Gbọ mí ni lẹkọyi godo na owhe vude. Nẹhemia, yèdọ Islaelivi de he nọ nọ̀ tòdaho Pẹlsia tọn Ṣuṣani mẹ, nọ wadevizọn na Ahọlu Altakẹlikesi. Nọvisunnu Nẹhemia tọn hẹn owẹ̀n ylankan lẹ wá na ẹn sọn Juda dọmọ: ‘Mẹhe lẹkọyi Jelusalẹm lẹ ma to hihọ́ glọ. Adó tòdaho lọ tọn po họngbo etọn he Babilọninu lẹ gídí lẹ po ma ko yin vivọjlado.’ Nẹhemia jẹflumẹ. E jlo na yì Jelusalẹm nado gọalọ, enẹwutu e hodẹ̀ dọ ahọlu ni nagbè emi nado yì.

To ojlẹ de godo, ahọlu lọ doayi e go dọ Nẹhemia to awubla bo kanse e dọmọ: ‘N’ma ko mọ a blawu dole pọ́n. Etẹwẹ jọ?’ Nẹhemia sọ dọmọ: ‘Naegbọn n’ma nado blawu to whenuena e yindọ tòdaho ṣie Jelusalẹm ko gbọgbé?’ Ahọlu lọ kanse e dọmọ: ‘Etẹwẹ a jlo dọ yẹn ni wà na we?’ To afọdopolọji, Nẹhemia hodẹ̀ to ahun etọn mẹ. Enẹgodo, e dọmọ: ‘Mì jaale bo dike yẹn ni lẹkọyi Jelusalẹm nado vọ́ adó lọ lẹ do.’ Ahọlu Altakẹlikesi dọna Nẹhemia dọ e gán yì, ahọlu lọ sọ basi tito nado hẹn ẹn diun dọ nude ma na wà ẹ to gbejizọnlin etọn whenu. E sọ de Nẹhemia taidi ayimatẹn-gán Juda tọn bo na ẹn atin he e na yí do basi họngbo tòdaho lọ tọn lẹ.

Whenue Nẹhemia jẹ Jelusalẹm, e gbeje adó tòdaho lọ tọn lẹ pọ́n. Enẹgodo, e pli yẹwhenọ lẹ po ogán lẹ po bo dọna yé dọmọ: ‘Ninọmẹ ehe ma yọ́n paali. Mí dona bẹ azọ́n jẹeji.’ Gbẹtọ lọ lẹ yigbe bọ yé jẹ adó lọ lẹ do ji.

Ṣigba, kẹntọ Islaelivi lẹ tọn delẹ jẹ yé ṣanko ji dọmọ: ‘Owọ̀ tata de gán họ́ adó he do mí te lẹ liai.’ Azọ́nwatọ lọ lẹ dovọ́na mẹṣanko yetọn bo zindonukọn nado to adó lọ do. Adó lọ wá yiaga bo lodo taun.

Kẹntọ lẹ magbe nado wá sọn awà voovo ji bo tọ́nawhàn Jelusalẹm to ajiji mẹ. Whenue Juvi lẹ sèhó gando ayiha he kàn yé te lọ go, obu jẹ yé ji. Amọ́, Nẹhemia dọmọ: ‘Mì dibu blo. Jehovah tin hẹ mí.’ E sọ de nuhọ́tọ lẹ nado basi hihọ́na azọ́nwatọ lọ lẹ, bọ kẹntọ lẹ ma penugo nado tọ́navùn yé.

 To azán 52 poun gblamẹ, adó lọ po họngbo lọ lẹ po yin tadona. Nẹhemia ylọ Levinu lẹpo wá Jelusalẹm na klandowiwe adó lọ tọn. E má yé do hànjigbẹ́ voovo awe mẹ. Yé sọ hẹji yì adó lọ ji gbọn pèkán he to Họngbo Asisa lọ tọn kọ̀n ji, enẹgodo pipli de gbọn adusiwhé bọ devo gbọn amiyọnwhé bọ yé zinzọnlin lẹdo tòdaho lọ. Yé kún opẹ̀n lẹ bo hò ajogàn lẹ po ajalẹn lẹ po bosọ jihàn hlan Jehovah. Ẹzla hodo pipli tintan, bọ Nẹhemia hodo pipli awetọ bọ yé zinzọnlin kakajẹ whenue yé pé yede to tẹmpli lọ kọ̀n. Gbẹtọ lọ lẹpo—yèdọ sunnu, yọnnu po ovi lẹ po—sanvọ́ hlan Jehovah bo jaya. Awhágbe ayajẹ tọn yetọn sọgan yin sisè sọn fidindẹn.