Nawẹ N’Sọgan Jihọntọn Dagbe lẹ Gbọn?
WETA 8
Nawẹ N’Sọgan Jihọntọn Dagbe lẹ Gbọn?
“Eyin n’gblehomẹ, n’nọ do hudo mẹde tọn he n’na dọ numọtolanmẹ ṣie na. Eyin n’to awubla, n’nọ do hudo mẹhe na miọnhomẹna mi tọn. Eyin n’to ayajẹ, n’nọ jlo dọ mẹde ni jaya hẹ mi. Na yẹn tọn, dandannu de wẹ họntọn lẹ yin.”—Brittany.
MẸLẸ nọ saba dọ dọ yọpọvu lẹ nọ do hudo aihunda-gbẹ́ de tọn, amọ́ jọja aflanmẹ lẹ nọ do hudo họntọn lẹ tọn. Fie wẹ vogbingbọn lọ te?
Aihunda-gbẹ́ de wẹ mẹhe yè nọ saba daihun dopọ hẹ.
Họntọn de wẹ mẹhe nọ yọ́n pinpẹn mẹtọn.
Humọ, Biblu dọ dọ “họntọn nugbo nọ yiwannamẹ to whelẹponu, podọ nọvisunnu he go yè sọgan dejido to ojlẹ ayimajai tọn lẹ mẹ wẹ ewọ.” (Howhinwhẹn lẹ 17:17) Ayihaawe matin dọ hogbe ehelẹ do haṣinṣan họntọnjiji tọn de hia he siso taun hú dehe a tindo hẹ aihundagbẹ́ towe lẹ to ovu whenu!
Nugbo lọ: Dile a to whinwhẹ́n, a na do hudo họntọn delẹ tọn, he
1. Do jẹhẹnu dagbe lẹ
2. Nọ nọgbẹ̀ sọgbe hẹ nunọwhinnusẹ́n he sọgbe lẹ
3. Nọ tindo nuyiwadomẹji dagbe do jiwe
Kanbiọ: Nawẹ a sọgan mọ họntọn dagbe mọnkọ lẹ gbọn? Gbọ mí ni dọhodo jẹhẹnu lọ lẹ dopodopo ji.
Jẹhẹnu Họntọnjiji Tọn #1—Jẹhẹnu Dagbe Lẹ
Nuhe a dona yọnẹn. E ma yin mẹhe nọ sọalọakọ́n dọ emi yin họntọn towe lẹpo wẹ gán lẹzun họntọn dagbe de na we. Biblu tlẹ dọ dọ “họntọn delẹ tin he nọ wleawufo nado gídí ode awetọ.” (Howhinwhẹn lẹ 18:24) Ehe gán taidi nuhe zẹpá. Amọ́, lẹnnupọndo ehe ji: Be a ko jihọntọn hẹ mẹde he ko zan we pọ́n ya? Be họntọn de ko dolalo dokọna we, kavi dọho agọ̀ lẹ gando gowe to mẹdevo lẹ dè pọ́n ya? Onú enẹlẹ sọgan zọ́n bọ a ma nasọ dejido họntọn enẹ go ba. a Nọ flin to whepoponu dọ họntọn nugbo vude tintindo pọnte hugan họntọn lalo susu tintindo!
Nuhe a sọgan wà. Nọ de họntọn he do jẹhẹnu dagbe bọ a gán hodo apajlẹ yetọn lẹ.
“Mẹlẹpo wẹ nọ dọ họntọn ṣie Fiona sin hó dagbe. Yẹnlọsu jlo dọ mẹlẹ ni nọ dọho ṣie dagbe ga. N’jlo na wleawuna yinkọ dagbe di ewọ. Na yẹn, jẹhẹnu dagbe de niyẹn.”—Yvette, 17.
Tẹ́n onú ehelẹ pọ́n.
1. Hia Galatianu lẹ 5:22, 23.
2. Kanse dewe dọ, ‘Be họntọn ṣie lẹ nọ do jẹhẹnu he “sinsẹ́n gbigbọ tọn” bẹhẹn lẹ hia ya?’
3. Kàn yinkọ họntọn towe vivẹ́ lẹ tọn do odò. Kàn jijọ dopodopo yetọn tọn do yinkọ yetọn nukọn.
Yinkọ
․․․․․
Jijọ
․․․․․
Ayidonugo: Eyin a mọdọ ode to yé mẹ ma do jijọ dagbe, be a dona dín họntọn dagbe devo lẹ!
Jẹhẹnu Họntọnjiji Tọn #2—Nunọwhinnusẹ́n He Sọgbe Lẹ
Nuhe a dona yọnẹn. Eyin a nọ to họntọn lẹ dín mapote, a na nọ yawu jihọntọn ylankan lẹ. Biblu dọ dọ: “Mẹhe nọ dogbẹ́ hẹ nulunọ ma na tindo kọdetọn dagbe.” (Howhinwhẹn lẹ 13:20) Hogbe lọ “nulunọ” ma to alọdlẹndo mẹhe ma nọ wazọ́n ganji to wehọmẹ kavi mẹhe ma sewé lẹ. Kakatimọ, e nọ dlẹnalọdo mẹhe nọ gbẹkọ ayinamẹ nuyọnẹn tọn lẹ go bo nọ de nado zan jijọ he ma sọgbe lẹ. E họnwun dọ e ma na jlo we nado jihọntọn hẹ omẹ mọnkọ lẹ!
Nuhe a sọgan wà. Kakati nado nọ jihọntọn hẹ mẹdepope poun, nọ pọ́n họntọn do ji. (Salmu lẹ 26:4) Enẹ ma zẹẹmẹdo dọ a ni nọ homẹnukuntapọn. Tofi, linlẹn lọ nado nọ pọ́n họntọn do ji zẹẹmẹdo dọ a ni to aṣeji taun bo nọ penugo nado “mọ vogbingbọn to dodonọ po mẹylankan po ṣẹnṣẹn, to mẹhe to Jiwheyẹwhe sẹ̀n po mẹhe ma to sinsẹ̀n ẹn po ṣẹnṣẹn.”—Malaki 3:18.
“N’dopẹ́ dọ mẹjitọ ṣie lẹ gọalọna mi nado jihọntọn lẹ—enẹ wẹ mẹhe po yẹn po to ohá ji bosọ to dagbe wà to gbigbọ-liho lẹ.”—Christopher, 13.
Dín gblọndo na kanbiọ he bọdego lẹ:
Be n’nọ dibu whenue n’topọ hẹ họntọn ṣie lẹ dọ yé na gbidikọna mi nado wà nuhe n’yọnẹn dọ e ma sọgbe de wẹ ya?
□ Mọwẹ
□ Lala
Be n’nọ whleawu nado do họntọn ṣie lẹ hia mẹjitọ ṣie lẹ, na n’to budi dọ onú yetọn ma na jẹ mẹjitọ ṣie lẹ tọn ji wẹ ya?
□ Mọwẹ
□ Lala
Ayidonugo: Eyin gblọndo towe na kanbiọ he jẹnukọn lẹ yin mọwẹ, dín họntọn he nọ nọgbẹ̀ sọgbe hẹ nujinọtedo he yiaga lẹ—yèdọ mẹhe nọ ze apajlẹ dagbe dai taidi Klistiani lẹ.
Jẹhẹnu Họntọnjiji Tọn #3—Nuyiwadomẹji Dagbe
Nuhe a dona yọnẹn. Biblu dọmọ: “Gbẹdido ylankan lẹ nọ hẹn walọ dagbe lẹ gble.” (1 Kọlintinu lẹ 15:33) Jọja de he nọ yin Lauren dọmọ: “Wehọmẹvigbẹ́ ṣie lẹ sin homẹ nọ hùn do go e, kiki eyin n’wà nuhe yé biọ to asi e lẹ. Na n’nọ to ṣokẹdẹ wutu, n’gbọ bo nọ yinuwa di yé.” Lauren wá mọdọ eyin yè nọ joawuna nujinọtedo mẹdevo lẹ tọn, yè nọ wá taidi ajikún lẹ to alọ yetọn mẹ bọ yé gán yí we do dó aṣa dile e jlo yé do. E ma dona yinmọ na we paali!
Nuhe a sọgan wà. Sankánna haṣinṣan towe hẹ mẹhe nọ jlo dọ a ni diọ bo yinuwa di yewlẹ. Eyin a wàmọ, a ma na do họntọn kaka de, amọ́ mọwiwà na zọ́n bọ a na vò to dewe mẹ bo na do dotẹnmẹ lọ nado jihọntọn dagbe lẹ—yèdọ họntọn he na do nuyiwadomẹji dagbe do jiwe lẹ.—Lomunu lẹ 12:2.
“Họntọn ṣie vivẹ́ Clint yin lẹnpọn dagbenọ bo nọ vẹawumẹ, ehe zọ́n bọ e yin asisa tulinamẹ tọn daho de na mi.”—Jason, 21.
Kàn kanbiọ he bọdego lẹ sè dewe:
Be n’nọ sọnú, dọho kavi yinuwa to aliho he ma sọgbe de mẹ, na n’jlo na hẹn homẹ họntọn ṣie lẹ tọn hùn poun wutu wẹ ya?
□ Mọwẹ
□ Lala
Be n’nọ yì fihe walọ gblezọn lẹ nọ yin mimọ te lẹ, ehe n’ma dona ko yì eyin e ma yin họntọn ṣie lẹ tọn wutu wẹ ya?
□ Mọwẹ
□ Lala
Ayidonugo: Eyin gblọndo towe na kanbiọ he jẹnukọn lẹ yin mọwẹ, dín alọgọ mẹjitọ towe lẹ kavi mẹhomẹ he whèwhín de tọn. Eyin Kunnudetọ Jehovah tọn de wẹ a yin, a gán sọ dọnsẹpọ mẹho agun tọn de bo hẹn ẹn zun yinyọnẹn na ẹn dọ a do hudo alọgọ etọn tọn nado jihọntọn he na tindo nuyiwadomẹji dagbe do jiwe lẹ.
HIA NUSUSU DOGỌ GANDO HOSỌ EHE GO TO WETA 9TỌ BLADOPỌ 2TỌ TỌN MẸ
Be họntọn de—kavi vlavo ahun towe—to kọgbidina we nado wà nuhe ma yọ́n de wẹ ya? Pọ́n lehe a gán dudeji do!
[Nudọnamẹ odò tọn]
a Nugbo wẹ dọ mẹlẹpo wẹ nọ ṣinuwa. (Lomunu lẹ 3:23) Enẹwutu, eyin họntọn de hẹn homẹgble we bọ a mọdọ nuhe e wà lọ vẹna ẹn, flindọ “owanyi nọ ṣinyọnnudo ylando susugege.”—1 Pita 4:8.
WEFỌ TANGAN
“Họntọn delẹ tin he nọ sẹpọ yede pẹkipẹki hú nọvisunnu.”—Howhinwhẹn lẹ 18:24.
AYINAMẸ
Eyin a nọ nọgbẹ̀ sọgbe hẹ nujinọtedo dodo tọn lẹ, e yọnbasi dọ mẹdevo he to vivẹnudo nado wà nudopolọ lẹ ni dọnsẹpọ we. Yé na lẹzun họntọn jọ họntọn lẹ na we!
BE A YỌNẸN YA . . . ?
Jiwheyẹwhe ma nọ homẹnukuntapọn, amọ́ e ma yin mẹlẹpo wẹ e nọ kẹalọyi taidi ‘jonọ to gòhọ etọn mẹ.’—Salmu lẹ 15:1-5.
AFỌDIDE HE N’NA ZE LẸ!
Nado mọ họntọn dagbe lẹ, n’na ․․․․․
Delẹ to mẹhe yin mẹho na mi bọ n’na jlo nado jẹakọ hẹ dogọ lẹ mẹ wẹ ․․․․․
Nuhe n’na jlo na kanse mẹjitọ ṣie lẹ gando hosọ ehe go lẹ wẹ ․․․․․
ETẸWẸ A LẸN?
● Jẹhẹnu tẹlẹ wẹ a na jlo dọ họntọn towe de ni wleawuna, podọ etẹwutu?
● Jẹhẹnu tẹlẹ wẹ a dona wleawuna nado yin họntọn dagbe de?
[Nudọnamẹ tangan lẹ]
“Whenue mẹjitọ ṣie lẹ biọ to asi e nado nọla na họntọn wunmẹ delẹ, n’dọna dee dọ omẹ ehelẹ kẹdẹ wẹ n’jlo na dogbẹ́ hẹ. Amọ́, ayinamẹ mẹjitọ ṣie lẹ tọn yọ́n taun, na to whenue n’de ayiha sọn nujlomẹ ṣie titi lẹ ji, n’wá mọdọ họntọn dagbe susu lẹ wẹ tin.”—Cole
[Apotin]
Tẹ́n Ayinamẹ Ehelẹ Pọ́n
Dọhodopọ hẹ mẹjitọ towe lẹ gando họntọnjiji go. Kanhose yé gando họntọn wunmẹ he yé ji to whenue yé do owhe towe nkọ lẹ go. Be nudide he yé basi gando mẹhe yé na dogbẹ́ hẹ lẹ go wá vẹna yé wẹ ya? Eyin mọ wẹ, etẹwutu? Biọ to yé si nado dọ lehe a sọgan dapana nuhahun he yé pehẹ lẹ do.
Do họntọn towe lẹ hia mẹjitọ towe lẹ. Eyin a to awuwhle nado wàmọ, kanse dewe dọ ‘Naegbọn e do yinmọ na mi?’ Be a mọdọ onú họntọn towe lẹ tọn ma na jẹ mẹjitọ towe lẹ tọn ji na nude wutu wẹ ya? Eyin mọ wẹ, be a dona nọ ṣinyan mẹhe a na nọ de taidi họntọn lẹ.
Nọ dotoai ganji. Onú họntọn towe lẹ tọn po dagbemẹninọ yetọn po ni nọ duahunmẹna we.—Filipinu lẹ 2:4.
Nọ jonamẹ. Ma nọ donukun pipé-yinyin sọn mẹdevo lẹ dè blo. “Mímẹpo wẹ nọ ṣinuwa whlasusu.”—Jakọbu 3:2.
Ma nọ nọpọ́ hẹ họntọn towe lẹ whelẹponu blo. E ma biọ dọ a ni nọ to gómẹ na họntọn towe lẹ. Họntọn nugbo lẹ na gọalọna we whenue a do hudo yetọn.—Yẹwhehodọtọ 4:9, 10.
[Yẹdide]
Eyin a nọ joawuna nujinọtedo mẹdevo lẹ tọn, a na wá taidi ajikún lẹ to alọ yetọn mẹ bọ yé gán yí we do dó aṣa dile e jlo yé do
A Gán Sọ Pọ́n Hosọ Ehelẹ
JỌJA LẸ
Kanbiọ He Jọja lẹ Nọ Kanse
Kanbiọ paa he jọja lẹ nọ kanse gando zanhẹmẹ, họntọnjiji, mẹjitọ, wehọmẹ po mọmọ po go.
