ADÀ 1

Sọn Nudida Whenu jẹ Singigọ Whenu

Fie wẹ olọn po aigba po wá sọn? Nawẹ owhè, osun, sunwhlẹvu lẹ po nususu devo he tin to aigba ji lẹ po wá aimẹ gbọn? Biblu na gblọndo he sọgbe lọ to whenuena e dọ dọ yé yin didá gbọn Jiwheyẹwhe dali. Enẹwutu, owe ehe bẹjẹeji po otàn Biblu tọn he gando nudida go lẹ po.

Mí plọn dọ onú tintan he Jiwheyẹwhe dá wẹ nudida gbigbọnọ he taidi ewọ lọsu lẹ. Angẹli lẹ wẹ. Aigba yin didá na mí gbẹtọvi lẹ. Jiwheyẹwhe dá sunnu po yọnnu po he yin yiylọdọ Adam po Evi po bo ze yé do jipa whanpẹnọ de mẹ. Ṣigba yé vẹtolina Jiwheyẹwhe bo masọ jẹ nado nọgbẹ̀ ba.

To lẹndopọ mẹ, owhe 1 656 wẹ juwayi sọn whenue Adam yin didá kakajẹ Singigọ whenu. Mẹylankan susu wẹ nọgbẹ̀ to ojlẹ ehe mẹ. To olọn mẹ, yé bẹ Satani po angẹli ylankan etọn lẹ po he yin nudida gbigbọnọ mayinukundomọ lẹ hẹn. To aigba ji, yé bẹ Kaini po mẹylankan susu devo lẹ po hẹn, gọna mẹdelẹ he tindo huhlọn he hugan jọwamọ tọn. Ṣigba, mẹdagbe lẹ sọ tin to aigba ji—taidi Abẹli, Enọku po Noa po. To Adà TINTAN mẹ, mí na plọnnu gando omẹ ehe lẹpo go gọna nujijọ ojlẹ enẹ mẹ tọn lẹ.