To whenue Jesu to gbẹtọ lẹ plọn to agbegbe Sesalea Filippi tọn ji, yèdọ fihe dẹn do Osó Helmoni na nudi kilomẹtlu 25, e basi nulila de na apọsteli etọn lẹ, ehe paṣa yé taun: “Nugbo wẹ yẹn dọna mì dọ delẹ to mẹhe to ote tofi lẹ mẹ ma na dọ́ okú pọ́n to aliho depope mẹ kaka yé nado mọ Visunnu gbẹtọ tọn ja whẹ́ to Ahọluduta etọn mẹ.”—Matiu 16:28.

Devi lẹ na ko kanse yede nuhe hodidọ Jesu tọn enẹ zẹẹmẹdo. To nudi osẹ dopo godo, e plan apọsteli atọ̀n, yèdọ Pita, Jakọbu po Johanu po yì osó he yiaga taun de ji. Ozán na ko kú to whenẹnu, na amlọn to tuklado sunnu atọ̀n lọ lẹ wutu. To whenue Jesu to dẹ̀ho, e diọwunmẹ to nukọn yetọn. Apọsteli lọ lẹ mọdọ nukunmẹ etọn to sisẹ́ taidi owhè podọ avọ̀ etọn lẹ họ́n taidi hinhọ́n, yèdọ hinhọ́n wewe tété.

Enẹgodo, omẹ awe delẹ sọawuhia ga, yèdọ “Mose po Elija po.” Yé jẹ hodọ hẹ Jesu ji gando ‘yìyì etọn he na wá aimẹ to Jelusalẹm’ go. (Luku 9:30, 31) Matin ayihaawe, yìyì Jesu tọn to alọdlẹndo okú po fọnsọnku etọn he na bọdego po, ehe ji e dọhodo to ojlẹ kleun de jẹnukọn. (Matiu 16:21) Hodọdopọ ehe dohia dọ to vogbingbọn mẹ na nuhe Pita dọ, okú winyan tọn he Jesu na kú yin nude he ewọ ma dona dapana.

Todin he amlọn ko họ́n na apọsteli atọ̀n lọ lẹ pete, wunmẹdidiọ lọ paṣa yé bọ yé to nupọn bosọ to todoai. Numimọ de wẹ, ṣogan na Pita, e taidi nujijọ jọnun de sọmọ bọ e jẹ mahẹ tindo to e mẹ ji bo dọmọ: “Labi, e yọ́n taun dọ mí ni nọfi, enẹwutu gbọ mí ni gbá gòhọ atọ̀n, dopo na hiẹ, dopo na Mose podọ dopo na Elija.” (Malku 9:5) Be Pita biọ dọ gòhọ lẹ ni yin gbigbá na e jlo dọ numimọ lọ ni zindonukọn wutu wẹ ya?

Dile Pita gbẹ́ to hodọ, aslọ sisẹ́ mlanmlan de ṣinyọ́n yé ji, podọ ogbè de sọn aslọ lọ mẹ dọmọ: “Ehe wẹ Visunnu ṣie, mẹyiwanna lọ, mẹhe yẹn ko kẹalọyi. Mì nọ dotoaina ẹn.” To whenue yé sè ogbè Jiwheyẹwhe tọn, apọsteli lọ lẹ dibu taun bo ṣinyọ́n nukunmẹ yetọn ai, ṣigba Jesu dọna yé dọmọ: “Mì fọnṣite. Mì dibu blo.” (Matiu 17:5-7) To whenue apọsteli atọ̀n lọ lẹ fọ́n godo, Jesu kẹdẹ wẹ yé mọ. Numimọ lọ ko wá vivọnu. To whenue ai ko họ́n bọ yé to tejẹ sọn osó lọ ji, Jesu dosẹ́n na yé dọmọ: “Mì dọ numimọ lọ na mẹdepope blo kaka Visunnu gbẹtọ tọn nado yin finfọn sọn oṣiọ lẹ mẹ.”—Matiu 17:9.

Apọsteli lẹ fọ́n kanbiọ de dote, na Elija sọawuhia to numimọ lọ mẹ wutu. Yé kanse dọ, “Naegbọn wekantọ lẹ do nọ dọ dọ Elija dona wá whẹ́?” Jesu gblọn dọ: “Elija ko wá, bọ yé ma yọnẹn dọ ewọ wẹ.” (Matiu 17:10-12) Johanu Baptizitọ lọ hodọ wẹ Jesu te, mẹhe hẹn azọngban he taidi Elija tọn nkọ de di. Elija jla aliho do na Eliṣa, podọ nudopolọ wẹ Johanu wà na Klisti.

Lehe numimọ ehe hẹn Jesu po apọsteli etọn lẹ po lodo do sọ! Dohia de wẹ e yin gando gigo he Klisti na wá tindo to Ahọluduta etọn mẹ go. Gbọnmọ dali, devi lẹ mọ ‘Visunnu gbẹtọ tọn ja to Ahọluduta etọn mẹ,’ dile Jesu ko dopagbe etọn do. (Matiu 16:28) To whenue yé tin to osó lọ ji, yé yin “kunnudetọ he yí nukun do mọ gigo daho etọn.” Mahopọnna dọ Falesi lẹ jlo na mọ ohia de dọ Jesu wẹ Ahọlu dide Jiwheyẹwhe tọn, e ma na yé ohia de. Ṣigba, devi Jesu tọn he sẹpọ ẹ lẹ yin dotẹnmẹna nado mọ wunmẹdidiọ etọn, ehe hẹn dọdai Ahọluduta lọ tọn lẹ lodo. Enẹwutu, Pita sọgan wlan to nukọn mẹ dọmọ: “Jidide mítọn to ohó dọdai tọn lọ mẹ yin hinhẹn lodo dogọ.”—2 Pita 1:16-19.