Jesu ko to ayinamẹ na devi etọn lẹ gando adọkunnu agbasa tọn lẹ yiyizan go. Ṣigba, e ma yin devi etọn lẹ kẹdẹ wẹ to ohó etọn dotó. Falesi lẹ lọsu to finẹ ga, podọ yelọsu dona nọ hodo ayinamẹ Jesu tọn lẹ. Etẹwutu? Na yé yin “wanyina akuẹtọ lẹ” wutu. Whenue yé sè nuhe Jesu to didọ, yé “jẹ awọnlín-yẹ́n do e ji.”—Luku 15:2; 16:13, 14.

Ṣigba, enẹ ma dobuna Jesu. E dọna yé dọmọ: “Mìwlẹ wẹ mẹhe nọ do mìde hia di dodonọ to gbẹtọ lẹ nukọn, ṣigba Jiwheyẹwhe yọ́n ahun mìtọn, na nuhe gbẹtọ lẹ nọ pọ́n taidi nujọnu wẹ awuhiọnu de to nukun Jiwheyẹwhe tọn mẹ.”—Luku 16:15.

Na ojlẹ dindẹn, “gbẹtọ lẹ nọ pọ́n [Falesi lẹ hlan] taidi nujọnu” kavi mẹhe yiaga, ṣigba ojlẹ sọ̀ na ninọmẹ lọ nido diọ, hoho tọn vò dintọn vò. Mẹhe ko yin zizedaga bo jẹ adọkun, na nuhe dù nutindo aihọn tọn lẹ, huhlọn tonudidọ tọn po ogántẹn sinsẹ̀n tọn po lẹ na yin zize whè. Gbẹtọ paa he yọ́n nuhudo gbigbọmẹ tọn yetọn lẹ na yin zizedaga. Jesu hẹn ẹn họnwun dọ diọdo ayidego tọn de to tintin bo dọmọ:

“Osẹ́n lọ po Yẹwhegán lẹ po tin kakajẹ ojlẹ Johanu tọn mẹ. Sọn whenẹnu sọyi, Ahọluduta Jiwheyẹwhe tọn to yinyin lilá taidi wẹndagbe, podọ gbẹtọ wunmẹ lẹpo wẹ to vivẹnudo zọnmii hlan e kọ̀n. Na nugbo tọn, e bọawuna olọn po aigba po nado juwayi hú na adà tiuntiun wekun Osẹ́n lọ tọn dopo nado nọma mọ hẹndi.” (Luku 3:18; 16:16, 17) Nawẹ hogbe Jesu tọn lẹ dohia dọ diọdo de to yìyì to alọnu gbọn?

Sinsẹ̀ngán Ju lẹ nọ yí goyiyi do lá dọ yé nọ yìn Osẹ́n Mose tọn. Flindọ, to whenue Jesu hunnukun na dawe de to Jelusalẹm, Falesi lẹ dọ po goyiyi po dọ: “Devi Mose tọn wẹ míwlẹ yin. Mí yọnẹn dọ Jiwheyẹwhe dọhona Mose.” (Johanu 9:13, 28, 29) Lẹndai Osẹ́n lọ he yin nina gbọn Mose gblamẹ tọn dopo wẹ nado deanana whiwhẹnọ lẹ yì Mẹsia lọ, yèdọ Jesu dè. Johanu Baptizitọ lọ do Jesu hia di Lẹngbọvu Jiwheyẹwhe tọn. (Johanu 1:29-34) Bẹsọn lizọnyizọn Johanu tọn whenu wẹ “Ahọluduta Jiwheyẹwhe tọn” ko to yinyin lilá na Ju whiwhẹnọ lẹ, titengbe wamọnọ lẹ. Na taun tọn, “wẹndagbe” tin na mẹdepope he jlo na yin mẹjidugando Ahọluduta Jiwheyẹwhe tọn bo duale etọn.

Osẹ́n Mose tọn ma nọma mọ hẹndi; e ko deanana gbẹtọ lẹ jẹ Mẹsia lọ dè. Humọ, to madẹnmẹ e ma nasọ yin dandan nado nọ yìn in ba. Di apajlẹ, Osẹ́n lọ yigbena gbẹdai to dodonu voovo lẹ ji, ṣigba todin, Jesu basi zẹẹmẹ dọ “mẹdepope he gbẹ́ asi etọn dai bo wlealọ hẹ devo deayọ, podọ ewọ he wlealọ hẹ yọnnu he asu etọn gbẹdai, e deayọ.” (Luku 16:18) Lehe hodidọ ehelẹ na ko doadihomẹna Falesi aṣẹglanglan-panamẹtọ enẹlẹ do sọ!

Todin, Jesu na apajlẹ de he zinnudo obá he  mẹ diọdo he to tintin lọ sẹhundaga jẹ ji. E donù sunnu awe delẹ go—he otẹn kavi ninọmẹ dopodopo yetọn tọn diọ to aliho ayidego tọn mẹ. Dile a to dogbapọnna apajlẹ lọ, hẹn do ayiha mẹ dọ Falesi wanyina akuẹtọ he gbẹtọ lẹ nọ pọnhlan di mẹhe yiaga lẹ tin to hosetọ lọ lẹ mẹ.

Jesu dọmọ: “Dawe adọkunnọ de tin he nọ saba yí sopẹ́-vọ̀ po alavọ po do doaṣọ́na ede, bo nọ to gbẹdu egbesọegbesọ po gigo daho po. Ṣigba, nubiọdutọ de he nọ yin Lazalọsi, he gọ́ na agàdá nọ saba yin zizedo họngbo etọn ji bo nọ jlo nado dù nuhe to fiflẹ sọn tafo dawe adọkunnọ lọ tọn ji lẹ. Mọwẹ, avún lẹ tlẹ nọ wá bo nọ didọ́ agàdá etọn lẹ.”—Luku 16:19-21.

Falesi lẹ yin wanyina akuẹtọ, enẹwutu be ayihaawe depope tin gando mẹhe Jesu to alọdlẹndo taidi “dawe adọkunnọ” lọ go ya? Sinsẹ̀ngán Ju ehelẹ lọsu nọ yiwanna nado yí avọ̀ whanpẹnọ akuẹgegenu tọn do doaṣọ́na yede. Podọ gbọnvona adọkunnu he yé sọgan ko tindo lẹ, e taidi dọ yé yin adọkunnọ na nuhe dù lẹblanulọkẹyi he yé nọ duvivi etọn po dotẹnmẹ hundote he yé tindo lẹ po. Mọwẹ, nado yí yé jlẹdo dawe he do sopẹ́-vọ̀ ahọlu lẹ tọn de go do otẹn nukundeji yetọn hia, podọ alavọ wewe lọ dohia dọ yé yin dodonọ to nukun yedetiti tọn mẹ.—Daniẹli 5:7.

Nawẹ nukọntọ adọkunnọ goyitọ ehelẹ nọ pọ́n wamọnọ he yin omẹ paa lẹ hlan gbọn? Yé nọ gbọn mẹdèpo dali ylọ yé dọ ‛am ha·’aʹrets, kavi omẹ aigba tọn lẹ he ma yọ́n Osẹ́n lọ bọ e masọ  jẹ dọ e ni yin pinplọn lẹ. (Johanu 7:49) Enẹ do ninọmẹ “nubiọdutọ . . . he nọ yin Lazalọsi” lọ tọn hia, mẹhe tlẹ nọ jlo na dù “nuhe to fiflẹ sọn tafo dawe adọkunnọ lọ tọn ji lẹ.” Kẹdẹdi Lazalọsi he gọ́ na agàdá, omẹ paa lẹ nọ yin didepo, taidi dọ yé bẹ azọ̀n to gbigbọ-liho wẹ nkọ.

Ninọmẹ ylankan enẹ ko nọ aimẹ na ojlẹ de, ṣigba Jesu yọnẹn dọ ojlẹ ko sọ̀ na diọdo ayidego tọn de ni wá aimẹ to ninọmẹ mẹhe taidi dawe adọkunnọ lọ lẹ tọn po mẹhe taidi Lazalọsi lẹ tọn po mẹ.

Jesu basi zẹẹmẹ dogọ dọ ninọmẹ yetọn lẹ diọ to aliho ayidego tọn mẹ. E dọmọ: “Todin, to ojlẹ vude godo, nubiọdutọ lọ kú bọ angẹli lẹ ze e yì akọ́nnu Ablaham tọn. Mọdopolọ, dawe adọkunnọ lọ kú bo yin dìdì. Podọ to awufiẹsa mẹ to Hadẹs mẹ, e ze nukun etọn lẹ daga bo mọ Ablaham to olá bọ Lazalọsi to akọ́nnu etọn.”—Luku 16:22, 23.

Mẹhe to todo Jesu lẹ yọnẹn dọ e ko dẹn bọ Ablaham kú bo to Yọdò mẹ. Owe-wiwe lẹ hẹn ẹn họnwun dọ depope to mẹhe to Yọdò kavi Ṣeol mẹ lẹ mẹ, kakajẹ Ablaham ji, ma sọgan mọnú kavi dọho. (Yẹwhehodọtọ 9:5, 10) To whelọnu lo, etẹwẹ sinsẹ̀ngán ehelẹ lẹndọ Jesu jlo na dọ po apajlẹ ehe po? Etẹ dọ wẹ e na ko te gando gbẹtọ paa lẹ po sinsẹ̀ngán wanyina akuẹtọ lọ lẹ po go?

Jesu ṣẹṣẹ donù diọdo de go to whenue e dọ dọ ‘Osẹ́n lọ po Yẹwhegán lẹ po tin kakajẹ ojlẹ Johanu Baptizitọ lọ tọn mẹ, ṣigba sọn whenẹnu sọyi, Ahọluduta Jiwheyẹwhe tọn to yinyin lilá taidi wẹndagbe.’ Enẹwutu, yẹwhehodidọ Johanu po Jesu Klisti po tọn wẹ zọ́n bọ Lazalọsi po dawe adọkunnọ lọ po kú, enẹ wẹ yindọ ninọmẹ yetọn dai tọn diọ bọ yé tin to otẹn yọyọ de mẹ to Jiwheyẹwhe nukọn.

Na taun tọn, e ko dẹn din bọ gbigbọnu lẹ yin titẹ̀ whiwhẹnọ kavi wamọnọ lẹ. Ṣigba, owẹ̀n Ahọluduta lọ tọn he Johanu Baptizitọ lọ lá jẹnukọn, bọ Jesu lá bọdego wẹ to alọgọna yé bọ yé sọ to alọkẹyi i. To dai, yé dona dowéna onú vude ‘he nọ flẹ sọn tafo gbigbọmẹ tọn’ sinsẹ̀ngán lẹ tọn ji. Todin, nugbo nujọnu tọn Owe-wiwe tọn lẹ wẹ yé to dùdù, titengbe nujiawu he Jesu to zẹẹmẹ etọn basi lẹ. Podọ e taidi dọ to godo mẹ, yewlẹ wẹ tin to otẹn nukundeji de mẹ to nukun Jehovah Jiwheyẹwhe tọn mẹ.

To vogbingbọn mẹ, sinsẹ̀ngán adọkunnọ he yin gbẹtọ nukundeji lẹ gbẹ́ nado kẹalọyi owẹ̀n Ahọluduta lọ tọn he Johanu lá, podọ ehe Jesu ko to yẹwheho etọn dọ to aigba lọ pete ji. (Matiu 3:1, 2; 4:17) Na nugbo tọn, owẹ̀n lọ dọ whẹdida vẹadi de ja sọn Jiwheyẹwhe dè hẹn yé gblehomẹ, kavi biọ awufiẹsa mẹ. (Matiu 3:7-12) Sinsẹ̀ngán wanyina akuẹtọ ehelẹ na mọ kọgbọ eyin  Jesu po devi etọn lẹ po sọgan gbẹ́ dekanpona owẹ̀n Jiwheyẹwhe tọn lilá. Nukọntọ ehelẹ taidi dawe adọkunnọ apajlẹ lọ tọn he dọ dọ: “Otọ́ Ablaham, wàlẹblanuna mi bo do Lazalọsi hlan nado ylọn bẹ́nu alọvi etọn tọn do osin mẹ bo fá odẹ́ ṣie, na yẹn to awufiẹsa mẹ to miyọ́n sinsinyẹn ehe mẹ wutu.”—Luku 16:24.

Ṣigba, enẹ ma na jọ. Suhugan nukọntọ sinsẹ̀n tọn lọ lẹ tọn ma na diọ. Yé gbẹ́ nado “dotoaina Mose po Yẹwhegán lẹ po,” yèdọ mẹhe sin kandai lẹ sọgan ko gọalọna yé nado kẹalọyi Jesu taidi Mẹsia podọ Ahọlu he Jiwheyẹwhe de. (Luku 16:29, 31; Galatianu lẹ 3:24) Mọdopolọ, yé ma whiwhẹ yede bo masọ dike wamọnọ he kẹalọyi Jesu bo tindo nukundagbe Jiwheyẹwhe tọn todin lẹ ni diọlinlẹnna yé. Etomọṣo, devi Jesu tọn lẹ ma sọgan hònúpla kavi dekanpona nugbo lọ nado hẹn homẹhun nukọntọ sinsẹ̀n tọn lọ lẹ kavi hẹn kọgbọ wá na yé poun gba. To apajlẹ Jesu tọn mẹ, e hẹn nugbo ehe họnwun to ohó he “Otọ́ Ablaham” dọna dawe adọkunnọ lọ mẹ, dọmọ:

“Ovi, flindọ hiẹ ko mọ nudagbe towe lẹ yí to gigọ́ mẹ to gbẹwhenu towe, ṣigba mọdopolọ, Lazalọsi mọ nuylankan lẹ yí. Todin, nalete, ewọ to homẹmimiọn tindo tofi, ṣigba hiẹ tin to awufiẹsa mẹ. Podọ gbọnvona onú ehe lẹpo, odò daho de ko yin zizedo míwlẹ po mìwlẹ po ṣẹnṣẹn, na mẹhe jlo na tọ́n sọn mí dè bo yì mì dè lẹ ma nado sọgan yì, mọjanwẹ mẹde ma sọgan dasá sọn finẹ wá mí dè do niyẹn.”—Luku 16:25, 26.

Lehe diọdo daho ehe sọgbe bo wá do gànmẹ do sọ! E nọtena diọdo he wá aimẹ to nukọntọ sinsẹ̀n tọn goyitọ lọ lẹ po whiwhẹnọ he kẹalọyi zẹgẹ Jesu tọn bo wá mọ kọfanamẹ gọna núdùdù gbigbọmẹ tọn yí lẹ po ṣẹnṣẹn. (Matiu 11:28-30) Diọdo ehe nasọ họnwun dogọ to osun delẹ godo to whenue alẹnu yọyọ lọ na diọtẹnna alẹnu Osẹ́n tọn lọ. (Jelemia 31:31-33; Kọlọsinu lẹ 2:14; Heblu lẹ 8:7-13) Whenue Jiwheyẹwhe wá kọ̀n gbigbọ wiwe etọn jẹgbonu to Pẹntikọsti owhe 33 W.M. tọn, ayihaawe ma tin dọ devi Jesu tọn lẹ wẹ tindo nukundagbe Jiwheyẹwhe tọn, kakati nido yin Falesi lẹ po gbẹ́gọ́nu yetọn lẹ po.