Mọldekai po Ẹsteli Po
OTÀN 82
Mọldekai po Ẹsteli Po
GBỌ mí ni pọ́n nujijọ de he wá aimẹ owhe vude whẹpo Ẹzla do yì Jelusalẹm. Mọldekai po Ẹsteli po wẹ yin Islaelivi he yin yinyọnẹn hugan to ahọluduta Pẹlsia tọn mẹ lẹ. Ẹsteli wẹ yin ahọsi lọ bọ tavẹ-vi etọn Mọldekai yin mẹhe bọdo ahọlu go tlọlọ to huhlọn mẹ. Gbọ mí ni pọ́n lehe ehe jọ do.
Mẹjitọ Ẹsteli tọn lẹ kú to whenue e gbẹ́ pò to ovu pete podọ Mọldekai wẹ pọ́n e go whẹ́n. Ahọlu Pẹlsia tọn, Ahasuelusi tindo họ̀nmẹ de to tòdaho Ṣuṣani tọn mẹ podọ Mọldekai sọ yin dopo to devi etọn lẹ mẹ. E wá jọ to gbèdopo bọ asi ahọlu tọn Vaṣti ma setonuna ẹn, podọ ahọlu sọ de asi yọyọ devo na ede nado yin ahọsi etọn. Be a yọ́n yọnnu he ewọ de ya? Mọwẹ, awhli whanpẹnọ lọ Ẹsteli wẹ e de.
Be a mọ dawe goyitọ he gbẹtọ lẹ to taliaina ehe ya? Hamani wẹ. Omẹ nukundeji de wẹ ewọ yin to Pẹlsia. Hamani jlo dọ Mọldekai lọsu, mẹhe sinai to yẹdide lọ mẹ finẹ ni litaina emi. Ṣigba Mọldekai ma jlo na wàmọ. E lẹndọ e ma sọgbe nado litaina mẹylankan mọnkọtọn. Ehe hẹn homẹgblena Hamani taun. Podọ nuhe e wà die.
Hamani dolalo dokọna Islaelivi lẹ to ahọlu dè. ‘Mẹylankan he ma jlo na setonuna osẹ́n towe lẹ wẹ yé yin,’ wẹ e dọ. ‘Yé dona yin hùhù.’ Ahasuelusi ma yọnẹn dọ Islaelivi de wẹ asi emitọn Ẹsteli yin gba. Enẹwutu wẹ e dotoaina Hamani bo de osẹ́n de tọ́n dọ Islaelivi lẹ dona yin hùhù to gbèdopo.
Whenuena Mọldekai sè dọ osẹ́n mọnkọtọn yin didetọn, e jẹflumẹ taun. E dowẹn hlan Ẹsteli dọ: ‘Hiẹ dona yì dọna ahọlu bosọ vẹ̀ ẹ nado whlẹn mí.’ Osẹ́n Pẹlsia tọn ma kẹalọyi dọ mẹde ni yì ahọlu dè adavo yè ylọ ẹ. Ṣigba Ẹsteli yì matin oylọ. Ahọlu sọ dlẹn ogánpò sika tọn etọn hlan ẹn, ehe zẹẹmẹdo dọ yè ma dona hù i. Ẹsteli dọ dọ emi jlo na yí jonọ ahọlu po Hamani po tọn. To jonọyiyi lọ tẹnmẹ, ahọlu kàn dagbe he Ẹsteli jlo dọ emi ni wà na ẹn sè. Ẹsteli dọ dọ emi na dọ nulọ na ẹn eyin ewọ po Hamani po yigbe nado wá dùnú to osọ.
To núdùdù lọ tẹnmẹ, Ẹsteli dọna ahọlu dọmọ: ‘Yé jlo na hù yẹn po omẹ ṣie lẹ po.’ Ahọlu gblehomẹ. ‘Mẹnu wẹ gboadọ nado wà onú mọnkọtọn?’ wẹ e kanse.
Ẹsteli gblọn dọmọ: ‘Hamani wẹ yin dawe lọ, mẹylankan lọ!’
Din wẹ homẹgble ahọlu tọn sọ sinyẹn deji lo. E degbè dọ Hamani ni yin hùhù. Enẹgodo wẹ ahọlu de Mọldekai taidi omẹ awetọ he bọdo ewọ go to huhlọn mẹ tlọlọ. Mọldekai sọ hẹn ẹn diun dọ osẹ́n de yin didetọn nado na dotẹnmẹ Islaelivi lẹ nado hoavùn na ogbẹ̀ yetọn to azán he gbè yé dona yin hùhù te dai lọ. Na Mọldekai ko yin omẹ titengbe mọnkọtọn todin wutu, mẹsusu gọalọna Islaelivi lẹ bọ yé sọ yin whinwhlẹngán sọn kẹntọ yetọn lẹ si.
Owe Biblu tọn Ẹsteli.
