ADÀ 9
Mì Nọ Sẹ̀n Jehovah Dopọ Taidi Whẹndo De
‘Mì sẹ̀n Omẹ lọ he dá olọn po aigba po.’—Osọhia 14:7
Dile mì plọn to alọnuwe ehe mẹ do, Biblu bẹ nunọwhinnusẹ́n susu hẹn he na gọalọna mì podọ na whẹndo mìtọn. Jehovah jlo dọ mì ni yin ayajẹnọ. E dopagbe dọ eyin mì ze sinsẹ̀n-bibasi emitọn do otẹn tintan mẹ, “onú devo ehe lẹpo na yin yiyidogọ na mì.” (Matiu 6:33) E jlo vẹkuvẹku dọ mì ni yin họntọn emitọn. Mì nọ yí dotẹnmẹ hundote lẹpo zan nado hẹn haṣinṣan mìtọn hẹ Jiwheyẹwhe lodo. Lẹblanulọkẹyi daho hugan he mẹde sọgan tindo wẹ ehe yin.—Matiu 22:37, 38.
1 MÌ HẸN HAṢINṢAN MÌTỌN HẸ JEHOVAH LODO
NUHE BIBLU DỌ: “‘Yẹn na yin otọ́ de na mì, bọ mìwlẹ na yin visunnu lẹ po viyọnnu lẹ po na mi,’ wẹ Jehovah . . . dọ.” (2 Kọlintinu lẹ 6:18) Jiwheyẹwhe jlo dọ mì ni lẹzun họntọn vivẹ́ emitọn. Aliho dopo nado wà enẹ wẹ nado nọ hodẹ̀. Jehovah basi oylọna mì nado nọ “hodẹ̀ to whepoponu.” (1 Tẹsalonikanu lẹ 5:17) E nọ to jejeji nado dotoaina numọtolanmẹ po ahunmẹdunamẹnu mìtọn lẹ po. (Filippinu lẹ 4:6) Eyin a nọ hodẹ̀ hẹ hagbẹ whẹndo towe tọn lẹ, yé na mọdọ Jiwheyẹwhe yin Omẹ nujọnu tọn de na we.
Gbọnvona hodidọ hlan Jiwheyẹwhe, mì sọ dona nọ dotoaina ẹn. Mì sọgan wàmọ gbọn Ohó etọn po owe sinai do Biblu ji lẹ po pinplọn dali. (Psalm 1:1, 2) Mì nọ lẹnayihamẹpọn do nuhe mì plọn lẹ ji. (Psalm 77:11, 12) Todidoai na Jiwheyẹwhe sọ biọ dọ mì ni nọ yì opli Klistiani tọn lẹ to gbesisọ mẹ.—Psalm 122:1-4.
Hodidọ na mẹdevo lẹ gando Jehovah go sọ yin aliho titengbe devo nado hẹn haṣinṣan mìtọn hẹ ewọ lodo. Lehe mì na to mọwà sọ, mọ wẹ mì na to dindọnsẹpọ ẹ do niyẹn. —Matiu 28:19, 20.
NUHE A SỌGAN WÀ:
-
Mì nọ de whenu dovo to azán lẹpo gbè nado nọ hia Biblu podọ nado nọ hodẹ̀
-
Taidi whẹndo de, mì nọ ze gbigbọnu lẹ do otẹn tintan mẹ jẹnukọnna aihundida po ayidedai lẹ po
2 SINSẸ̀N-BIBASI WHẸNDO TỌN MÌTỌN NI NỌ YIN AWUVIVINU
NUHE BIBLU DỌ: “Mì dọnsẹpọ Jiwheyẹwhe, podọ ewọ na dọnsẹpọ mì.” (Jakọbu 4:8) Mì dona nọ hodo tito sinsẹ̀n-bibasi whẹndo tọn gbesisọ tọn de. (Gẹnẹsisi 18:19) Amọ́, enẹ kẹdẹ ma pé. Mì dona nọ flin Jiwheyẹwhe to nuwiwa mìtọn lẹpo mẹ. Mì hẹn haṣinṣan he whẹndo mìtọn tindo hẹ Jiwheyẹwhe lodo gbọn hodidọ gando ewọ go dali ‘whenuena mì sinai to owhé mìtọn gbè, podọ whenuena mì to zọnlinzin to aliho ji, podọ to whenuena mì mlọnai, podọ to whenuena mì fọ́n tite.’ (Deutelonomi 6:6, 7) Yanwle mìtọn ni yin nado taidi Jọṣua, mẹhe dọmọ: “Na yẹn tọn po owhé ṣie po, míwlẹ na OKLUNỌ lọ sẹ̀n.”—Jọṣua 24:15.
NUHE A SỌGAN WÀ:
-
Mì tindo tito nupinplọn tọn dagbe de, ehe mẹ hagbẹ whẹndo lọ tọn dopodopo na nọ mọaleyi sọn
