Mose po Aalọn po Yí Falo Dè
OTÀN 31
Mose po Aalọn po Yí Falo Dè
WHENUENA Mose lẹkọyi Egipti, e dọ azọ́njiawu lọ lẹpo na mẹdaho etọn Aalọn. Podọ to whenuena Mose po Aalọn po do azọ́njiawu ehelẹ hia Islaelivi lẹ, yemẹpo yise dọ Jehovah tin po yé po.
Enẹgodo Mose po Aalọn po yì Falo dè. Yé dọna ẹn dọ: ‘Jehovah, Jiwheyẹwhe Islaeli tọn dọmọ, “Gbọ omẹ ṣie lẹ ni yì na azán atọ̀n, na yé nido basi sinsẹ̀n hlan mi to zungbo mẹ.”’ Ṣigba Falo gblọn dọmọ: ‘Yẹn ma tindo yise to Jehovah mẹ. Podọ yẹn ma na dike Islaeli ni yì.’
Falo gblehomẹ, na Islaelivi lẹ jlo na yí gbọjẹ sọn azọ́n kọ̀n nado sẹ̀n Jehovah wutu. Enẹwutu e hẹn yé po huhlọn po nado wazọ́n susu dogọ. Islaelivi lẹ gblewhẹdo Mose na nuyiwahẹmẹ agọ̀ he yé to pipehẹ, bọ ehe hẹn awubla wá na Mose. Ṣigba Jehovah dọna ẹn dọ ni ma hanú blo. Jehovah dọmọ: ‘Yẹn na hẹn Falo nado dike omẹ ṣie lẹ ni yì.’
Mose po Aalọn po sọ lẹkọyi Falo dè whladopo dogọ. To ojlẹ ehe mẹ, yé wà azọ́njiawu de. Aalọn ze opò etọn dlan kọmẹ bọ e lẹzun odàn daho de. Sunnu nuyọnẹntọ Falo tọn lẹ lọsu ze opò yetọn lẹ dlan kọmẹ bọ popolẹpo lẹzun odàn. Ṣigba, pọ́n! Odàn Aalọn tọn to odàn nuyọnẹntọ lọ lẹ tọn ze mì. Etomọṣo Falo ma dike Islaelivi lẹ ni yì gba.
Todin ojlẹ lọ sọ̀ na Jehovah nado plọn nude Falo. Be a yọ́n lehe e wàmọ gbọn ya? E hẹn azọ̀nylankan kavi nugbajẹmẹji 10 wá Egipti ji.
To susu azọ̀nylankan lọ lẹ tọn godo, Falo nọ domẹhlan Mose bo nọ dọna ẹn dọmọ: ‘Doalọtena azọ̀nylankan lọ, yẹn nasọ dike Islaeli ni yì.’ Ṣigba eyin azọ̀nylankan lọ doalọte, Falo nọ diọlinlẹn. E ma nọ dike gbẹtọ lọ lẹ ni yì. Ṣigba to godo mẹ, to azọ̀nylankan 10tọ godo, Falo degbena Islaelivi lẹ nado yì.
Be a yọ́n dopodopo azọ̀nylankan 10 lọ lẹ tọn ya? Hùn weda he bọdego na mí ni plọnnu gando yé go.
A Gán Sọ Pọ́n Hosọ Ehelẹ
YẸDIDE OTÀN BIBLU TỌN LẸ TỌN
Jiwheyẹwhe Do Mose Hlan Egipti
Naegbọn Falo ma wà nuhe Mose po Aalọn po dọna ẹn? Kọdetọn ylankan tẹlẹ wẹ ehe hẹnwa?
