OTÀN 10

Singigọ Daho Lọ

MẸHE ma biọ aki lọ mẹ lẹ zindonukọn po nuwiwa yetọn egbesọegbesọ tọn lẹ po. Kakajẹ din, yé ma yise dọ Singigọ lọ na wá. Yé na ko ṣàn Noa po whẹndo etọn po kò taun hugan lehe yé wà do dai. Ṣigba e ma dẹn bọ nukiko yetọn doalọte.

To ajiji mẹ, jikun jẹ jijà ji. E to jijà sọn olọn mẹ taidi dọ mẹde ni to osin kọ̀n sọn sinhẹnnú de mẹ nkọ. Nuhe Noa dọ lọ jọ nugbo! Ṣigba whenu ko fẹ́ todin na mẹdepope nado biọ aki lọ mẹ. Jehovah ko sú ohọ̀n lọ gbanun-gbanun.

To madẹnmẹ osin ṣinyọ́n aigba. Osin lọ sù taidi tọ̀sisa daho. E họ́ atin lẹ liai bo bli osé daho lẹ bosọ to núdọ po huhlọn po. Obu di gbẹtọ lẹ. Yé hẹ́ osó dahodaho lẹ ji. Ṣo, yemẹpo wẹ na to didọ dọ eyin emi ko yọnẹn wẹ, emi na ko dotoaina Noa bo biọ aki lọ mẹ to whenuena ohọ̀n lọ gbẹ́ to hùnhùn! Ṣigba todin whenu ko fẹ́.

Osin lọ fọ́n bo to gigọ́ janwẹ. E kọ̀n sọn agahomẹ na okle 40, ozán 40. E ṣinyọ́n osó lẹ, etlẹ yin osó he yiaga hugan lẹ. Enẹwutu kẹdẹdile Jiwheyẹwhe dọ do, gbẹtọ gọna kanlin he ma biọ aki lọ mẹ lẹpo wẹ kú. Ṣigba mẹhe tin to e mẹ lẹpo wẹ gán gọna kanlin lẹ.

Noa po visunnu etọn lẹ po gbá aki lọ ganji. Osin lọ ze e yiaga bọ e fò to osin nukunta. To gbèdopo, jikun lọ doalọte bọ owhè jẹ hùnhùn ji. Nujiawu nankọ die! Osin gọ́ filẹpo. Onú dopo gee he gbẹtọ sọgan mọ wẹ aki lọ he fò to osin nukunta.

Asuka lẹ masọ tin ba. Yé masọ sọgan gbleawuna gbẹtọ lẹ ba. Yemẹpo ko kú, to pọmẹ hẹ onọ̀ yetọn lẹ po mẹylankan he pò lẹpo po. Ṣigba etẹwẹ jọ do otọ́ yetọn lẹ go?

Otọ́ asuka lọ lẹ tọn ma yin gbẹtọ taidi míwlẹ gba. Angẹli he wá aigba ji nado nọpọ́ po gbẹtọ lẹ po wẹ yé yin. Enẹwutu to whenuena Singigọ lọ wá, yé ma kú po mẹhe pò lẹ po gba. Yé jo agbasa gbẹtọ tọn yetọn lẹ do bo lẹkọyi olọn mẹ taidi angẹli. Ṣigba dotẹnmẹ masọ yin nina yé nado kọnawudopọ hẹ angẹli Jiwheyẹwhe tọn he pò lẹ ba. Enẹwutu yé lẹzun angẹli Satani tọn lẹ. To Biblu mẹ, yé nọ yin yiylọdọ aovi lẹ.

Todin, Jiwheyẹwhe hẹn jẹhọn nado yìn bọ osin lọ jẹ doyi ji. To osun atọ́n godo, aki lọ wá nọte do osó de ji. Mẹhe tin to aki lọ mẹ lẹ sọgan mọ aga osó lẹ tọn to whenuena azán susu ko juwayi godo. Osin lọ fọ́n bo to doyi.

Enẹgodo Noa do ohẹ̀ yuu de he nọ yin yiylọdọ ohọ́n hlan gbonu. Ohẹ̀ lọ zlọn yì na ojlẹ de bo lẹkọwa na e ma mọ ofi dagbe he e sọgan jẹte do wutu. E basi yigọyigọ ehe na ojlẹ de bo nọ wá gbọjẹ do aki lọ ji eyin e lẹkọ.

Noa jlo na yọnẹn eyin osin ko hú sọn aigba ji, enẹwutu e do apoe de hlan bọdego sọn aki lọ mẹ. Ṣigba ohẹ̀ ehe lọsu lẹkọwa na e ma mọ ofi dagbe de nado nọ wutu. Noa do e hlan whla awetọ bọ e lẹkọwa po amà olivieli tọn de po to nùmẹ. Gbọnmọ dali, Noa yọnẹn dọ osin lọ ko yìdo. Noa do apoe lọ hlan whla atọ̀ntọ, bọ e wá mọ ofi húhú de nado nọ.

Todin, Jiwheyẹwhe dọna Noa dọmọ: ‘Tọ́n sọn aki lọ mẹ. Plan whẹndo towe po kanlin lẹ po tọ́n.’ Yé ko nọ aki lọ mẹ na nuhe hugan owhe dopo blebu. Lehe homẹ yetọn na ko hùn nado tin to gbonu whladopo dogọ podọ nado tin togbẹ̀ do sọ!

Gẹnẹsisi 7:10-24; 8:1-17; 1 Pita 3:19, 20.

Kanbiọ Oplọn Tọn Lẹ