:

Baptẹm yin dandannu de na Klistiani lẹ.

□ Nugbo

□ Lalo

Onú taji he wutu yè nọ yí baptẹm wẹ yindọ e nọ zọ́n bọ yè ma nọ jai jẹ ylando mẹ.

□ Nugbo

□ Lalo

Mẹhe yí baptẹm nọ tin to ali whlẹngán tọn ji.

□ Nugbo

□ Lalo

E ma na biọ dọ a ni dogbè nue wà a te lẹ tọn na Jiwheyẹwhe eyin a ma ko yí baptẹm.

□ Nugbo

□ Lalo

Eyin hagbẹ towe lẹ to baptẹm yí, enẹ dohia dọ hiẹ lọsu ko pegan nado yí baptẹm ga.

□ Nugbo

□ Lalo

EYIN a nọ setonuna nubiọtomẹsi Jiwheyẹwhe tọn lẹ to gbẹzan towe mẹ, nọ dovivẹnu nado jihọntọn hẹ Jiwheyẹwhe, bosọ nọ dọhona mẹdevo lẹ gando nuyise towe lẹ go, be e sọgbe taun dọ a ni nọ lẹnnupọndo baptẹm yíyí ji. Amọ́ din, nawẹ a na wagbọn do yọnẹn dọ a ko wleawufo nado jẹ yanwle enẹ kọ̀n? Nado gọalọna we na a nido mọ gblọndo lọ, gbọ mí ni gbadopọnna hodidọ he a ko dohiagona to aga dọ yé yin nugbo kavi lalo lẹ.

● Baptẹm yin dandannu de na Klistiani lẹ.

Nugbo. Jesu degbe dọ mẹhe na yin devi emitọn lẹ ni yin bibaptizi. (Matiu 28:19, 20) Na taun tọn, Jesu lọsu desọn ojlo mẹ bo yí baptẹm. Nado yin hodotọ Klisti tọn de, e na biọ dọ a ni yí baptẹm to whenue a ko whèwhín jẹ obá lọ mẹ nado basi nudide mọnkọ bosọ tindo ojlo nujọnu tọn nado yí baptẹm.

● Onú taji he wutu yè nọ yí baptẹm wẹ yindọ e nọ zọ́n bọ yè ma nọ jai jẹ ylando mẹ.

Lalo. Baptẹm yin aliho de nado dohia to gbangba dọ a ko klan gbẹzan towe do wiwe na Jehovah. Klandowiwe towe ma yin gbekọndopọ mọmọ tọn de he a gán basi, dọ a na nọla na nudelẹ, ṣogan bo na gbẹ́ to onú enẹlẹ wà to nuglọ gba. Kakatimọ, gbẹzan towe kinklandowiwe na Jehovah nọ dohia dọ a jlo na nọgbẹ̀ sọgbe hẹ osẹ́n etọn lẹ.

● Mẹhe yí baptẹm nọ tin to ali whlẹngán tọn ji.

Nugbo. Biblu dọ dọ baptẹm yin afọdide titengbe de he yè dona ze nado mọ whlẹngán. (1 Pita 3:21) Amọ́, ehe ma dohia dọ baptẹm yíyí taidi akuẹ súsú na azọ́nwhé hihọ́-basinamẹ tọn de (assurance), na e nido to gbesisọ mẹ nado wá gọalọna we to adángbomẹ de whenu. Eyin a yí baptẹm, na a yiwanna Jehovah bo jlo na sẹ̀n ẹn kakadoi po ahun towe lẹpo po wutu wẹ.—Malku 12:29, 30

● E ma na biọ dọ a ni dogbè nue wà a te lẹ tọn na Jiwheyẹwhe eyin a ma ko yí baptẹm.

Lalo. Jakọbu 4:17 dọmọ: “Eyin mẹde yọ́n lehe e na wà nuhe sọgbe do ṣogan bo ma wà ẹ, ylando de wẹ e yin na ẹn”—vlavo mẹlọ ko yí baptẹm wẹo kavi lala. Enẹwutu, eyin a nọ yọ́n nuhe sọgbe lẹ, bọ po obá he mẹ a whèwhín jẹ po a ko yọ́n nuhe a gán yí gbẹzan towe do wà, vlavo ojlẹ lọ niyẹn nado dọhodo whẹho delẹ ji hẹ mẹjitọ towe de kavi hẹ Klistiani devo he whèwhín. Gbọnmọ dali, a gán yọ́n nuhe a na wà nado yinukọn bo pegan na baptẹm.

● Eyin hagbẹ towe lẹ to baptẹm yí, enẹ dohia dọ hiẹ lọsu ko pegan nado yí baptẹm ga.

Lalo. Nudide towe nado yí baptẹm dona yin sọn ojlo mẹ wá, yèdọ sọn ahun towe mẹ. (Salmu lẹ 110:3) Whẹpo a nido yí baptẹm, a dona yọ́n nuhe Kunnudetọ Jehovah tọn de yinyin zẹẹmẹdo to gigọ́ mẹ bosọ hẹn ẹn diun dọ a ko wleawufo nado didá azọngban enẹ.—Yẹwhehodọtọ 5:4, 5.

Afọdide de He Nọ Diọ Gbẹzan Mẹtọn

Baptẹm yin afọdide de he nọ hẹn diọdo lẹ wá gbẹzan mẹtọn mẹ bosọ nọ hẹn dona susu lẹ wá. To ojlẹ dopolọ mẹ, e bẹ azọngban sinsinyẹn de hẹn—enẹ wẹ nado nọgbẹ̀ sọgbe hẹ nudide he a basi nado klan dewe do wiwe na Jehovah.

Be a ko wleawufo nado klan dewe do wiwe na ewọ ya? Eyin mọ wẹ, e sọgbe dọ a ni gọ́ na ayajẹ. Nudide towe enẹ na hẹn we tindo lẹblanulọkẹyi daho hugan lọ—enẹ wẹ nado yí ahun lẹpo do sẹ̀n Jehovah bosọ nọgbẹ̀ to aliho de mẹ he na dohia dọ a ko klan dewe do wiwe na ewọ nugbonugbo.—Matiu 22:36, 37.

TO WETA HE BỌDEGO MẸ

Pọ́n lehe a gán ze yanwle lẹ donukọnna dewe do nado sọgan yí nuyọnẹn do zan ogbẹ̀ towe.

WEFỌ TANGAN

“[Mì] yí agbasa mìtọn do basi avọ́sinsan he togbẹ̀, wiwe, he yin alọkẹyi na Jiwheyẹwhe, yèdọ sinsẹ̀nzọn wiwe he yin bibasi po huhlọn nulẹnpọn tọn mìtọn po.”—Lomunu lẹ 12:1.

AYINAMẸ

Po alọgọ mẹjitọ towe lẹ tọn po, tẹnpọn bo mọ mẹde to agun towe mẹ he sọgan gọalọna we nado yinukọn to gbigbọ-liho bo pegan na baptẹm.—Owalọ lẹ 16:1-3.

BE A YỌNẸN YA . . . ?

Baptẹm yíyí yin afọdide dandan tọn de, he yin dopo to “ohia” he yè nado yọ́n we di mẹhe to ali whlẹngán tọn ji lẹ mẹ.—Ezekiẹli 9:4-6.

AFỌDIDE N’DONA ZE LẸ!

Nado pegan na baptẹm, n’na dovivẹnu bo mọnukunnujẹ nuplọnmẹ Biblu tọn he bọdego ehelẹ mẹ ganji dogọ: ․․․․․

Nuhe n’jlo na kanse mẹjitọ ṣie (lẹ) gando whẹho ehe go wẹ ․․․․․

ETẸ A LẸN?

● Naegbọn baptẹm do yin afọdide dandan tọn de sọmọ?

● Etẹwẹ sọgan sisẹ́ jọja de nado ze afọdide he jẹ lẹ bo yawu yí baptẹm?

● Whẹjijọ nulú tọn tẹwẹ jọja de sọgan na, ehe wutu e na to yonu dọ̀n dogodo nado klan gbẹzan etọn do wiwe bo yí baptẹm?

[Nudọnamẹ tangan lẹ]

Na n’yọnẹn dọ n’ko yí baptẹm wutu, ehe zọ́n bọ n’nọ basi nudide nuyọnẹn tọn lẹ bo nọ dapana nuyiwa delẹ he gán ko hẹn kọdetọn vẹadi lẹ wá na mi.​—Holly

[Apotin/​Yẹdide]

Kanbiọ Delẹ He Mẹsusu Nọ Saba Kanse Gando Baptẹm Go

Etẹwẹ baptẹm yíyí nọ dohia? Whenue yè ylọ́n we do osin mẹ bo gọ̀ we wá aga, e nọ dohia dọ a doalọtena afọdidona ojlo towe titi lẹ to gbẹ̀mẹ, bọ to linlẹn de mẹ gbẹtọ-yinyin hoho towe ko kú podọ a gọwá ogbẹ̀ todin nado wà ojlo Jehovah tọn.

Etẹwẹ e zẹẹmẹdo nado klan gbẹzan towe do wiwe na Jehovah? E zẹẹmẹdo dọ a masọ yin dewe titi tọn ba, bo ko dopà nado ze ojlo Jiwheyẹwhe tọn wiwà do otẹn tintan mẹ na nuhe pò lẹpo. (Matiu 16:24) Aliho dagbe lọ nado do opà ehe wẹ nado hò odẹ̀ vonọtaun de hlan Jehovah to ojlẹ de mẹ jẹnukọnna baptẹm towe.

Etẹwẹ a dona ko yí gbẹzan towe do to wiwà jẹnukọnna baptẹm towe? A dona ko to Ohó Jiwheyẹwhe tọn yí do yizan mẹ to gbẹzan towe mẹ bosọ nọ dọhona mẹdevo lẹ gando nuyise towe lẹ go. A dona dovivẹnu nado jihọntọn hẹ Jiwheyẹwhe gbọn dẹ̀hiho po Ohó etọn pinplọn po dali. Hiẹ lọsu wẹ dona basi dide nado sẹ̀n Jehovah sọn ojlo mẹ wá—e ma dona yin na mẹdevo lẹ to ṣọ̀ṣọ̀ do na we nado wàmọ wutu.

Be e biọ dọ a ni do owhe tangan de whẹpo do sọgan yí baptẹm wẹ ya? E ma yin owhe he a do wẹ yin onú tintan he yè nọ pọ́n. Etomọṣo, a dona ko whẹ́n jẹ obá de mẹ—bo yin mẹhe whèwhín—nado sọgan mọnukunnujẹ nuhe klandowiwe nọ biọ mẹ.

Amọ́, eyin a jlo nado yí baptẹm bọ mẹjitọ towe lẹ ka dọ dọ a dona gbẹ́ nọte whẹ́ lo, etẹ a na wà? Vlavo na yé jlo dọ a ni tindo numimọ nuhe gbẹzan Klistiani tọn bẹhẹn tọn vude dogọ whẹ́ wutu wẹ. Ma yí nukunpẹvi do pọ́n ayinamẹ yetọn blo, kakatimọ yí ojlẹ enẹ zan nado hẹn haṣinṣan towe hẹ Jehovah sinyẹn deji.—1 Samuẹli 2:26.

[Apotin]

Azọ́nplọnmẹwe

Be A to Linlẹn Nado Yí Baptẹm Wẹ Ya?

Gbeje nukọnyiyi towe pọ́n gbọn dogbigbapọnna kanbiọ po nudọnamẹ he to odò fi lẹ po dali. Hẹn ẹn diun dọ a hia wefọ he yin sislẹ lẹ whẹpo do nọ kàn gblọndo towe lẹ.

Aliho tẹlẹ mẹ wẹ a to didohia te to alọnu din dọ a nọ dejido Jehovah go?—Salmu lẹ 71:5. ․․․․․

Nawẹ a ko dohia dọ a plọn huhlọn wuntuntun tọn towe nado nọ yọ́n dagbe dovo na oylan gbọn?—Heblu lẹ 5:14. ․․․․․

Nawẹ a nọ hodẹ̀ whẹwhẹ sọ? ․․․․․

Nawẹ a nọ hò odẹ̀ he to tlọlọ lẹ gbọn, podọ etẹwẹ odẹ̀ towe lẹ nọ dohia gando owanyi he a do na Jehovah go?—Salmu lẹ 17:6. ․․․․․

Kàn yanwle depope he a jlo na zedai gando dẹ̀hiho go do odò fi. ․․․․․

Tito tẹwẹ a zedai nado nọ basi oplọn mẹdetiti tọn towe to gbesisọ mẹ?—Jọṣua 1:8. ․․․․․

Etẹlẹ wẹ a nọ gbadopọnna to oplọn mẹdetiti tọn towe whenu? ․․․․․

Kàn yanwle depope he a jlo na zedai gando oplọn mẹdetiti tọn towe go do odò fi. ․․․․․

Be lizọnyizọn towe nọ de sinsẹ́n tọ́n ya? (Apajlẹ lẹ: Be a gán basi zẹẹmẹ nuplọnmẹ dodonu tọn Biblu tọn lẹ tọn na mẹdevo lẹ ya? Be a nọ basi gọyìpọn na mẹhe do ojlo hia lẹ ya? Be a to vivẹnudo nado nọ deanana plọnmẹ Biblu de ya?)

□ Mọwẹ □ Lala

Kàn yanwle depope he a jlo na zedai gando lizọnyizọn towe go do odò fi.—2 Timoti 2:15.

□ Mọwẹ □ Lala

Kàn yanwle depope he a jlo na zedai gando lizọnyizọn towe go do odò fi.—2 Timoti 2:15. ․․․․․

Be a nọ yì opli Klistiani tọn lẹ to gbesisọ mẹ ya kavi dopo vlavo?—Heblu lẹ 10:25. ․․․․․

Aliho tẹlẹ mẹ wẹ a nọ do mahẹ to opli lẹ mẹ te? ․․․․․

Be a nọ yì opli lẹ etlẹ yin to whenue e ma na pà mẹjitọ towe lẹ nado yì (bọ yé ka nagbè we nado yì) ya?

□ Mọwẹ □ Lala

Be a gán dọ dọ a nọ mọ awuvivi nugbonugbo to ojlo Jiwheyẹwhe tọn wiwà mẹ ya?—Salmu lẹ 40:8.

□ Mọwẹ □ Lala

Be a gán slẹ ojlẹ tangan delẹ he mẹ a duto kọgbidinamẹ hagbẹ lẹ tọn ji te ya?—Lomunu lẹ 12:2. ․․․․․

Tito tẹlẹ wẹ a basi nado to owanyi towe na Jehovah hẹn lodo?—Juda 20, 21. ․․․․․

Be a na sẹ̀n Jehovah eyin mẹjitọ towe lẹ po họntọn towe lẹ po tlẹ doalọtena mọwiwà ya?—Matiu 10:36, 37.

□ Mọwẹ □ Lala

[Yẹdide]

Taidi alọwle, baptẹm yin afọdide de he nọ hẹn diọdo lẹ wá gbẹzan mẹtọn mẹ, podọ yè ma dona yí nukunpẹvi do pọ́n ẹn