Josẹfu fọ́n Malia sọn amlọn mẹ nado dowẹn niyaniya tọn de na ẹn. Angẹli Jehovah tọn wẹ ṣẹṣẹ sọawuhia ẹ to odlọ de mẹ bo dọmọ: “Fọ́n, ze ovi pẹvi lọ po onọ̀ etọn po bo họnyi Egipti bosọ nọ finẹ kakajẹ whenue yẹn na vọ́ dọhona we, na Hẹlọdi ko jlo na jẹ ovi pẹvi lọ dín ji nado hù i.”—Matiu 2:13.

To afọdopolọji, Josẹfu, Malia po ovi yetọn po họnyi to zánmẹ. Yé wàmọ do mẹwhenu, na Hẹlọdi sè dọ sunwhlẹvu-pọntọ lọ lẹ ko blu emi. E ko dọna yé wayi dọ yé ni lẹkọwa dogbè na emi. Ṣigba, yé ma wàmọ bo lẹkọyi otò yetọn mẹ. Hẹlọdi gblehomẹ sinsinyẹn. Na e gbẹ́ jlo nado hù Jesu wutu, e degbe dọ yọpọ sunnu lẹpo bẹsọn owhe awe mẹvi wá odò he tin to Bẹtlẹhẹm podọ to agbegbe etọn lẹpo ji ni yin hùhù. Hẹlọdi lẹn owhe ovi lọ lẹ tọn sọgbe hẹ nuhe e ko sè wayi sọn sunwhlẹvu-pọntọ he wá sọn Whèzẹtẹn lọ lẹ dè.

Nuylankan taun wẹ e yin dọ yọpọ sunnu lọ lẹpo yin hùhù! Mí ma sọgan yọ́n sọha yọpọ sunnu he yin hùhù lẹ tọn, ṣigba avigbè daho po dasin he onọ̀ ovi lọ lẹ tọn kùn po yin hẹndi dọdai he yẹwhegán Jiwheyẹwhe tọn Jelemia ko dọ de tọn.—Jelemia 31:15.

Ṣigba to ojlẹ enẹ mẹ, Josẹfu po whẹndo etọn po ko họnyi Egipti, bosọ nọ nọ̀ finẹ. Enẹgodo, to zánmẹ gbèdopo, angẹli Jehovah tọn sọ sọawuhia Josẹfu to odlọ de mẹ. Angẹli lọ dọna ẹn dọmọ: “Fọ́n, ze ovi pẹvi lọ po onọ̀ etọn po bo yì aigba Islaeli tọn ji, na mẹhe to okú ovi pẹvi lọ tọn dín lẹ ko kú.” (Matiu 2:20) Enẹwutu, Josẹfu mọnukunnujẹemẹ dọ todin emi sọgan lẹkọyi otò emitọn mẹ po whẹndo emitọn po. Gbọnmọ dali, dọdai Biblu tọn devo sọ mọ hẹndi, yèdọ Visunnu Jiwheyẹwhe tọn yin yiylọ jẹgbonu sọn Egipti.—Hosea 11:1.

 Josẹfu na ko to linlẹn dọ whẹndo emitọn na sawhé do Jude, vlavo sẹpọ tòdaho Bẹtlẹhẹm tọn, yèdọ fie yé nọ whẹpo do họnyi Egipti. Ṣigba, e sè dọ visunnu kanylantọ Hẹlọdi tọn he nọ yin Alkẹlausi wẹ yin ahọlu Jude tọn todin. To odlọ devo mẹ, Jiwheyẹwhe na avase Josẹfu gando owù lọ go. Enẹwutu, Josẹfu po whẹndo etọn po zingbejizọnlin yì agewaji bo sawhé do tòdaho Nazalẹti tọn mẹ to aigba Galili tọn ji, yèdọ fie dẹn do ahọnkan sinsẹ̀n-bibasi Ju lẹ tọn to Jelusalẹm. Lẹdo enẹ mẹ wẹ Jesu whẹ́n te, podọ enẹ sọ hẹn dọdai devo di, ehe dọmọ: “Ewọ na yin yiylọdọ Nazalẹtinu.”—Matiu 2:23.