Jehovah * Jiwheyẹwhe wẹ do alọwle tintan lọ ai. Biblu dọna mí dọ ewọ dá yọnnu tintan lọ bo “hẹn ẹn wá sunnu lọ dè.” Homẹ Adam tọn hùn sọmọ bọ e dọmọ: “Ehe wẹ dinvie ohú sọn ohú ṣie lẹ mẹ, podọ olàn sọn olàn ṣie mẹ.” (Gẹnẹsisi 2:22, 23) Jehovah gbẹ́ jlo dọ alọwlemẹ lẹ ni tindo ayajẹ.

To whenue a wlealọ, a sọgan lẹndọ nulẹpo wẹ na yì ganji. Amọ́ nado dọ hójọhó, asu po asi po he tlẹ yiwanna yede taun lẹ nọ wá tindo nuhahun delẹ. (1 Kọlintinu lẹ 7:28) To alọnuwe ehe mẹ, mì na mọ nunọwhinnusẹ́n Biblu tọn lẹ he sọgan gọalọna whẹndo po alọwle mìtọn po nado tindo ayajẹ, eyin mì yí yé do yizan mẹ.—Psalm 19:8-11.

NUHE BIBLU DỌ: Asu wẹ yin tatọ́ whẹndo tọn.—Efesunu lẹ 5:23.

Eyin asu de wẹ a yin, Jehovah nọ donukun dọ a ni tindo mẹtọnhopọn sisosiso na asi towe. (1 Pita 3:7) E dá ẹ taidi alọgọtọ de na we bo jlo dọ hiẹ ni nọ yí yẹyi po owanyi po do yinuwa hẹ ẹ. (Gẹnẹsisi 2:18) A dona yiwanna asi towe sọmọ bọ dagbemẹninọ etọn dona nọ duahunmẹna we hugan towe titi.—Efesunu lẹ 5:25-29.

Eyin asi de wẹ a yin, Jehovah nọ donukun dọ a ni tindo sisi sisosiso na asu towe bo nọ gọalọna ẹn nado hẹn azọngban etọn di. (1 Kọlintinu lẹ 11:3; Efesunu lẹ 5:33) Nọ nọgodona nudide etọn lẹ bo nọ kọngbedopọ hẹ ẹ po ahun lẹpo po. (Kọlọsinu lẹ 3:18) Eyin a nọ wàmọ, a na họakuẹ to nukun asu towe po Jehovah po tọn mẹ.—1 Pita 3:1-6.

NUHE A SỌGAN WÀ:

• Kàn nuhe a sọgan wà nado yin asu kavi asi dagbe de sè alọwlemẹ towe. Dotoaina ẹn po sọwhiwhe po, bo tẹnpọn nado basi vọjlado

• Nọ fahomẹ. E na yí whenu to mì omẹ awe lẹ si nado plọn lehe mì na nọ hẹn homẹhun ode awetọ do

NUHE BIBLU DỌ: Dagbemẹninọ alọwlemẹ towe tọn dona nọ duahunmẹna we. (Filippinu lẹ 2:3, 4) Nọ flindọ Jehovah biọ to devizọnwatọ etọn lẹ si nado nọ “wà dẹẹdẹ hlan mẹlẹpo,” enẹwutu nọ dohia alọwlemẹ towe to nuyiwa towe lẹ mẹ dọ ewọ họakuẹ to nukun towe mẹ. (2 Timoti 2:24) ‘Ohó he yè ma lẹnnupọn whẹpo do dọ nọ taidi ohísọmẹ, ṣigba, odẹ́ nuyọnẹntọ tọn nọ hẹnazọ̀ngbọ.’ Enẹwutu, nọ lẹnnupọn ganji whẹpo do dọho. (Howhinwhẹn lẹ 12:18) Gbigbọ Jehovah tọn na gọalọna we nado nọ yí homẹdagbe po owanyi po do dọho.—Galatianu lẹ 5:22, 23; Kọlọsinu lẹ 4:6.

NUHE A SỌGAN WÀ:

• Whẹpo a nido dọho hẹ alọwlemẹ towe do whẹho sinsinyẹn lẹ ji, nọ biọ alọgọ to odẹ̀ mẹ nado sọgan yí homẹfa po ahundopo po do dọho

• Nọ yí sọwhiwhe do lẹnnupọndo nuhe a na dọ po lehe a na dọ ẹ do po ji

NUHE BIBLU DỌ: To whenue a wlealọ, hiẹ po alọwlemẹ towe po lẹzun “agbasalan dopo.” (Matiu 19:5) Amọ́, mì gbẹ́ yin omẹ voovo awe bo na nọ tindo pọndohlan he gbọnvo lẹ. Enẹwutu, e na biọ dọ mì ni plọn nado nọ kọngbedopọ do linlẹn dopolọ lẹ ji podọ nado nọ hò numọtolanmẹ ode awetọ tọn pọ́n. (Filippinu lẹ 2:2) Gbekọndopọ yin nujọnu to nudide lẹ bibasi whenu. Biblu dọmọ: “Matin wedido, linlẹn lẹzun ovọ́.” (Howhinwhẹn lẹ 15:22) Mì dike nunọwhinnusẹ́n Biblu tọn lẹ ni nọ deanana mì dile mì na to nudide titengbe lẹ basi dopọ.—Howhinwhẹn lẹ 8:32, 33.

NUHE A SỌGAN WÀ:

• Gbọnvona pọndohlan towe po ohó paa devo lẹ po didọna alọwlemẹ towe, sọ nọ dọho hẹ ẹ do nuhe yin numọtolanmẹ towe lẹ ji

• Nọ dọhodopọ hẹ alọwlemẹ towe whẹpo do basi nudide lẹ