Onọ̀ godoponọ de he nọ yin Desicar jlo na hẹn lizọnyizọn etọn gblodeji bo lẹzun gbehosọnalitọ whepoponu tọn. To otò he mẹ e nọ nọ̀, enẹ wẹ to Vénézuéla, nuhahun akuẹzinzan tọn lẹ sinyẹn taun. Mahopọnna enẹ, e magbe nado bẹ gbehosọnalitọ whepoponu tọn jẹeji, bo ka sọ wàmọ. E vivi na ẹn dọ e wàmọ, amọ́ e ma dẹn bọ azọ̀n bẹplamẹ COVID-19 tọn gbajẹgbonu.

 To bẹjẹeji azọ̀n bẹplamẹ COVID-19 tọn, e vẹawuna Desicar nado diọalọ to lizọnyizọn etọn mẹ sọgbe hẹ ninọmẹ yọyọ lọ. E ma nọ bọawuna ẹn nado kàn wekanhlanmẹ lẹ. Podọ e ma gán nọ dekunnu gbọn kanji na Intẹnẹt vẹkuẹ taun to lẹdo etọn mẹ wutu. E dọmọ: “Ninọmẹ lọ hẹn awàkan mẹ kú mi. To ajiji mẹ, nue n’sọgan wà to lizọnyizọn lọ mẹ depò. N’lẹndọ taidi gbehosọnalitọ de, n’ma to kọdetọn dagbe tindo ba.”

 Enẹgodo, to janvier 2021, wekantẹn alahọ Kunnudetọ Jehovah tọn lẹ tọn to Vénézuéla nagbè dọ nujijla kunnudide tọn vonọtaun de ni yin bibasi. Tito yin bibasi na azọ́nwhe ladio tọn 60 gọna azọ́nwhe televiziọn tọn 7 nido nọ hò hodidọ sinai do Biblu ji he yin dide delẹ to sẹfifo atọ́n osun enẹ tọn lẹpo mẹ. Kunnudetọ lẹ yin tulina nado basi oylọna jlodotọ lẹ nado dotó kavi pọ́n hodidọ lọ lẹ. Alahọ sọ wleawu kanbiọ po wefọ delẹ po tọn gando hodidọ dopodopo go, na mẹmẹsunnu po mẹmẹyọnnu lẹ po nido sọgan nọ yí yé zan to wekanhlanmẹ po hodọdopọ alokan ji tọn yetọn lẹ po mẹ. Humọ, alahọ na tuli mẹmẹsunnu lẹ nado nọ yí wekanhlanmẹ alokan ji tọn zan to lizọnyizọn lọ mẹ, yèdọ aliho kunnudide tọn yọyọ de na Kunnudetọ susu to Vénézuéla.

 Desicar to jejeji nado do mahẹ to nujijla lọ mẹ. Dile etlẹ yindọ e ma ko dekunnu gbọn wekanhlanmẹ alokan ji tọn gblamẹ pọ́n, e de nado tẹ́n ẹn pọ́n. Etomọṣo, e gbẹ́ do hudo alọgọ tọn. Desicar yigbe dọ “N’ma yọ́n nuyizan lẹtliki tọn lẹ zan sọmọ.” Enẹwutu, e biọ to viyọnnu etọn si nado gọalọna ẹn, bọ to whenue viyọnnu lọ ko gọalọna ẹn na ojlẹ kleun de godo, Desicar wá penugo nado do mahẹ to nujijla lọ mẹ.

 Gbọn azọ́nwanu wekanhlanmẹ tọn he to alokan etọn ji yiyizan dali, Desicar basi oylọna mẹyinyọnẹn etọn susu nado dotoaina hodidọ he yin yíyí do kanji lọ lẹ. Kọdetọn lọ lẹ jiawu na ẹn taun. Susu mẹhe e kanwehlan lẹ tọn wẹ dotoaina hodidọ lọ lẹ bosọ kàn kanbiọ lẹ sè. Mẹdevo lẹ ma penugo nado dotoaina hodidọ lọ lẹ, amọ́ yé kanse Desicar nuhe ji yè dọhodo to hodidọ lọ lẹ mẹ. Desicar dọmọ: “N’basi bladopọ kandai ṣie titi lẹ tọn bo do e hlan yé. N’ma ko penugo bo basi hugan gọyìpọn 5 to osun de mẹ pọ́n, amọ́ to vivọnu nujijla lọ tọn, n’basi gọyìpọn 112!” a

 Desicar sọ dọna mẹdaho etọn yọnnu he yin mayisenọ de bo nọ nọ̀ owhé etọn pá nado dotoaina hodidọ lọ lẹ to ladio ji. Desicar dọmọ: “E paṣa mi dọ mẹdaho ṣie yigbe. To Sẹgbe ogàn 8 mẹ afọnnu lẹpo, n’nọ yì ohọ̀ etọn mẹ bọ mí nọ dotoaina dopọ. Kanbiọ susu wẹ e nọ kanse to hodidọ lọ lẹ whenu podọ to godo yetọn.” Mẹdaho Desicar tọn sọ hodo hùnwhẹ Oflin okú Jesu tọn he yin bibasi gbọn kanji lọ, podọ e sọ yigbe dọ Desicar ni yí Intẹnẹt emitọn zan to lizọnyizọn lọ mẹ.

 Desicar dọmọ: “N’dopẹ́ na Jehovah taun. N’sọ dopẹ́ dọ mẹho agun he mẹ n’te tọn lẹ na mi tuli. Yé gọalọna mi nado gọ̀ ayajẹ ṣie mọyi to lizọnyizọn lọ mẹ.” (Jelemia 15:16) Desicar zindonukọn to gbehosọnalitọ bibasi mẹ bosọ to afọdona ojlo mẹhe e dekunnuna gbọn wekanhlanmẹ alokan ji tọn gblamẹ lẹ tọn.