To whenue Zarina yí baptẹm bo lẹzun dopo to Kunnudetọ Jehovah tọn lẹ mẹ, e lẹkọ sọn Russie yì otò etọn mẹ to Asie centrale po gbemima lọ po nado plọn nuyise etọn viyọnnu etọn awe lẹ. Na ninọmẹ akuẹzinzan tọn etọn wutu, e nọ nọ̀ owhé dopolọ gbè hẹ mẹjitọ etọn lẹ gọna nọvisunnu etọn po asi etọn po. Mẹjitọ etọn lẹ gbẹna ẹn dọ e ma dona plọn nugbo Biblu tọn ovi etọn lẹ. Yé sọ dọna viyọnnu etọn lẹ dọ yé ma dona dọhodo Biblu ji hẹ onọ̀ yetọn.

 Zarina lẹnnupọn sisosiso do lehe e na gọalọna viyọnnu etọn lẹ nado plọnnu gando Jehovah go do ji. (Howhinwhẹn lẹ 1:8) Enẹwutu, e hodẹ̀ vẹkuvẹku hlan ẹn bo biọ anademẹ po nuyọnẹn po. Enẹgodo, Zarina yinuwa sọgbe hẹ odẹ̀ etọn bo kàn ayiha nado nọ disa hẹ viyọnnu etọn lẹ bosọ nọ to hodọ hẹ yé gando lehe nudida lẹ jiawu do go dile yé to zọnlinzin. Sadidi kleunkleun ehelẹ zọ́n bọ ovi lọ lẹ tindo ojlo to Mẹdatọ lọ mẹ.

 Enẹgodo, Zarina kàn ayiha devo nado hẹn ojlo yetọn zindonukọn gbọn owe Etẹwẹ Biblu Plọn Mí Taun? yiyizan dali. a E nọ vọ́ hukan lẹ po kanbiọ lẹ po kàn sọn owe lọ mẹ do wema pẹvi de mẹ. E sọ nọ kàn hodidọ kleun delẹ dogọ nado gọalọna viyọnnu etọn lẹ nado mọnukunnujẹ nudọnamẹ lọ lẹ mẹ ganji. Enẹgodo, e nọ ze wema lọ po wekantin de po whlá do maṣinu avọ̀yinyan tọn glọ to awulẹpa mẹ. Eyin viyọnnu lọ lẹ wá avọ̀yantẹn lọ, yé nọ hia hukan lọ lẹ bo nọ kàn gblọndo yetọn dai.

 Gbọn tito ehe yiyizan dali, Zarina penugo nado plọn weta awe sọn owe lọ Biblu Plọn Mí mẹ hẹ viyọnnu etọn lẹ whẹpo yé do wá mọ fidevo he yé na nọ. To whenue yé jẹ fidevo, e vò nado plọn ovi etọn lẹ matin aliglọnnamẹ. To octobre 2016, viyọnnu awe lọ lẹ yí baptẹm, bo to ayajẹ dọ onọ̀ yetọn ko yí nuyọnẹn po wuntuntun po zan nado na yé núdùdù to gbigbọ-liho.