Ojlẹ vude to whenue Jesu yì hùnwhẹ Juwayi owhe 30 W.M. tọn godo wẹ Johanu Baptizitọ lọ yin wiwle do gànmẹ. Johanu jlo dọ devi etọn lẹ ni lẹzun hodotọ Jesu tọn lẹ, ṣigba e ma yin yemẹpo wẹ ko wàmọ to osun he bọdo gànpamẹ yìyì Johanu tọn go lẹ mẹ.

Todin, dile Juwayi owhe 31 W.M. tọn to sisẹpọ, delẹ to devi Johanu tọn lẹ mẹ wá Jesu dè bo kanse dọmọ: “Naegbọn míwlẹ po Falesi lẹ po nọ blanù bọ devi towe lẹ ma ka nọ blanù?” (Matiu 9:14) Aṣa sinsẹ̀n tọn de wẹ nùbibla yin na Falesi lẹ. To nukọn mẹ, Jesu tlẹ yí apajlẹ de zan he mẹ Falesi dodonọ-jlatọ de hodẹ̀ te dọ: “Jiwheyẹwhe E, yẹn dopẹna we dọ yẹn ma taidi mẹdevo lẹ . . . Yẹn nọ blanù whla awe to osẹ dopo mẹ.” (Luku 18:11, 12) Devi Johanu tọn lẹ lọsu sọgan ko nọ blanù to aṣa-liho ga. Kavi yé sọgan ko to nùbla nado nọ aluẹmẹ na gànpamẹ yìyì Johanu tọn wutu. E nọ paṣa ayidonugotọ lẹ lọsu dọ devi Jesu tọn lẹ ma nọ blanù, vlavo nado dohia dọ yelọsu to aluẹmẹ na nuhe yin wiwà na Johanu wutu.

Jesu yí apajlẹ de zan nado na gblọndo dọmọ: “Họntọn asisunọ yọyọ lọ tọn lẹ ma tindo nuhudo nado nọ aluẹmẹ to whenue asisunọ yọyọ tin to yé dè, kavi e ma yin mọ wẹ? Ṣigba azán lẹ ja bọ yè na yí asisunọ yọyọ lọ sọn yé dè, whenẹnu wẹ yé na blanù.”—Matiu 9:15.

Johanu lọsu dlẹnalọdo Jesu taidi asisunọ yọyọ de. (Johanu 3:28, 29) Enẹwutu, devi Jesu tọn lẹ ma nọ blanù to whenue Jesu gbẹ́ pò to yé dè. To nukọn mẹ, eyin Jesu kú, devi etọn lẹ na nọ aluẹmẹ bo ma na jlo nado dùnú. Ṣigba, lehe nulẹ na gbọnvo to whenue e na yin finfọnsọnku do sọ! To whenẹnu, whẹwhinwhẹ́n depope ma nasọ tin nado blanù na aluẹmẹninọ wutu ba.

Enẹgodo, Jesu na apajlẹ awe dọmọ: “Mẹdepope ma nọ tọ̀ avọ̀nu avọ̀ yọyọ tọn do awugbó hoho go gba, na avọ̀nu yọyọ lọ na dọ̀n awugbó lọ bọ tintlẹ́n lọ nasọ ylanhu. Mọdopolọ, gbẹtọ lẹ ma nọ kọ̀n ovẹn yọyọ do ayúgò hoho lẹ mẹ gba. Eyin yé wàmọ, whenẹnu, ayúgò lọ lẹ nọ là podọ ovẹn lọ nọ kọnyingbe bọ ayúgò lọ lẹ nọ gble. Ṣigba, ayúgò yọyọ lẹ mẹ wẹ gbẹtọ lẹ nọ kọ̀n ovẹn yọyọ do, bọ onú awe lẹ nọ yin hihla dai.” (Matiu 9:16, 17) Etẹ na dọ wẹ Jesu te?

Jesu to alọgọna devi Johanu Baptizitọ lọ tọn lẹ nado mọnukunnujẹemẹ dọ mẹdepope ma dona donukun dọ hodotọ Jesu tọn lẹ ni hodo nuyiwa hoho sinsẹ̀n Ju lẹ tọn lẹ, taidi nùbibla aṣa tọn. Ewọ ma wá nado vọ́ aliho sinsẹ̀n-bibasi tọn hoho he ko ṣá de jlado bo dlẹnkanna ẹn gba, yèdọ aliho sinsẹ̀n-bibasi tọn de he na yin gbigbẹdai petepete to madẹnmẹ. Sinsẹ̀n-bibasi he Jesu to tulina ma yin dehe sọgbe hẹ sinsẹ̀n Ju lẹ tọn po aṣa gbẹtọ tọn he zọnpọ hẹ ẹ to whenẹnu lẹ po gba. Lala, e ma to tintẹnpọn nado tọ̀ avọ̀nu yọyọ de do awù hoho de go, kavi nado kọ̀n ovẹn yọyọ do ayúgò hoho he ko hú de mẹ gba.