NUPINPLỌN 53
Nọ De Ayidedai He Go Homẹ Jehovah Tọn Nọ Hùn Do Lẹ
Jehovah wẹ “Jiwheyẹwhe ayajẹnọ lọ.” (1 Timoti 1:11) E jlo dọ mí ni do ayajẹ bosọ duvivi ogbẹ̀ tọn. Homẹ etọn nọ hùn eyin mí nọ jo azọ́n do to whedelẹnu nado gbọjẹ. To nupinplọn ehe mẹ, mí na mọ lehe mí sọgan nọ yí ojlẹ ayidedai tọn mítọn lẹ zan do to aliho he na hẹn awuvivi wá na mí bosọ hẹn homẹ Jehovah tọn hùn lẹ mẹ.
1. Etẹwẹ mí dona nọ flin to whenue mí jlo na de ayidedai he mẹ mí na do mahẹ te?
Etẹwẹ a nọ jlo na wà to whenue a to gbigbọjẹ? Mẹdelẹ nọ yiwanna nado yí ojlẹ gbọjẹ tọn yetọn zan nado nọ whégbè whii bo hia owe de, dotó nuhiho lẹ, pọ́n sinima de, kavi nado yì nọtẹn Intẹnẹt tọn lẹ ji. Mẹdevo lẹ nọ yiwanna nado yí whenu zan dopọ hẹ họntọn yetọn lẹ—vlavo nado disa, lẹ́ otọ̀, kavi daihun dopọ. Depope he nujlomẹ mítọn na yin, mí dona nọ hẹn ẹn diun dọ ayidedai wunmẹ he mí de lẹ yin “nuhe Oklunọ kẹalọyi lẹ.” (Efesunu lẹ 5:10) Nujọnu wẹ e yin dọ mí ni mọnukunnujẹ ehe mẹ, na suhugan ayidedai he gbayipe lẹ tọn wẹ nọ bẹ nuhe Jehovah gbẹwanna lẹ hẹn, taidi danuwiwa, fẹnnuwiwa zanhẹmẹ tọn kavi afinyọnnuwiwa. (Hia Salmu lẹ 11:5.) Etẹwẹ na gọalọna mí nado basi nudide nuyọnẹn tọn lẹ to whenue mí jlo na de ayidedai he mẹ mí na do mahẹ te lẹ?
Eyin mí nọ jihọntọn hẹ mẹhe yiwanna Jehovah lẹ, yé sọgan yinuwado mí ji to aliho dagbe mẹ bo gọalọna mí nado de ayidedai he sọgbe lẹ. Dile mí mọ do to nupinplọn he jẹnukọn de mẹ, “mẹhe nọ zinzọnlin hẹ nuyọnẹntọ na yọnnuin.” To alọ devo mẹ, eyin mí nọ saba dogbẹ́ hẹ mẹhe ma yiwanna nujinọtedo Jiwheyẹwhe tọn lẹ, mí “ma na tindo kọdetọn dagbe.”—Howhinwhẹn lẹ 13:20.
2. Naegbọn e do yin nujọnu nado nọ na dogbó ojlẹ he mí do nọ deayidai lẹ?
Eyin ayidedai he mí de tlẹ yọ́n, mí dona nọ aṣeji ma nado nọ yí whenu susu zan to e kọ̀n. Eyin e ma yinmọ, mí sọgan nọma mọ whenu he pé na nuhe yin nujọnu hugan lẹ. Biblu dotuhomẹna mí nado “nọ yí whenu [mítọn] zan to aliho dagbe hugan mẹ.”—Hia Efesunu lẹ 5:15, 16.
DINDONANU DOGỌ
Plọn lehe a gán nọ basi nudide dagbe lẹ gando ayidedai towe lẹ go do.
3. Nọ dapana ayidedai he ma sọgbe lẹ
Naegbọn mí dona nọ yí sọwhiwhe do de ayidedai mítọn lẹ? Hò VIDEO lọ, enẹgodo dọhodo kanbiọ he bọdego lẹ ji.
-
To Lomu hohowhenu tọn, nawẹ ayidedai he mẹ agbàwhlẹntọ he nọ hoavùn jẹ kúdonu lẹ nọ do mahẹ te lẹ sọgbe pẹpẹ hẹ ayidedai egbezangbe tọn delẹ gbọn?
-
To video lọ mẹ, etẹwẹ Dani plọn gando ayidedai lẹ go?
Hia Lomunu lẹ 12:9, enẹgodo dọhodo kanbiọ ehe ji:
-
Nawẹ wefọ ehe na gọalọna we nado de ayidedai he sọgbe lẹ gbọn?
Etẹwẹ yin delẹ to nuhe Jehovah gbẹwanna lẹ mẹ? Hia Howhinwhẹn lẹ 6:16, 17 gọna Galatianu lẹ 5:19-21. To wefọ dopodopo hihia godo, dọhodo kanbiọ ehe ji:
-
Detẹ lẹ to nuhe yin nùdego to wefọ ehelẹ mẹ wẹ ayidedai egbezangbe tọn lẹ nọ saba bẹhẹn?
Lehe a sọgan nọ yí nuyọnẹn do de ayidedai towe lẹ do
Nọ kanse dewe dọ:
-
Etẹwẹ e bẹhẹn? Be nuhe Jehovah gbẹwanna lẹ wẹ ya?
-
Ojlẹ tẹwẹ n’do nọ deayidai? Be ojlẹ he n’na yizan na nujọnu hugan lẹ wẹ ya?
-
Mẹnu wẹ n’nọ deayidai hẹ? Be e nọ zọ́n bọ n’nọ dogbẹ́ hẹ mẹhe ma yiwanna Jehovah lẹ wẹ ya?
Yè nọ tin to hihọ́ glọ eyin yè gbọn olá na owùnú lẹ dile e yọnbasi do. Enẹwutu wẹ mí dona nọla na ayidedai depope he bẹ nuhe mí mọdọ yé ma na wà dagbe na mí lẹ hẹn
4. Nọ yí whenu towe zan po nuyọnẹn po
Hò VIDEO lọ, enẹgodo dọhodo kanbiọ he bọdego ji.
-
Dile etlẹ yindọ mẹmẹsunnu he to video lọ mẹ ma to nuhe ma sọgbe de pọ́n, nawẹ whenu he e nọ yizan nado deayidai to nuyiwadeji gbọn?
Hia Filipinu lẹ 1:10, enẹgodo dọhodo kanbiọ ehe ji:
-
Nawẹ wefọ ehe sọgan gọalọna mí nado magbe ojlẹ nẹmu he mí na nọ yí do deayidai tọn gbọn?
5. Nọ de ayidedai dagbe lẹ
Dile etlẹ yindọ homẹ Jehovah tọn ma nọ hùn do ayidedai delẹ go, ayidedai susu devo lẹ tin he e ma jẹagọdo. Hia Yẹwhehodọtọ 8:15 gọna Filipinu lẹ 4:8, enẹgodo dọhodo kanbiọ ehe ji:
-
Ayidedai dagbe tẹlẹ sin vivi wẹ a nọ dù?
A sọgan yí ojlẹ gbọjẹ tọn lẹ zan ganji bo duvivi ayidedai dagbe lẹ tọn
MẸDELẸ NỌ DỌ DỌ: “E ma ylan nado nọ doalọ to ayidedai he bẹ danuwiwa, fẹnnuwiwa kavi afinyọnnuwiwa hẹn lẹ mẹ, eyin n’ma gbẹ́ nọ wà onú enẹlẹ.”
-
Gblọndo tẹwẹ a na na?
BLADOPỌ
Jehovah jlo dọ mí ni nọ de ayidedai he sọgbe lẹ bosọ nọ duvivi yetọn.
Dogbapọn
-
Ayidedai wunmẹ tẹlẹ wẹ Klistiani lẹ dona dapana?
-
Naegbọn mí dona nọ nọ̀ aṣeji gando ojlẹ nẹmu he mí nọ yizan nado deayidai go?
-
Naegbọn a nọ jlo na de ayidedai he nọ hẹn homẹ Jehovah tọn hùn lẹ?
PỌ́N NUDỌNAMẸ DEVO LẸ
Mẹnu wẹ do jlọjẹ nado dọ ayidedai he mẹ mí na do mahẹ te lẹ na mí? Pọ́n gblọndo lọ.
Pọ́n lehe a gán nọ basi nudide dagbe lẹ gando ayidedai towe lẹ go do.
“Be Ayidedai Towe lẹ Nọ Hẹn Ale Wá Na We Ya?” (Atọ̀họ̀-Nuhihọ́ lọ Tọn, 15 octobre 2011 tọn)
To otàn lọ “N’Tlẹ Duto Nuvẹun Ṣie Ji” mẹ, pọ́n nuhewutu dawe de do basi vọjlado gando ayidedai he mẹ e nọ do mahẹ te dai lẹ go.
“Biblu Nọ Diọ Gbẹzan Mẹtọn” (Atọ̀họ̀-Nuhihọ́ lọ Tọn, juillet- septembre 2010 tọn)
Pọ́n lehe onọ̀ de basi nudide nuyọnẹn tọn gando ayidedai he nọ bẹ otàn gbigbọ ylankan lẹ tọn hẹn lẹ go do.
A Gán Sọ Pọ́n Hosọ Ehelẹ
KANBIỌ HE MẸSUSU NỌ KANSE LẸ
Tito Biblu Pinplọn Tọn Tẹwẹ Kunnudetọ Jehovah Tọn lẹ Do?
Vọnu wẹ tito Biblu pinplọn tọn Kunnudetọ Jehovah tọn lẹ tọn, podọ a gán zan lẹdogbedevomẹ Biblu tọn depope. Voawu nado ylọ whẹndo towe blebu po họntọn towe depope po wá nupinplọn lọ tẹnmẹ.
