Jelusalẹm Yin Vivasudo
OTÀN 76
Jelusalẹm Yin Vivasudo
E KO hugan owhe 10 todin bọ Ahọlu Nẹbukadnẹzali bẹ Islaelivi he sewé taun lẹpo yì Babilọni. Todin, bo pọ́n nuhe to jijọ! Yè domiyọ́n Jelusalẹm. Podọ yè bẹ Islaelivi he ma yin hùhù lẹ jei kanlinmọgbenu to Babilọni.
Flindọ, yẹwhegán Jehovah tọn lẹ ko na avase gbẹtọ lẹ dọ ehe na wá jọ eyin yé ma diọ walọ ylankan yetọn lẹ. Ṣigba Islaelivi lẹ ma dotoaina yẹwhegán lẹ. Yé zindonukọn nado to yẹwhe lalo lẹ sẹ̀n kakati nido yin Jehovah. Enẹwutu, gbẹtọ lẹ dona mọ mẹplọnlọ yì. Mí yọ́n ehe na yẹwhegán Jiwheyẹwhe tọn Ezekiẹli ko dọ nuylankan he Islaelivi lẹ to wiwà na mí.
Be a yọ́n Ezekiẹli ya? E yin dopo to visunnu jọja he Ahọlu Nẹbukadnẹzali bẹ yì Babilọni to nuhe hugan owhe 10 die wayi whẹpo vasudo daho ehe do wá Jelusalẹm ji lẹ mẹ. Daniẹli po họntọn etọn lẹ po Ṣadlaki, Mẹṣaki, po Abẹdinẹgo po yin bibẹ yì Babilọni to ojlẹ dopolọ mẹ ga.
To ojlẹ he mẹ Ezekiẹli gbẹ́ to Babilọni, Jehovah do nuylankan he to jijọ to tẹmpli mẹ to Jelusalẹm hia ẹ. Jehovah wà ehe to azọ́njiawu-liho. Nugbo wẹ dọ Ezekiẹli gbẹ́ to Babilọni, ṣigba Jehovah na ẹn dotẹnmẹ nado mọ nuhe to jijọ to tẹmpli mẹ lẹpo. Podọ nuhe Ezekiẹli mọ lẹ hẹnmẹ jọsi taun!
Jehovah dọna Ezekiẹli dọmọ: ‘Pọ́n osùnú he wà gbẹtọ lẹ te to tẹmpli mẹ fi. Pọ́n lehe adó lẹ go gọ́ na yẹdide odàn po kanlin devo lẹ po tọn do. Bo pọ́n Islaelivi lẹ sọ to onú enẹlẹ sẹ̀n!’ Ezekiẹli mọ onú ehe lẹpo bosọ basi kandai yetọn.
Jehovah kanse Ezekiẹli dọmọ: ‘Be a mọ nuhe wà nukọntọ Islaelivi lẹ tọn te to nuglọ ya?’ Ezekiẹli mọ nugbo. Sunnu 70 wẹ to finẹ podọ yemẹpo wẹ sọ to yẹwhe lalo lẹ sẹ̀n. Yé to didọmọ: ‘Jehovah ma mọ mí. Ewọ ko jo aigba ehe do.’
Enẹgodo wẹ Jehovah do yọnnu delẹ hia Ezekiẹli to họntonu agewaji tẹmpli lọ tọn. Yé sinai to finẹ bo to Tamuzi, yẹwhe lalo de sẹ̀n. Bosọ pọ́n sunnu he tin to họntonu tẹmpli Jehovah tọn ehelẹ! Yé omẹ 25 nkọ wẹ. Ezekiẹli mọ yé. Yé to taliai hlan whèzẹtẹn dali bosọ to owhè sẹ̀n!
Jehovah dọmọ: ‘Omẹ ehelẹ ma tindo sisi depope na mi. E ma yin dọ yé to onú ylankan wà kẹdẹ wẹ gba, ṣigba tẹmpli ṣie mẹ wẹ yé nọ wà onú enẹlẹ te!’ Enẹwutu, Jehovah dopagbe dọ: ‘Yé na mọ homẹgble sinsinyẹn ṣie. Podọ yẹn ma na wàlẹblanuna yé to vasudo yetọn whenu.’
Nudi owhe atọ̀n poun to whenuena Jehovah ko do onú ehelẹ hia Ezekiẹli godo wẹ Islaelivi lẹ ṣiatẹ do Ahọlu Nẹbukadnẹzali go. Enẹ wẹ zọ́n bọ e do yì funawhàn hẹ yé. To owhe dopo daa godo, Babilọninu lẹ zẹ̀ adó biọ Jelusalẹm bo fiọ tòdaho lọ mlẹnmlẹn. Suhugan gbẹtọ lẹ tọn wẹ yé hù kavi bẹ sọyi kanlinmọgbenu to Babilọni.
Naegbọn Jehovah do jotẹnna vasudo sinsinyẹn ehe nado jọ do Islaelivi lẹ go? Mọwẹ, na yé ma dotoaina Jehovah bo setonuna osẹ́n etọn lẹ wutu wẹ. Ehe do nuhewutu e yin nujọnu dọ mí ni nọ wà nuhe Jiwheyẹwhe dọ to whepoponu hia.
To tintan whenu, mẹdelẹ yin dotẹnmẹna nado nọ aigba Islaeli tọn ji. Ahọlu Nẹbukadnẹzali de Juvi de he nọ yin Gedalia do gbẹtọ lẹ ji. Ṣigba Islaelivi delẹ hù Gedalia. Todin, gbẹtọ lẹ to budi dọ Babilọninu lẹ na wá nado và yemẹpo sudo na nuylankan he jọ wutu. Enẹwutu, yé hẹn Jelemia po huhlọn po nado họnyi Egipti hẹ yé.
Ehe zọ́n bọ mẹdepope masọ pò to aigba Islaeli tọn ji ba. Mẹdepope ma nọ finẹ na owhe 70. E gbọgbé mlẹnmlẹn. Ṣigba Jehovah dopagbe dọ emi na hẹn omẹ emitọn lẹ wá aigba lọ ji to owhe 70 godo. Jẹnukọnna ehe, etẹwẹ to jijọ do omẹ Jiwheyẹwhe tọn lẹ go to Babilọni fihe yé to kanlinmọgbenu te? Enẹ wẹ mí na dindona.
