1-3. (a) Etẹ mẹ wẹ “adi sinsinyẹn” Jehovah tọn na dekọtọn do? (Pọ́n yẹdide he tin to bẹjẹeji hosọ ehe tọn.) (b) Etẹwẹ mí na gbadopọnna todin?

SUNNU lẹ, yọnnu lẹ po yọpọvu lẹ po ṣite to pọmẹ bo to ohàn Ahọluduta tọn de ji. Enẹgodo, mẹho agun tọn de nọ nukọnna agun lọ to odẹ̀ ahundopo tọn de mẹ bo to Jehovah vẹ̀ na hihọ́-basinamẹ Etọn. Hagbẹ agun lọ tọn lẹ kudeji dọ Jehovah na penukundo yé go, etomọṣo yé gbẹ́ do hudo homẹmiọnnamẹ po jidevọnamẹ po tọn. To gbonu, awhá mẹhe to avùnho lẹ tọn fọ́n bo to sinsinyẹn deji. Amagẹdọni ko bẹjẹeji!—Osọ. 16:14, 16.

² To awhàn Amagẹdọni tọn whenu, Jehovah na hù mẹlẹ, e ma yin mẹlẹpo to pọmẹ kavi to aliho mọmọ tọn mẹ, amọ́ to “adi sinsinyẹn mẹ.” (Hia Ezekiẹli 38:18.) E na túntún homẹgble sinsinyẹn etọn jẹgbonu, e ma yin do awhànpa kavi akọta dopo poun ji, ṣigba do gbẹtọvi madosọha he nọ nọ̀ otò voovo mẹ lẹdo aihọn pé lẹ ji. To gbenẹgbe, mẹhe Jehovah na hù lẹ “na tin sọn opodo aigba tọn de ji kakajẹ opodo awetọ aigba tọn ji.”—Jel. 25:29, 33.

³ Etẹwẹ na zọ́n bọ Jehovah, yèdọ Jiwheyẹwhe owanyinọ de, he yin yinyọnẹn taidi “lẹblanunọ podọ awuvẹmẹtọ” bosọ “nọ whleawu nado gblehomẹ,” na yinuwa domọ to “adi sinsinyẹn”  mẹ? (Eks. 34:6; 1 Joh. 4:16) Mì gbọ mí ni pọ́n lehe gblọndo kanbiọ enẹ tọn gán miọnhomẹna mí, na mí adọgbigbo bo dozolanmẹna mí to azọ́n yẹwhehodidọ tọn mítọn mẹ do to egbehe.

4, 5. Nawẹ homẹgble Jiwheyẹwhe tọn gbọnvona gbẹtọvi mapenọ lẹ tọn gbọn?

⁴ Jẹnukọn whẹ́, mí dona yọnẹn dọ homẹgble Jehovah tọn ma taidi gbẹtọvi mapenọ de tọn. Eyin homẹgble sisẹ́ gbẹtọvi de nado duadi bo yinuwa, e ma nọ saba dava ede podọ vlavo wẹ ehe nọ hẹn kọdetọn dagbe wá. Di apajlẹ, Kaini, visunnu tintan Adam tọn “gọ́ na adi,” na Jehovah gbẹ́ avọ́sinsan etọn dai bo kẹalọyi nunina Abẹli tọn wutu. Po kọdetọn tẹ po? Kaini hù nọvisunnu etọn he yin dodonọ. (Jen. 4:3-8; Heb. 11:4) Sọ lẹnnupọndo Davidi ji, yèdọ sunnu de he ahun Jehovah tọn kẹalọyi. (Owalọ 13:22) Dawe dagbe ehe tlẹ dibla hùwhẹ sẹ́nhẹngba sinsinyẹn tọn to whenue e sè dọ dawe adọkunnọ lọ Nabali zun ewọ po sunnu etọn lẹ po. Po adi po, Davidi po awhànfuntọ etọn lẹ po “blá ohí yetọn dogo,” bo lẹn nado yì hù Nabali mayọndagbenọ lọ gọna sunnu he to whédo etọn mẹ lẹpo. Mí dopẹ́ dọ asi Nabali tọn, Abigaili, penugo nado diọlinlẹnna Davidi po sunnu etọn lẹ po ma nado yiahọsu. (1 Sam. 25:9-14, 32, 33) Abajọ, Jehovah gbọdo Jakọbu nado wlan dọmọ: “Homẹgble gbẹtọ tọn ma nọ hẹn dodowiwa Jiwheyẹwhe tọn di.”—Jak. 1:20.

⁵ To vogbingbọn mẹ na homẹgble gbẹtọ tọn, he ma nọ saba yin anadena, Jehovah nọ dava ede bo nọ na avase whẹpo do yinuwa. Eyin Jehovah tlẹ gblehomẹ sinsinyẹn, e nọ yinuwa po dodo po. Eyin e hoavùn sọta kẹntọ de, e ma nọ và “dodonọ po mẹylankan po sudo” gbede. (Jen. 18:22-25) Humọ, Jehovah nọ gblehomẹ, na whẹwhinwhẹ́n dodo tọn lẹ kẹdẹ wutu. Lẹnnupọndo whẹwhinwhẹ́n awe he bọdego lẹ po nuhe mí gán plọn sọn yé mẹ lẹ po ji.

6. Nawẹ Jehovah nọ yinuwa gbọn eyin masin yin kinkọndo oyín etọn go?

⁶ Whẹwhinwhẹ́n: Eyin masin yin kinkọ̀n do oyín Jehovah tọn go. Mẹhe nọ sọalọakọ́n dọ emi yin afọzedaitọ Jehovah tọn ṣigba bo nọ yinuwa po kanyinylan po lẹ nọ kọnmasin dego bọ ehe nọ fọ́n homẹgble etọn dote. (Ezek. 36:23) Dile mí dọhodeji to weta he wayi lẹ mẹ do, akọta Islaeli tọn hẹn vlẹko daho wá oyín Jehovah tọn ji. Abajọ walọ po nuyiwa akọta lọ tọn lẹ po do hẹn homẹgble Jehovah. Ṣigba, e ma gblehomẹ zẹjlẹgo pọ́n gbede—e nọ dọ̀n otó na omẹ etọn lẹ dile e jẹ do, e ma yin po wazẹjlẹgo po. (Jel. 30:11) Podọ eyin homẹgble Jehovah tọn jẹ lẹndai etọn kọ̀n, e nọ wá vivọnu bọ ewọ ma nọ hẹn yé do homẹ.—Salm. 103:9.

7, 8. Etẹlẹ wẹ mí plọn sọn aliho he mẹ Jehovah yinuwa hẹ Islaeli te mẹ?

⁷ Nuplọnmẹ: Aliho he mẹ Jehovah yinuwa hẹ Islaelivi lẹ te yin avase titengbe de na mí. Taidi Islaelivi hohowhenu tọn lẹ, mí tindo lẹblanulọkẹyi lọ nado tindo oyín Jehovah tọn to ota. Kunnudetọ  Jehovah tọn lẹ wẹ mí. (Isa. 43:10) Ohó po walọ mítọn lẹ po nọ yinuwado pọndohlan mẹlẹ tọn gando Jiwheyẹwhe he mí to afọ etọn zedai lọ go ji. Mí ma na jlo gbede nado yí ylanwiwa do dó aṣa bo hẹn vlẹko wá oyín Jehovah tọn ji. Yẹnuwiwa mọnkọtọn na fọ́n homẹgble Jehovah tọn dote, podọ e yá wẹo kavi e dẹn wẹo, e na yinuwa nado klan oyín etọn do wiwe.—Heb. 3:13, 15; 2 Pita 2:1, 2.

⁸ Be avase lọ dọ Jehovah gán biọ “adi sinsinyẹn mẹ” dona glọnalina mí ma nado dọnsẹpọ ẹ wẹ ya? Lala. Mí yọnẹn dọ Jehovah nọ fahomẹ bosọ nọ jonamẹ. (Isa. 55:7; Lom. 2:4) Ṣigba, mí sọ yọnẹn dọ numọtolanmẹ lẹ ma nọ deanana ẹn. Na nugbo tọn, mí nọ na ẹn sisi sisosiso, to yinyọnẹn mẹ dọ homẹgble etọn na jizò do mẹhe nọ yí tasinsinyẹn do doafọna ylanwiwa lẹ ji, podọ ewọ ma na dike yé ni gbọṣi omẹ etọn lẹ ṣẹnṣẹn. (1 Kọl. 5:11-13) Jehovah ko dọ nuhe nọ fọ́n adi etọn dote lẹ na mí hezeheze. E pò to mí si nado dapana walọ po nuyiwa he nọ hẹn homẹgble e lẹ po.—Joh. 3:36; Lom. 1:26-32; Jak. 4:8.

9, 10. Nawẹ Jehovah nọ yinuwa gbọn to whenue ogbẹ̀ omẹ nugbonọ etọn lẹ tọn tin to owù mẹ? Na apajlẹ lẹ.

⁹ Whẹwhinwhẹ́n: Eyin omẹ nugbonọ Jehovah tọn lẹ yin nukundiọsọ. Homẹ nọ gble Jehovah to whenue kẹntọ lẹ tọ́nawhàn nugbonọ he wá dín fibẹtado to hihọ́-basinamẹ etọn glọ lẹ. Di apajlẹ, to whenue Islaelivi lẹ tọ́n sọn Egipti godo, Falo po awhànpa huhlọnnọ etọn po dómọna yé, na yé pli do Ohù Vẹẹ tó taidi mẹhe ma do mẹde lẹ wutu. Ṣigba, to whenue awhànpa huhlọnnọ enẹ jẹgodona Islaelivi lẹ biọ hùzànmẹ, Jehovah de kẹkẹfọ lẹ sẹ̀ sọn oglọ na osọ́-kẹkẹ awhàn tọn yetọn lẹ bọ Egiptinu lẹ siọ do ohù mẹ. “Dotẹnmẹ ma yin nina dopo tata to yé mẹ nado họ̀ngán.” (Eks. 14:25-28) Adi Jehovah tọn jizò do Egiptinu lẹ ji, na “owanyi nugbo” he e tindo na omẹ etọn lẹ wutu.—Hia Eksọdusi 15:9-13.

¹⁰ Mọdopolọ, owanyi he Jehovah tindo na omẹ etọn lẹ whàn ẹn nado yinuwa to azán Ahọlu Hẹzekia tọn lẹ gbè. Asilianu lẹ, yèdọ awhànpa huhlọnnọ podọ kanylantọ hugan ojlẹ lọ mẹ tọn ko deawhànfọ wá lẹdo tòdaho Jelusalẹm tọn mẹ. Devizọnwatọ nugbonọ Jehovah tọn lẹ tin to owù mẹ na osla na yin dido lẹdo yé, ehe na zọ́n bọ yé na kú vudevude. (2 Ahọ. 18:27) Jehovah yinuwa bo do angẹli dopo gee hlan; mẹhe hù awhànfuntọ kẹntọ 185 000 to zánto dopo mẹ! (2 Ahọ. 19:34, 35) Yí nukun homẹ tọn do pọ́n osla Asilianu lẹ tọn mẹ to wunkẹngbe. Owhán, awọ̀yinu lẹ po ohí lẹ po to kọ̀mẹ bọ mẹde ma doalọ yé go. Opẹ̀n ma dọnú nado fọ́n sunnu lọ lẹ. Gbedide depope ma tlẹ yin nina awhànpa lọ. Abọẹninọ ayidego tọn de wẹ tin to osla lọ mẹ bọ oṣiọ lẹ gbọn kámẹ-gòmẹ.

11. Homẹmiọnnamẹ po tulinamẹ tẹ po wẹ mí mọyi sọn apajlẹ Owe-wiwe tọn lẹ mẹ gando lehe Jehovah nọ yinuwa do eyin omẹ etọn lẹ tin to owù mẹ go?

 ¹¹ Nuplọnmẹ: Apajlẹ lehe Jehovah nọ yinuwa do eyin omẹ etọn lẹ tin to owù mẹ tọn enẹlẹ yin avase sinsinyẹn de na kẹntọ mítọn lẹ dọ: “Nudobu de wẹ e yin nado jai jẹ alọ Jiwheyẹwhe ogbẹ̀nọ lọ tọn lẹ mẹ” to whenue homẹgble etọn yin finfọndote. (Heb. 10:31) Amọ́ na míwlẹ, apajlẹ enẹlẹ nọ miọnhomẹna mí bosọ nọ na mí tuli taun. Mí nọ mọ homẹmimiọn yí to yinyọnẹn mẹ dọ kẹntọ tangan mítọn Satani ma gán jẹ yanwle etọn kọ̀n. To madẹnmẹ, “whenu gli” gandudu etọn tọn na wá vivọnu! (Osọ. 12:12) Kakajẹ whenẹnu, mí sọgan to Jehovah sẹ̀n po adọgbigbo po, bo deji dọ mẹdepope, titobasinanu kavi tohọluduta de ma gán glọnalina mí nado wà ojlo Jiwheyẹwhe tọn. (Hia Salmu lẹ 118:6-9.) To gbọdo glọ, apọsteli Paulu do nujikudo mítọn hia po hogbe ehelẹ po dọmọ: “Eyin Jiwheyẹwhe tin hẹ mí, mẹnu wẹ na jẹagọdo mí?”—Lom. 8:31.

12. To nukunbibia daho lọ whenu, etẹwẹ na zọ́n bọ homẹgble Jehovah tọn na jizò?

¹² To nukunbibia daho he ja lọ whenu, Jehovah na yinuwa nado basi hihọ́na mí, kẹdẹdile e wà do na Islaelivi he Egiptinu lẹ dómọna po Juvi he Asilianu lẹ whèsla lẹdo to Jelusalẹm lẹ  po. To whenue kẹntọ mítọn lẹ na tẹnpọn nado và mí sudo, owanyi sisosiso he Jehovah tindo na mí na zọ́n bọ adi etọn na jizò. Yé mẹhe na gbọn nulú dali yangbé mítọn lẹ na to alọdo nukunzìn Jehovah tọn go to linlẹn de mẹ. Ewọ nasọ yinuwa to afọdopolọji po nujikudo po. (Zek. 2:8, 9) Sọha mẹhe na yin hùhù lọ lẹ tọn na sù taun. Amọ́, e ma dona paṣa kẹntọ Jiwheyẹwhe tọn lẹ dọ Jehovah túntún homẹgble etọn jẹgbonu do yé ji. Etẹwutu?

13. Avase tẹlẹ wẹ Jehovah ko na?

¹³ Jehovah “nọ whleawu nado gblehomẹ” bo ko na avase pludopludo dọ emi na và mẹhe diọnukunsọ emi bo ze ogbẹ̀ omẹ emitọn lẹ tọn do owù mẹ lẹ sudo. (Eks. 34:6, 7) Jehovah yí yẹwhegán delẹ zan taidi Jelemia, Ezekiẹli, Daniẹli, Jesu Klisti gọna apọsteli Pita, Paulu po Johanu po nado na avase gando awhàn daho hugan he ja de go.—Pọ́n apotin lọ “Jehovah Na Avase Gando Awhàn Daho He Ja lọ Go.”

14, 15. Azọ́n tẹwẹ Jehovah ko wà, podọ etẹwutu?

¹⁴ Jehovah hẹn ẹn yọnbasi bọ avase ehelẹ yin kinkando Ohó etọn mẹ. E sọ hẹn ẹn diun dọ Biblu yin lilẹdogbedevomẹ bosọ  yin mimá pé hugan owe devo depope to whenuho mẹ. Lẹdo aihọn pé, e ko fọnjlodotena awhànpa mẹdezejotọ lẹ tọn de nado gọalọna mẹdevo lẹ bo plọn yé lehe yé na tindo haṣinṣan dagbe hẹ Jiwheyẹwhe do bosọ na avase gando “azán daho Jehovah tọn” he ja lọ go. (Zef. 1:14; Salm. 2:10-12; 110:3) E ko whàn omẹ etọn lẹ nado basi lẹdogbedevomẹ owe sinai do Biblu ji lẹ tọn do ogbè kanweko susu mẹ bosọ nọ yí gànhiho livi kanweko susu zan to whemẹwhemẹ nado dọhodo opagbe po avase he yin mimọ to Ohó etọn mẹ lẹ po ji.

¹⁵ Jehovah ko hẹn ẹn diun dọ azọ́n ehe lẹpo yin wiwà “na e ma jlo dọ mẹdepope ni yin vivasudo ṣigba jlo dọ mẹlẹpo ni wá lẹnvọjọ kọ̀n.” (2 Pita 3:9) Lẹblanulọkẹyi nankọ die mí tindo nado ze afọ Jiwheyẹwhe owanyinọ podọ homẹfatọ mítọn tọn dai bo yí adà kleun de wà to owẹ̀n etọn lilá mẹ! Ṣigba, to madẹnmẹ, whenu na fẹ́ do mẹhe ma na ayidonugo avase lọ lẹ.

16, 17. Be Jehovah ko de azán de na awhàn godo tọn lọ wẹ ya? Basi zẹẹmẹ.

¹⁶ Jehovah ko de azán de na awhàn godo tọn lọ. E ko yọ́n whenue mẹgbeyinyan lọ na bẹjẹeji sọta omẹ etọn lẹ. (Mat. 24:36)  Nawẹ Jehovah wagbọn do yọ́n whenue kẹntọ etọn lẹ na bẹ mẹgbeyinyan lọ jẹeji?

¹⁷ Dile mí mọ to weta he wayi mẹ do, Jehovah dọna Gọgi dọmọ: “Yẹn na . . . yí omlẹn lẹ do aglàn towe mẹ.” E na deanana akọta lẹ biọ nudindọn sinsinyẹn de mẹ. (Ezek. 38:4) Ehe ma zẹẹmẹdo dọ Jehovah wẹ na tọ́navùn nukundiọsọmẹtọ etọn lẹ jẹnukọn, mọ e masọ zẹẹmẹdo dọ ewọ wẹ na basi nudide do otẹn yetọn mẹ. Kakatimọ, e dohia dọ Jehovah gán mọnú jẹ ahun mẹ bo yọ́n lehe kẹntọ etọn lẹ na yinuwa do to ninọmẹ tangan de mẹ.—Salm. 94:11; Isa. 46:9, 10; Jel. 17:10.

18. Naegbọn gbẹtọvi lẹ na wá hoavùn hẹ Ganhunupotọ lọ?

¹⁸ Eyin Jehovah ma na bẹ avùn lọ jẹeji kavi sisẹ́ nukundiọsọmẹtọ etọn lẹ nado hoavùn, naegbọn gbẹtọvi tata lẹ nado ze yede do ninọmẹ de mẹ he na zọ́n bọ yé na hoavùn sọta Ganhunupotọ lọ? Whẹwhinwhẹ́n dopo wẹ yindọ to ojlẹ enẹ mẹ, yé sọgan ko hẹn yede kudeji dọ vlavo Jiwheyẹwhe ma tin kavi dọ ewọ ma na dádo whẹho gbẹtọvi lẹ tọn mẹ. Yé sọgan lẹnmọ, vlavo na yé ṣẹṣẹ sukúndona titobasinanu sinsẹ̀n lalo tọn lẹ sọn aigba ji wutu. Po enẹ po, yé sọgan lẹndọ eyin Jiwheyẹwhe tin dai wẹ, e họnwun  dọ ewọ na ko yiavùnlọna titobasinanu he sọalọakọ́n dọ yé yin afọzedaitọ etọn lẹ. Yé ma na doayi e go dọ Jiwheyẹwhe wẹ ze linlẹn lọ do ahun yetọn mẹ nado de sinsẹ̀n he nọ ze afọ etọn dai to aliho agọ̀ mẹ lẹ sẹ̀.—Osọ. 17:16, 17.

19. Etẹwẹ sọgan jọ to vasudo sinsẹ̀n lalo tọn godo?

¹⁹ Ojlẹ vude to vasudo sinsẹ̀n lalo tọn godo, Jehovah sọgan biọ to omẹ etọn lẹ si nado lá owẹ̀n sinsinyẹn de, yèdọ owẹ̀n de he owe Osọhia tọn yijlẹdo kẹ́njikun go he kẹ́nsu etọn dopo pẹnzin sọ nudi kilo 20. (Osọ. 16:21, odò.) Owẹ̀n ehe, he sọgan yin nulila de dọ vivọnu tito tonudidọ po ajọwiwa po tọn ko sẹpọ, na dotukla mẹhe sè lẹ sọmọ bọ yé na zánnu do Jiwheyẹwhe go. E yọnbasi dọ owẹ̀n ehe wẹ na sisẹ́ akọta lẹ nado bẹ mẹgbeyinyan egblemaku tọn de jẹeji sọta omẹ Jiwheyẹwhe tọn lẹ, nado bọnùdo na mí kakadoi. Yé na lẹndọ mẹde ma gán yiavùnlọna mí bọ e na bọawu nado và mí sudo. Lehe enẹ na yin nuṣiwa de do sọ!

20, 21. Mẹnu wẹ Gọgi yin, podọ etẹwẹ na jọ do e go?

²⁰ Dile mí mọ do to Weta 17tọ owe ehe tọn mẹ, Ezekiẹli yí tẹnmẹ-yinkọ dọdai tọn lọ, “Gọgi aigba Magọgi tọn” zan nado dlẹnalọdo pipli akọta he na yangbé mítọn lẹ tọn. (Ezek. 38:2) Ṣigba, gbekọndopọ kaka de ma na tin to hagbẹ pipli lọ tọn lẹ ṣẹnṣẹn. Dile etlẹ taidi dọ yé kọngbedopọ, gbigbọ agbàwhinwhlẹn tọn, goyiyi po akọta mẹtọn zizedaga po na gbẹ́ tin to ṣẹnṣẹn yetọn. E na bọawu taun na Jehovah nado lilẹ́ ohí dopodopo yetọn tọn “pànta nọvisunnu etọn titi.” (Ezek. 38:21) Amọ́, vasudo akọta lọ lẹ tọn ma na yin nugbajẹmẹji de sọn gbẹtọvi lẹ dè.

²¹ Jẹnukọnna vasudo yetọn, kẹntọ mítọn lẹ na mọ ohia Visunnu gbẹtọ tọn, vlavo dohia ayidego tọn huhlọn madodogbó Jehovah po Jesu po tọn. Nukundiọsọmẹtọ lọ lẹ na mọ nudelẹ he na hẹn ayimajai sinsinyẹn wá na yé. Dile Jesu ko dọ dọdai etọn do, “gbẹtọ lẹ nasọ nọ dakú na obu podọ na nukundido nuhe ja aigba ji lẹ tọn wutu.” (Luku 21:25-27) Yé na wá mọdọ onú wẹ emi ṣiwà nado tọ́nawhàn omẹ Jehovah tọn lẹ. Yé na yin hinhẹn gánnugánnu nado yọnẹn dọ awhàngán daho de wẹ Mẹdatọ lọ yin, yèdọ Jehovah awhànpa lẹ tọn. (Salm. 46:6-11; Ezek. 38:23) Matin ayihaawe, Jehovah na yí awhànpa olọn mẹ tọn po huhlọn jọwamọ tọn lẹ po zan to aliho de mẹ nado basi hihọ́na devizọnwatọ nugbonọ etọn lẹ, ṣigba bo sukúndona kẹntọ etọn lẹ.—Hia 2 Pita 2:9.

22, 23. Mẹnu lẹ wẹ na basi hihọ́na omẹ Jiwheyẹwhe tọn lẹ, podọ numọtolanmẹ tẹwẹ e yọnbasi taun dọ yé na tindo gando azọ́n yetọn go?

²² Lẹnnupọndo lehe Jesu na yí jejejininọ do yinuwa sọta kẹntọ Jiwheyẹwhe tọn lẹ bo basi hihọ́na mẹhe yiwanna Otọ́ etọn bo nọ sẹ̀n ẹn lẹ do ji. Sọ lẹnnupọndo numọtolanmẹ he mẹyiamisisadode lẹ na tindo to whenẹnu ji. To ojlẹ de mẹ jẹnukọnna Amagẹdọni, pipotọ yetọn he to aigba ji lẹ na yin zize yì olọn  mẹ, na yé omẹ 144 000 lọ lẹpo nido hodo Jesu yì awhàn. (Osọ. 17:12-14) Ayihaawe ma tin dọ susu mẹyiamisisadode lẹ tọn na ko wleawuna haṣinṣan họntọnjiji tọn de hẹ hagbẹ lẹngbọ devo lẹ tọn, dile yé to azọ́nwadopọ to azán godo tọn lẹ mẹ. Todin, mẹyiamisisadode lẹ na tindo aṣẹpipa po huhlọn lọ po nado yiavùnlọna mẹhe yí nugbonọ-yinyin do nọgodona yé to whlepọn yetọn whenu lẹ.—Mat. 25:31-40.

²³ Angẹli lẹ lọsu na tin to awhànpa olọn mẹ tọn Jesu tọn mẹ. (2 Tẹs. 1:7; Osọ. 19:14) Yé ko gọalọna ẹn nado yàn Satani po aovi etọn lẹ po sọn olọn mẹ. (Osọ. 12:7-9) Yé ko sọ gọalọ nado bẹ mẹhe jlo na sẹ̀n Jehovah to aigba ji lẹ pli. (Osọ. 14:6, 7) Lehe e sọgbe dọ Jehovah ni na dotẹnmẹ angẹli lẹ nado basi hihọ́na nugbonọ enẹlẹ do sọ! Hú popolẹpo, gbégbò daho de wẹ e yin na mẹhe to awhànpa Jehovah tọn mẹ lẹpo nado klan oyín etọn do wiwe bo suwhẹna ẹn gbọn alọgigọ nado và kẹntọ etọn lẹ sudo dali.—Mat. 6:9, 10.

24. Nawẹ gbẹtọ susugege he yin lẹngbọ devo lẹ na yinuwa gbọn?

²⁴ Po hihọ́-basinamẹ awhànpa huhlọnnọ enẹ tọn po, gbẹtọ susugege he yin lẹngbọ devo lẹ ma na tindo whẹwhinwhẹ́n depope nado dibu. Na nugbo tọn, yé na “ṣite bo ze ota [yetọn] daga, na whlẹngán [yetọn] to sisẹpọ” wutu. (Luku 21:28) Lehe e yin nujọnu do sọ dọ whẹpo azán Jehovah tọn nido wá, mí ni gọalọna mẹsusu dile e yọnbasi do nado wá yọ́n Otọ́ lẹblanunọ podọ hihọ́-basinamẹtọ mítọn!—Hia Zefania 2:2, 3.

25. Etẹwẹ mí na gbadopọnna bọdego?

²⁵ Kọdetọn he awhàn gbẹtọvi tọn nọ hẹnwa wẹ bẹwlu po flumẹjijẹ po. To vogbingbọn mẹ, awhàn Amagẹdọni tọn na dekọtọn do jijọho po ayajẹ po mẹ. Nawẹ nulẹ na te do to whenue homẹgble Jehovah na wá vivọnu bọ awhànfuntọ etọn lẹ na gọ̀ ohí do apà mẹ, bọ nujijọ awhàn lọ tọn lẹ na ko yin winwọn godo? To weta he bọdego mẹ, mí na dọhodo sọgodo jiawu enẹ ji.