“N’ko to Nukundo Oylọ Alọkan Ji Tọn Mìtọn”
Ed po asi etọn Jennie po tẹ́n kunnudide alokan ji tọn pọ́n whla tintan to 2010. a Jennie dọmọ: “N’ma yiwanna paali. N’dọna asu ṣie dọ, ‘N’ma nasọ do mahẹ to e mẹ gbede ba!’” Numọtolanmẹ dopolọ wẹ Ed lọsu tindo. E basi zẹẹmẹ dọ “N’ma nọ yiwanna hodọdopọ hẹ mẹhe nọ basi ajọjijla gbọn alokan ji lẹ, enẹwutu n’ma gán lẹn pọ́n dọ n’na wá dekunnu gbọn alokan ji.”
Azọ̀n Covid-19 tọn wá gbajẹgbonu bọ Kunnudetọ Jehovah tọn lẹ masọ nọ dọyẹwheho sọn họndekọn jẹ họndekọn ba. Amọ́, nado setonuna gbedide Jesu tọn nado lá wẹndagbe lọ, yé zindonukọn nado nọ do mahẹ to lizọnyizọn lọ mẹ, titengbe gbọn kunnudide wekanhlanmẹ po alokan ji tọn po gblamẹ. (Matiu 24:14; 28:19, 20) To ojlẹ dopolọ mẹ, opli Klistiani tọn lẹ po opli sinsẹ̀nzọn kunnudegbe tọn lẹ po nọ yin bibasi gbọn hodọdopọ video ji tọn gblamẹ. To dopo to opli enẹlẹ ji, Ed wleawuna adọgbigbo nado tẹ́n kunnudide alokan ji tọn pọ́n whladopo dogọ. Etẹwẹ yin numọtolanmẹ etọn whenue e jlo na ylọmẹ whla tintan to alokan ji? E dọmọ: “Obu di mi sọmọ bọ n’hodẹ̀ nado biọ alọgọ! Enẹgodo n’basi oylọ alokan ji tọn lọ. Lehe n’yọ́n Tyrone gbọn niyẹn.” b
Tyrone po asi etọn Edith po nọ nọ̀ gbétatò Kentucky tọn mẹ to États-Unis. Whenue Tyrone do owhe 83, nukun etọn masọ nọ mọnú ganji ba. Etomoṣo, e kẹalọyi nuzedonukọnnamẹ Ed tọn nado plọn Biblu hẹ ẹ. E hia owe oplọn tọn lọ po gànnukun wehihia tọn de po podọ Ed sọ jẹ Biblu plọn hẹ ẹ ji to gbesisọ mẹ gbọn alokan ji.
To nudi osun dopo godo, Tyrone po Edith po jẹ opli lẹ yì ji to agun he to lẹdo lọ mẹ de mẹ. Amọ́, na yé ma do Intẹnẹt wutu, yé nọ hodo opli lẹ gbọn alokan ji. Etẹwẹ yidogọna ojlo Edith tọn?
To oplọn Tyrone tọn lẹ whenu, Ed po Jennie po nọ to ogbè Edith tọn sè to nuglọ, dile e to alọgọna Tyrone nado na gblọndo lẹ podọ nado dín wefọ lẹ to Biblu yetọn mẹ. Amọ́, Edith ma nọ do ojlo hia nado plọn Biblu. Jennie dọmọ: “Kọnugbè etọn nọ dohia dọ e to awubla sinsinyẹn mẹ, amọ́ yẹn po Ed po ma gán dọ nuhe zọ́n taun.”
Ed po Jennie po to kunnude gbọn alokan ji
To gbèdopo, Jennie mọdọ emi dona kanhose Edith. Enẹwutu to ojlẹ he sọgbe de mẹ, E biọ to Ed si nado ze alokan lọ jo na emi. E dọmọ: “Tyrone n’to ogbè asi towe tọn sè to nuglọ finẹ, amọ́ n’jlo na biọ to e si nado hia wefọ de kavi na gblọndo de.”
Edith nọte na ojlẹ kleun de, enẹgodo ewọ lọsu dọho to alokan ji. E dọ po ogbè fifa de po dọmọ: “N’ko to jijlo nado dọho hẹ we, Kunnudetọ Jehovah tọn de wẹ n’yin. Amọ́ e ko yì owhe 40 din he n’gbọjọ.”
E paṣa Jennie taun. E dọmọ: “Mẹmẹyọnnu ṣie wẹ a yin,” bọ yé omẹ awe lẹ sọ jẹ avivi ji.
To ojlẹ kleun de godo, Ed ze alọnuwe lọ Lẹkọwa Jehovah Dè jo na Edith. To osẹ he bọdego lẹ mẹ, Ed po Jennie po doayi diọdo dagbe de go gando Edith go. Ed dọmọ: “To bẹjẹeji, kọnugbè etọn nọ dohia dọ e to awubla sinsinyẹn mẹ. Amọ́ todin kọnugbè etọn gọna ayajẹ.” Edith yinukọn to gbigbọ-liho taun, podọ whladopo dogọ e to sinsẹ̀n di wẹnlatọ ayajẹnọ de he to wẹndagbe lọ lá. Asu etọn yí baptẹm taidi dopo to Kunudetọ Jehovah tọn lẹ mẹ to juillet 2022.
Eyin Ed flin lehe Kunnudide to alokan ji nọ ṣí na ẹn to tintan whenu, e sọ nọ flin hodọdopọ etọn de hẹ Tyrone. Whenue Ed hia Johanu 6:44 na ẹn bosọ basi zẹẹmẹ dọ Jehovah wẹ nọ dọ̀n gbẹtọ lẹ wá nugbo lọ mẹ godo, Tyrone kọngbedopẹ hẹ ẹ bosọ yidogọ dọ: “N’ko to nukundo oylọ alọkan ji tọn mìtọn.” Homẹ Jennie tọn lọsu hùn dọ ewọ po asu etọn po wleawuna adọgbigbo nado tindo mahẹ to kunnudide alokan ji tọn mẹ. E dọmọ: “Jehovah nọ dona vivẹnudido mọnkọ lẹ.”