Nunina de wẹ ovi lẹ yin sọn Jehovah dè. Ewọ nọ donukun dọ mẹjitọ lẹ ni penukundo nunina enẹ go ganji. Jehovah ko wleawuna ayinamẹ nuyọnẹn tọn lẹ he gán gọalọna mẹjitọ lẹ nado wàmọ. Ayinamẹ etọn lẹ gán gọalọna ovi lẹ lọsu nado yidogọna ayajẹ whẹndo lọ tọn.

1. Ayinamẹ tẹwẹ Jehovah na mẹjitọ lẹ?

Jehovah nọ donukun dọ mẹjitọ lẹ ni yiwanna ovi yetọn lẹ bo nọ zan whenu susu dopọ hẹ yé dile e yọnbasi do. E sọ jlo dọ mẹjitọ lẹ ni nọ basi hihọ́na ovi yetọn lẹ sọn owùnu lẹ si bosọ nọ yí nunọwhinnusẹ́n Biblu tọn lẹ zan nado plọn yé whẹ́n. (Howhinwhẹn lẹ 1:8) E dọna otọ́ lẹ dọmọ: ‘Mì nọ to pinpọn ovi mìtọn lẹ go whẹ́n to tudohomẹnamẹ Jehovah tọn mẹ.’ (Hia Efesunu lẹ 6:4.) Homẹ Jehovah tọn nọ hùn eyin mẹjitọ lẹ nọ hodo anademẹ etọn lẹ whenue yé to ovi yetọn lẹ plọn, bo ma jo azọngban yetọn enẹ do na mẹdevo lao.

2. Ayinamẹ tẹwẹ Jehovah na ovi lẹ?

Jehovah degbena ovi lẹ dọmọ: “Mì nọ setonuna mẹjitọ mìtọn lẹ.” (Hia Kolosinu lẹ 3:20.) Eyin ovi lẹ nọ na sisi mẹjitọ yetọn lẹ bosọ nọ setonuna yé, yé nọ hẹn homẹ Jehovah po mẹjitọ yetọn lẹ po tọn hùn. (Howhinwhẹn lẹ 23:22-25) Jesu ze apajlẹ dagbe dai whenue ewọ lọsu to ovu. Dile etlẹ yindọ mẹpipe de wẹ ewọ yin, e nọ setonu bosọ nọ na sisi mẹjitọ etọn lẹ.—Luku 2:51, 52.

3. Nawẹ whẹndo towe sọgan dọnsẹpọ Jiwheyẹwhe dogọ gbọn?

Eyin mẹjitọ de wẹ a yin, ayihaawe ma tin dọ a nọ jlo dọ ovi towe lẹ ni yiwanna Jehovah taun dile a nọ wà do. Nawẹ a gán jẹ yanwle ehe kọ̀n gbọn? E gán pà we eyin a hodo anademẹ Biblu tọn lọ he dọmọ: “Hiẹ dona nọ yí sọwhiwhe do plọn [ohó Jehovah tọn lẹ] ovi towe lẹ bo na nọ dọho gando yé go to whenue hiẹ sinai to owhé towe gbè, [podọ] to whenue hiẹ to zọnlinzin to aliji.” (Deutelonomi 6:7) Nado ‘yí sọwhiwhe do plọnmẹ nude,’ nọ biọ dọ yè ni vọ́ nuhe plọnmẹ yè te lọ dọ whlasusu. Di apajlẹ, hiẹ lọsu yọnẹn dọ na ovi towe lẹ nido flin nude, a dona nọ to nulọ vọ́ dọ na yé mapote. Wefọ ehe to didohia dọ a dona nọ dín dotẹnmẹ lẹ nado nọ dọho Jehovah tọn na ovi towe lẹ to gbesisọ mẹ. Nujọnu wẹ e yin dọ mì ni nọ de whenu dovo to sẹmẹsẹmẹ nado nọ basi sinsẹ̀n dopọ taidi whẹndo de. Eyin a ma tlẹ ko jivi, e na wà dagbe na hiẹ lọsu, eyin a nọ de whenu dovo to sẹmẹsẹmẹ nado plọn Ohó Jiwheyẹwhe tọn.

 DINDONANU DOGỌ

 6. Nọ na sisi mẹjitọ towe lẹ

 BLADOPỌ

Jehovah jlo dọ mẹjitọ lẹ ni yiwanna ovi yetọn lẹ, nọ plọn yé bo nọ basi hihọ́na yé; ovi lẹ ni nọ sí mẹjitọ lẹ bo nọ setonuna yé; podọ whẹndo lẹ ni nọ basi sinsẹ̀n hlan emi to pọmẹ.

Dogbapọn

• Nawẹ mẹjitọ lẹ sọgan plọn ovi yetọn lẹ bosọ basi hihọ́na yé gbọn?

• Nawẹ ovi lẹ sọgan nọ gbògbéna mẹjitọ yetọn lẹ gbọn?

• Ale tẹlẹ wẹ whẹndo lẹ nọ mọyi eyin yé nọ de whenu dovo to sẹmẹsẹmẹ nado basi sinsẹ̀n dopọ?